Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Tơlơi hơtah hơtai ngă kơ ƀing ta rung răng. Ƀing ta či hơtah hơtai tơdang mơnuih pơkŏn ƀu djă tơlơi ñu ƀuăn hăng ƀing ta. Ƀing ta ăt hơtah hơtai mơ̆n tơdah tơlơi hơdip hơmâo truh ƀu djơ̆ tui tơlơi ƀing ta kiăng. Samơ̆, ƀing ta ƀu či mư̆n găn tơlơi hơtah hơtai tơdang ƀing ta thâo kơnang kơ Khua Yang. Yua kơ Ñu jing Pô hơnơ̆ng ten ƀu či wơr hơbit tơlơi Ñu ƀuăn pha brơi tơlơi pơklaih kơ rĭm čô ƀing ta ôh.

Hrơi anai, lơ 05/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Wally Odum tui hăng akŏ tơlơi hrăm KHUA YANG NANAO HƠNƠ̆NG TEN

Tơlơi pơhrưĭ hĭ tơlơi čang rơmang, ngă brơi kơ pran jua ruă rơngot” (‭‭Tơlơi Bơrơtưh‬ ‭13:12‬)

Ih hơmâo găn djơ̆ tơlơi hơtah hơtai yơh ƀôdah akă ôh? Tơdah hơmâo hlơi ƀu ngă tui tơlơi ih kiăng, ƀôdah tơdah hơdôm tơlơi hơmâo truh amăng tơlơi hơdip ƀu djơ̆ tui tơlơi ih pơmĭn? Sa čô yă tha hơmâo iâu police rai pơ sang ñu yua kơ hơmâo sa drơi ja dŏ amăng sang gơñu. Police pơtô brơi kơ ñu, kiăng gơñu pioh ƀañ tơpŭng mơng sang ñu truh pơ gah rơngiao kiăng kơ plư ja anŭn đuaĭ tui pơ gah rơngiao. Giơ̆ng kơ anŭn, yă anŭn pơhiăp glaĭ hăng laĭ: “Kâo hơmâo ngă tui asăp ih pơtă. Ră anai hơmâo dua drơi ja dŏ amăng sang kâo”.

Sĭt nang ai amăng ƀing ta leng kơ hơmâo găn laih tơlơi sĭt amăng hră Pơrơtưh 13:12: “Tơlơi pơhrưĭ hĭ tơlơi čang rơmang, ngă brơi kơ pran jua ruă rơngot.” Tơlơi hơtah hơtai či ngă pơrŭng răng tơlơi hơdip ƀing ta. Pô pơtô kơ tơlơi dŏ rơkơi bơnai Jimmy Evans hơmâo laĭ, hlâo adih hơmâo klâo mơta tơlơi či ba truh kơ tơlơi lui rơkơi bơnai: prăk kăk, tơlơi jĕ giăm rơkơi bơnai laih anŭn tơlơi dưi (ƀôdah tơlơi dưi wai lăng). Samơ̆ mơta tal sa ba nao kơ tơlơi lui rơkơi bơnai, anŭn jing tơlơi hơtah hơtai. “Tuč rơnuč ih ƀu djơ̆ tui hăng tơlơi kâo pơmĭn ôh.”

Sa mơta tơlơi ngă kơ ƀing ta hơtah hơtai anŭn jing tơlơi ƀuăn ƀu sĭt ôh. Sa čô pô git gai kơ tơpul adoh ƀlơ̆ng bơngơ̆t biă mă kơ tơlơi prap pre Phĕt Hrơi Khua Yang Yêsu Tơkeng Rai amăng Phung Sang Ơi Adai. Yua kơ nanao hơmâo mơnuih rơkŭt amăng tơlơi prap pre tơlơi adoh anŭn. Truh kơ mông prap pre hnal tuč, pô git gai laĭ: “Kâo bơni biă mă kơ pô pĕ brŏ, yua kơ ñu jing pô aka rơkŭt ƀô̆ dung ta ôh amăng abih bang tơlơi pơkra adoh amăng dua blan rơgao”. Tañ mơtam, pô pĕ brŏ tơgŭ, kŭp akŏ laih anŭn laĭ: “Ƀiă biă mă kâo khŏm ngă tơlơi anŭn, yua kơ kâo ƀu dưi nao hrŏm hơbit ƀing ta amăng mông phĕt amăng klăm anai.”

Tơlơi hơtah hơtai ƀu djơ̆ kơnơ̆ng rai mơng pô pơkŏn đôč ôh. Đơđa hơmâo tơlơi truh gah rơngiao tơlơi ƀing ta dưi wai lăng ăt ngă kơ ƀing ta huĭ hyưt laih anŭn hơtah hơtai. Kâo hơmâo găn tơlơi anŭn laih, anŭn jing mông kâo hơtah hơtai hloh amăng tơlơi hơdip.

