Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Tơlơi hơdip jing sa hrơi mông tañ rơgao, ƀu hmâo ôh hlơi dưi weh đuaĭ mơ̆ng tơlơi pơčơlah ruă rơngot tơlơi djai. Samơ̆, amăng kơnăm mŏt tơlơi djai, tơlơi dưi mơyang Hơdip Glaĭ kơ Yang Krist hmâo bang hyu kơ tơlơi pơdơ̆ng phrâo , ba rai kơ ƀing ta tơlơi ƀuăn kơ sa tơlơi hơdip hlŏng lar ƀu thâo bơblih. Amăng tơlơi dưi mơyang hơdip glaĭ, amăng tơlơi khăp laih anŭn tơlơi čang rơmang Khua Yang pha brơi hmâo pơpuh hĭ gơnăm mơmŏt kơ tơlơi djai, ba rai kơ ană mơnuih phŭn tơlơi hơdip hlŏng lar.

Hrơi anai, lơ 31/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Matthew Loomis tui hăng akŏ tơlơi hrăm TƠLƠI DƯI MƠYANG HƠDIP GLAĬ KƠ YANG KRIST

“Samơ̆ ƀing ta jing ană plei pla amăng adai, mơ̆ng anih anŭn ƀing ta dŏ čang tơguan Pô Pơklaih, Khua Yang Yêsu Krist. Ñu či pơplih drơi jan tơdu ƀing ta jing hĭ kar hăng drơi jan guh kơang Ñu, hăng tơlơi dưi mơyang Ñu dưi brơi abih bang mơnơ̆ng mŭt gưt kơ Ñu.” (Philip 3:20-21)

Amăng glo kâo hơdơr glaĭ hlak 10 thŭn, Phĕt Khua Yang Hơdip Glaĭ jing sa hrơi kâo ƀu thâo wơr. Kâo dŏ hơđơ̆ng ƀơi gre sang kơkuh pơpŭ, hơtai boh rơyuh tañ hăng tơlơi mơak ƀu thâo laĭ ôh. Tơdang tơlơi phĕt čơdơ̆ng pơjưh, khua pô pơtô čơdơ̆ng iâu mơthưr arăng mă tŭ tơlơi đaŏ. Kâo čơdơ̆ng prăp pre kơ sa čal phrâo amăng tơlơi hơdip kâo: yak nao pơ anăp laih anŭn pơklă tơlơi đaŏ kâo pô ƀơi anăp Sang Ơi Adai. Ƀu arăng rơmang mơ̆n, tơlơi khưp ư anai kơ kâo hmâo truh djơ̆ amăng hrơi phĕt Khua Yang Hơdip Glaĭ, hrơi pơhơdơr Khua Yang Yêsu hơdip glaĭ.

Bruă pơklă tơlơi đaŏ ƀơi anăp Sang Ơi Adai nang ai tơbiă rai mơ̆ng Boh Pơhiăp Khua Yang amăng Mathiơ 10:32:
“Tui anŭn hlơi pô pơhaih tơlơi ñu đaŏ kơ Kâo ƀơi anăp mơnuih, kar kaĭ mơ̆n Kâo či pơhaih pô anŭn ƀơi anăp Ama Kâo amăng adai mơ̆n.”

Kâo dưi hrăm khul tơlơi anai mơ̆ng nai pơtô Tơlơi Pơhrăm hrơi Juh. Lăng glaĭ hrơi Phĕt Khua Yang Hơdip Glaĭ anŭn, kâo thâo krăn pơjeh Boh Pơhiăp Khua Yang hmâo sai amăng bơngăt jua kâo, laih anŭn čơdơ̆ng čăt đĭ mơ̆ng khul tơlơi pơhrăm yom pơphan anŭn. Anŭn jing khul tơlơi pơhrăm hmâo pơdơ̆ng đĭ tơlơi hơdip kâo hrơi anai.

Kâo yak nao hăng dŏ ber pơ roh gre pơanăp laih anŭn pơhiăp hăng khua pô pơtô kâo kiăng tŭ jum Khua Yang Yêsu jing Pô Pơklaih kơ tơlơi hơdip kâo. Tơdang abih mơnuih adoh giơ̆ng, gơmơi hrŏm hơbĭt tơgŭ, klă anăp hăng phung ƀing djru.

