Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Nyob rau hauv lub neej, ntau zaug peb yeej ntsib kev sim siab, kev txomnyem. Yog ib tug ntseeg Vajtswv, peb yuav tau nkag siab tias Vajtswv ua tau txhua yam, daws tau txhua txoj teeb meem. Tej teeb meem uas peb tab tom ntsib nws tsuas yog Vajtswv ib txoj kev sim xwb, cia saib peb puas yuav ntseeg siab rau Vajtswv tiag thiab mloog Nws lus lossis tsis mloog xwb. 

Hnub no, yog hnub 21/01/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Missey Butler dhau ntawm Zaj kawm TSUAS YOG KEV SIM SIAB XWB

Thiaj tis npe rau qhov chaw ntawd hu ua Maxas thiab Melinpas, rau qhov cov Yixalayees tay yws thiab sim tus TSWV siab thaum lawv nug hais tias, “Tus TSWV nrog peb nyob los tsis nrog? (khiavdim 17:7)

Muab saib mas muaj kev zoo siab heev li. Tag nrho haiv neeg Yixalayees tau cawmdim tawm ntawm txoj kev ua cev qhev. Lawv xav tsis thoob thaum Vajtswv cais hiav txwv liab ua ob phab kom lawv zoo siab taug kev mus zoo li taug  kev saum av qhuav. Peb nyeem tau zaj xwm txheej no nyob rau hauv Khiavdim. 

Mili-as uas yog Mauxes tus muam, yog tus thawj coj pab hu nkauj nrog cov niam tsev ntaus nruas nyob rau hauv ib txoj kev pehawm qhuas Vajtswv tus uas zoo tshaj plaws nyob rau txhua tiam. Lawv ob lub qhov muag tau ntsia pom tim ntsej tim muag tu TSWV uas muaj hwjchim loj kawg nkaus tau cawm lawv dim ntawm vajntxwv Falaus kev caij tsuj thiab dim ntawd cov tub rog Iziv uas tab tom caum lawv tua pov tseg. 

Tej zaug koj yuav xav tias cov neeg Yixalayees lawv yuav caij saum txoj kev ntseeg no nyob rau hauv ib lub sijhawm ntev heev. Tiamsis tsuas peb hnub tom qab xwb, lawv yws rau Mauxes, “Vim li cas koj coj peb khiav tawm tim tebchaws Iziv los rau qhov no cia rau peb tuag nqhis rau ntawm no?” 

Mauxes tus kheej los thaum no nws kuj tswj tsis tau nws tus kheej lawm. Yawg thiaj yws rau Vajtswv, “Kuv yuav ua li cas rau haiv neeg no?” 

Vajtswv ua tib zoo teb Mauxes (ib yam li Vajtswv yeej tsis tas yuav xav tsis thoob rau tej uas cov pej xeem tab tom coj). 

“Nej cia li mus uas sawv daws ntej… Cia li ntaus lub pobzeb ntawd, dej yuav tawm hauv los rau cov neeg haus.” Yog li Mauxes thiaj ntaus lub pob zeb thiab dej txhawv hauv los rau cov txwj laug saib. Mauxes tis npe rau thaj chaw no hu ua Maxas muaj lub ntsiab tias yog “sim”, thiab Melinpas, muaj lub ntsiab tias yog “nrhiav plaub” vim haiv neeg Yixalayees lawv ua plaub rau Mauxes thiab sim Vajtswv thaum uas hais tias, “Tus TSWV nrog peb nyob lossis tsis nrog?” (Khiavdim 17:5-7). 

Lawv sim Vajtswv tiamsis tseeb tiag yog Vajtswv tab tom sim lawv. 

Thaum peb nrog lawv mus ua ke nyob rau tom moj sab qhua kub nkig nkuav, peb pom tau tias daim duab yim hnub yim tsis zoo. Yam uas cov neeg Yixalayees lawv tsis pom yog Vajtswv pheej cia lawv mus rau hauv moj sab qhua “sim lawv” vim tib lub homphiaj xwb: cia seb lawv lub siab muaj dab tsi tiag, saib seb lawv puas ntseeg thiab mloog Nws lus uas tsis tas yuav ua tej txujci tseem ceeb. 

Nyob rau hauv peb lub neej, peb kuj mus dhau tej kev sim siab sib txawv. Vajtswv siv zaj xwm txheej no nyob rau hauv keeb kwm haiv neeg Yixalayees zoo li ib qhov piv txwv qhia txoj kev uas peb yuav tau coj li cas thaum uas peb ntsib kev sim siab. 

“Yog li ntawd, tsimnyog peb sawvdaws yuav tsum ua tiag mus kom peb tau nrog Vajtswv so. Tsis txhob pub peb cov ib tug twg tsis mloog lus li lawv cov ntawd nyob tsam nws tsis tau mus so.” (Henplais 4:11). 

Qhov tseem ceeb ntawm no yog Vajtswv tab tom caum ib yam dab tsi twg nyob rau hauv peb txhua tus. Yam uas peb hu hais tias yog lub neej, tsuas yooj yim yog moj sab qhua tab tom sim peb tus kheej xwb. Vim li cas koj ho tsis cia Vajtswv muab “tej hiav txwv liab” hauv koj lub neej cais? Vajtswv muaj “lub tebchaws cog lus tseg” xav coj koj mus so rau hauv kom Nws nthuav qhia txog Nws lub hwjchim muaj zog rau koj. 

Los ntawm ua lub siab tawv, peb yuav tau kawm ntawm cov neeg mus ua ntej zaj kawm muaj nqis txog kev ntseeg no thiab cim civ ntuas tus kheej tias “Ntawm no tsuas yog ib txoj kev sim siab xwb”.

Cia li nrog kuv peb thov Vajtswv ua ke: Tus Tswv lub neej no coj ntau yam kev sim siab los, thov Koj pab kuv kom kawm paub tej no los ntawm cov neeg tau mus ua ntej kom kuv yuav ntseeg siab rau Koj nyob hauv txhua yam. Kuv thov hauv Tswv Yexus Khetos lub npe. Amees.

Cov kwv tij Vajtswv ua tau txhua yam, daws txhua txoj teeb meem, tiamsis yam uas Nws xav pom nyob ntawm koj yog koj lub siab ntseeg thiab mloog lus. Hnub no, koj tab tom ntsib txoj kev sim siab twg? Koj yuav chim rau Vajtswv lossis vam khom Vajtswv kom tiv dhau txoj kev sim siab no?

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.