Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi.

Jing sa čô pô đaŏ Khua Yang, ƀing ta khŏm thâo Khua Yang, thâo pran jua laih anŭn tơlơi Khua Yang kiăng. Mơak yơh tơdang tơlơi hơgĕt ƀing ta kiăng thâo kơ Khua Yang hơmâo pơdah brơi laih kơ ƀing ta amăng Hơdrôm Hră Boh Pơhiăp Ơi Adai jing Boh Pơhiăp Hơdip. 

Hrơi anai, lơ 16/02/2022, Tơlơi Lir Hơbĭt Khua Yang Rĭm Hrơi iâu pơthưr abih bang ƀing ta hrăm hrŏm hơbĭt Boh Pơhiăp Khua Yang hăng Daphne Delay găn mơng akŏ tơlơi hrăm THÂO KHUA YANG

Tơlơi yom hơgơ̆m lơ̆m kơ Yêhôwa Ơi Adai ƀing ta, samơ̆ khul tơlơi hmâo pơrơđah rai laih lơ̆m hĭ kơ ƀing ta laih anŭn kơ ană tơčo ƀing ta nanao hlŏng lar, kiăng kơ ƀing ta ngă tui abih bang boh pơhiăp amăng tơlơi juăt anai. (Tơlơi Pơtô Mơñă Tơlơi Juăt 29:29)

Tơlơi yom hơgơ̆m lơ̆m kơ Yêhôwa Ơi Adai ƀing ta, samơ̆ khul tơlơi hơmâo pơrơđah rai laih lơ̆m hĭ kơ ƀing ta laih anŭn kơ ană tơčo ƀing ta nanao hlŏng lar, kiăng kơ ƀing ta ngă tui abih bang boh pơhiăp amăng tơlơi juăt anai. (Tơlơi Pơtô Mơñă Tơlơi Juăt 29:29)

Rơnŭk anai, ƀing ta juăt hơmư̆ nanao boh pơhiăp: bruă glăm ƀôdah tơlơi pơhaih. Abih bang ƀing ta leng kơ hơmâo bruă glăm kơ bruă ƀing ta ngă, mơng sang anŏ truh kơ plei pla. Ơi Adai ƀu djơ̆ kơnŏng bơngơ̆t kơ abih tơlơi anŭn samơ̆ Hơdrôm Hră Boh Pơhiăp Ơi Adai ăt pơtô rơđah đong kơ tơlơi ƀing ta khŏm pơhaih abih bruă ƀing ta hơmâo ngă amăng tơlơi hơdĭp kar hăng hơmâo čih amăng hră Rôm 14:12, 

“Tui anŭn yơh, rĭm čô ƀing ta či pơrơđah bruă ñu pô ƀơi anăp Ơi Adai” (Rôm 14:12)

Tơlơi anai hơmâo ngă kơ ih huĭ mơ̆? Kâo pơmĭn či huĭ biă mă yơh tơdah ih aka thâo krăn Khua Yang laih anŭn thâo pran jua Ñu. Samơ̆ kâo ƀu pơmĭn ôh, tơlơi Khua Yang hơduah jing kiăng ngă kơ ƀing ta huĭ. Kâo pơmĭn bruă glăm kơ tơlơi ƀing ta pơhaih anŭn jing hroa tui hloai tơlơi ƀing ta hluh laih anŭn tui hloai hăng tơlơi ƀing ta ƀuh. Kiăng laĭ, hơmâo tơlơi Ơi Adai pơdŏp kơ ƀing ta, samơ̆ ăt hơmâo tơlơi Ñu pơrơđah brơi kơ ƀing ta kiăng ƀing ta dưi ngă giơ̆ng hĭ bruă Ñŭ ƀơi lŏn tơnah anai. Pơhaih jai lu, ƀing ta či jai mă bruă lu hloh. 

Ƀơi lŏn tơnah anai lu mơnuih ƀu thâo hluh pran jua laih anŭn tơlơi Ơi Adai kiăng. Anŭn yơh jing tơlơi yua hơgĕt lŏn tơnah anai jai hrơi jai pơlŭk pơlăk, djĭng djăng, soh sat laih anŭn djai brŭ. Anih pơpă ƀu hơmâo tơlơi hluh rơđah anih anŭn roh ayăt dŏ hơdĭp. Tơlơi “ƀu hluh rơđah” hơmâo dua jơlan pơblang. Jơlan tal sa anŭn jing kơƀah tơlơi thâo, tal dua anŭn jing ngă amơng. Pơhơmutu, tơdah pơhiăp kâo ƀu thâo pơkra adeh, năng ai yua kơ kâo ƀu hơmâo tơlơi thâo kơ bruă anai, samơ̆ ăt yua kơ kâo pơrơ̆ng ngă amơng kơ tơlơi kơsem hơduah, laih pơhrăm pô.

Ƀu hrăm pơkra adeh ƀu hơmâo tơlơi hơgĕt soh prŏng lơi, samơ̆ či hơmâo lu bruă amăng tơlơi hơdĭp, biă mă bruă gah bơngăt ƀu hrŭp hăng anŭn ôh. Ƀu hluh rơđah anŭn ƀu djơ̆ sa tơlơi mơyun ôh. Ƀu hluh rơđah kơ bruă gah bơngăt anŭn jing tơlơi huĭ hyưt biă mă. 