Ƀu kơčăng hơdôm čô mơnuih hmâo ƀŏ mơta amăng sang kơkuh pơpŭ hrơi anŭn – nang ai ha rơtuh mơta lăng nao pơ ƀing gơmơi. Samơ̆ amăng ƀing anŭn, hmâo ƀô̆ mơta sa čô bơ kâo hơdơr nanao: nai pơhrăm Tơlơi Pơhrăm Hrơi Tơjuh kâo.

Tơdang khua pô pơtô pơthâo tơlơi mơak anŭn jing kâo mă tŭ Khua Yang, kâo ƀuh ñu dŏ pơklon hăng klao mơak. Ñu jing pô mơak hloh amăng anih anŭn, bơbă tơlơi sŭ tơdang lăng ƀuh sa amăng “ƀing ană” ñu pơklă tơlơi đaŏ.

Samơ̆ tơlơi ngă kơ kâo pơmĭn nao anŭn jing kâo thâo ñu jing mơnuih ƀu hmâo pran đơi ôh. Amăng phĕt Khua Yang Hơdip Glaĭ thŭn anŭn, ñu hlăk dŏ ƀơi deh arăng trŭt hăng čut mă ƀuk arăng ngă đôč. Ñu ƀu dưi rơbat ôh yua kơ tơlơi ruă kren ƀơ̆ng amăng klang tăng truh čal tuč laih.

Phĕt Khua Yang Hơdip Glaĭ thŭn anŭn mơ̆n jing mông hrơi tuč nuč ñu nao pơ sang jơnŭm. Ñu hmâo djai tơdơi kơanŭn sa hrơi kŏm.

Anŭn jing tal blŭng amăng tơlơi hơdip kâo ƀuh tơlơi hơdip jing tañ rơgao – drơi jan ƀing ta kơnơ̆ng hơdip jang jai.

Kâo thâo krăn yua kơ Boh Pơhiăp Khua Yang ƀuăn hăng ƀing ta anŭn jing tơlơi djai ƀu djơ jing hnal tuč; Ñu ƀuăn pha brơi kơ ƀing ta tơlơi hơdip hlŏng lar găn Pô Pơklaih Khua Yang Yêsu Krist. Tơlơi dưi mơyang hơdip glaĭ Ñu pŏk bah amăng kơ tơlơi čang rơmang brơi kơ abih bang mơnuih.

Boh Pơhiăp Khua Yang amăng Yôhan 11:25-26 pơtrut pơđur ƀing ta:

“Yêsu laĭ kơ gơ̆: “Kâo jing tơlơi hơdip glaĭ laih anŭn tơlơi hơdip. Hlơi pô đaŏ kơ Kâo, ñu či hơdip, wơ̆t dah ñu djai laih; Laih anŭn hlơi pô dŏ hơdip đaŏ kơ Kâo, ñu ƀu či djai ôh. Ih đaŏ tơlơi anŭn mơ̆?”

Hrơi anai jing hrơi Phĕt Khua Yang Hơdip Glaĭ – hrơi yom pơphan kiăng pơhơdơr kơ tơlơi hơdip glaĭ Yang Krist mơ̆ng plei atâo djai, ăt hơ̆k mơak amăng tơlơi ƀuăn Ñu či pha brơi tơlơi hơdip hlŏng lar kơ ƀing hlơi tŭ mă Ñu jing Pô Pơklaih.

Amăng tơlơi sŭ prŏng hrơi Phĕt Khua Yang Hơdip Glaĭ, pran jua kâo bă blai hơ̆k mơak tơdang pơmĭn nao kơ boh pơhiăp Hơdip Glaĭ Khua Yang. Abih bang bơngăt huĭ pơpŭ kơ Khua Yang – kar hăng nai pơhrăm Tơlơi Pơhrăm Hrơi Tơjuh kâo – či hmâo sa hrơi blih drơi jan hơdip glaĭ phrâo phrang, bă blai tơlơi hơdip, ƀu hmâo gleh tơnap ƀôdah ruă duăm. Ƀu hmâo kren ƀơ̆ng, ƀu ruă hơtai boh, ƀu hmâo sa mơta tơlơi hơgĕt ngă kơ ƀing ta tơdu rơbuh tah!

