Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Hlơi pô amăng ƀing ta leng hmâo khul tơlơi huĭ hyưt. Khua Yang Yêsu pô ăt huĭ hyưt laih anŭn tơnap tap tơdang khŏm đĭ kơyâo bơrơkal. Wơ̆t tui anŭn, Ñu hmâo ruah glăm mă tơlơi djai ruă nuă kiăng kơ song mă tơlơi soh kơ ană mơnuih. Samơ̆ ƀu dơ̆ng glaĭ ƀơi anŭn đôč ôh, Ñu hmâo hơdip glaĭ hăng dưi hĭ tơlơi djai. Ñu yơh jing Pô pơklaih ƀing ta mơ̆ng abih tơlơi huĭ hyưt.

Hrơi anai, lơ 30/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Dee Aspin tui hăng akŏ tơlơi hrăm PÔ PƠKLAIH ɃING TA MƠ̆NG HUĬ HYƯT

“’Kâo hmâo hơduah rơkâo kơ Yêhôwa laih anŭn Ñu laĭ glaĭ kơ kâo, Pơklaih kâo mơ̆ng khul tơlơi hwĭ hyưt.” (Tơlơi Adoh Hơđăp 34:4)

Kâo khăp lăng phim Mơnuih Čim Dŭng – Mơnuih Đĭ Seh Mlam. Hăng kâo phim anai ƀu djơ̆ jing sa mơnơ̆ng djru tơlơi pơmĭn sôh san ôh samơ̆ ăt jing sa tơlơi pơhrăm kơ kơnuih hơdip. Kâo khăp kơ lu khul mơnuih amăng tơlơi pơdơ̆ng phim wơ̆t hăng tơlơi dưm ră ruai amăng phim mơ̆n.

Čal kâo khăp hloh anŭn jing hlăk pô mŭt rup phŭn, Bruce Wayne, hmâo găn tơlơi pơhrăm kơtraŏ kiăng prăp kơ bruă jao yom amăng tơlơi hơdip ñu – pơkơdơng hăng tơlơi sat. Nai ñu khăng khip tơlư̆ ñu klă anăp hăng tơlơi huĭ bral hloh – “Klă anăp bĕ hăng tơlơi huĭ hyưt ih pô,” yua kơ hơgĕt tơlơi ta huĭ či pơrung ta. Ƀing ta hmâo ƀuh, pô juăt huĭ bral kơ čim dŭng kar hăng Bruce Wayne hnal tuč ăt jing hĭ Mơnuih Čim Dŭng.

Tơlơi anai ngă kơ kâo hơdơr nao kơ Khua Yang Yêsu, laih anŭn Boh Pơhiăp Ñu pơtă kơ ƀing ding kơna kơ tơlơi huĭ hyưt amăng tơlơi hơdip rĭm hrơi. Ñu thâo Ñu Pô dŏ ƀiă hrơi mông ƀơi lŏn. Khua Yang Yêsu khŏm klă anăp hăng tơlơi huĭ hyưt prŏng hloh kơ Ñu Pô hăng abih drơi jan, bơngăt: tơlơi djai laih anŭn tơlơi pơčơlah mơ̆ng Ơi Adai, Ama khăp hơeng.

Tơlơi huĭ hyưt jing sa črăn amăng tơlơi hơdip ană mơnuih, yua kơ anŭn yơh, ñu hmâo laĭ djơ̆ kar hăng sa akŏ yom amăng Hră Ơi Adai Pơhiăp. Ơi Adai thâo rơđah ƀing ta jing hlơi laih anŭn thâo krăn rĭm tơlơi kơƀah tơdu amăng ƀing ta.

Mơ̆ng dŏ čơđai, Đawit thâo krăn kơ tơlơi dưi kơtang mơ̆ng bruă hơduah tơlơi djru mơ̆ng Khua Yang:

“Kâo hmâo hơduah rơkâo kơ Yêhôwa laih anŭn Ñu laĭ glaĭ kơ kâo, Pơklaih kâo mơ̆ng khul tơlơi hwĭ hyưt.” (Tơlơi Adoh Hơđăp 34:4)

Amăng tơdrŏn har hyưt huĭ, tơlơi hơdip Đawit bưp lu tơlơi arưp aram jum dar, mơ̆ng mơhao ia truh kơ khul hlô mơnơ̆ng glai. Ñu khŏm klă anăp hăng lu tơlơi lông lăng ƀu kơnơ̆ng rai mơ̆ng hlô mơnơ̆ng bơ mơ̆ng ană mơnuih – ƀing mơnuih tui hơduah ñu tui hăng asăp pơkiaŏ pơtao Sôl.

