Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Hnub no peb yuav ua kevcai nco txog ib hnub uas tseem ceeb – hnub Tswv Yexus rov mus saum ntuj. Tiamsis nyuaj siab tshaj, peb ho pheej hnov qab ib hnub tseem ceeb li no . Muaj ntau yam uas ua rau peb tsis pom txog lub ntsiab lus thiab qhov tseem ceeb ntawm koob tsheej Tswv Yexus rov mus saum ntuj; ntawd yog peb tseem tsis tau tseg lub sijhawm tiag los tshawb nrhiav tag nrho qhov xwm txheej no. 

Hnub no, yog hnub 18/05/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia JOHN P. KING dhau ntawm Zaj kawm HNUB TSWV YEXUS MUS SAUM NTUJ: YOG HNUB TSEEM CEEB

“Txiv, nimno kuv nyob ntawm koj lub xubntiag; thov koj ua rau kuv tau koob meej ib yam li thaum uas tseem tsis tau tsim lub ntiajteb no wb ibtxwm tau koob meej.” (Yauhas 17:5). 

Thaum xav txog Tswv Yexus, peb pheej xam txog daim duab uas luag muab Tswv Yexus kos rau hauv duab, lossis tus neeg uas sawv cev ua yeeb yam yog Tswv Yexus nyob rau hauv tej duab thiab yeeb yam. Tiamsis, tus ntawd tsis yog tus uas tab tom zaum saum lub zwm txwv thaum no. Nyob rau hnub uas Tswv Yexus rov mus saum ntuj, Tswv Yexus sawv hauv qhov tuag rov qab los, Nws tau ntsib Malis nyob rau ntawm lub qhov ntxa, Nws kuj taug kev mus rau ntawm lub zos Ema-us nrog Nws ob tug thwjtim ua ke, Nws kuj tau ua pluas tshais tos cov thwjtim nyob rau tom ntus hiav txwv, tus ntawd yog tus Tswv uas tau rov qab mus saum ntuj. Tswv Yexus tau txhawb nqa los ntawm Nws txoj kev zoo nkauj dawbhuv thiab tau coj rov qab mus nrog Nws lub hwjchim ci ntsa iab. Qhov xwm txheej uas Tswv Yexus lub cev hloov saum roob thaum no dhau los zoo kawg nkaus ib yam li Tswv Yexus tau hais txog nyob rau hauv Phau Tshwmsim: 

“Nyob hauv nruab nrab xya tus ncej kub ntawd muaj ib tug zoo li neeg sawv hauv, nws hnav ib lub tsho ntev suab yi nram kotaw thiab nws sia ib txoj siv kub saum nws qhovtso. ws cov plaubhau dawb ib yam li xov paj lossis ib yam li cov daus, thiab nws lub qhovmuag ci ib yam li nplaim taws; nws txhais kotaw ci ib yam li tej tooj dag uas luag twb muab nchuav thiab txhuam tau ci ci lawm, thiab nws lub suab nrov ib yam li dej tsaws tsag nrov. Nws txhais tes xis tuav rawv xya lub hnubqub, thiab muaj ib rab ntaj ob sab ntse tawm hauv nws qhovncauj tuaj. Nws lub ntsejmuag ci ib yam li lub hnub ci thaum tavsu” (Tshwmsim 1:13-16). 

Tswv Yexus tau tsa ua Vajntxwv dua ib zaug ntxiv! Cov lus uas Tswv Yexus thov Vajtswv rau hmo kawg ua ntej uas Tswv Yexus yuav raug muab ntsia saum Ntoo Khaub Lig twb tau ua tiav rau hnub Tswv Yexus rov mus saum ntuj: 

“Txiv, nimno kuv nyob ntawm koj lub xubntiag; thov koj ua rau kuv tau koob meej ib yam li thaum uas tseem tsis tau tsim lub ntiajteb no wb ibtxwm tau koob meej.” (Yauhas 17:5). 

Koj puas xam tau tias thaum uas Tswv Yexus taug kev mus rau saum ntuj ceebtsheej rov qab mus rau ntawm lub zwm txwv uas Tswv Yexus tau muab tso tseg 33 xyoo dhau los? Tej zaug cov timtswv lawv tau hu zaj nkauj nyob ntawm Ntawv Nkauj 24: 

“Muab tej roojvag qhib kom dav fo, muab tej qhovrooj qub thaum ub qhib cia, tus vajntxwv uas muaj hwjchim yuav tuaj rau hauv.  Leejtwg yog tus vajntxwv uas muaj hwjchim? Nws yog tus Tswv uas muaj zog thiab muaj hwjchim, yog tus Tswv uas ntaus yeej rog. Muab tej roojvag qhib kom dav fo, muab tej qub qhovrooj thaum ub qhib cia, tus vajntxwv uas muaj hwjchim yuav tuaj rau hauv. Leejtwg yog tus vajntxwv uas muaj hwjchim? Tus Tswv uas muaj hwjchim loj kawg nkaus, nws yog tus vajntxwv uas muaj hwjchim ntawd” (Ntawv Nkauj 24:7-10). 

