Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Amăng jơlan đuaĭ tui Khua Yang, ƀu djơ̆ ôh rĭm wơ̆t ƀing ta ăt ngă djơ̆ tui boh pơhiăp Ñu atăt črâo. Samơ̆ Ơi Adai ăt dŏ nanao tŭ mă hăng pap brơi abih bang tơlơi soh tơdang ƀing ta kơhmal hăng Ñu. Ƀing ta ƀu djơ̆ ôh kla nua kiăng dưi tŭ mă tơlơi khăp laih anŭn tơlơi pap mơ̆ng Khua Yang samơ̆ Ñu hmâo pha brơi đôč đač kơ ƀing ta.

Hrơi anai, lơ 22/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Cathy Irvin tui hăng akŏ tơlơi hrăm TƠLƠI PAP PRŎNG PRIN.

“Kiăng kơ ƀing ta pơ-ư bơni kơ tơlơi pap guh kơang Ñu hmâo pha brơi đôč kơ ƀing ta amăng Ană Ñu khăp hơeng biă mă.” (Êphêsô 1:6)

Kâo hăng tơčo đah kơmơi kâo 2 thŭn mŭt nao amăng sang sĭ pơdro gơnam mơ̆ng čar tač rơngiao. Kâo pioh tơčo kâo dŏ amăng deh trut yua kơ tơdah ƀu răng či hmâo khul gơnam yom pơčah. Samơ̆ kâo ƀu thâo klă tơčo kâo hluh mơ̆ kơ tơlơi kâo pơhiăp. Samơ̆ kâo lăng wai abih bang hăng tơlơi djrưng răng, wơ̆t kơ tơngan anĕt aneo kơ tơčo kâo. Yua kơ abih bang bruă tơčo kâo ăt dưi mơ̆n ruaih djơ̆ khul gơnam hmâo bă ia khuôr, khul gơnam tañ pơčah hmâo dưm pioh amăng anih pioh kơ mơta ñu dưi lăng ƀuh.

Tơdơi kơ ƀiă mơnit mông sem hơduah, kâo dŏ dơ̆ng glaĭ ƀơi anih pioh gơnam kiăng kơ blơi hmâo pioh hăng ngŏ. Kâo kiăng yơr nao mă get mơñum ia hrŏm hăng kơčŏk kơčai hmâo dăp dưm đŭt hăng ngŏ. Tơdang kâo mă ñu tui anŭn yơh get jĕ giăm lĕ trŭn ƀơi lŏn laih anŭn kơčŏk kơčai ƀơi anih pioh hăng ngŏ ăt pơčah lĕ trŭn amăng kra sang. “Yă ngă pơčah kơčŏk laih. Kơčŏk yă ngă pơčah yơh” – tơčo kâo ur đĭ.
Kiăng kơ kla glaĭ gơnam kâo ngă răm tui anŭn yơh kâo tŭ ư laih kâo či blơi get hăng kơčŏk pơčah anŭn. Samơ̆ hmâo sa čô sĭ gơnam amăng anŭn laĭ hăng kâo tui anai: “Ih ƀu añong brơi prăk kla glaĭ kơ kơčŏk pơčah anŭn. Hnŭn kơnơ̆ng jing tơlơi truh đôč.”

Hlăk anŭn kâo hling hlang hăng khul pô sĭ gơnam laĭ. Samơ̆ kâo ăt dŏ pơhiăp: “Kâo či blơi ñu.” Samơ̆ ñu ăt hơngah: “Ih ƀu añong ôh ngă hiư̆m anŭn. Hnŭn jing tơlơi truh ƀu pơ rơ̆ng ôh. Laih anŭn kâo mơak yua kơ ih hăng čơđai ƀu hmâo tơlơi truh, ƀu hmâo hneč pơčah ngă ruă kơ tơngan.” Tơdang hmư̆ pô sĭ laĭ kar hăng anŭn, kâo klao laih anŭn kơnang kơ ñu mă get mơñum ia pioh pơanih brơi prăk tŏ tui kâo nao blơi gơnam.

Tơčo kâo lăng ƀuh boh kơčai wil hơhuč. Yua kơ ñu kiăng lăng tui anŭn yơh kâo mă tơbiă sa boh amăng hruh. Kâo brơi kơ ñu djă boh kơčai wil laih anŭn kâo djă kơjăp tơngan ñu. Tơdang kâo djă kơjăp tơngan tơčo kâo tui anŭn yơh tơčo kâo dưi mưn thâo boh wil anŭn ƀu djơ̆ ôh ngă hăng kaosu samơ̆ ñu ngă hăng kơčai amuñ pơčah. Yua kơ anŭn, kâo pơmĭn anai jing hơdră hiam kiăng pơtô kơ tơčo kâo mưn thâo kơčai. Ñu djă boh kơčai wil hăng tơlơi răng laih anŭn kâo pŏk hruh kiăng kơ pioh glaĭ ñu amăng hruh ñu.

Tŏ tui tơdơi kơ anŭn, tơčo kâo djă sa boh wil pơkŏn samơ̆ tal anai ñu lĕ trŭn ƀơi lŏn. Ñu kơtuă yơr tơngan klŏp hĭ amăng bah ñu laih anŭn pơhiăp: “Kâo ngă pơčah yơh.” Kâo laĭ hăng ñu: “Sĭt biă mă, ih hmâo ngă pơčah.” Hlăk mông anŭn, kâo rơbat nao pơ pô sĭ gơnam hăng pơthâo brơi kơ ñu kơ bruă anŭn kiăng kơ brơi prăk kơ gơnam pơčah anŭn. Tơdơi kơ anŭn, kâo tŏ tui mă thim 3 boh gơnam dơ̆ng laih anŭn nao pơ anih brơi prăk kiăng kơ brơi prăk. Kâo laĭ hăng pô mă prăk kâo khŏm tơbiă đuaĭ tañ mơtam yơh tơdah ƀu tơbiă đuaĭ tañ či hmâo tơhnal dơ̆ng.

