Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Hơmâo mơ̆ đơđa ih rơkâo kơwưh hăng abih pran jua kiăng kơ Khua Yang brơi tơlơi ih kiăng, samơ̆ ih kơnơ̆ng tŭ mă tơlơi dŏ rơiăt mơng Khua Yang? Hơdôm tơlơi iâu laĭ Khua Yang aka laĭ glaĭ ôh ngă kơ ƀing ta hơmâo tơlơi pơđing. Amuñ biă mă ƀing ta či hơmâo tơlơi pơđing, laih anŭn pơmĭn Khua Yang hơmâo wơr bit ƀing ta laih. Samơ̆, Khua Yang hơmâo hơdră hiam klă brơi kơ rĭm čô tơlơi hơdip ƀing ta. Tơdang krĕp djơ̆ hrơi mông, Ñu či pơhlao hĭ abih tơlơi ruă nuă, laih anŭn pha brơi tơlơi ƀing ta čang tơguan hăng hơdră yom pơphăn biă mă.

Hrơi anai, lơ 19/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Maria Schleicher tui hăng akŏ tơlơi hrăm KHUA YANG PƠSUAIH HƠDÔM PRAN JUA RUĂ NUĂ

Pơhlao brơi pran jua rơngot hơning laih anŭn pŏn brơi khul rơka kơ ƀing gơñu. (Tơlơi Adoh hơđăp 147: 3)

“Rơkâo bĕ, ƀing gih či hơmâo; kơsem bĕ, ƀing gih či ƀuh; khŏk bah amăng bĕ, Ơi Adai či pŏk brơi kơ ƀing gih yơh. Yua kơ hlơi pô rơkâo, ñu či hơmâo yơh; hlơi pô hơduah, ñu či ƀuh; laih anŭn hlơi pô khŏk bah amăng, Ơi Adai či pŏk brơi yơh kơ ñu.” (Mathiơ 7:7-8)

Ih hơmâo iâu laĭ rơkâo kiăng kơ dưi hơmâo sa tơlơi hơgĕt ih kiăng mơ̆, samơ̆ Khua Yang ƀu ječ meč laĭ glaĭ tơlơi ih iâu laĭ ôh? Kâo hơmâo bưp laih tơlơi anai. Kâo hơmâo iâu laĭ amăng lu thŭn kơ rơkơi kâo laih anŭn sang anŏ amăng tơlơi hơdip pơ anăp anai.

Tơdang Khua Yang Yêsu hơmâo mŭt amăng tơlơi hơdip kâo, kâo hlăk juăt laih anŭn khăp hăng sa čô đah rơkơi aka ƀu đaŏ ôh. Sĭt tơlơi hơdip phrâo amăng Yang Krist ƀu hơmâo anih kơ tơlơi hơdip anai ôh. Sui mơng anŭn kâo hơmâo pơjưh hĭ tơlơi khăp dua čô gơmơi, tuč rơnuč ăt tui hăng tơlơi Khua Yang kiăng mơ̆n. Kâo pơmĭn dah Khua Yang či brơi gơnam bơni kơ tơlơi kâo gưt asăp anŭn hăng tơlơi tañ mơtam ba rai sa čô đah rơkơi jing rơkơi kâo.

Samơ̆ Khua Yang ƀu ngă tui anŭn ôh. Kâo ruă pran jua biă mă.
Kâo hơmâo iâu laĭ kiăng kơ hơmâo rơkơi amăng pluh thŭn. Amăng lăm pran jua kâo thâo rơđah biă mă, či hơmâo sa hrơi kâo či jing sa čô bơnai, sa čô amĭ, samơ̆ kâo hơtah hơtai yua kơ Khua Yang ƀu ngă tơlơi anŭn tañ kar hăng kâo pơmĭn ôh.

Anŭn jing hrơi mông hyal mal laih anŭn rơngot hơning, samơ̆ ăt hơmâo lu tơlơi tŭ yua laih anŭn tơlơi yom mơ̆n. Khua Yang hơmâo pơhlao brơi tơlơi ruă kâo, brơi kâo thâo ƀuh tơlơi khăp hlong lar laih anŭn klă tum Ñu. Ñu hơmâo pơrơđah rai Ñu pô brơi kơ kâo, brơi kơ kâo thâo ƀu hơmâo tơlơi hơgĕt kiăng kơ rơngot ôh. Kâo đaŏ kơnang kơ Khua Yang amăng rĭm tơlơi kơƀah kiăng kâo. Ñu hơmâo sŭt lui abih tơlơi pleč ƀlor, kơ tơlơi sa čô mơnuih dưi bơbŏ hĭ tơlơi hŏng amăng atai boh kâo, sĭt kơnơ̆ng kơ Khua Yang đôč dưi ngă tơlơi anŭn. Lu wơt Khua Yang hơmâo pơrơđah brơi kơ kâo thâo rup hơbŏ kơ sa tơlơi khăp klă tum, tơdang pơrơđah rai tơlơi khăp hlong lar Ñu hơmâo pha brơi kơ kâo (lăng I Yôhan 4:17-19)

