Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Tseeb tiag xyoo 2021 twb yuav dhau mus, koj puas tau npaj yam dab tsi rau xyoo tshiab 2022 lawm tau? Yog tias koj tsis tau xav txog yam no, cia li koom nrog Oneway txiav txim siab ua Ib Yam tseem ceeb! 

Hnub no, yog hnub 30/12/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Bill Gaultiere dhau ntawm zaj kawm IB YAM

Kuv tsuas thov tus TSWV pub ib yam rau kuv xwb, yam uas kuv xav yuav, yog kuv xav nyob hauv tus TSWV lub tsev mus tas kuv simneej… (Ntawv Nkauj 27:4)

Koj puas tau npaj tawm tej kev cog lus rau xyoo tshiab lawm los tsis tau? Lossis koj twb tso tsis ua qhov ntawd lawm! Tej zaug nyob rau txhua xyoo tag los, koj twb mus dhau lub sijhawm ntawm txoj kev ntseeg siab, siv zog, thaub qab, tag kev cia siab thiab xav muab tso tseg. 

Tseeb tiag, cov neeg uas lawv muaj kev cog lus xyoo tshiab lawv tau muab lawv tej kev cog lus ntawd tso tseg thaum txog ib nrab ntawm lub hli ob. Coob tug muab tag nrho nws tej tswv yim tso tseg thiab hais tias, “Kuv yuav tsis npaj muaj kev cog lus rau xyoo tshiab ntxiv lawm!” 

Txawm yog koj tseem tab tom npaj lossis twb muab tso tseg lawm los yeej tseem tshuav dua lwm txoj kev pib dua ib xyoo tshiab: ntawd yog thov Vajtswv coj koj txoj hau kev nyob rau hauv “Hloov dua tshiab ntawm xyoo tshiab”. 

“Hloov dua tshiab ntawm xyoo tshiab” uas kuv npaj muaj yog tsom ntsoov rau ib yam: tshaj dua lwm yam, kuv xav kom kuv dhau los ua ib tug neeg ua lub neej pub rau ib yam xwb, ntawd yog tag siab ntsws muab fij pub rau Tswv Yexus Khetos. 

Txhua xyoo, Vajtswv qhia rau kuv pom txog ib qhov teeb meem uas kuv yuav tau tiv kom dhau lossis ib yam dab tsi txog lub neej txhua hnub uas kuv yuav tau hloov pauv kom kuv tsom ntsoov mus rau Yexus Khetos. 

Kuv tus phooj ywg, Howard Baker nyob rau hauv phau ntawv nws sau muaj lub npe tias Ib Yam, tau qhia txog peb tug  qauv kev ntseeg nyob hauv Vajluskub, yog cov neeg uas muaj lub neej txhawb zog tau rau peb paub ua neej fij pub rau Vajtswv: 

- Thib ib yog Daviv: thaum ntsib tej kev sim siab mob siab thiab txaus ntshai kwv yees li kaum xyoo nyob hauv moj sab qhua, raug luag ua saib tsis taus thiab yuav luag raug muab tua pov tseg, Daviv tau thov Vajtswv: “Kuv tsuas thov tus TSWV pub ib yam rau kuv xwb, yam uas kuv xav yuav, yog kuv xav nyob hauv tus TSWV lub tsev mus tas kuv simneej…Thaum Koj hais tias, cia li los pehawm Kuv, kuv teb hais tias, tus TSWV, kuv yuav los cuag Koj” (Ntawv Nkauj 27:4,8). 

• Thib ob yog Malis: nws tso nws tes haujlwm hauv tsev ua mov tseg los mus zaum hauv Tswv Yexus ko taw, ua tib zoo mloog Tswv Yexus qhia thiab txais tau Tswv Yexus cov lus qhia tseeb tias nyob rau ntawm ntau txoj haujlwm ua rau peb ntxhov siab, txhawj xeeb, “Tiamsis tsuas muaj ib yam zoo xwb, Malis twb xaiv yam zoo ntawd lawm, tsis muaj leejtwg yuav txeeb tau yam uas nws muaj ntawd  mus li.” (Lukas 10:42). 

