Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Tơdang hmâo lu mơnuih tơña, tơña kơ tơlơi đaŏ, ƀôdah tơña kơ khul tơlơi tơña tơnap kiăng kơ ƀu thâo laĭ glaĭ ƀing ta ngă hiư̆m pă lĕ? Khua Yang Yêsu laĭ glaĭ hăng ƀing mơnuih tơña Ñu hăng tơlơi kơhnâo rơgơi. Ƀu djơ̆ kar hăng anŭn đôč ôh, Ñu tơña glaĭ ƀing gơñu, lăng lăng ƀing gơñu hluh mơ̆ khul tơlơi sĭt amăng Hră Ơi Adai Pơhiăp. Amăng Khua Yang Yêsu, ƀing ta hmâo abih tơlơi laĭ glaĭ kiăng yaih pơblang kơ tơlơi đaŏ.

Hrơi anai, lơ 25/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Helen Ryser Smith tui hăng akŏ tơlơi hrăm TƠÑA KHUA YANG.

“Ƀu hmâo sa čô dưi laĭ glaĭ kơ Ñu dơ̆ng ôh, laih anŭn čơdơ̆ng mơ̆ng hrơi anŭn ƀu hmâo hlơi pô khĭn tơña Ñu sa mơta tơlơi hơgĕt dơ̆ng ôh.” (Mathiơ 22:46)

Tơdơi kơ ƀing Pharasi hơduah hơdră jơlan mơneč Khua Yang Yêsu amăng bruă tơña kơ Ñu dưi mơ̆ duh jia kơ Sêsar, Hră Ơi Adai Pơhiăp čih ruai dơ̆ng kơ tơlơi ră ruai kơ mơnuih Sadusi rai laih anŭn hơduah hơdră jơlan ngă tơnap kơ Khua Yang. Anai jing tơpul mơnuih ƀu đaŏ kơ tơlơi hơdip glaĭ yua kơ anŭn ƀing gơñu tơña kơ Khua Yang tơdah sa čô đah bơnai mă dŏ 7 čô rơkơi, tui anŭn yơh tơdơi kơ hơdip glaĭ đah kơmơi anŭn jing bơnai kơ hlơi.

Kâo khưp pran jua biă mă kơ tơlơi Khua Yang laĭ glaĭ hăng ƀing mơnuih kiăng ƀơč mơneč Ñu. Amăng hrơi anŭn Khua Yang Yêsu pơtô kơ ƀing Sadusi kơ tơlơi pơhrăm kơ Plei Hiam. Ñu laĭ amăng Mathiơ 22:29:
“Ƀing gih tơhwơl laih yua kơ ƀing gih ƀu thâo hluh ôh Hră Ơi Adai Pơhiăp, kŏn thâo hluh lơi tơlơi dưi mơyang Ơi Adai.”

Khua Yang Yêsu djru kơ ƀing gơñu hluh thim kơ tơlơi hơdip glaĭ laih anŭn yaih pơblang rơđah brơi kơ ƀing gơñu thâo ƀu hmâo ôh tơlơi dŏ rơkơi bơnai amăng anih Plei Hiam. Yua kơ anŭn, tơlơi gơñu tơña jing đôč đač.

“Bơ kơ tơlơi ƀing djai hơdip glaĭ dơ̆ng, ƀing gih aka lăng ôh hă Hră Ơi Adai hmâo laĭ laih kơ ƀing gih, ‘Kâo jing Ơi Adai kơ Abraham, Ơi Adai kơ Isak, laih anŭn Ơi Adai kơ Yakôp?’ Ñu ƀu djơ̆ jing Ơi Adai kơ ƀing djai ôh, samơ̆ jing Ơi Adai kơ ƀing hơdip.”

Sĭt bia mă kâo kiăng lăng ƀuh ƀŏ mơta kơ ƀing Sadusi hlăk amăng mông anŭn. Yua kơ tơdơi kơ hmư̆ Khua Yang Yêsu laĭ kar hăng anŭn ƀing mơnuih lu hling hlang kơtuă yua kơ tơlơi Ñu pơtô (jơlan 33). Khua Yang Yêsu hluh rơđah Hră Ơi Adai Pơhiăp kơ ƀing Yuđa laih anŭn pơblang tơlơi sĭt kơ Ơi Adai rơđah rơđong hăng khưp djơ̆ pran jua.

