Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Hmâo lu wơ̆t ƀing ta pơmĭn ƀing ta hmâo prăp pre laih abih bang, samơ̆ hnăl tuč abih bang bruă hmâo truh ƀu kar hăng hơdră jơlan ƀing ta pơmĭn. Tơlơi hơdip ƀu djơ̆ nanao leng tui hăng tơlơi ƀing ta kiăng, či hmâo tơlơi kơtuă, tơlơi tơnap laih anŭn tơlơi lông lăng truh. Amăng mông anŭn, bruă ƀing ta kơnơ̆ng dưi ngă jing djă kơjăp tơngan Khua Yang laih anŭn brơi kơ Ñu atăt ba ƀing ta.

Hrơi anai, lơ 06/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Kathy Schultz tui hăng akŏ tơlơi hrăm TƠDANG ABIH BANG ɃU KAR HĂNG ɃING TA ČANG RƠMANG.

“Tui anŭn, anăm ƀing gih lui hĭ ôh tơlơi ƀing gih đaŏ kơnang sĭt, yua kơ ñu či ba glaĭ pri apah prŏng.” (Hêbrơi 10:35)

Kâo hmâo găn laih sa mơguah gleh glan biă mă. Amăng ưm mơguah, kâo khŏm ba ană đah kơmơi hăng tơčo đah kơmơi kâo nao pơ dron deh pơr hlăk 5 mông. Anŭn jing sa tơlơi nao pơgŭn găn biă mă samơ̆ ăt ƀu kơƀah ôh črăn mơak.

Hlăk phrâo truh pơ dron deh pơr, tơčo đah kơmơi kâo rơbuh tơdang wer wăr hăng hip kơdŭng. Tŏ tui, tơdang dŏ dă ruaĭ, kâo hmâo đom hăng ngă tơglưh hĭ ruaĭ pơkah. Laih anŭn ană đah kơmơi kâo pơthâo kơ ƀing gơmơi hmâo dŏ huơl ruaĭ laih anŭn khŏm pŭ nao pơ anih pơkŏn. Ană đah kơmơi kâo mlâo biă mă tơdang nao hrŏm hơbĭt hăng ƀing gơmơi tơdơi kơ khul tơlơi truh anŭn.

Hlăk amăng mông anŭn, pô djru bruă amăng dron deh pơr mă gơnam kơ tơčo đah kơmơi kâo kiăng kơ pơječ anăn mơit. Tơčo kâo hia brip brap, ƀu hluh ôh yua kơ hơgĕt đah rơkơi anai mă hip kơdŭng ñu. Anŭn jing hip kơdŭng ñu khăp biă mă. Hip kơdŭng mraih hơhuñ, hmâo blơi brơi kơ tơlơi đĭ deh anai. Anŭn jing hip kơdŭng blŭng hlâo yua kơ anŭn yơh ñu ƀu kiăng ôh rơngiă hĭ hip kơdŭng anŭn. Ƀing gơmơi khŏm dŏ dơ̆ng glaĭ hăng pơalum kơ ñu ăt či mă glaĭ mơ̆n hip kơdŭng tơdang truh pơanih. Tơdơi kơ anŭn ñu khŏm pioh kơdŭng gui amăng anih arăng kơsem ep laih anŭn ƀing gơmơi bơngơ̆t biă mă ñu či hia ur đĭ. Pŭn biă mă, ñu ăt dŏ ƀuh kơdŭng gui ñu tơbiă pơanăp gah dih. Ƀing gơmơi laĭ nao mă bĕ kơdŭng gui ih amăng mông anai mơtam yơh.

Kâo djă kơjăp tơngan dua amĭ ană gơñu rơbat trŭn ƀơi jơlan kơnua, ba gơñu nao pơ deh pơr. Hmâo lu bruă truh, samơ̆ kơnơ̆ng phrâo 6 mông mơguah đôč! Tơdơi kơ čơlah hĭ mơ̆ng dron deh pơr, kâo nao ƀiă pơ anih sĭ pơdro gơnam blơi ƀiă gơnam laih anŭn nao bruă. Kâo truh pơ anih mă bruă hlăk 7 mông 15 mơnit. Pơmĭn rŏ dah hmâo abih laih hrơi samơ̆ biă mă hrơi kơnơ̆ng phrâo čơdơ̆ng đôč.

