Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Jing ană bă Ơi Adai, ƀing ta khŏm jing tơhan pơblah amăng phung tơhan Ơi Adai. Ƀing ta lŏm kơ Ơi Adai jing Pô djru ƀing ta dưi hĭ abih bang tơlơi pơblah amăng drŏn pơblah tơlơi hơdip. Tơlơi yom ƀing ta khŏm ngă anŭn jing prap pre tum djŏp gơnam pơblah mơng Ơi Adai kiăng kơ prap pre kơsung nao amăng rĭm drŏn pơblah.

Hrơi anai, lơ 18/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Cathy Irvin tui hăng akŏ tơlơi hrăm PRAP PRE GƠNAM PƠBLAH GAH BƠNGĂT

“Hnal tuč, brơi kơ ƀing gih jing kơtang amăng Khua Yang laih anŭn kơnang kơ tơlơi kơtang mơyang Ñu. Brơi ƀing gih buh mă bĕ abih bang gơnam pơblah Ơi Adai brơi, kiăng kơ ƀing gih dưi dŏ kơjăp pơkơdơ̆ng glaĭ hăng tơlơi plư pleč yang sat” (Êphêsô 6:10-11)

Ƀing đaŏ Yang Krist hlăk bưp tơlơi pơblah gah bơngăt kơtang biă mă amăng tơlơi hơdip tui anŭn ƀing ta khŏm buh mă hơdôm gơnam pơblah gah bơngăt. Ƀing ta hơdơr boh hră tơlơi adoh “Ƀing Djru Nao Pơ Anăp Bĕ” hrŏm hăng boh hră yom pơphăn biă mă: “Ƀing djru nao pơ anăp bĕ, kar hăng tơhan nao blah! Hơmâo kơyâo bơrơkal Yêsu, ba jơlan ƀing gih. Krist Khua Yang jing Khua ta, Ñu yơh Pô nao hlâo. Lăng bĕ, Ñu djă hla kơ nao pơblah yang sat. Nao bĕ phung ƀing djru hơi, kar hăng tơhan nao blah. Hơmâo kơyâo bơrơkal Yêsu ba jơlan nanao.”

Mơng hrơi mông tŭ mă anăn Khua Yang ƀing ta lŏm kơ phung tơhan Ơi Adai laih. Yua kơ anŭn yơh, yang sat či kơsem hơduah hơdră jơlan kiăng kơsung nao pơ ƀing ta laih anŭn ngă kơ ƀing ta ataih mơng Ñu. Wơt dah ƀing ta hơmâo thâo laih ƀing ta lŏm kơ Ơi Adai jing Pô djru ƀing ta dưi hĭ, samơ̆ tơlơi ƀing ta khŏm ngă anŭn jing prap pre tum djŏp hơdôm gơnam pơblah mơng Ơi Adai.

Hơgĕt jing gơnam pơblah mơng Ơi Adai? Mông anai ƀing ta lăng hrŏm hơbit Boh Pơhiăp Khua Yang hơmâo čih amăng hră Êphêsô 6:10-20:
“Hnal tuč, brơi kơ ƀing gih jing kơtang amăng Khua Yang laih anŭn kơnang kơ tơlơi kơtang mơyang Ñu. Brơi ƀing gih buh mă bĕ abih bang gơnam pơblah Ơi Adai brơi, kiăng kơ ƀing gih dưi dŏ kơjăp pơkơdơ̆ng glaĭ hăng tơlơi plư pleč yang sat. Yua kơ ƀing ta pơblah, ƀu djơ̆ pơblah glaĭ hăng asar đeh laih anŭn drah ôh, samơ̆ ƀing ta pơkơdơ̆ng glaĭ hăng ƀing khua wai lăng, ƀing hơmâo tơlơi dưi, ƀing khua pơtao lŏn tơnah rơnŭk kơnăm mơmŏt anai, hăng ƀing yang sat ƀai dŏ amăng khul tal adai. Yua kơ anŭn yơh, mă yua bĕ abih bang gơnam pơblah Ơi Adai brơi, kiăng kơ ƀing gih dưi pơkơdơ̆ng glaĭ amăng rơnŭk sat, laih anŭn tơ dưi hĭ abih bang laih, ƀing gih ăt či dŏ kơjăp.

