Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Amăng abih rơnŭk ană mơnuih, đah kơmơi hmâo găn laih lu tơlơi gleh tơnap, hmâo mơ̆n amăng čăl arăng ƀu pơpŭ pơyom hăng ngă gleh. Hmâo lu ƀing ngă bơnai, ngă amĭ hmâo hơdip amăng sang anŏ ƀu thâo pơpŭ pơyom, kơƀah hĭ tơlơi khăp laih anŭn tơlơi pơpŭ mơ̆ng đah rơkơi, mơ̆ng ama. Samơ̆ Tơlơi Phrâo Hiam hmâo truh laih anŭn pơblih abih bang. Tơlơi sĭt Khua Yang tal blŭng laĭ nua yom kơ ƀing đah kơmơi – jing bruă hlâo dih ƀing gơñu aka khĭn pơmĭn nao ôh. Tal blŭng amăng tơlơi čih ruai kơ ană mơnuih, đah kơmơi thâo klă sĭt gơñu nang lăp kơ khăp, nang lăp kơ pơpŭ, yua mơ̆ng Khua Yang Yêsu hmâo khăp laih anŭn pơsăn yua kơ ƀing gơñu.

Hrơi anai, lơ 08/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Dianne Neal Matthews tui hăng akŏ tơlơi hrăm ĐAH KƠMƠI NANG LĂP KƠ PƠPŬ.

“Ơ ƀing jing rơkơi, khăp bĕ kơ bơnai ƀing gih, kar hăng Yang Krist hmâo khăp laih kơ Phung Sang Ơi Adai laih anŭn pơsăn drơi jan Ñu pô yua kơ Phung Sang Ơi Adai.” (Êphêsô 5:25)

Đưm dih, lu tơlơi phiăn lăng đah kơmơi jing gơnam kơ đah rơkơi gĭt gai, hăng bưng tui đah rơkơi kiăng yua. Wơ̆t kơ tui anŭn, Tơlơi Phrâo Hiam Khua Yang Yêsu hmâo pŭ đĭ nua yom kơ đah kơmơi, aka hmâo ôh mơ̆ng hlâo dih. Năng ai črăn Hră Ơi Adai Pơhiăp amăng Êphêsô črăn 5 ƀu hmâo tơlơi phara ôh hăng ƀing ta, samơ̆ tơlơi anŭn sĭt jing sa tơlơi kơtưn nao prŏng, sa tơlơi krŭ hăng ƀing đah kơmơi hmâo hmư̆ hră mơit mơ̆ng ơi Pôl amăng rơnŭk sang Ơi Adai blŭng hlâo. Kiăng bơrơđah tơlơi khăp blŭng hlâo hăng “bơnai” Ñu, Khua Yang Yêsu Krist, Pô Pơklaih hmâo djai pơala brơi kơ abih bang ƀing hlơi pô đuaĭ tui Ñu. Ră anai, ơi Pôl čih hră mơit pơtô kơ ƀing đaŏ ƀing đah rơkơi khŏm khăp kơ bơnai ñu hăng pran jua pơsăn hrup hăng Khua Yang Yêsu.

Ƀing đah kơmơi blŭng hlâo hmâo đơ̆k hră mơit kơ ơi Pôl năng ai hmâo tŭ tơlơi tơnap tap, tơlơi arăng ngă gleh ƀu thâo pơhiăp nao tum ôh. Năng ai ƀing gơñu hlăk dŏ hơdip hăng đah rơkơi ƀu hmâo tơlơi khăp, tơlơi thâo pơpŭ. Wơ̆t dah tơdang ƀing gơñu hmâo hrăm laih hơdră jơlan gir añ hăng tơlơi truh ƀing gơñu, năng ai Boh Pơhiăp Khua Yang ăt dŏ ngă kơ ƀing gơñu mưn ƀuh kơ tơlơi pơpŭ tui hơdră hlâo dih ƀing gơñu aka thâo ôh. Wơ̆t dah pô ngă rơkơi hmâo tơlơi gưt tui boh pơhiăp Khua Yang khăp kơ bơnai ñu ƀôdah ƀu ôh, tui anŭn yơh ră anai ƀing đah kơmơi hiam klă hmâo tơlơi thâo sĭt Khua Yang kiăng kơ ƀing đah rơkơi khăp laih anŭn wai lăng bơnai ñu kar hăng kơ ñu pô. Khua Yang kiăng abih bang ƀing đah kơmơi hơdip amăng sa boh sang anŏ hmâo tơlơi khăp pơđao, anih ƀing rơkơi nanao pioh tơlơi ba glăi kơ tơlơi tŭ yua kơ bơnai ñu jing blŭng hlâo.