Ama kâo hơmâo tơlơi ruă brŭ klang ñu. Ñu hơmâo tơlơi ruă anai amăng dua thŭn laih. Amăng thŭn tuč ñu dŏ hơdip, ƀing gơmơi prap pre đĭ rơdeh nao čuă ngui ayŏng amai adơi gơmơi. Kâo kiăng biă mă nao tui hăng ama kâo. Amăng blan pă thŭn hlâo adih, tơlơi ruă ama kâo ăt hoaĭ kơtang lơi. Ƀing gơmơi nao hrŏm hơbit pơ graih rơdeh, prap pre kơ tơlơi hyu ngui amăng blan sa păn. Samơ̆ truh blan sa păn, ama kâo hơmâo djai laih. Kâo ƀu djơ̆ rơngot yua kơ ama kâo rơngiă đôč ôh, samơ̆ ăt rơngŏt dơ̆ng mơ̆n yua kơ kâo hơmâo rơngiă hĭ laih mông geh gal kiăng dŏ jĕ giăm hrŏm hơbit ama kâo. Sĭt yơh tơlơi anŭn ƀu djơ̆ tơlơi ƀu geh kơ ama kâo ôh. Tơlơi truh tơnap tap yơh kơ ama kâo.

Tơlơi hơtah hơtai anŭn jing bruă prŏng, ñu či ngă pơrŭng tơlơi pơmĭn ƀing ta, laih anŭn ngă pơrŭng hơdră jơlan ƀing ta lăng đĭ kơ Khua Yang. Jimmy Harris hơmâo laĭ: “Mơnuih pơđing ƀu djơ̆ kơnơ̆ng mưn găn tơlơi ruă rơngot amăng thŭn so hơđăp ôh, samơ̆ ñu mơ̆n jing pô tañ rơngiă tơlơi đaŏ kơnang kơ tơlơi hơdip pơ anăp”.

Hơmâo lu mơnuih yua kơ tơlơi hơtah hơtai ngă kơ ƀing gơñu hơmâo tơlơi lăng ƀuh ƀu djơ̆ kơ Khua Yang. Ƀing gơñu pơmĭn Khua Yang ăt jing kar hăng mơnuih đôč, Ñu ƀu djă tơlơi Ñu ƀuăn, ƀu dưi wai lăng rĭm khul mơta bruă. Samơ̆ yom pơphăn biă mă, Khua Yang jing Pô hơnơ̆ng ten. Kâo hơmâo tơlơi alum pơđur biă mă kơ tơlơi ơi Pôl hơmao pơhiăp hăng ƀing mơnuih Kôrantô: “Ơi Adai jing Pô hơnơ̆ng ten; Ñu Pô hơmâo iâu laih ƀing gih kơ tơlơi pơgop pơlir hăng Ană Ñu, Yêsu Krist, Khua Yang ƀing ta.” (I Kôrantô 1:9)
Tơdang kâo ƀuh tơlơi tơdu kơ kâo pô, wơt dah anŭn jing tơlơi kơƀah kâo pô, ƀôdah tơlơi kâo ƀu dưi ngă, kâo hơmâo tơlơi alum pơđur tơdang kâo thâo tơlơi hơdip kâo dŏ amăng plă tơngan hơnơ̆ng ten Khua Yang.

Sĭt yơh, tơlơi anŭn ƀu djơ̆ kiăng laĭ kâo ƀu kiăng glăm bruă glăm kâo pô dơ̆ng tah. Kâo khŏm glăm. Samơ̆ tơlơi kiăng laĭ tơdah kâo hơmâo prŏng laih amăng tơlơi đaŏ kơnang laih anŭn gưt asăp kâo či mưn găn tơlơi hơnơ̆ng ten Khua Yang dŏ amăng kâo.

Kar hăng pô čih hră Tơlơi Adoh Hơđăp hơmâo laĭ: “Tơlơi hơnơ̆ng ten Ñu jing khiơl laih anŭn kơđông pơgang ih.” (Tơlơi Adoh Hơđăp 92:4)

Tơdang kâo hơmâo dưi hluh laih tơlơi hơnơ̆ng ten Khua Yang, kâo či dưi găn rơgao hơdôm tơlơi hơmâo ngă kơ kâo hơtah hơtai hlâo adih. Kâo dưi đaŏ kơnang tơlơi Khua Yang ƀuăn, laih anŭn jao tơlơi hơdip kâo, tơlơi hơdip kâo brơi kơ Ñu.

