Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Hiưm ƀing ta pơmĭn Khua Yang dưi yua khul tơlơi kơtuă hling kiăng pơtô kơ ƀing ta? Nang ai jing sa tơlơi adoh, sa sŏp hră, sa pŏk rup, ƀôdah sa boh pơtâo? Khua Yang dưi yua djŏp mơta mơnơ̆ng kiăng pơtô kơ ƀing ta tơdah ƀing ta tŭ ư hmư̆ Ñu. Samơ̆ ƀing ta kiăng hmư̆ mơ̆? Ƀôdah ƀing ta kơnơ̆ng anăp nao kơ khul tơlơi ƀing ta kiăng hmư̆ đôč? Ƀing ta kiăng pơpŭ bơni kơ Khua Yang djŏp anih djŏp mông mơ̆? Ƀôdah kơnơ̆ng pơpŭ bơni kơ Ñu tơdang ƀing ta mưn ƀuh djôl mơak hăng mơyun pŭn?

Hrơi anai, lơ 12/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Jenn Hannah Goodwyn tui hăng akŏ tơlơi hrăm BOH PƠTÂO UR DRIAO

“Yêsu laĭ glaĭ: “Kâo laĭ kơ ƀing gih, tơdah gơñu dŏ rơiăt, boh pơtâo yơh či ur driao.” (Luk 19:40)

Ih hơdơr mơ̆ jơlan Ơi Adai Pơhiăp čih boh pơtâo či ur driao tơdah ƀing ană plei Khua Yang ƀu pơpŭ bơni kơ Ñu?

Djơ̆ laih, tơlơi anŭn hmâo truh kơ kâo. Kâo hmư̆ boh pơtâo adoh. Kâo ƀu pơhiăp blơr ôh. Sĭt biă mă.
Hơdôm hrơi hlâo, kâo nao ngui hăng ayŏng kâo pơ đang kơyâo pơdơi. Anŭn jing sa đang pơdơr ngui ngơr. Giơ̆ng kơ đĭ deh treng đuaĭ hmar, ƀing gơmơi weh nao sa anih kiăng hơduah tơlơi ngui phrâo tŏ tơnŏ kâo hmư̆ dơnai hơgĕt anŭn. Anŭn jing dơnai ayŭ. Kâo čơdơ̆ng ep lăng anih pă pơtơbiă dơnai anai.
Laih anŭn kâo lăng ƀuh dua boh pơtâo. Hiưm boh pơtâo thâo mơñi wơih? Samơ̆ hnal tuč tơdang nao jĕ, mơnơ̆ng lăng hrup boh pơtâo anŭn jing dua boh loa. Kâo klao, laih anŭn pơblang tơlơi mơak anai hăng ayŏng kâo, pô aka thâo krăn hơgĕt tơlơi truh ôh.

Kâo thâo tơlơi anai hmư̆ rŏ dah hling hlang, samơ̆ tơl mơ̆ng tơlơi anŭn kâo hmâo pơmĭn nao kơ tơlơi truh amăng hră Luk 19 tơdang Khua Yang Yêsu ƀuah ƀing mơnuih Pharisi.

“’Hlăk Yêsu giăm truh pơ plei Yêrusalem ƀơi anih trŭn đŭng čư̆ Ôliwơ, abih bang ƀing ding kơna čơdơ̆ng hơ̆k mơak laih anŭn pơpŭ bơni kơ Ơi Adai hăng asăp kraih yua kơ abih bang khul bruă mơsêh mơyang gơñu hmâo ƀuh laih. Gơñu laĭ: “Ơi Adai hơơč mơyun kơ Pơtao rai amăng anăn Khua Yang! Rơnŭk rơnua amăng adai, laih anŭn tơlơi guh kơang amăng anih Glông Hloh!” Amăng tơ̆ng krah ƀing mơnuih lu hmâo đơđa ƀing Pharisi laĭ kơ Yêsu: “Ơ Nai, khă bĕ ƀing ding kơna Ih.” Yêsu laĭ glaĭ: “Kâo laĭ kơ ƀing gih, tơdah gơñu dŏ rơiăt, boh pơtâo yơh či ur driao.”(Luk 19:37-40)

Nang ai ƀing ih či tơña hiưm kâo dưi hrăm tơlơi pơhrăm hơgĕt gah bơngăt mơ̆ng dua boh pơtâo lĕ? Samơ̆ Khua Yang dưi yua djŏp mơta mơnơ̆ng kiăng kơ pơtô ƀing ta tơdah ƀing ta tŭ ư hmư̆ Ñu.
Čang rơmang ƀing ta pơyơr jao ta pô kơ Khua Yang. Pơpŭ bơni kơ Ñu găn djŏp bruă ƀing ta ngă laih anŭn pơhiăp.

Anăm hrup hăng ƀing Pharisi tŭ tơlơi Khua Yang ƀuah. Anăm pioh pran jua ƀing ta jing hĭ mlaih tơdu ƀiă mông laih anŭn pơhiăp phat kơđi kơ ƀing mơnuih jao pơyơr abih tơlơi hơdip kiăng kơ kơkuh pơpŭ kơ Yang Krist. Ur driao pơpŭ pơư Khua Yang bĕ, ƀu kơnơ̆ng yua kơ tơlơi khăp hăng tơlơi pap Ñu, bơ ăt yua kơ anăn yom pơphan Ñu – Pơtao kơ abih pơtao laih anŭn Khua Yang kơ abih yang.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih hmâo yua khul hơdră yom pơphan kiăng kơ pơtô kâo. Rơkâo Ih pŏk mơta, pŏk tơngia kiăng kơ kâo hmư̆ asăp rơun tơdu Ih amăng djŏp mông. Rơkâo Ih djru kâo pơyơr jao tơlơi hơdip kâo hlom ƀom kơ Ih, hăng pơpŭ pơư Ih găn abih bruă kâo ngă hăng abih tơlơi kâo pơhiăp. Rơkâo Ih pơblih pran jua kâo, brơi kâo hơdip sa tơlơi hơdip pơrơđah anăn Ih kơ abih mơnuih leng thâo krăn. Kâo iâu laĭ amăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, ur driao bơni kơ Khua Yang bĕ yua kơ Ñu nang lăp pơpŭ bơni. Ur driao kơ Ñu wơ̆t amăng tơlơi mơak ƀôdah gleh tơnap, găn djŏp bruă ƀing ta ngă hăng khul tơlơi ƀing ta pơhiăp. Hmư̆ bĕ tơlơi pơtă Ñu hăng hla tui gru tơkai Ñu kiăng hơdip sa tơlơi hơdip tŭ yua. Brơi hrŏm hơbĭt adoh sa tơlơi adoh bơni kơ Khua Yang, tơlơi adoh kơ pran jua thâo hơdơr bơni laih anŭn tơlơi khăp.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.