Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Koob tsheej hnub Halloween yim hnub yim tshwm ntau rau txhua qhov hauv ntiajteb no. Txij li ntawm tej neeg laus txog rau tej menyuam yaus txhua tus nyias yeej npaj nyias ib cev zam thiab npaj qhov txhua chaw zoo xws li dab teb nyob txhua qhov. Yog ib tug ntseeg Vajtswv, peb yuav tau txiav txim siab li cas kom thiaj yuav nthuav tawm qhov kaj nyob rau qhov tsaus ntuj dub nciab no? 

Hnub no, yog hnub 30/10/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Beth Patch dhau ntawm Zaj kawm KEV TXIAV TXIM SIAB RAU HNUB HALLOWEEN

“Twb yog vim li ntawd, kuv thiaj ua siab ntev nyiaj ib puas tsav yam kev txomnyem, rau qhov kuv hlub cov neeg uas Vajtswv tau xaiv cia lawm, thiab xav kom lawv los ntseeg Yexus Khetos, lawv thiaj dim lawv lub txim ib yam li peb thiab lawv thiaj tau Vajtswv txoj koob hmoov thiab lub tshwjchim uas ci ntsa iab mus ibtxhis” (2 Timautes 2:10).

“Koj tsuas tau cai sawv sab no lossis sab tid ntawm ntus vaj xwb” – Xibhwb Chip hais li ntawd. “Koj yeej sawv tsis tau ti ob sab. Sim xav saib. Yuav mob heev!” – yawg ke hais ke tshem ib txhais taw dhau ntawm cov laj kab xov vaj, tsa taw sawv thiab ua ntsej muag caws tas thaum tso ko taw nqes. “Koj tsuas muaj cai xaiv ib phab xwb”. 

Xibhwb tab tom hais txog qhov uas cia ib sab taw sawv ntawm lub ntiajteb thiab ib sab sawv rau ntawm Yexus Khetos – ntawd yog ib tus yam ntxwv phem tshaj plaws ntawm ib tug ntseeg Vajtswv. 

Tiamsis nyob rau hauv txoj kev nrog tus Tswv mus, kuv pib ntsib ntau thaj chaw hu ua “qhov chaw nruab nrab” ua rau kuv yuav tau nres ob txhais taw ntawm tej laj kab. Thiab cuam tshuam txog koob tsheej Halloween, kuv yuav tau lees tias – kuv tau dhau los ua ib tug neeg mus ua ob phab. 

Thaum tseem yau, kuv nyiam lub caij Halloween heev. Kuv koom rau txoj kev ua si muab thaj lossis raug tawb ua si thiab txia ua yam twg uas kuv nyiam. Zoo siab heev! Kuv yeej tsis paub dab tsi txog lub hauv paus pib ntawm lub koob tsheej no. 

20 xyoo dhau los – kuv dhau los ua ib leej niam ntseeg Vajtswv nyuam qhuav tau Tswv Yexus hloov dua tshiab – kub siab lug ua txhua yam uas kuv muaj cuab kav ua tau kom paub txog Vajtswv thiab qhuas Nws. Kuv ua tib zoo tshuaj tej uas kuv nqa los rau hauv tsev thiab coj los coj hauv kuv lub neej, thaum uas kuv paub tej yam tsis zoo nyob ib ncig ntawm TV, tej duab thiab movies thiab tej phooj ywg. Kuv tau xav yooj yim rau tej kev xav uas tab tom tua tuaj rau kuv sab ntsujplig. Muaj ib hnub nyob rau hauv lub 10 hli, thaum uas kuv mus tos cov menyuam yaus, tus neeg tu cov menyuam yaus no muab ib tsab ntawv cev rau kuv – “Qhov tseeb txog Halloween”. 

Peb yeej xav tsis thoob thaum uas paub tias lub koob tsheej no pib los ntawm dab ntxws nyoog tuaj. Ntawm no yog ib lub koob tsheej pib ntawm qhov tsaus ntuj thiab nws yog cuav, cuam tshuam txog Xatas thiab tej ntsujplig phem. Wb khub niam txiv pom tias wb yeej tsis paub dab tsi nyob rau ntau xyoo dhau los, ua rau tsev neeg raug dab ntxwgnyoog yooj yim tua xub tuaj. Ntawm no yeej tsis yog ib txoj kev zoo siab tsis paub es tsis muaj txim. Wb txiav txim siab tias wb tsev neeg yuav tsis npaj muaj lub koob tsheej Halloween no ntxiv lawm. 

Tsis tas yuav hais, wb txoj kev txiav txim siab ua rau cov menyuam lawv ntxhov siab heev, vim xyoo dhau los cov menyuam lawv puav leej tau koom lub koob tsheej Halloween tib si. Wb yeej txhais lub ntsiab meej meej tias, niam thiab txiv tab tom tiv thaiv nej cov menyuam kom dim ntawm tej kev phem, kom tsim muaj ib txoj kev xav dawbhuv, kom qhia paub tias peb tsev neeg tab tom sawv rau sab twg ntawm phab ntsa – ntawd yog sawv ntawm Vajtswv phab! Peb tsis xav hais tsis zoo txog Vajtswv lub npe. Peb yuav qhuas Vajtswv. 

