Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Amăng tơlơi truh ăt hmâo mơ̆n jơlan, amăng tơlơi rơngiă hĭ tơlơi čang rơmang nanao hmâo tơlơi bơngač kơ tơlơi čang rơmang laih anŭn amăng tơlơi kơnăm mơmŏt jing mông ƀing ta kiăng biă mă kơ tơlơi bơngač. Khua Yang Yêsu jing tơlơi bơngač laih anŭn tơlơi sĭt brơi kơ ană mơnuih mơnam. Khua Yang pha kơ ƀing ta hrơi mông hăng mông găl kiăng kơ ƀing ta kơhmal hăng đaŏ tŭ jum Ñu. Wơ̆t dah hlăk dŏ amăng tơlơi tơnap tap biă mă ƀing ta ăt hơduah sem ƀuh tơlơi rơnŭk rơnua hăng tơlơi čang rơmang tơdang hmâo Khua Yang dŏ hrŏm hơbĭt.

Hrơi anai, lơ 21/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Bruce C. Swaffield tui hăng akŏ tơlơi hrăm TƠLƠI BƠNGAČ PƠČRANG AMĂNG TƠLƠI KƠNĂM MƠMŎT

“Kâo jing tơlơi bơngač kơ lŏn tơnah, hlơi pô đuaĭ tui Kâo ñu ƀu či rơbat amăng tơlơi kơnăm mơmŏt ôh, samơ̆ či hmâo tơlơi bơngač kơ tơlơi hơdip.” (Yôhan 8:12)

Tơlơi pơthâo kơ tơlơi truh amăng lŏn tơnah anai ngă kơ ƀing ta huĭ hiư̆t. Bruă kơ ƀing ta dưi ngă jing đuaĭ nao Ơi Adai kơwưh rơkâo kơ Ñu pha brơi kơ ƀing ta pran kơtang, tơlơi thâo hluh kơ tơlơi čang rơmang ƀơi Ñu. Hloh kơ abih bang bruă, ƀing khŏm djă kơjăp Khua Yang hrup hăng boh kơ Tơlơi Adoh ‘Bơngăt kâo kơnang ƀơi Yêsu’ hmâo čih mơ̆ng Edward Mote hăng khul boh pơhiăp tui anai: “Tơdah kơnăm tit kâo ƀu huĭ ôh, yua kơ Yêsu dŏ jĕ kâo laih. Ia lip rơbŭ kơthel ăt kâo dŏ hiam, Yêsu brơi kâo dŏ kơjăp nanao. Ƀơi ngŏ boh poqtâo Yêsu kâo dŏ. Abih bang lŏn pơkŏn hrup hăng lŏn čuah. Abih bang lŏn pơkŏn hrup hăng lŏn čuah.”

Jing ƀing đaŏ, ƀing ta khŏm gưt tui Boh Pơhiăp Khua Yang laih anŭn pơčrang tơlơi bơngač Ñu amăng lŏn tơnah bă tơlơi kơnăm mơmŏt anai. Samơ̆ yang sat nanao hơduah jơlan pơgăn ƀing ta pơčrang tơlơi bơngač kơ tơlơi sĭt Khua Yang brơi kơ lŏn tơnah anai. Wơ̆t kơ tơlơi pơblah wang, tơlơi ruă duam, tơlơi truh mơ̆ng ƀing mơnuih sat, tơlơi tơnap tap truh mơ̆ng yang đar ngă kơ rơbâo rơbăn ană mơnuih djai ăt nanao dŏ hmâo tơlơi bơngač kơ tơlơi čang rơmang brơi kơ ană mơnuih amăng lŏn tơnah anai. Hnŭn jing tơlơi bơngač brơi kơ ƀing răm rơngiă. Hnŭn ăt jing tơlơi bơngač brơi kơ ƀing dŏ amăng tơlơi hơdip tơnap tap. Hloh kơ anŭn dơ̆ng, hnŭn ăt jing tơlơi čang rơmang brơi kơ ƀing kiăng hmâo tơlơi pơsuaih laih anŭn tơlơi pơalum. Hnŭn ăt jing tơlơi čang rơmang brơi kơ ƀing čang rơmang hmâo tơlơi rơnŭk roanua. Wơ̆t kơ anŭn ăt jing tơlơi čang rơmang kiăng kơ lui hĭ brơi kơ ƀing hmâo tơlơi kiăng bơglaĭ kơ tơlơi sat kơ arăng.

Năng ai ƀing ta či tơña kơ Khua Yang yua kơ hơgĕt Ñu brơi tơlơi hơdip bă tơlơi kơnăm mơmŏt hăng tơlơi truh sat mơ̆ng ƀing sat ƀai ngă hmâo truh amăng djŏp djang anih? Yua kơ hơgĕt Ñu ƀu pơgăn kơ khul tơlơi pơdjai ană mơnuih, kơ khul tơlơi pơdjai arăng hăng boh đôh? Yua kơ hơgĕt Ñu brơi yang sat ngă bruă hăng hmâo tơlơi dưi hĭ kar hăng anŭn?

Samơ̆ pơmĭn kar hăng anŭn jing tơlơi soh glaĭ. Yang sat ƀu dưi hĭ ôh yua kơ Boh Pơhiăp Khua Yang amăng Hră Ơi Adai Pơhiăp brơi kơ ƀing ta thâo Ơi Adai či dưi hĭ abih bang laih anŭn Ñu či gĭt gai nanao hlŏng lar ƀơi lŏn tơnah anai. Ơi Adai nanao jing Pô dưi hĭ amăng abih bang tơlơi truh. Khua Yang hmâo pơhaih laih tơlơi anŭn rơbeh kơ 2000 thŭn tơdang brơi kơ Khua Yang hơdip glaĭ tơdơi kơ klâo hrơi Ñu tŭ tơlơi djai laih anŭn arăng hơdơr Ñu. Năng ai H’Mari, H’Mart, Yôhan hăng lu mơnuih pơkŏn ăt tơña mơ̆n kơ tơlơi tơña kơ ră anai ƀing ta ăt tơña: “Ơi Adai dŏ pơpă amăng tơlơi truh kar hăng anŭn? Yua kơ hơgĕt Khua Yang ƀu ngă ôh bruă kiăng kơ pơblih hĭ tơlơi truh anŭn?”

Samơ̆ biă mă Ơi Adai hmâo ngă laih bruă. Ơi Adai yơh jing Pô hmâo ngă brơi Khua Yang Yêsu hơdip glaĭ laih anŭn pha tơlơi pơklaih brơi kơ ƀing hlơi tŭ jum Ñu găn amăng rĭm rơnŭk thŭn. Kơ tơlơi khăp pap ƀu pơblih Ñu ăt nanao dŏ kơjăp truh kơ hrơi anai. Ơi Adai hmâo laih hơdră song mă kơ ƀing tŭ-ư đaŏ kơ Pô Pơklaih laih anŭn ăt jing Pô ba rai tơlơi bơngač truh kơ ƀing gơñu. Sa čô pô pơblang Hră Ơi Adai Pơhiăp hmâo čih: “Yang Krist jing tơlơi bơngač kơ lŏn tơnah. Ơi Adai yơh jing tơlơi bơngač laih anŭn Yang Krist jing rup Ơi Adai ƀu dưi thâo ƀuh. Yang hrơi pơčrang tơlơi bơngač brơi kơ djơ̆p lŏn tơnah. Laih anŭn hơjăn Yang Krist yơh jing tơlơi bơngač brơi kơ abih bang ană mơnuih mơnam. Sĭt biă mă tơdah ƀu hmâo tơlơi bơngač abih lŏn tơnah anai dŏ amăng luh kơnăm mơmŏt. Yua kơ anŭn mơ̆n, tơdang Yang Krist rai Ñu ba tơlơi bơngač truh pơ ană mơnuih mơnam” djơ̆ kar hăng boh pơhiăp Khua Yang hmâo čih amăng hră Yôhan 8:12-16.

Ƀing ta yơh jing pô khŏm dưi jing hĭ mơnuih pơčrang tơlơi bơngač Khua Yang brơi kơ lŏn tơnah ani. Ƀing ta ƀu dŏ dơ̆ng hrŏm hơbĭt ôh hăng ƀing mơnuih ngă bruă sat ƀai hăng ngă ƀu rơđah tơlơi bơngač Khua Yang brơi kơ abih bang ană mơnuih mơnam. Sĭt bia mă tơdang ƀing ta dŏ amăng Khua Yang ƀing ta či mă tŭ tơlơi pap laih anŭn tơlơi čang rơmang mơ̆ng Ñu.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih pha brơi tơlơi bơngač pơčrang brơi kơ kâo amăng abih bang tơlơi truh wơ̆t dah kâo dŏ amăng tơlơi tơnap tap ƀôdah tơlơi rơngot hơning. Rơkâo kơ Ih djru kơ kâo nanao hơdip gơ̆ng jơlan brơi kơ Ih hăng pơčrang tơlơi bơngač Ih brơi abih bang mơnuih dŏ jum dar kâo kiăng kơ mơ̆ng anŭn ƀing gơñu ƀu dŏ dơ̆ng tah amăng tơlơi hơdip kơnăm mơmŏt kơ tơlơi soh samơ̆ hmâo dŏ amăng tơlơi bơngač kơ Ama Amăng Adai Dih. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, hơdră jơlan Ơi Adai nanao rơgao hloh kơ abih bang tơlơi thâo hluh kơ ană mơnuih. Ñu ba rai tơlơi rơnŭk rơnua, tơlơi čang rơmang laih anŭn tơlơi hơdip wơ̆t dah dŏ amăng khul tơlơi kơnăm mơmŏt biă mă. Yua kơ anŭn anăm ngă pơrơngiă hĭ ôh kơ tơlơi čang rơmang kơ ƀing ih tui hăng mơta lăng kơ ană mơnuih samơ̆ brơi lăng bĕ abih bang bruă tui hăng mơta Khua Yang lăng. Brơi nanao pơčrăng tơlơi bơngač Ñu găn mơ̆ng tơlơi đaŏ, kơnuih thâo bơni, tơlơi khăp laih anŭn tơlơi bơngơ̆t nao kơ abih bang mơnuih amăng mông ƀing gơñu tơnap tap hăng rơngiă hĭ tơlơi čang rơmang.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.