Amăng Luk 12:5, Khua Yang Yêsu hmâo laĭ kơ tơlơi hyưt huĭ ƀing mơnuih sat pơrăm, ăt hăng mơta tơlơi ƀing ta lăp huĭ:

“Samơ̆ Kâo či pơhaih brơi kơ ƀing gih kơ hlơi pô ƀing gih khŏm hwĭ: Hwĭ bĕ Ơi Adai yua kơ giơ̆ng Ñu hmâo pơdjai ƀing gih, Ñu hmâo tơlơi dưi glŏm hĭ ƀing gih amăng war apui; Djơ̆ yơh, Kâo laĭ kơ ƀing gih, hwĭ bĕ kơ Ñu!”

Mơ̆ng dŏ čơđai, ƀing đah kơmơi nanao kơčăng răng kơ lu tơlơi hyưt jum dar. Dŏ djŏp anih, wơ̆t anih hial mal ƀôdah lu mơnuih, rĭm čô đah kơmơi khŏm hrăm thâo wai ñu pô. Ƀing đah rơkơi ăt kai kaĭ mơ̆n, gơñu ăt khŏm thâo pơgang gơñu pô. Anŭn jing sa črăn pơgang pô bơ kơ rĭm ƀing leng kơ khŏm pơhrăm kiăng kơ hơdip amăng rơnŭk anai.

Amăng tơlơi hơdip bă tơlơi bơblih, amŏn kâo hmâo ƀuh lu tơlơi krip yip huĭ bral biă mă, mơ̆ng thŏng đao tơl truh phao amăng mlam hmư̆ mơ̆ng sang jum dar. Phrâo anai sa čô hlăk krah bưp tơlơi truh yua mơ̆ng tơlơi pơtaih pơčom tơdang ñu rơbat găn ƀơi anăp dua čô tuai hơdip amăng anih hơđơ̆ng gơmơi hlăk hơdip.

Khua Yang Yêsu hmâo klă anăp hăng tơlơi huĭ hyưt kơtang kơtĭt – tơlơi djai ruă laih anŭn tơlơi pơčơlah hăng Ơi Adai Ama. Anŭn jing tơlơi djai kơ asar, bơngăt. Khua Yang Yêsu hmâo glăm tơlơi djai hăng tơlơi ruă nuă, mlâo hañ… kiăng gui tơlơi soh ƀing ta ƀơi kơyâo bơrơkal, laih anŭn pơklaih ƀing mơ̆ng tơlơi răm rai hlŏng lar. Ñu djai kiăng kơ ƀing ta dưi hơdip.

Tơdang klă anăp hăng tơlơi hyưt huĭ kơtang hloh, Khua Yang Yêsu hmâo dưi hĭ amăng tơlơi drưh kơang laih anŭn jing Pô pơklaih ƀing ta mơ̆ng djŏp mơta tơlơi huĭ. Ñu hmâo pơrơgoh laih anŭn pha brơi kơ ƀing ta tơlơi hơdip nanao hlŏng lar, dưi hăng yang jŭ sat amăng tơlơi pơblah kiăng pơklaih bơngăt ƀing ta.

Mơ̆ng anih kơnăm mơmŏt, Ñu hmâo hơdip glaĭ, dưi hăng abih bang. Kơnang mơ̆ng Ñu, ƀing ta ăt dưi hĭ hăng tơlơi djai. Khua Yang hmâo pha brơi kơ ƀing ta tơlơi hơdip hăng tơlơi dưi mơyang hơdip glaĭ Ñu. Ñu jing Pô atăt, Pô pŏk jơlan nao pơ Plei Hiam, anih ƀing ta dưi pŭ đĭ glông hloh khul tal adai drưh kơang.

“Ơ tơlơi djai, pơpă tơlơi dưi ŏng lĕ? Ơ tơlơi djai, pơpă ia bih ŏng lĕ?”(I Kôrantô 15:55)

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih thâo rơđah khul tơlơi hyưt huĭ amăng kâo, khul hlung dlăm kơnăm mơmŏt laih anŭn khul tơlơi truh hyưt hlak kiăng ngă kơ kâo. Čang rơmang tơlơi bơngač hơdip glaĭ Ih Pô pơčrang ƀơi tơlơi hơdip kâo, atăt kâo găn gao hĭ abih čơđong ayăt dưm, kiăng kơ kâo hơdip sa tơlơi hơdip dưi hloh amăng tơlơi dưi mơyang pơklaih Ih. Kâo iâu laĭ amăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, mơ̆ng hlung dlăm kơnăm mơmŏt, Yang Krist hmâo tơgŭ, mă tŭ tơlơi dưi drưh kơang. Kơnang kơ tơlơi pap pơsăn drơi Ñu, ƀing ta ăt dưi găn rơgao hĭ tơlơi djai. Čang rơmang ƀing ta jao pơyơr abih tơlơi hyưt huĭ ta pô đĭ kơ Khua Yang laih anŭn hơdip dưi hloh amăng tơlơi pap pơklaih hiam klă Ñu.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.