Hmâo mơ̆ mông ƀing ih hmâo găn hĭ sa mơguah kar hăng anŭn? Năng ai Khua Yang ăt khŏm klao mơ̆n hăng ƀing gơmơi. Ƀing gơmơi pơmĭn dah ƀing gơmơi hmâo prăp rơmĕt tum num laih kiăng kơ nao pơ dron deh pơr. Samơ̆ ƀing ih thâo laih, hmâo khul ƀu thâo glơng hlâo ôh. Ƀu hmâo hlơi pơmĭn nao bruă khŏm yaih pơblang brơi kơ tơčo đah kơmơi kâo yua kơ hơgĕt arăng mă đuaĭ hip kơdŭng ñu. Ƀing gơmơi pơmĭn ñu hmâo prăp pre laih kơ tơlơi đĭ deh, samơ̆ hnal tuč ƀing gơmơi hmâo wơr bĭt hĭ đơđa bruă anĕt aneo. Ƀing gơmơi ăt ƀu pơmĭn nao truh ôh kơ bruă ƀing gơñu či pơthâo kơ tơlơi đĭ deh hiư̆m pă. Tơčo kâo khŏm đaŏ hơĭn kơ ƀing gơmơi, deh pơr, pô gat hăng ƀing mơnuih ƀŏ mơta ƀu thâo krăn ôh. Pŭn biă mă, tơčo kâo ăt dŏ hmâo amĭ ñu dŏ jĕ giăm, laih anŭn amĭ ñu či ba ñu nao pơ anih rơnŭk rơnua. Ñu thâo krăn kơ ñu pô đaŏ hơĭn kơ amĭ laih anŭn kơnơ̆ng djă kơjăp tơngan kơ amĭ.

Gah kơ ƀing ta, ƀing ta đaŏ kơnang kơ hlơi? Ƀing ta hmâo mơ̆ hơĭn kơnang ƀơi Khua Yang? Kâo hmâo tơlơi pơhơdơr tơdang pơmĭn nao kơ tơčo đah kơmơi kâo. Tơdang abih bang bruă ƀu kar hăng čang rơmang, ƀing ta khŏm djă kơjăp tơngan Khua Yang. Ñu či djru kơ ƀing ta găn hĭ!

Kar hăng Boh Pơhiăp Khua Yang lu wơ̆t iâu pơthưr kơ ƀing ta đaŏ kơnang ƀơi Ñu:
“Ơ Yêhôwa, ƀing mơnuih thâo anăn Ih či đaŏ kơ Ih, yua kơ Ih ƀu hơngah lui ôh hlơi pô tui hơduah sem Ih.” (Tơlơi Adoh Hơđăp 9:10)

“Ơ ƀing ană pla kâo hơi, hơ-ĭn kơnang bĕ kơ Ñu nanao; Lưh pran jua gih ƀơi anăp Ñu bĕ; Yua kơ Ơi Adai jing anih ƀing ta đuaĭ kơđap.” (Tơlơi Adoh Hơđăp 62:8)

“Tui anŭn, anăm ƀing gih lui hĭ ôh tơlơi ƀing gih đaŏ kơnang sĭt, yua kơ ñu či ba glaĭ pri apah prŏng.” (Hêbrơi 10:35)

“Yêhôwa jing pran kơtang kâo laih anŭn jing khiơl kâo; Pran jua kâo đaŏ kơnang kơ Ih laih anŭn kâo dưi hmâo tơlơi djru.” (Tơlơi Adoh Hơđăp 28:7)

Amăng mlam anŭn, ană đah kơmơi kâo hmâo pơhiăp rai pơ kâo hăng pơthâo dua amĭ ană gơñu hmâo truh laih pơ anih rơnŭk rơnua. Tơčo đah kơmơi kâo pơhiăp hăng đŏk mơak, ñu hmâo lăng laih kuih Mickey! Ñu hmâo truh laih pơ anih kơñăm djơ̆ kar hăng boh pơhiăp ƀing gơmơi hmâo ƀuăn. Sĭt mơak biă mă yơh tơdang đaŏ hơ-ĭn kơ ƀing mơnuih ƀing ta khăp hơeng, đaŏ hơ-ĭn kơ Ơi Adai ƀing ta. Ñu ƀu či brơi kơ ƀing ta rơngiă hĭ tơlơi čang rơmang ôh.

Rơkâo ƀing ta pioh mông iâu laĭ hrŏm hơbĭt
Ơ Khua Yang, tơlơi hơdip tăp năng ƀu truh kar hăng tơlơi kâo čang rơmang, samơ̆ bơni kơ Ih yua kâo dưi đaŏ kơnang ƀơi Ih. Bơni kơ Ih yua Ih nanao rơbat hrŏm hơbĭt hăng kâo laih anŭn pơgang wai lăng kâo nanao. Amăng rĭm yak jơlan bă tơlơi tơnap tap lông lăng, kâo djă kơjăp hĭ tơngan Ama kiăng dưi ba truh pơ anih hang rơnŭk rơnua. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏnga amai adơi khăp hơeng, amăng jơlan kơ tơlơi hơdip sĭt yơh či hmâo amăng mông ƀing ta mưn ƀuh ƀing ta rơngiă hĭ tơlơi čang rơmang, tơlơi hơtah tai laih anŭn tơlơi đing yua kơ abih bang bruă truh ƀu kar hăng ƀing ta čang rơmang. Amăng mông anŭn, čang rơmang biă mă ƀing ta ƀu hơtah tai ôh samơ̆ dŏ nanao đaŏ kơnang ƀơi Khua Yang laih anŭn djă kơjăp hĭ tơngan Ñu. Ñu či nanao dŏ hrŏm hơbĭt, djru laih anŭn atăt ba ƀing ta nao truh pơ anih rơnŭk rơnua.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.