Ƀu hmâo ƀing đah kơmơi pă ƀu kiăng kơ ñu pô hmâo sa čô rơkơi khăp ƀueng kơ ñu hăng pơsăn tơlơi hơdip kơ ñu pô yua kơ bơnai ñu? Lu ƀing jing bơnai amăng hrơi anai mưn ƀuh ƀing gơñu hơdip amăng sang anŏ ƀu hmâo tơlơi khăp. Đơđa hmâo mơnuih gir añ hăng tơlơi pơdơ̆ng sang anŏ ƀu djơ̆ tui hăng tơlơi Khua Yang kiăng, ngă kơ ƀing gơñu mưn ƀuh rŏ dah tơlơi pleč, tơlơi ngă pơruă pran jua. Wơ̆t tơlơi hơdip rơkơi bơnai hiư̆m pă, ƀing ta leng liah thâo tơlơi khăp hăng amăng Êphêsô črăn 5. Anŭn jing tơlơi khăp kơ Khua Yang Yêsu, Pô hmâo pơsăn laih tơlơi hơdip Ñu pô yua kơ ƀing ta tơdang ƀing ta aka thâo krăn Ñu. Ñu hmâo tŭ tơlơi tơnap ta hăng kla nua brơi tơlơi soh ƀing ta, kiăng kơ ƀing ta hmâo sa tơlơi hodip yom biă mă ƀơi lŏn tơnah, laih anŭn tơdơi kơ anŭn hmâo hơdip hăng Ơi Adai nanao. Tơdang ƀing ta hmâo pŏk laih pran jua ƀing ta tŭ mă khul hơgĕt Khua Yang Yêsu hmâo pha, sĭt yơh ƀing ta jing ƀing đah kơmơi hmâo tơlơi khăp.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih hmâo hrih pơjing rai đah kơmơi nang lăp kơ pơpŭ biă mă. Bơni kơ Ih yua kơ Ih hmâo pơklă pơsĭt tơlơi yom kơ abih bang đah kơmơi, laih anŭn pơgang, wai lăng ƀing ană đah kơmơi ih khăp hơeng amăng abih rơnŭk. Čang rơmang Ih nanao dŏ hrŏm hơbĭt, thim brơi tơlơi kơtang kơ ƀing đah kơmơi hiam klă anai, kiăng kơ abih bang ƀing đah kơmơi leng kơ hmâo tơlơi khăp, tơlơi pơpŭ hrup hăng hơhră jơlan Ih hmâo khăp abih bang ƀing gơmơi. Kâo iâu laĭ hăng anăn Khua Yang Yêsu Krist, Amen.

Ơ abih bang ƀing đah kơmơi khăp hơeng, ƀing ih jing ƀing ană đah kơmơi kơ Ơi Adai, hmâo Ñu hrih pơjing hmâo tơlơi phara biă mă. Ƀu djơ̆ kơnơ̆ng hrơi Đah Kơmơi amăng djŏp djang lŏn čar amăng hrơi anai, samơ̆ čang rơmang abih bang đah kơmơi či nanao hmâo tơlơi pơpŭ hăng hmâo tơlơi khăp rĭm hrơi. Rơkâo tơlơi khăp pơsăn kơ Khua Yang či thim brơi pran kơtang, tơlơi hur har brơi kơ abih bang ƀing đah kơmơi hmâo tơlơi kơjăp, laih anŭn hơdip sa tơlơi hơdip pơčrang rơđah anăn yom pơphan Ih brơi kơ abih bang mơnuih leng kơ thâo. Laih anŭn brơi hơdơr nanao ƀing ih jing ƀing đah kơmơi Khua Yang hmâo khăp.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.