Tơdang hmư̆ kâo pơhiăp kar hăng anŭn, dua čô sĭ gơnam klao, wơ̆t tơngan hăng gơmơi laih anŭn laĭ: “Ih anăm ƀlơ̆ng ôh kơ tơlơi anŭn. Ƀu hmâo tơlơi hơgĕt truh prŏng ôh.” Ƀing gơñu ăt dŏ pơhiăp hăng kâo: “Ƀing gơmơi hơ̆k mơak yua kơ hmâo bưp kơ sa čô čơđai amuñ khăp kar hăng anŭn.” Kơnuih mơak kơ pô sĭ pơdro, ngă kơ kâo hmâo tơlơi pơtrŭt amăng tơlơi nao blơi gơnam hmâo tơlơi truh.

Găn mơ̆ng bruă anai, kâo pơmĭn lu kơ hơdră jơlan Ơi Adai hmâo ngă hăng kâo. Kâo thâo krăn tăp năng ƀing ta ngă soh glaĭ laih anŭn ƀu djơ̆ rĭm mông ƀing ta nanao ngă djơ̆ tui hăng boh pơhiăp Ñu atăt črâo. Samơ̆ Ñu klao laih anŭn pơhiăp: “Huai gơgĕt ôh ană ah.” Bơni kơ Khua Yang yua kơ amăng tơlơi truh kar hăng anŭn Ñu djru kâo thâo ƀuh glaĭ sĭt mơyun hiam biă mă tơdang tŭ mă tơlơi pap prŏng prĭn mơ̆ng Ñu.

Khua ding kơna Pôl hmâo mưn găn laih tơlơi pap prŏng prĭn Khua Yang hmâo pioh brơi kơ ñu amăng II Kôrantô 12:9: “Samơ̆ Ñu laĭ: “Tơlơi pap Kâo djŏp laih kơ ih, yua kơ tơlơi dưi kơtang Kâo dưi jing tum klă amăng tơlơi tơdu ih.” Yua kơ anŭn yơh kâo hơ̆k mơak biă mă pơ-ư kâo pô kơ khul tơlơi tơdu kâo, kiăng kơ tơlơi dưi kơtang Yang Krist dưi dŏ amăng kâo.”

Biă mă, hmâo đơđa anih sĭ pơdro gơnam hmâo tơlơi pơkă: “Tơdah ƀing ih ngă pơčah gơnam pă ƀing ih khŏm blơi gơnam anŭn.” Tơdang pơmĭn nao bruă kâo ƀu añong ôh blơi gơnam ƀing gơmơi ngă pơčah kâo mưn ƀuh tơlơi pap Ơi Adai hmâo pha brơi kâo prŏng prin biă mă. Bơni kơ Khua Yang yua kơ kâo ƀu khŏm blơi ôh kơ gơnam kâo ƀu añong blơi ôh. Năng ai tơdơi dơ̆ng kâo či nao blơi gơnam hơjăn păn kâo laih anŭn iâu laĭ hăng Khua Yang kâo ƀu ngă pơčah gơnam pă dơ̆ng tah.

Ƀing ih pơmĭn nao mơ̆ anih Plei Hiam hrup hăng sa anih sĭ pơdro gơnam mơ̆? Ƀing ta ƀu añong ôh joh nua kiăng kơ dưi tŭ mă tơlơi khăp laih anŭn tơlơi pap mơ̆ng Khua Yang samơ̆ Ñu hmâo pha brơi đôč đač.

“Kiăng kơ ƀing ta pơ-ư bơni kơ tơlơi pap guh kơang Ñu hmâo pha brơi đôč kơ ƀing ta amăng Ană Ñu khăp hơeng biă mă.” (Êphêsô 1:6)

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih hmâo yua tơlơi pơhrăm amăng hrơi anai pơhơdơr kâo hơdơr kơ tơlơi khăp laih anŭn tơlơi pap prŏng prin Ñu hmâo pha brơi kâo. Rơkâo kơ Ih djru kơ kâo nanao thâo bơni kơ Ih laih anŭn hơdip amăng tơlơi pap mơyang anai. Rơkâo kơ Ih djru kơ kâo khĭn amăng bruă pơpha tơlơi pap Ih brơi kơ ƀing mơnuih aka thâo krăn anăn Ih amăng anŭn jing mơnuih amăng sang anŏ, gơyŭt, ƀing mă bruă hrŏm hơbĭt hăng kâo. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, jing ană bă kơ Khua Yang ƀing ta hmâo tŭ mă tơlơi pap Ñu pha brơi đôč đač. Wơ̆t tơlơi hơdip rơgao kơ ƀing ta hiư̆m pă, khul tơlơi soh glaĭ ƀing ta ngă hiư̆m pă Ñu ăt dŏ khăp kơ ƀing ta laih anŭn yap ƀing ta jing tơpă yua mơ̆ng tơlơi pap Ñu, bruă ƀing ta ngă kơnơ̆ng kơhmal hăng đuaĭ nao pơ Ñu. Yua kơ anŭn, brơi hơdip laih anŭn pơrơđah bĕ pran jua thâo bơni kơ Khua Yang amăng bruă ngă gơ̆ng jơlan hăng pơhaih tơlơi khăp Ñu kiăng kơ lu mơnuih tŭ mă tơlơi pap mơ̆ng Ñu.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.