Tui anŭn tơlơi ră ruai tŏ tui tơdang ƀing Pharisi, sa tơpul tơlơi đaŏ pơkŏn pơgop glaĭ rai kiăng kơ lông lăng Khua Yang Yêsu. Sa čô thâo tơlơi juăt amăng tơpul ƀing Pharisi tơña kơ Khua Yang Yêsu kơ tơlơi juăt pă yom hloh amăng tơlơi juăt (jơlan 36). Kâo pơmĭn Khua Yang Yêsu amuñ đôč laĭ glaĭ kơ tơlơi tơña anai.
Khua Yang Yêsu laĭ glaĭ: “Ih khŏm khăp kơ Khua Yang Ơi Adai ih hăng abih pran jua, hăng abih bơngăt laih anŭn hăng abih tơlơi pơmĭn ih.’ Tơlơi pơtă anŭn jing prŏng hloh laih anŭn yom hloh. Liah anŭn tơlơi pơtă tal dua ăt yom kar hăng anŭn mơ̆n: ‘Ih khŏm khăp kơ pô jum dar ih kar hăng kơ ih pô.”’

Khua Yang Yêsu laĭ tŏ tui hăng ƀing gơñu amăng jơlan 40: “Abih bang tơlơi juăt laih anŭn tơlơi ƀing pô laĭ lui hlâo pơtô leng kơ tơbiă rai mơ̆ng dua tơlơi pơtă anŭn soh sel.”

Laih anŭn Khua Yang Yêsu tơña kơ ƀing Pharisi amăng jơlan 42 tui anai: “Hơgĕt ƀing gih pơmĭn kơ Krist? Ñu jing ană hlơi?” Ƀing gơñu laĭ glaĭ: “Ană Đawit.”

Năng ai Khua Yang Yêsu thâo hlâo ƀing gơñu či laĭ glaĭ hiư̆m pă yua kơ anŭn Ñu tŏ tui tơña kơ ƀing gơñu dua tơlơi tơña dơ̆ng kơ ƀing gơñu ƀu dưi laĭ glaĭ: “Tơdah pơtao Đawit iâu Ñu jing ‘Khua Yang’ hiư̆m Ñu dưi jing ană pơtao anŭn dơ̆ng lĕ?” Tơdơi kơ hmư̆ Ñu tơña kar hăng anŭn năng ai ƀŏ mơta gơñu bă hăng tơlơi hling hlang. Sĭt biă mă, jơlan 46 čih klă rơđah kơ bruă ƀu hmâo hlơi ôh dưi laĭ glaĭ sa boh pơhiăp hăng Khua Yang Yêsu, mơ̆ng anŭn ƀu hmâo hlơi dơ̆ng tah khĭn tơña thim kơ Ñu kơ tơlơi tơña pă dơ̆ng.
Ƀing Pharisi ƀu thâo laĭ glaĭ ôh kơ tơlơi Khua Yang Yêsu tơña kơ ƀing gơñu.

Găn mơ̆ng tơlơi ră ruai anai, sĭt yơh kâo bơni biă mă kơ Khua Yang yua kơ Ñu pha brơi Hră Ơi Adai Pơhiăp jing sŏp hră hmâo lu gơnam yom brơi kơ ƀing ta. Bơni kơ Khua Yang yua kơ Ñu pha brơi Yang Bơngăt Hiam kiăng kơ pơalum, djru laih anŭn pơtô kơ ƀing ta thâo hăng hluh klă rơđah tơlơi sĭt hơgơ̆m amăng Hră Ơi Adai Pơhiăp. Kơ kâo pô hăng pran jua sĭt bơni kơ Ñu laih anŭn kâo kơnơ̆ng kiăng kơ kâo pô dŏ ƀơi tơkai Khua Yang Yêsu kiăng kơ pơđing tơngia hmư̆ Ñu pơtô pơblang kar hăng H’Mari hmâo ngă laih amăng hră Luk 10:39.

Rơkâo ƀing ta pioh mông iâu laĭ hrŏm hơbĭt
Ơ Khua yang, rơkâo kơ Ih djru kâo nanao tŏng ten pơhrăm Boh Pơhiăp Ih kiăng kơ prŏng đĭ tui amăng tơlơi đaŏ, tơlơi thâo hluh kơ Ih. Rơkâo kơ Ih djru kơ kâo nanao prăp rơmĕt kiăng kơ laĭ glaĭ kơ ƀing hlơi pô tơña kơ Ih, kơ Boh Pơhiăp Ih. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, tơlơi sĭt mơ̆ng boh pơhiăp Khua Yang či pơklaih ƀing ta, ba ƀing ta pơ tơlơi rơngai sĭt amăng Ñu. Brơi pơmĭn bĕ boh pơhiăp Khua Yang hrơi hăng mlam, răng gưt tui abih bang tơlơi Khua Yang pơtô kiăng kơ ƀing ta hơdip klă tum amăng jơlan Ñu. Anăm brơi tơlơi pơmĭn tui hăng tơlơi rơgơi kơ ană mơnuih ngă kơ ƀing ta đing Khua Yang samơ̆ nao bĕ pơ Khua Yang, hơduah Ñu laih anŭn tŭ mă tơlơi Ñu atăt ba amăng abih bang bruă.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.