Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Ngă hiưm pă kiăng kơ dưi dŏ kơjăp amăng Khua Yang tơdang tơlơi pơlông lăng amăng tơlơi hơdip anai kơsung rai pơ ƀing ta? Ngă hiưm pă kiăng kơ hơdip hơmâo tơlơi tŭ yua brơi kơ Khua Yang, hơdip ngă bơmơak pran jua Khua Yang? Hơdrôm Hră Tơlơi Ơi Adai pơhiăp hơmâo pơthâo brơi kơ ƀing ta thâo, hơdôm tơlơi hơgĕt pơrơđah rai gah rơngiao leng kơ tơbiă rai mơng amăng lăm pran jua. Tui anŭn ƀing ta khŏm kơsem ep glaĭ pran jua, kiăng kơ lăng glaĭ pran jua ƀing ta hlăk hlưm pă?

Hrơi anai, lơ 20/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Lorie Hartshorn tui hăng akŏ tơlơi hrăm KƠSEM EP GLAĬ PRAN JUA

Samơ̆ ƀing mơnuih tŭ mă pơjeh amăng lŏn hiam jing ƀing hơmư̆ boh pơhiăp laih anŭn mă tŭ gơ̆, hăng hơmâo mơboh sa asar lĕ ƀơi lŏn hiam, jing kar hăng ƀing mơnuih hơmư̆ hiăp pơtô, tŭ mă hăng mơboh, sa asar hơmâo hĭ klâo pluh, năm pluh, laih anŭn sa rơtuh.” (Markôs 4:20)

Ama kao hơmâo tơlơi ruă atai boh, ñu khŏm djă ba gơnam djru kơ atai boh ñu. Tơlơi anŭn ngă kơ ama kâo mưn ƀu mơak ôh, samơ̆ ñu ăt mơak djă ba gơnam anŭn ƀơi drơi jăn ñu yua kơ nai ia jrao kiăng thâo krăn kơ atai boh ñu, mơng anŭn či hơmâo hơdră jơlan pơkra brơi kơ tơlơi ruă ñu.

Tơlơi anai ngă kơ kâo pơmĭn nao kơ tơlơi kơsem ep glaĭ pran jua ƀing ta hăng Khua Yang. Amăng hră Markô črăn 4, Khua Yang ră ruai brơi kơ ƀing ding kơna Ñu kơ 4 mơta lŏn. Amăng tơlơi ră ruai anai, Khua Yang Yêsu ruai glaĭ kơ sa čô mơnuih nao sai pơjeh, laih anŭn pơjeh lĕ trŭn amăng pă mơta lŏn pha ra. Pơjeh amăng tơlơi ră ruai anai jing boh pơhiăp Khua Yang. Djơ̆ mơ̆ Boh Pơhiăp Khua Yang či tơma dlăm amăng tơlơi pơmĭn laih anŭn pran jua kơ ƀing mơnuih hơmư̆ asăp Ñu laih anŭn pơblih tơlơi hơdip ƀing gơñu? Ƀôdah ƀing gơñu či đuaĭ hĭ, wơr hơbit hĭ hơdôm tơlơi ƀing gơñu hơmâo hrăm laih? Ƀing ta hơdip hiưm pă hăng Boh Pơhiăp Ơi Adai?

Pơjeh pơdai hơmâo lĕ trŭn amăng pă mơta lŏn anai: hơmâo đơđa pơjeh lĕ ƀơi jơlan, đơđa lĕ ƀơi boh pơtâo, đơđa lĕ ƀơi pum drơi, đơđa lĕ ƀơi lŏn hiam. Anai jing hơdôm tơlơi tơña kiăng kơ ƀing ta pơmĭn glaĭ kơ tơlơi hơdip ƀing ta jing mơta lŏn hơgĕt. Pran jua ih hiưm pă tơdang hơmư̆ Boh Pơhiăp Khua Yang?
Tơdang hơmư̆ laih anŭn đok Boh Pơhiăp Khua Yang ih či ngă hiưm pă?

Hơmư̆ Boh Pơhiăp Khua Yang samơ̆ ƀu hơmâo tơlơi pơblih amăng pran jua ôh
Hơmư̆ laih anŭn čơdơ̆ng tŭ mă Boh Pơhiăp Khua Yang, samơ̆ tơl tơlơi lông lăng truh ƀing ta ƀu đaŏ kơ Boh Pơhiăp Khua Yang dơ̆ng tah.