“Samơ̆ ƀing ta jing ană plei pla amăng adai, mơ̆ng anih anŭn ƀing ta dŏ čang tơguan Pô Pơklaih, Khua Yang Yêsu Krist. Ñu či pơplih drơi jan tơdu ƀing ta jing hĭ kar hăng drơi jan guh kơang Ñu, hăng tơlơi dưi mơyang Ñu dưi brơi abih bang mơnơ̆ng mŭt gưt kơ Ñu.” (Philip 3:20-21)

Amăng bơyan Khua Yang Hơdip Glaĭ anai, kâo bă blai tơlơi mơak yua kơ Khua Yang hmâo ba rai kơ kâo sa čô atăt kâo ten ñen biă mă. Ñu hmâo pơtô gơmơi thâo rơđah tơlơi kiăng pia kơ Phĕt Khua Yang Hơdip Glaĭ. Ñu hmâo yua khul tơlơi pap Khua Yang brơi kiăng djru pơtô Boh Pơhiăp Khua Yang laih anŭn khul boh pơhiăp ƀuăn kơ tơlơi dưi mơyang Hơdip Glaĭ rơđah rơđong, rơyuh pran jua gơmơi – ƀing čơđai ƀu thâo phe pho.

Mông anai, kâo kiăng mơĭt boh pơhiăp hăng ƀing nai pơhrăm Tơlơi Pơhrăm Hrơi Tơjuh: Hơđơ̆ng rơnŭk bĕ, yua kơ pran kơtang ih jing khul gač yom man pơdơ̆ng kơ rơnŭk hơdip pơanăp kơtang kơjăp!

Kâo čang rơmang hrơi kâo dưi pơhiăp boh pơhiăp bơni kơ nai pơhrăm Tơlơi Hrăm Hrơi Tơjuh kâo yua kơ gru tŏng ten huĭ pơpŭ ñu – jing apui pơčrang jơlan gơmơi amăng jơlan tơlơi đaŏ.

Yom hloh anŭn jing, kâo bơni kơ tơlơi dưi mơyang Hơdip Glaĭ Khua Yang Yêsu či pŏk mông gal lăp kơ ƀing ta dưi pơbưp laih anŭn hrŏm hơbĭt kơkuh pơpŭ kơ Ñu hlŏng lar ƀu thâo pơjưh.

Rơkâo ƀing ta pioh mông iâu laĭ hrŏm hơbĭt
Kâo hơơč bơni Yang Krist Hơdip Glaĭ, jing Pô dưi hic tơlơi dưi kơ tơlơi djai laih anŭn hơdip glaĭ kiăng pha brơi kơ ƀing ta tơlơi hơdip hlŏng lar. Bơni kơ Ih yua kơ asăp ƀuăn pơdơ̆ng bơrâo laih anŭn phŭn čang rơmang kơjăp bơ Ih hmâo pha brơi kơ rĭm yak amăng tơlơi hơdip gơmơi. Gơmơi ƀuăn pơpŭ bơni kơ anăn Khua Yang Hơdip Glaĭ mơ̆ng hrơi anai tơl truh tơdơi dih. Kâo iâu laĭ amăng anăn Khua Yang Yêsu Krist, Amen.

Ơ abih bang ayŏng amai adơi khap hơeng, Khua Yang Yêsu hmâo hơdip glaĭ dưi hloh kiăng ba kơ ƀing ta boh pơhiăp ƀuăn sĭt kơ tơlơi hơdip hlŏng lar. Boh Pơhiăp ƀuăn anŭn jing tơlơi alŭm yom pơphăn khul bơngăt jua hlăk hơduah tơlơi rơnŭk rơnua tơ̆ng krah tơlơi pơpư̆ mơgơi amăng lŏn tơnah. Sa hrơi anŭn, tơdang Khua Yang rai dơ̆ng, abih bang ƀing ta či dưi pơdơ̆ng pơjing phrâo laih anŭn hơdip dưi hloh amăng tơlơi bơngač drưh kơang Ñu. Hrơi anai, hrŏm hơbĭt adoh bơni bĕ kơ tơlơi dưi mơyang Hơdip Glaĭ Khua Yang, laih anŭn pơyơr ha rơbâo asăp bơni kơ Ñu yua kơ tơlơi čang rơmang prŏng prĭn bơ Ñu hmâo pha brơi laih kơ ƀing ta.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.