Kar hăng pô čih hră Tơlơi Adoh Hơđăp hơmâo alum pơđur brơi kơ kâo, Khua Yang “Pơhlao brơi pran jua rơngot hơning laih anŭn pŏn brơi khul rơka kơ ƀing gơñu. (Tơlơi Adoh hơđăp 147: 3)

Pluh thŭn tơdơi, kâo hơmâo bưp pô đah rơkơi, ră anai ñu jing rơkơi kâo. Kâo hơmâo tơlơi dưi, laih anŭn tŭ mă tơlơi yom tơdang jing amĭ rong kơ dua čô ană đah rơkơi ñu – ană đah rơkơi bơrơhmač, tui gưt laih anŭn khăp kơ kâo kar hăng amĭ ñu sĭt. Khua Yang hơmâo laĭ glaĭ tơlơi kâo iâu laĭ hiam hloh abih bang.
Kâo aka pơmĭn nao kơ tơlơi hơdip hiam klă kar hăng anai ôh. Yua mơng tơlơi gir dŏ tơguan, pơhlao amăng Khua Yang, kâo hơmâo tŭ mă tơlơi hơk mơak prŏng tơdang dưi čem rong sang anŏ mơyun hiam Khua Yang hơmâo pha brơi kơ kâo – rĭm hrơi hơdip hăng tơlơi khăp Khua Yang Yêsu găn mơng boh pơhiăp laih anŭn bruă ngă kâo. Hrơi anai, čang rơmang ƀing ta ăt đaŏ kơjăp Khua Yang či laĭ glaĭ tơlơi ƀing ta iâu laĭ laih anŭn pơhlao hĭ tơlơi rơngot ruă amăng tơlơi hơdip ƀing ta. “Rơkâo bĕ, ƀing gih či hơmâo; kơsem bĕ, ƀing gih či ƀuh; khŏk bah amăng bĕ, Ơi Adai či pŏk brơi kơ ƀing gih yơh.” (Mathiơ 7:7)
Hơdră jơlan Khua Yang laĭ glaĭ nang ai ƀu djơ̆ kar hăng tơlơi ƀing ta pơmĭn ôh, samơ̆ sĭt ñu či ngă pơgiơ̆ng hĭ tơlơi pơmĭn kiăng ƀing ta amăng hrơi mông Ñu kiăng. Rơkâo bĕ Khua Yang yua hrơi mông ƀing ta dŏ tơguan anai kiăng kơ pơhlao hĭ pran jua ih, laih anŭn pơtô kơ ih hơdôm tơlơi kơphrâo kơ Khua Yang.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ hơmâo hơmư̆ tơlơi kâo iâu laĭ. Bơni kơ Khua Yang yua kơ hơmâo laĭ glaĭ tơlơi kâo iâu laĭ amăng hrơi mông hiam klă Ñu. Rơkâo Khua Yang djru ƀing gơmơi dưi lui hĭ tơlơi kiăng gơmơi pô laih anŭn đaŏ kơnang kơ hơdră jơlan yom pơphăn Ih hơmâo ngă brơi kơ tơlơi hơdip kâo. Rơkâo ih pơhlao hĭ hơdôm tơlơi ruă rơngot amăng pran jua ƀing gơmơi, kiăng kơ ƀing gơmơi dưi tŭ mă tơlơi mơyun hiam tơdang Ih hơmâo laĭ glăi kơ tơlơi ƀing gơmơi iâu laĭ. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, ƀing ta hơmâo hơdôm tơlơi rơkâo kơwưh Khua Yang aka laĭ glaĭ ôh? Čang rơmang ƀing ta ƀu pơđing, ƀu rơngiă tơlơi čang rơmang ôh, samơ̆ nanao gir run, nanao rơkâo hơduah. Mơak bĕ amăng hrơi mông dŏ tơguan, kiăng kơ thâo đaŏ kơnang kơ Khua Yang hăng tơlơi đaŏ kơjăp. Khua Yang hơmâo sa hơdră jơlan hling hlang brơi kơ tơlơi hơdip ƀing ta. Truh mông hiam klă Ñu, Khua Yang či laĭ glăi tơlơi ƀing ta iâu laĭ tui hơdră jơlan hiam hloh kơ tơlơi ƀing ta pơmĭn.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.