Tui anŭn, dŏ kơjăp bĕ, hrăng bĕ hơdrăng kơiăng hăng tơlơi sĭt, buh bĕ ao pơsơi jing tơlơi tơpă, yua tơlơi hur har ră ruai Tơlơi Phrâo Hiam rơnŭk rơnua kar hăng čŭt čơkhŏ. Hăng abih khul tơlơi anai, mă bĕ khiơl jing tơlơi đaŏ. Hăng gơnam anŭn ƀing gih dưi pơdjai abih bang ƀrŏm apui yang sat. Buh bĕ tơlơi pơklaih jing mŭk pơsơi, laih anŭn djă đao gưm Yang Bơngăt Hiam, jing boh pơhiăp Ơi Adai. Amăng Yang Bơngăt Hiam iâu laĭ nanao laih anŭn kơwưh rơkâo. Kiăng kơ truh tơlơi kơñăm, brơi kơ ƀing gih gir run, dŏ răng, laih anŭn iâu laĭ brơi kơ abih bang ƀing rơgoh hiam. Ăt iâu laĭ brơi kơ kâo kar kaĭ mơ̆n, kiăng kơ tơdang kâo pơhiăp, Ơi Adai pha brơi kơ kâo tơlơi pơtô mơ̆ng Ñu, laih anŭn pơtô tơlơi yom hơgơ̆m kơ Tơlơi Phrâo Hiam hăng tơlơi khĭn. Yua kơ Tơlơi Phrâo Hiam yơh, kâo jing pô pơala, arăng krư̆ kơđơ̆l kâo. Tui anŭn iâu laĭ brơi kâo kiăng kơ kâo hơmâo tơlơi khĭn pơhaih Tơlơi Phrâo Hiam anŭn kar hăng kâo khŏm pơhiăp.”

Ƀing ta khŏm rơkâo hơduah Khua Yang djru ƀing ta prap pre gơnam pơblah tum djŏp rĭm hrơi. Tơdang ngă tui anŭn ƀing ta dưi prap pre laih anŭn pơkơdơ̆ng glaĭ hăng tơlơi či truh kơ ƀing ta.

Blung hlâo ƀing ta khŏm hrăng hơdrăng kơiăng hăng tơlơi sĭt, buh ao pơsơi jing tơlơi tơpă. Tŏ tui ƀing ta čŭt čơkhŏ hăng tơlơi hur har ră ruai Tơlơi Pơthâo Hiam, nanao yua tơlơi đaŏ jing khiơl kiăng kơ pơgang glaĭ hăng ƀlŏm apui yang sat. Buh mă mŭk kơ tơlơi pơklaih, djă đao gưm Yang Bơngăt Hiam, jing Boh Pơhiăp Ơi Adai ngă pơphrâo nanao bơngăt ƀing ta rĭm hrơi. Tơdah ƀing ta djă kơjăp Boh Pơhiăp Ơi Adai, ƀing ta či dưi pơkơdơ̆ng glaĭ hăng abih tơlơi truh amăng tơlơi hơdip ƀing ta.

Čut čơkhŏ kơ Tơlơi Pơthâo Hiam rơnuk rơnua kiăng kơ dưi pơkơdơ̆ng glaĭ hăng ayăt ƀing ta jing yang sat. Rĭm hrơi rơgao ƀing ta khŏm prap pre tum djŏp gơnam pơblah mơng Ơi Adai. Anai jing hơdră jơlan či djru kơ ƀing ta găn rơgao hơdôm tơlơi plư mơng ayăt ƀing ta. Ơi Adai jing phŭn tơlơi kơtang kơ ƀing ta, laih anŭn Ñu dŏ hrŏm ƀing ta kiăng kơ djru ƀing ta dưi hĭ abih bang ayăt ƀing ta.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih jing Pô pha thim pran kơtang brơi kơ kâo kiăng kơ kâo dưi pơkơdơ̆ng glaĭ laih anŭn dưi hĭ hăng tơlơi plư yang sat. Rơkâo Khua Yang djru kâo thâo nanao prap pre laih anŭn pơkơdơ̆ng glaĭ hăng hơdôm tơlơi lông lăng. Rơkâo Khua Yang djru kâo thâo djă kơjăp Boh Pơhiăp Khua Yang kiăng kơ kâo thâo dŏ kơjăp. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, ƀing ta ƀu thâo kơsung nao pơ drŏn pơblah gah kơ bơngăt ôh tơdah ƀing ta ƀu prap pre hơdôm gơnam pơblah mơng Ơi Adai. Kơnang bĕ pran kơtang Khua Yang pha brơi kiăng kơ ƀu rơbuh ôh yua mơng yang sat, yua kơ jai jĕ giăm Khua Yang ƀing ta či dưi hĭ kơ tơlơi plư yang sat. Đaŏ kơnang bĕ kơ Khua Yang, laih anŭn rơbat nao hăng tơlơi dưi mơyang kiăng kơ dưi jing tơhan pơblah dưi hĭ amăng rĭm tơlơi pơblah gah bơngăt ih hơmâo bưp.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.