Thaum uas Tswv Yexus rov qab mus saum ntuj, Tswv Yexus tau coj tag nrho cov neeg uas twb tuag lawm nrog Nws rov qab mus rau saum ntuj ceebtsheej, vim txoj kev cawmdim twb tau ua tiav lawm. Ntawd yog Anplahas thiab Xalas, Daviv, Xamuyees, Luv, Yelemis, Exathaws, Nau-es, Yauhas Npatitus, thiab tus tub sab uas nrog Tswv Yexus ntsia ua ke saum Ntoo Khaub Lig twb tau tso kev txhaum tseg, tag nrho lawv tau sawv puv nkaus txhua txoj kev koom kev zoo siab zoo kawg nkaus txais tos tus Vajntxwv cawm seej rov qab los rau ntawm Nws lub zwm txwv – lub zwm txwv kub saum ntuj ceebtsheej. 

“Thiab paub hais tias, Vajtswv lub hwjchim uas ua haujlwm hauv peb cov ntseeg lub siab loj npaum li cas. Lub hwjchim ntawd twb yog lub uas Vajtswv tsa Yexus Khetos sawv hauv qhov tuag rov qab los, thiab coj Yexus mus nyob ntawm Vajtswv sab xis saum ntuj ceebtsheej. Yexus Khetos nyob saum ntuj ceebtsheej kav cov timtswv, kav tej vajntxwv thiab tej nomtswv uas muaj hwjchim kav hauv ntiajteb no tibsi. Yexus Khetos muaj hwjchim loj dua tej nomtswv uas sawvdaws hwm, tsis hais tiam no lossis tiam tom ntej. Vajtswv muab ib puas tsav yam huv tibsi rau Yexus Khetos kav, thiab Vajtswv tsa Yexus Khetos ua tus thawj saib cov ntseeg thiab ib puas tsav yam tagnrho. Cov ntseeg yog Yexus Khetos lub cev uas muaj txhua yam txhij. Yexus Khetos yog tus uas ua rau ib puas tsav yam uas nyob txhua qhov  muaj txhij muaj txhua” (Efexaus 1:19). 

Tswv Yexus yog VAJNTXWV! Tswv Yexus twb rov qab mus saum ntuj thiab tau txhawb nqa siab dua ntais txhua yam, txhua lub hwjchim, koob meej, txhua lub tshwjchim thiab txoj kev zoo puav leej pib ntawm Tswv Yexus – Tswv Yexus yog tej ntawd. TXHUA YAM puav leej nyob qab tswjhwm thiab nyob qab ntawm Tswv Yexus. Yuav tau nco ntsoov qhov ntawd. Nco ntsoov tias yam twg uas tab tom tshwmsim tuaj nyob rau hauv peb lub neej, Tswv Yexus puav leej muaj cai kav tagnrho tej ntawd. Kev txomnyem, kev sim siab, kev ntxeev ntxias, kev mob siab, muaj mob muaj nkeeg, raug ntes… txawm yog li cas los, Tswv Yexus lub npe yeej ib txwm loj dua. Vajluskub txhawb kom peb muab peb tej teeb meem fij pub rau peb tus Vajntxwv: 

“Yog li ntawd, peb cia li ua siab tawv qhawv mus cuag Vajtswv tus uas zaum saum lub Zwmtxwv, rau qhov nws yog tus uas hlub peb. Nws yuav pab peb thiab foom koob hmoov rau txhua tus uas thov nws.” (Henplais 4:16). 

Thov caw nrog kuv peb thov Vajtswv ua ke

Tus Tswv, ntev los no kuv yeej tsis tau paub txog lub zog loj nyob rau ntawm hnub uas Tswv Yexus rov qab mus saum ntuj, thiab kuv tau tsis muaj kev zoo siab los ua kev nco txog hnub tseem ceeb no li uas tsimnyog yuav tau ua. Thov qhib kuv lub hlwb kom kuv nco qhov tseem ceeb ntawm hnub ntawd, thaum uas tag nrho ntuj ceeb tsheej koom siab ua ke hu nkauj txais tos tus Vajntxwv ntawm txhua tus vajntxwv rov qab los rau ntawm Nws lub zwm txwv nyob mus ib txhis – thiab ua kom tiav txhua tes haujlwm rau cov uas hlub Koj.  Kuv thov hauv Tswv Yexus Khetos lub npe. Amees. 

Cov kwv tij txhua tus, hnub no yog hnub nco ua kev nco txog hnub Tswv Yexus rov qab mus saum ntuj, cia li koom siab ua ke hu nkauj qhuas tus Vajntxwv uas muaj sia zeeg nyob – tus uas yuav kav mus ib txhis! Vim hnub no Tswv Yexus twb rov qab mus saum ntuj nrog txoj kev muaj yeej thiab caw peb sawv daws nrog nws zoo siab ua ke. Tseem tos tus dabtsi kav tsij nkag  mus rau ntawm peb  tus Vajntxwv lub zwm txwv uas ci ntsa iab pehawm Nws!

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj