Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Koj puas hnov nyhav thaum kwv ib lub nra nyhav? Yog hais txog lub nra nyhav thaum sau hauv ntawv ces lo lus nug no yooj yim teb, tiamsis thaum kwv lub nra tiag tiag ces lo lus teb nws ho sib txawv, nyob txij seb koj tab tom ris lub nra nyhav ntawd rau leej twg. Yog muaj txaus kev hlub ces lub nra nyhav no yuav tsis nyhav li. 

Hnub no, yog hnub 28/01/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Paul Linzey dhau ntawm Zaj kawm TSIS NYHAV LI OS!

Nej yuav tsum sib pab ris nra, yog nej ua li ntawd thiaj yog nej coj raws li Yexus Khetos txoj kevcai (Kalatias 6:2)

Taug txoj kev hauv lub zog, muaj ib tug me ntxhais saib mas nws tab tom txog siav heev thaum uas nws ris ib lub nra nyhav heev rau saum nraub qaum. Muaj ib tug neeg dhau kev nres saib seb nws puas cheem tsum kev pab thiab pom tias nyob rau saum tus me ntxhais no lub nraud qaum muaj ib tug metub, cuag li nws yeej tsis me dua tus ntxhais no pes tsawg. 

“Ev tus metub li ntawd koj tsis hnov sab lov?”

Tus mentxhais ntawd nws teb tiag tiag li, “Tsis nyhav li os, nws yog kuv tus nus”. 

Zaj xwm txheej luv no thawj zaug tshwm sim nyob rau Scotland rau xyoo 1884, nyob rau hauv ib phau ntawv muaj lub npe tias “Tswv Yexus tej lus piv txwv”. Nws tshwm sim nyob rau hauv cov ntawv xov xwm Kiwanis hli 9 xyoo 1941, tus xibhwb Edward Flanagan tau nrhiav pom ib zaj xwm txheej zoo ib yam nkaus li daim duab muab los piv txwv nyob rau hauv tsab ntawv xov xwm Ideal. Yawg tau thov cai siv tus mentxhais no lo lus thiab nws daim duab coj los ua piv txwv rau tsab ntawv xov xwm tham txog ib lub tsev sov siab tu cov menyuam tub uas yawg tau tsim muaj npe tias Boys Town. 

Zaj movies Boys Town tau muab coj los qhib saib rau xyoo 1938. Feem txuas ntxiv yog qhib rau xyoo 1941 muaj lub npe tias The Men of Boys Town, nyob rau hauv muaj lo lus, “tsis nyhav li os, nws yog kuv tus nus”. Xyoo 1969, Bob Russell thiab Bobby Scott sau ib zaj nkauj koom tib lub npe. Zaj nkauj no dhau los muaj koob nto npe heev tau cov tub hu nkauj nto npe (nhạc pop) hu rau xyoo 60 thiab 70. Tsis tas li ntawd, kuj muaj ntau daim duab thiab ntau daim luag muab tes kos ua duab tseg cia txog lub npe ntawm zaj xwm txheej no.  

Lo lus hais cuag li tsis muaj dab tsi tiamsis tus mentxhais no nto npe heev nyob rau hauv zaj xwm txheej tham txog ib zaj tseem ceeb nyob rau hauv Vajluskub. Chivkeeb 4:9, Vajtswv tau nug Ka-ees txog A-npees thiab tus neeg tua neeg no tau teb tias: “Kuv tsis paub. Kuv yog tus uas saib xyuas kuv tus kwv los?” Lo lus teb no hais txog ib qhov tseeb nyob rau hauv Vajluskub, “Yog, kuv yog tus uas saib xyuas kuv tus kwv ntag”. 

Levis Kevcai 19:18 taw kev rau Vajtswv haiv neeg: “Hlub kwv tij zej zog ib yam li koj hlub koj lub cev.” Cov lus samhwm tseg no kuj tau Tswv Yexus rov qab hais txog nyob rau hauv Mathais 22:37. Paulus txhab ntxiv rau nyob hauv Kalatias 6:2 tias peb yuav tau: “sib pab ris nra, yog nej ua li ntawd thiaj yog nej coj raws li Yexus Khetos txoj kevcai” (Kalatias 6:2).”

Nyob rau hauv phau ntawv muaj nqis hla dhau ntau tiam uas tau tus sau Victor Hugo sau muaj lub npe tias “Les Misérable” txhais tias (cov neeg muaj kev txomnyem), tus neeg uas muaj lub npe hu tias Jean Valjean nws yeej ib txwm yog ib tug neeg txhaum tau hloov npe hloov xeem thiab siv zog ua lub neej zoo kom zais nws lub neej txhaum yav dhau los, thaum kawg yawg kuj dhau los ua ib tug nom saib xyuas nyob rau hauv lub nroog me uas yawg nyob. Tiamsis tus thawj tub ceev xwm nyuam qhuas los tuav haujlwm ho yog tus tub ceev xwm uas yav dhau los zov lub tsev rau txim, thiab tab tom nrhiav kev ntes kom tau Valjean vim yawg lub txim uas ua tsis tiav yawg tej lus cog tseg kom tau tso dim ib ntus.