Khua ding kơna Pôl pơhiăp, “kiăng kơ ƀu brơi kơ Satan hơmâo mông găl dưi hĭ kơ ƀing ta ôh. Yuakơ ƀing ta thâo krăn laih hơdră mơneč ñu kiăng” (2 Kôrantô 2:11)

Tơlơi pơblang pơkŏn pơblang tui anai, “kiăng kơ ƀu brơi kơ Satan hơmâo mông găl dưi hĭ kơ ƀing ta ôh. Yuakơ ƀing ta thâo krăn laih hơdră mơneč ñu kiăng” (JBSV14). Anŭn yơh jing tơlơi yua hơgĕt Khua Yang kiăng pơdah tơlơi sĭt kơ ană bă Ñu. Khua Yang ƀu kiăng ôh ƀing ta nanao hơdĭp amăng tơlơi ƀu thâo hluh, lĕ amăng tơlơi plư. Hluh tơlơi hơmâo pơhaih či pơklaih tơlơi hơdĭp ƀing ta, gah kơnuih, gah bơngăt laih anŭn tơlơi dŏ tơ̆ng krah. Satan thâo tơlơi anai, Khua Yang thâo tơlơi anai. “Đơđa khul tơlơi hơgŏm Yahweh Ơi Adai ta ƀu pơrơđah kơ ƀing ta ôh, samơ̆ đơđa khul tơlơi anŭn Ñu pơrơđah rơđah rơđo̱ng yơh kơ ƀing ta laih anŭn kơ ƀing ană tơčô ta hlŏng lar, kiăng kơ ƀing ta dưi đuaĭ tui abih bang boh hiăp amăng tơlơi juăt anai yơh” (Tơlơi pơtô mơñă tơlơi juăt 29:29)

Kiăng laĭ, ƀing ta hơmâo bruă glăm khŏm hrăm, kơsem ep, djă pioh laih anŭn pơtô glaĭ. Kâo ƀu pơmĭn ôh amăng mơnit mông tuč tơlơi hơdĭp, ƀing ta či pơhiăp, “Ô, kâo ƀu thâo tơlơi anai”, ƀôdah, “Ô, kâo hơmâo gao lui laih tơlơi pơtrŭt anŭn”. Sĭt Ơi Adai nanao jing Pô hiam klă laih anŭn tơlơi pap. Samơ̆ bruă Ñu pŏk,  pơdah brơi ƀing ta hơmâo tơlơi kơñăm. Rơnŭk tơdơi či thâo tơlơi pơhaih anai tui jơlan anai ƀôdah jơlan pơkŏn tui hăng tơlơi ƀing ta thâo laih anŭn tui hăng tơlơi ƀing ta yua tơlơi ƀing ta thâo. 

Dưi mơ̆ ƀing ta pơmĭn kiăng kơ thâo hiưm pă Ơi Adai mưn, tơdang ană bă Ñu ruă nuă, rơngot hơning, rơngiă, pơđing đaŏ, tơdah Khua Yang hơmâo prap pre, laih anŭn brơi laih tơlơi djru mơng Boh Pơhiăp Ñu. Hơdrôm Hră Boh Pơhiăp Ơi Adai jing tơlơi pơhaih blung hlâo kơ ƀing ta. Ơi Adai ăt hơmâo pha brơi ƀing ta Yang Bơngăt Hiam, Pô djru ƀing ta.

Ƀing ta hơmâo bruă glăm khŏm pơhaih, samơ̆ ƀu djơ̆ mă bruă tui pran kơtang ta pô ôh. Čang rơmang rĭm čô ƀing ta či thâo krăn bruă glăm ƀing ta laih anŭn yua ñu djơ̆ hơnơ̆ng. Laih anŭn kâo ăt iâu laĭ brơi kơ ih či ƀuh lu tơlơi mơak prŏng amăng jơlan kơsem hơduah, kar hăng pô čih hră Tơlơi Adoh hơđăp hơmâo laĭ, “Kâo hơ̆k mơak biă mă amăng tơlơi Ih ƀuăn, hơ̆k mơak kar hăng arăng hơduah ƀuh gơnam sua mă prŏng” (Tơlơi Adoh Hơđăp 119:162)

Rơkâo ƀing ta iâu laĭ hrŏm hơbĭt: Bơni kơ Khua Yang yua kơ tơlơi Ih hơmâo pơhaih rai amăng Boh Pơhiăp Ih djru kâo thâo krăn Khua Yang, thâo pran jua laih anŭn tơlơi Ih kiăng. Rơkâo Ih djru kâo khăp Boh Pơhiăp Ih rĭm hrơi, pơyơr abih pran jua hơdĭp tui tơlơi Ih kiăng. Kâo iâu laĭ hăng anăn Khua Yang Yêsu Krist. Amen.

Ơ met anŏng ayong amai adơi ơi yă ană amon, ih hơmâo thâo Khua Yang hiưm pă? Amăng hrơi kŏm anai, ih či ngă tơlơi hơgĕt kiăng kơ thâo pran jua laih anŭn tơlơi Khua Yang kiăng lu hloh?

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.