Môis hơmâo kơčrâo brơi tơlơi anŭn kơ ƀing Israel mơng hlâo laih: “Ơi Adai ƀu djơ̆ jing mơnuih pơhiăp ƀlor ôh, Ăt kŏn djơ̆ lơi jing djuai mơnuih pơblih tơlơi pơmĭn. Tơlơi Ñu hơmâo pơhiăp, Ñu ƀu dưi ngă ôh hă? Boh pơhiăp Ñu hmâo ƀuăn laih, Ñu ƀu pơgiơ̆ng ôh hă?” (Tơlơi Yap 23:19)

Tơdah Ơi Adai hơmâo laĭ tơlơi hơgĕt, tui anŭn kơnuih Ñu ăt kar hăng tơlơi Ñu hơmâo laĭ anŭn mơ̆n. Ñu wai lăng abih bang mơnơ̆ng amăng tơlơi hơdip, Ñu ƀu hơmâo laĭ ôh tui anai: “Kâo ƀu pơmĭn ôh tơlơi anŭn či truh sĭt”. Khua Yang ƀu djơ̆ kơnơ̆ng ngă pơgiơ̆ng hĭ tơlơi Ñu ƀuăn đôč ôh, Ñu ăt hơmâo tơlơi dưi ngă pơgiơ̆ng hĭ tơlơi Ñu hơmâo ƀuăn.

Tơlơi Ơi Adai ƀuăn brơi kơ ƀing ta yom pơphăn hloh kơ tơlơi ƀing ta dưi pơmĭn nao. Pô čih hră laih anŭn pô sĭ mơdro anăn ñu Fred Smith hơmâo ruai glaĭ tơlơi ñu hơmâo găn djru ƀing ta thâo rơđah kơ tơlơi anai. Ñu čih tui anai: “Sa tơlơi truh yom kơ kâo hơmâo rai tơdang kâo dŏ ƀơi sang sĭ ƀañ tơpŭng ŏm. Kâo dŏ jĕ giăm kơ dua čô rơkơi bơnai. Giơ̆ng kơ ƀơ̆ng giơ̆ng ƀañ tơpŭng ŏm anŭn, rơkơi ñu tơgŭ kla prăk, laih anŭn kâo ƀuh bơnai ñu ƀu tơgŭ tui ñu ôh.

“Giơ̆ng kơ anŭn rơkơi ñu wơt glaĭ dŏ ƀơi anăp bơnai ñu. Bơnai ñu yơr tơngan kuar ƀơi kuai rơkơi ñu, rơkơi ñu pi ñu, drơi jăn ñu hlăk pŏ hăng gai. Ñu yŏng bơnai ñu mơng grê, pi nao pơ rơdeh ñu. Tơdang ñu hơmâo pioh giơ̆ng gơ̆ ƀơi rơdeh laih, abih bang mơnuih leng kơ dŏ rơiăt laih anŭn lăng. Ƀu hơmâo hlơi pơhiăp ôh, tơl hơmâo sa čô pô djru bruă amăng sang sĭ ƀañ hơmâo pơhiăp hăng tơlơi pơpŭ: “Ñu djă yom biă mă kơ tơlơi ñu hơmâo ƀuăn.”

Khua Yang lăng yom biă mă kơ tơlơi Ñu hơmâo ƀuăn. Ơi Pôl hơmâo čih mơit brơi kơ Timôthê: “Tơdah ƀing ta ƀu tŏng ten ôh,

Ñu ăt dŏ hơnơ̆ng ten; Yua kơ Ñu ƀu dưi hơngah lui Ñu pô ôh.” (II Timôthê 2:13). Tơdang kâo tơdu, wơt kơ tơlơi đaŏ ăt tơdu, ñu ăt hơnơ̆ng ten. Ih hăng kâo khŏm đaŏ kơnang kơ tơlơi sĭt anai.

Rơkâo ƀing ta pioh mông iâu laĭ hrŏm hơbĭt
Ơ Khua Yang, tơlơi hơdip anai lu wơ̆t ngă kơ kâo hơtah hơtai. Samơ̆ bơni kơ Ih yua kơ Ih jing Yang hơnơ̆ng ten. Ih nanao djră tơlơi Ih ƀuăn hăng kâo laih anŭn nanao ƀu lui kâo dŏ hơjăn ôh. Rơkâo Ih djru kâo dưi găn rơgao tơlơi hơtah hơtai laih anŭn lăng nao kơ hơdôm tơlơi mơyun hiam Ih hơmâo pha brơi kơ kâo. Rơkâo Ih pha brơi kơ kâo tơlơi čang rơmang laih anŭn tơlơi đaŏ kơnang kơ hơdôm tơlơi Ih hơmâo ƀuăn laih. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, hơdơr bĕ wơt dah tơlơi hơdip anai hơmâo lu tơlơi hơtah hơtai, samơ̆ Khua Yang nanao hơnơ̆ng ten laih anŭn ƀu brơi kơ ƀing ta dŏ hyal mal ôh. Đaŏ kơnang bĕ kơ Boh Pơhiăp Khua Yang laih anŭn hơdip tui tơlơi Ñu kiăng. Rơkâo Khua Yang pha brơi kơ ƀing ta tơlơi kơtang, tơlơi hơk mơak laih anŭn tơlơi hơđơ̆ng amăng rĭm črăn tơlơi hơdip, kiăng kơ ƀing ta dưi đaŏ kơjăp amăng tơlơi Ñu ƀuăn.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.