• Thib peb yog Paulus: Laulus saib txhua yam uas nws ua tiav thiab txhua yam uas nws tau koob hmoov zoo li tej liamsim uas muab pov tseg xwb: rau qhov kuv xav tau yam uas muaj nqis heev dua tej ntawd; yam uas kuv xav tau ntawd yog qhov uas kuv xav muab siab npuab Yexus Khetos tus uas yog kuv tus Tswv heev dua yav tas los. Kuv ua kuv lub neej kom haum Yexus Khetos siab, kuv thiaj li tso ib puas tsav yam tseg. Kuv saib tej ntawd zoo ib yam li tej liamsim uas luag muab povtseg lawm xwb; kuv ua li ntawd kom kuv thiaj tau Yexus Khetos los ua kuv tus Tswv.” (Filipis 3:8). Paulus nthuav tawm yam uas nws lub neej ntshaw yog: Yog li ntawd, kuv thiaj li khiav ncaj nraim mus rau tus ciam tom kawg kom kuv tau nqi zog. Qhov nqi zog ntawd yog txojsia ntev dhawv mus ib txhis uas Vajtswv khaws cia rau saum ntuj ceebtsheej tos peb cov uas ntseeg Yexus Khetos.” (Filipis 3:14).

Xyoo no, tshaj txhua yam, yam kuv xav nrhiav yog ib yam, yog yam uas zoo tshaj plaws, ntawd yog tau muab kuv lub neej kom fij ntau ntxiv pub rau Yexus Khetos. Tshuav koj ne ho zoo li cas? 

Yuav ua li cas kom peb lub siab muab fij pub rau Vajtswv yuav loj hlob mus zuj zug, dhau los ua Ib Yam uas peb caum qab? Yuav ua li cas kom peb xyaum hloov tau tej yam ntawd tiag tiag nyob rau hauv peb lub neej txhua hnub zoo li ib qho pov thawj qhia tias peb hlub Vajtswv? Yuav ua li cas kom peb thiaj yuav tsis txhawj thiab tsis chim? Yuav ua li cas kom peb kawm tau txoj kev zoo siab thaum muaj kev sim siab? Thov Vajtswv tsis tseg? Hlub tus neeg tsis tsimnyog hlub? Tsis yog vam khom yus txoj kev siv zog! Vim txoj kev no yuav nyob tsis ntev. Lossis txoj kev ntawd tsuas ua rau peb khav theeb xwb!

Txoj hau kev kom peb tus neeg hloov tau tiag tiag – kawm kom paub, loj hlob, tau kho zoo – ntawd yog “xyaum” ib yam li Paulus tau ntuas nws cov thwjtim: “Koj yuav tsum ua koj lub neej kom haum Vajtswv siab thiaj zoo” (1 Timautes 4:7b). Cia li ntsia saib Tswv Yexus yog peb tus thawj thiab yuav tau xyaum ua txhua hnub nrog Tswv Yexus ua ke. 

Ib feem tseem ceeb nyob rau hauv txhua txoj kev xyaum twg puav leej yog ua tib zoo xav txog Vajtswv tej lus. 

Kawm Vajtswv txoj lus tsis yog tsuas nyeem xwb. Thiab nws kuj txawv li tshawb nrhiav. Thaum kawm txog Vajluskub, koj thov Vajtswv los ntawm Vajtswv txojlus thiab nrhiav kev siv cov lus ntawd rau tej lub sijhawm txomnyem thiab tej lub sijhawm zoo hauv lub neej. Koj yuav zoo li tus muv tsaws rau saum tej paj thiab nyob saum cov paj ntawd nqus zib, siv nws los ua tawm tej yam zoo qab zib nyob rau hauv lub neej. 

“Koj tej lus qhia qab zib tshaj zib ntab lawm thiab! (Ntawv Nkauj 119:103).

Thov caw nrog kuv peb thov Vajtswv ua ke: Tus Tswv thov pab kom kuv ua tau ib yam tshiab rau xyoo tshiab no, ntawd yog fij tag nrho lub neej pub rau Vajtswv Koj, caum ib lub neej ua haum Vajtswv Koj siab. Kuv thov hauv Tswv Yexus Khetos lub npe. Amees.

Cov kwv tij txhua tus, ntseeg tias peb txhua tus yuav nrhiav tau yam qab zib nyob rau hauv Vajtswv txojlus txhua hnub thiab txiav txim siab vam khom Vajtswv, yuav muab IB YAM uas peb kawm tau  coj los coj, ntawd yog hlub Vajtswv thiab hlub tib neeg ib yam li Nws tau hlub peb.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.