Hơmư̆ Boh Pơhiăp Khua Yang samơ̆ ih ăt dŏ ƀlơ̆ng bơngơ̆t kơ tơlơi hơdip anai laih anŭn hưp ham kiăng kơ lu tơlơi pơkŏn dơ̆ng yom hloh.

Hơmư̆ asăp Khua Yang, tŭ mă tơlơi sĭt mơng Khua Yang, kơđŏm dlăm amăng tơlơi pơmĭn laih anŭn pran jua kiăng kơ Boh Pơhiăp Khua Yang pơblih pran jua ih.

Tui anŭn tơdang hơmư̆ Boh Pơhiăp Khua Yang pran jua ih lŏm kơ črăn hơgĕt amăng pă črăn anai? Pơsĭt bĕ hăng Khua Yang laih anŭn hăng ih pô. Pran jua ih hăng Khua Yang jing mơta lŏn pơpă? Čang rơmang ih lŏm kơ mơta lŏn tal pă – hơmư̆ asăp Khua Yang laih anŭn tơbiă rai lu boh than yua kơ pran jua ih tŭ mă Boh Pơhiăp Khua Yang. Khua Yang Yêsu hơmâo pơhiăp nao kơ boh than tơdang hơmư̆ Boh Pơhiăp Khua Yang hơmâo čih amăng hră Markôs 4:20:

“Samơ̆ ƀing mơnuih tŭ mă pơjeh amăng lŏn hiam jing ƀing hơmư̆ boh pơhiăp laih anŭn mă tŭ gơ̆, hăng hơmâo mơboh sa asar lĕ ƀơi lŏn hiam, jing kar hăng ƀing mơnuih hơmư̆ hiăp pơtô, tŭ mă hăng mơboh, sa asar hơmâo hĭ klâo pluh, năm pluh, laih anŭn sa rơtuh.”

Boh Pơhiăp Ơi Adai hơmâo brơi kơ ƀing ta thâo kơ sa čô hơmâo pran jua hiam, či hơk mơak tŭ mă laih anŭn gưt tui Boh Pơhiăp Ơi Adai, anŭn jing hơdră jơlan kiăng kơ dưi hơdip hơmâo boh than hiam. Boh Pơhiăp Khua Yang amăng hră Galati 5:22-23 hơmâo laĭ nao kơ tơlơi hơdip khŏm hơmâo boh than Yang Bơngăt Hiam amăng pran jua ƀing ta:

“Samơ̆ boh mơ̆ng Yang Bơngăt Hiam jing: Tơlơi khăp, tơlơi hơ̆k mơak, tơlơi rơnŭk rơnua, tơlơi gir run, tơlơi klă djrưng, tơlơi hiam klă, tơlơi tŏng ten, tơlơi tơdu rơun, tơlơi djơ̆ hơnơ̆ng. Ƀu hơmâo ôh tơlơi juăt khă khul tơlơi kar hăng anŭn”

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih hơmâo pha brơi Boh Pơhiăp Ih kơ ƀing gơmơi đŏk, pơhrăm, laih anŭn pơmĭn, ngă tui kiăng kơ ƀing gơmơi dưi tŭ mă tơlơi mơyun hiam Khua Yang pha brơi. Rơkâo Khua Yang ngă brơi pran jua kâo hơmâo tơlơi tơdu rơun kiăng kơ kâo dưi tŭ mă tơlơi sĭt amăng Boh Pơhiăp Ih laih anŭn tơbiă rai lu boh than. Rơkâo Boh Pơhiăp Khua Yang pơblih pran jua kâo, djru kâo dưi găn rơgao hĭ tơlơi ƀlơ̆ng bơngơ̆t amăng tơlơi hơdip anai laih anŭn kơnang kơ Khua Yang kiăng kơ dưi dŏ kơjăp amăng tơlơi đaŏ. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, tơlơi kơsem ep glaĭ drơi jăn gah bơngăt ƀing ta jing yom biă mă kơ sa čô pô đaŏ Yang Krist. Kiăng kơ nanao dưi hơmâo boh than brơi kơ Khua Yang ƀing ta khŏm čem rong pran jua ƀing ta laih anŭn ngă tui Boh Pơhiăp Khua Yang. Bruă blŭng hlâo amăng sa hrơi ƀing ta khŏm ngă anŭn jing đŏk, hrăm, pơmĭn laih anŭn ngă tui Boh Pơhiăp Khua Yang. Pơyơr bĕ tơlơi hơdip ƀing ta brơi kơ Khua Yang yua, kiăng kơ dưi tơbiă rai boh than hiam brơi kơ Khua Yang.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.