Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Vajtswv muaj ib lub suab hu tshwj xeeb heev tseg rau peb txhua txhia tus, thiab tsis yog tias thaum twg peb twb zoo siab rau lub suab hu ntawd. Ntau zaug peb tseem khiav nkaum tes dejnum uas Vajtswv tseg rau peb lub neej vim txaus ntshai heev lossis vim pom tias qhov ntawd tsis phim rau peb. Tiamsis thaum uas peb txiav txim siab ua raws li lub suab hu ntawd, ces peb lub neej thiaj yuav dhau los zoo kawg nkaus thiab muaj nqis rau Vajtswv. 

Hnub no, yog hnub 03/11/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jay Lowder dhau ntawm Zaj kawm

KHIAV NTAWM YUS TES DEJNUM

“Tiamsis Yaunas xav khiav ntawm Vajtswv mus, nws thiaj mus rau lwm qhov lawm. Nws mus rau hauv lub nroog Yaupas; thaum nws mus txog nrad, nws porn ib lub nkoj uas tabtom yuav sawv kev mus rau tim tebchaws Xapees. Nws txawm them nqi nkoj thiab nrog cov neeg ntawd mus rau tim tebchaws Xapees, kom nws nyob deb ntawm tus Tswv” (Yaunas 1:3). 

Vajtswv txib Yaunas mus rau pem lub nroog Ni-ni-ves tiamsis yawg tsis xav mus. Muaj ntau txoj kev xav heev nyob rau ntawm qhov teeb meem no, tiamsis feem ntau cov tub txawg puav leej ntseeg tias qhov uas Yaunas khiav los vim yog cov pej xeem hauv lub nroog Ni-ni-ves no yog cov neeg Yudas tus yeebncuab. Nyob rau hauv zaj xwm txheej no, Yaunas raug muab pov rau hauv dej tom qab uas muaj ib nthwv cua daj cua dub loj heev. Qhov uas yawg raug pov rau hauv hiav txwv yog vim yawg ntshai ua raws li Vajtswv lub suab hu tseg rau yawg lub neej. Ntshai lub neej tom ntej uas Vajtswv twb npaj tseg lawm, yawg thiaj khiav, siv zog kom khiav dhau Vajtswv lub homphiaj. 

Kuv nco ntau xyoo dhau los, kuv paub tias kuv tau hu los ua ib tug tub xa moo zoo mus rau cov neeg uas tsis tau paub txog cawm seej Tswv Yexus. Zoo ib yam li Yaunas, muaj ib lub sijhawm kuv siv zog khiav nkaum Vajtswv lub suab hu tseg rau kuv! Pauv qhov uas ua raws li lub suab hu ntawd, kuv ho mus lees ib txoj haujlwm nyob rau hauv ib lub tsev ua lag luam xa khoom. Kuv yeej tseem nco hnub uas kuv cia li ntsib kuv txiv ib tug phooj ywg. Thaum kuv xa khoom mus txog ntawd, tus txiv ntxawm hais tias: “Jay, koj tab tom ua dab tsi?” Kuv xav tias tsuas yog ib lo lus nug zoo li ib txwm nug xwb. Yog li, kuv thiaj teb: “Kuv tab tom ua haujlwm; kuv tsev neeg yeej tseem noj qab nyob zoo…” tiamsis txiv ntxawm ho hais tias: “Tsis yog nug qhov koj, qhov tseeb tiag koj tab tom ua dab tsi?’ 

Kuv tsis paub yuav hais li cas vim kuv tsis nkag siab txiv ntxawm lo lus nug. Txiv ntxawm hais tias: “Jay, koj yeej paub tias koj tsis yog raug hu los ua txoj haujlwm no. Koj paub tias Vajtswv twb hu koj ua lwm txoj haujlwm lawm. Yog li vim li cas koj ho tsis ua tes haujlwm ntawd?” 

Kuv tsis paub tias kuv yuav teb li cas. Tag nrho hnub ntawd thiab ob peb thiv tom qab thiab, kuv pheej xav ntsoov txog tej lus uas txiv ntxawm tau hais, thiab ua tib zoo tshuaj xyuas vim li cas kuv ho tsis ua raws li lub suab hu tseg rau kuv. Kuv txomnyem heev. Zoo li txhua tus, kuv pom tias qhov uas yus khiav nkaum tes dejnum yeej tsis ua rau kom peb txaus siab li. 

Tshuav koj ne ho zoo li cas? 

Koj puas tab tom khiav tawm ntawm ib tes haujlwm uas Vajtswv xav kom koj ua, khiav nkaum lub suab hu uas Vajtswv tseg rau koj lub neej vim koj ntshai dhau heev lawm? Tej zaug koj yuav ntshai tias tsam yus ua tsis zoo tes haujlwm uas Vajtswv yuam, thiab ntshai tsam koj tej kev siv zog yuav ua tsis tiav, lossis koj yuav cim civ ua rau kom koj txaj muag. 

Koj puas tab tom khiav nkaum koj lub luag haujlwm thiab lub homphiaj uas Vajtswv tau npaj tseg rau koj lub neej – thaum uas koj tau Vajtswv tsim los kom ua tiav tes haujlwm ntawd? Qhov tseeb tiag yeej tsis muaj leej twg yuav ua tiav tes haujlwm no dhau ntawm koj. Yog li, vim li cas koj ho khiav nkaum? Yog tias Vajtswv yeej hu koj los ua ib teg haujlwm ntawd tiag, ces txog rau thaum twg koj tseem tsis tau teb tias “ua li” thiab mloog raws li Vajtswv txojlus, ces koj yeej tseem ntxig taub hau mus rau ntawm txoj kev txomnyem. Yaunas tau tso tes khiav, thaum kawg thiaj ua rau muaj ntau yam tsis zoo tshwm sim tuaj, thiab yawg lub neej yeej tsis muaj ib yam dab tsi zoo txaus nkaus txog rau thaum yawg mloog raws li Vajtswv lub homphiaj. Hnub no kav tsij ua lub siab tawv hais tias: “Tus Tswv, Kuv xav muab txoj kev txhawj ntshai tso pov tseg thaum hnov Koj lub suab hu tseg rau kuv. Thov pab kom kuv paub Koj lub siab nyiam, thiab yuav ua raws li ntawd.”

Thov caw nrog kuv peb thov Vajtswv ua ke

Thov Vajtswv Koj zam txim rau kuv txog txhua zaug uas kuv siv zog khiav nkaum kom Koj lub suab hu dawbhuv tseg rau kuv. Thov pub rau kom kuv muaj lub siab mloog lus thiab siv zog rau tes dejnum hauv kuv lub neej, txawm yog yuav ntsib pes tsawg txoj kev txom nyem thiab txhawj ntshai. Kuv xav hais tias Vajtswv yuav tau koob meej dhau ntawm kuv lub neej. Kuv thov hauv Tswv Yexus Khetos lub npe. Amees.

Cov kwv tij sawv daws, yog koj muab koj lub neej thiab homphiaj ntawm koj lub neej fij rau Vajtswv, koj yuav tsis khuv xim thaum uas nrhiav tau tej yam zoo uas Vajtswv twb npaj txhij tseg rau koj lawm. Lub suab hu ntawd tej zaug yuav sim koj lub nrim, ua rau koj tsis hnov zoo, thiab yuam kom koj yuav tau ua siab tawv, tiamsis thaum kawg yuav zoo heev tshaj lawm ntau npaug lub homphiaj uas koj tus kheej tau cim civ tsim muaj.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj