Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Hơdôm tơlơi soh aka pơhaih ôh, hơdôm tơlơi soh ƀu kơhmal ôh laih anŭn aka lui hĭ ôh, abih bang tơlơi anŭn kar hăng tơlơi ruă tưp hyu, ngă pơhrŏ tơlơi kơtang gah bơngăt ƀing ta. Ơi Adai jing Pô Rơgoh Hiam, nanao ƀu tŭ ư tơlơi soh ôh. Khua Yang ƀu brơi ƀing ta pơdŏp tơlơi soh ôh, samơ̆ khŏm tañ mơtam pơhaih tơlơi soh kiăng kơ Ñu rao rơgoh.

Hrơi anai, lơ 04/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Cathy Irvin tui hăng akŏ tơlơi hrăm ANĂM PƠDŎP TƠLƠI SOH ÔH

Pran jua mơnuih mơnam jing pleč ƀlor hloh kơ abih bang mơnơ̆ng, Laih anŭn jing sat ƀai biă mă. Hlơi pô dưi thâo tơlơi anŭn? Kâo, Yêhôwa, Pô kơsem lăng tơlơi pơmĭn, Pơlông lăng pran jua arăng, Ba glaĭ kơ rĭm čô tui hluai hăng jơlan gơñu rơbat, Laih anŭn tui hăng boh than mơ̆ng bruă gơñu ngă (Yêrêmi 17:9-10)

Ƀu hơmâo hlơi pla kơyâo hơmâo ia akăm amăng đang gơñu, samơ̆ kâo ƀu hluh ôh yua hơgĕt ñu hơmâo čăt ƀơi đang sang kâo. Ñu čăt rai hiưm pă? Kâo ƀu thâo hluh ôh. Sĭt kâo ƀu hơmâo pla gơñu ôh.
Phrâo anai, tơdang hlăk rơmet glaĭ đang kơyâo kâo, kâo tek djơ̆ khul kơyâo hơmâo ia akăm anŭn. Kâo buč hĭ abih gơñu, samơ̆ ƀu lăng ten ñien ôh. Giơ̆ng kơ anŭn, kâo čơdơ̆ng tal. Kâo pơmĭn ƀu hơmâo tơlơi hơgĕt lơi yom. Kâo mơnơi laih anŭn mă bruă tŏ tui.

Hrơi tơdơi, kâo ƀuh sa nam rơka ƀơi tơngia iao kâo. Kâo pơmĭn arŏng hơgĕt hơmâo duĭ kâo. Kâo wơr lui hĭ tơlơi anŭn. Samơ̆ jai hrơi jai kơtang tui. Kâo dŏ tơguan amăng sa hrơi kŏm, giơ̆ng anŭn kâo nao pơ sang sĭ ia jrao. Nai ia jrao laĭ hăng kâo, kơyâo hơmâo ia akăm klâŏ kâo, laih anŭn brơi kâo ia jrao kiăng kơ pik.

Đơđa, ƀing ta ruah jơlan dŏp lui hĭ hơdôm bruă amăng tơlơi hơdip ƀing ta, ƀu kiăng pơjrao hĭ gơñu ôh. Jrao kâo blơi pơ sang sĭ jrao kơnơ̆ng pơhrŏ tơlơi tal đôč, samơ̆ ƀu kơ̆ng hĭ ôh tơlơi ruă anŭn tưp hyu. Tơngia iao kâo čơdơ̆ng mriah, nam rơka jai kơtang tui. Giơ̆ng kơ dua hrơi kŏm, kâo čơdơ̆ng nao pơ nai ia jrao. Ñu čih brơi kâo jrao kiăng pơhlao hĭ ia rơkăm anŭn. Kâo hơmâo hrăm tŭ tơlơi hrăm: Anăm nanao dŏp lui ôh!