Muaj ib hnub muaj ib tug pej xeem nyob rau hauv lub zos ntawd nws lub tsheb nees daig lawm vim muab ib lub nra nyhav heev tab tom tsuam nrees, thiab tsis muajleej twg yuav pab kom yawg dim qhov ntawd. Thiab thaum kawg, tus tub ceev xwm Javert tab tom tshuaj, tus tswv xeev ntawd tau rub tau lub tsheb nce saum npoo av kom lwm tus lawv thiaj yuav rub tau tus txiv neej uas tab tom raug tsheb tais ntawd tawm rau sab nraud. 

Tus tub ceev xwm rov qab nco txog tau muaj ib zaug, muaj ib tug neeg tau ua li no ib yam nkaus nyob rau hauv tsev rau txim, thiab cim civ nug tias tus neeg no thiab tus ntawd puas yuav yog tib tug. Txawm yog paub tias muaj ib txoj kev phomsij tab tom tos rawv, los Valjean yeej yuav tau ua, txawm paub tias yog ua li ntawd luag yuav paub tias nws yog leej twg thiab nws txoj kev ywj pheej kom pab tau tus txiv neej uas tab tom raug tsheb tais rau hauv av. 

Tus yam ntxwv kev hlub nyob rau hauv Vajtswv yog ib leeg pab ib leeg ris nra, ib txoj kev hlub txaus kom pab tau rau lub nra sib zog, kev hlub txaus los ua haujlwm, txaus siab cia yus tus kheej ua tus poob ib yam kom thiaj yuav pab tau rau lwm tus ib txhais tes. 

Nyob rau hauv zaj xwm txheej txog tus neeg Xamalis siab zoo tau sau nyob rau hauv Lukas 10, peb kuj pom muaj ib qhov xwm txheej zoo li ntawd. Hauv zaj xwm txheej no, cov neeg uas tau suav tias ncaj ncees ntsia pom tus neeg tab tom raug mob tiamsis tsis nres thiab mus pab. Tus tau nres thiab pab yog ib tug neeg txawv tebchaws, yog neeg Xamalis ua raug saib tsis taus, yog tus neeg uas koj yeej tsis npaj siab tog tias nws yuav zoo siab pab. Tiamsis tus neeg Xamalis no twb tau nres thiab pab. Tseeb tiag, yawg tseem them nyiaj rau tus tswv tsev so thiab thov kom yawg pab saib tus neeg raug mob no txog rau thaum nws ua tiav tes haujlwm thiab rov qab los. 

Tom qab tham zaj xwm txheej no tas, Tswv Yexus thiaj nug: “Yexus nug hais tias, "Koj sim xav saib, lawv peb tug no, tus twg yog tus uas tubsab ntaus ntawd tus kwvtij? " Tus xibhwb uas qhia Vajtswv Kevcai teb hais tias, "Twb yog tus uas hlub tus tubsab ntaus ntawd ntag." Yexus hais rau nws tias, "Koj cia li mus ua ib yam li ntawd”. (Lukas 10:36-37).

Thov caw nrog kuv peb thov Vajtswv ua ke: Tus Tswv, thov Koj pab kom kuv yuav hlub tau Koj tag nrho kuv lub siab thiab hlub lwm tus los ntawm Koj txoj kev hlub, ib txoj kev hlub zoo siab hlo muab tus kheej txoj kev zoo tso tseg xyab tes los mus pab lwm tus txoj kev cheem tsum. Thov kom kuv lub neej yuav mus raws li ntawd. Kuv thov hauv Tswv Yexus Khetos lub npe. Amees.

Cov kwv tij txhua tus, twb yog vim qhov uas mus thiab ua raws li ntawd yog yam uas Tswv Yexus tau qhia rau Nws cov thwjtim yuav tau ua. Txoj kev hlub nyob rau hauv peb puas yuav loj txaus kom saib tej neeg ib ncig yus thiab tag nrho cov neeg nyob sab nraud suav tias lawv yog yus kwv tij nus muag? Yog tias peb suav tau tias lawv yog thaum ntawd peb yuav hais tau ib yam li tus mentxhais tau tham txog hauv zaj xwm txheej nto npe lug ntawm tus neeg Scotland tias “tsis nyhav, nws yog kuv tus nus xwb”.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.