Wb plaub tug menyuam yeej thooj yim rau wb, txawm yog lawv raug yuam xwb los. Wb yeej muab thaj ntau heev rau cov menyuam thiab coj lawv mus noj hmo nyob rau lub sijhawm ntawd txhua xyoo. Tiamsis qhov no yeej tsis tseem ceeb. Cov menyuam lawv yeej tseem khuv xim lub koob tsheej tsab zam thiab dhia ua si tej kev ua si muab thaj pub lossis raug lawv tawb. Tej zaug cov menyuam lawv kuj raug hais saib tsis taus txog qhov no ntau heev. 

Ib pliag ntshis xwb 20 xyoo dhau mus. Wb tej menyuam twb loj tas, lawv rov qab mus koom lub koob tsheej no dua. Wb cov menyuam xeeb hnav ris tsho zoo li tej tus neeg txawj txawj, mus rau ib lub tsev zuj zus thov thaj rau hmo Halloween ntawd. Wb tej kev cai txwv tsis pub  koom Halloween tsis muaj nqis rau tiam txuas ntxiv lawm. 

Txawm yog kuv ntseeg tias wb tab tom ua yog raws li tej haujlwm yog thiab los ntawm lub siab ncaj ncees los kuv tsis paub tias xyov kuv puas tau daws qhov teeb meem no raws li txoj kev zoo tshaj plaws lawm los tsis tau. Wb tsis koom koob tsheej Halloween tiamsis wb kuj ua poob lub sijhawm kom dhau los ua qhov kaj ci rau lub ntiajteb tsaus ntuj nti no. Thiab ntawm no yog qhov uas vim li cas kuv cim civ suav tias kuv yog tus uas mus nrhab ceg ris rau ob sab. 

Txawm li los kuv yeej tsis nyiam lub koob tsheej Halloween no vim nws tsis zoo, tiamsis kuv xav tias peb muaj cuab kav qhuas Vajtswv rau hmo ntawd, thaum uas cov menyuam nyob ib ncig ntawd tuaj txog rau hauv yus tsev. Kuv pom txog qhov zoo no thaum uas pom muaj cov neeg zej zog siab zoo, cov neeg ntawd lawv muab thaj thiab cov menyuam lawv zoo siab heev. 

Kuv kuj kawm tau ib zaj kawm txog kev qhia tej menyuam yaus. Kuv pom tias kuv tsom ntsoov rau txoj kev tiv thaiv tsev neeg thiab zam yam uas phem, txog qib uas hnov qab lawm hais tias kuv yeej tseem yog tib neeg, yeej ua tsis tau txhua yam zoo tag nrho. Tshuav Vaj Ntsujplig yog tus uas nyob rau hauv peb txhua tus uas ntseeg Nws, muaj hwjchim pab txhua tus uas ntseeg Nws kom kov yeej lub hwjchim ntawm qhov tsaus ntuj. Ib yam li kuv tus pog pheej hais: “Tus yoov poob rau hauv cov dej uas nej yuav haus, nej tseem muab lim huv tibsi, tiamsis nej twb nqos ib tug ntxhuav lawm nej tsis paub” (Mathais 23:24). 

Tig rov qab los rau ntawm qhov teeb meem no, kuv xav tias qhov teeb meem tsis yog xaiv sab no lossis sab tid, kuj tsis yog nrhab ceg ris rau ob sab. Tej zaug txog sijhawm peb yuav tau muab tus laj kab ntawd rhuav thiab tsom ntsoov rau yam uas tseem ceeb tshaj plaws, ntawd yog nthuav tawm Vajtswv tus duab ci rau cov neeg uas nyob rau hauv lub ntiajteb uas tsaus ntuj nti. 

“Twb yog vim li ntawd, kuv thiaj ua siab ntev nyiaj ib puas tsav yam kev txomnyem, rau qhov kuv hlub cov neeg uas Vajtswv tau xaiv cia lawm, thiab xav kom lawv los ntseeg Yexus Khetos, lawv thiaj dim lawv lub txim ib yam li peb thiab lawv thiaj tau Vajtswv txoj koob hmoov thiab lub tshwjchim uas ci ntsa iab mus ibtxhis” (2 Timautes 2:10).

Thov caw nrog kuv peb thov Vajtswv ua ke

Leej Txiv thov pab kom peb yuav saib ntsoov rau yam uas tseem ceeb dua ntais, thiab txhua hnub uas peb muaj ntsej muag ua neej nyob rau hauv lub ntiajteb no. Vajtswv txojlus qhia peb tias yuav tau tag siab, tag zog, tag laj lim tswv yim hlub Vajtswv,  thiab hlub tej neeg ib ncig ib yam li yus. Thov pab kom peb txhua tus paub nthuav tawm txoj kev hlub ntawd tawm nyob rau hnub Halloween no. Thov pab kom peb txhob txiav txim rau lwm tus, pauv rau qhov ntawd yuav tau nthuav tawm kev hlub thiab siv zog qhia rau lawv paub txog qhov tseeb ntawm Vajtswv. Kuv thov hauv Tswv Yexus Khetos lub npe. Amees.

Cov kwv tij, paub tias peb yeej tsis muaj ib pab pawg twg, lossis yeej tsis koom noj kev zoo siab rau hnub Halloween no los kuj txhob ua lub neej cais tawm ntawm lub ntiajteb no. Vim txoj kev ua neej zoo li no yeej ci tsis tau Vajtswv tus duab ci rau qhov tsaus ntuj no. Pauv qhov uas txiav txim, liam txim rau lwm tus, thiab tig nraud qaum rau lawv ces peb qhov haujlwm yog hlub thiab nthuav tawm txoj kev hlub zoo kawg nkaus no rau txhua tus neeg uas nyob ib ncig peb.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.