Tơdang rơbuh amăng tơlơi soh, ƀing ta juăt pơdŏp hĭ ñu, sut lui laih anŭn pơdŏp hĭ gơñu, lăng kar hăng ƀu hơmâo tơlơi hơgĕt ôh. Tơdah tơlơi soh ƀu thâo buč hĭ phŭn kha ñu ôh, ñu či jai kơtang tui, pran jua ƀing ta amŭñ biă mă jing khăng hĭ. Tơdang thâo krăn ƀing ta hơmâo rơbuh amăng tơlơi soh, ƀing ta či mưn tơlơi ƀuah pơkra mơng Yang Bơngăt Hiam (kar hăng tơlơi tal). Anŭn jing mơnit mông ƀing ta bưp tơlơi truh. Ƀing ta khŏm lăng kơsem glaĭ tơlơi hơdip gah bơngăt ƀing ta. Pran jua ƀing ta hơmâo tơlơi rơgoh mơ̆n? Bơngăt ƀing ta ƀôdah tơlơi pơmĭn ƀing ta hlăk hơmâo ia akăm hă?

Boh Pơhiăp Khua Yang pơhơdơr brơi kơ ƀing ta:
“Pran jua mơnuih mơnam jing pleč ƀlor hloh kơ abih bang mơnơ̆ng, Laih anŭn jing sat ƀai biă mă. Hlơi pô dưi thâo tơlơi anŭn? Kâo, Yêhôwa, Pô kơsem lăng tơlơi pơmĭn, Pơlông lăng pran jua arăng, Ba glaĭ kơ rĭm čô tui hluai hăng jơlan gơñu rơbat, Laih anŭn tui hăng boh than mơ̆ng bruă gơñu ngă” (Yêrêmi 17:9-10)
Kâo kơnang ană đah rơkơi kâo čŏng hĭ kơyâo anŭn, buč hĭ ñu. Kar hăng kơyâo hơmâo ia akăm anŭn mơ̆n, ƀing ta khŏm pơgiơ̆ng hĭ tơlơi soh ƀing ta hăng tơlơi buč hĭ truh phŭn akha gơñu, kiăng kơ mă lui abih tơlơi sat ñu ƀơi tơlơi hơdip ƀing ta.

Anăm pơdop laih anŭn kơsem hơdră jơlan pơdŏp hĭ tơlơi soh ôh, yua kơ Khua Yang či pơrơđah rai ñu, laih anŭn ba ñu rai gah rơngiao tơlơi bơngač. Hăng tơlơi pap Ơi Adai, ƀing ta či thâo krăn glaĭ tơlơi soh ƀing ta, wơt glaĭ pơ Khua Yang, kiăng kơ dưi kơhmal laih anŭn rao rơgoh.

Rơkâo ƀing ta pioh mông iâu laĭ hrŏm hơbĭt
Ơ Ama Pô khăp, rơkâo Ih pha brơi kơ kâo pran jua khĭn kơtang kiăng kơ dưi pơkơdơ̆ng glaĭ hăng tơlơi soh kâo pô. Rơkâo Yang Bơngăt Hiam ƀuah pơkra kâo kiăng kơ kâo kâo dưi thâo krăn laih anŭn pơhaih tơlơi soh kơ kâo pô, kiăng kơ kâo dưi mưn găn tơlơi Khua Yang pap brơi tơlơi soh. Rơkâo Khua Yang pơčrang rơđah tơlơi pơmĭn kâo kiăng kơ kâo dưi hơmâo tơlơi kơtang rơbat tui tơlơi Khua Yang kiăng, laih anŭn hơdip ră ruai tơlơi sĭt Khua Yang. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, hrơi anai Khua Yang hơmâo pơhơdơr brơi kơ Ih tơlơi soh hơgĕt hlăk dŏ amăng tơlơi pơmĭn ih? Tañ pơhaih hăng Khua Yang bĕ, rơkâo Khua Yang rao rơgoh abih bang tơlơi soh anŭn. Tui anŭn, ƀing ta dưi khĭn rơbat amăng tơlơi bơngač, tơlơi sĭt, tơlơi rơgoh Khua Yang sa wơt dơ̆ng.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.