Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Oă Gùng Duh Khoai gah Jơnau Niam prap ngai 1 kơnhai 11 kòp nam la ngai Pơjum kah Ală Cau Sàng Goh nàng jòng ro Yàng mơ kah kơlôi tus ală cau sàng goh Yàng dê, la ală cau geh pơnro sơnđan tòm kòp bă tiah bal mơ ală cau ò geh yal sơnđan. Tòm tŭ kơno tus jơnau “cau sàng goh”, bol he gơs bơta kơlôi sơnơng lơi mơ bol he pal gơs nus nhơm mbe lơi gơwèt mơ “ală cau sàng goh” taih?

Ngai do, ngai 01/11/2021, bơta Hòi Dan Kòp Ngai dan jà ồng mò oh mi bơtê bal jơnau Yàng dê kơnòm dê bơta dong kòl mò Dianne Neal Matthews dê bơh tơnggume BƠTA KÒÑ GƠBOH GƠWÈT MƠ ALĂ CAU SÀNG GOH

Bơh bol hi neh kơno bơh bơta dòn oh mi dê tòm Yàng Krist Jesu mơ bơh bơta kòñ gơboh oh mi dê gơwèt mơ jơh ală cau sàng goh. (kôlôse 1:4)

Bồ dà ngai Pơjum Kah Ală Cau Sàng Goh  digơlan sơntòm bơh bồ pah rài dơ̆ poan, tiah ală Hìu Jum Goh bơtào gơs ală ngai pơjum kah ală cau Dòn Yàng chơt bơh bơta dòn, la ală cau geh pơnro sơnđan bal mơ ală cau ò git sơnđan. 

Ală ngai pơjum kah wơl do lồi dut gen gơlik gơs ngai pơjum kah ală cau sàng goh ò di mìng kah ală cau chơt bơh bơta dòn. Tus nam 837, Giáo hoàng Gregory IV lơh nền tơlik dô gơnoar sồr lơh  gơs bơta Pơjum Kah Ală Cau Sàng Goh dơ̆ sơnròp tòm jơh gùng duh khoai Công giáo. 

Tòm pah rài Cải Chánh, dô êt Gùng duh khoai jat Jơnau Niam neh ràng tơlik  wơl ngai Pơjum Kah Ală Cau Sàng Goh là bơta pơjum kah kirsơnre bơta gơtòmklac dô bă bal Hìu Jum Goh dê kơnòm dê bơta bơto Sră Goh dê lah jơh ală cau dòn Yàng la “cau sàng goh”. Ngai do, ală Gùng duh khoai đah mattơngai mut gam kirsơnre  ngai pơjum do di dê ngai 1 kơnhai 11, ai ală Gùng duh khoai đah mattơngai lik gen prap bơta pơjum do di dê ngai Rlô sơnròp tơnơ̆ ngai Pơjum  Ngai Pram Jơt. 

Bulah jơh tơl nă bol he kung git lơm jơnau gơtha bơh “cau sàng goh” mơya dô êt nă lơm tòm bol he lơh jat jơnau hơ̆ să tòm in mơ ală oh mi ruh lŏ tòm bơta dòn in. Bol he yal tơlik bơta ò wil tơl he dê gan dê jơnau đơs lah “Añ ò di la cau sàng goh gen mbe lơi añ wil tơl”. Bol he kung òs đơs jơnau sơwì behơ̆ gơwèt mơ cau ndai tai sơl. 

Kah tĕ lah jơh ală cau sàng goh la cau ò wil tơl mơya gơs bal dô bơta dòn tòm Yàng Jesu Krist mơ bal dô gơnap gơnoar Yàng Hwềng Goh dê lơh broă tòm bol khai.

Rlau mơ gơnoar broă bơto yal Jơnau Niam cau òhềt geh dong klàs in, bol he kung ò geh gơnoar hŭi lah he gơs gơnoar broă krơi is gơ wèt mơ ală “cau sàng goh” ndai. Yàng Jesu đơs lah dunnia rơp git bol he la cau bơtê Kơnràñ dê bơh bơta kòñ gơboh mơ bol he gơ wèt bal mơ gơp, “Dilah bol mê gơs bơta kòñ gơboh bal mơ gơp, gen bơh bơta hơ̆ jơh tơl nă cau rơp git bol mê la cau bơtê Añ jê.” (Jang 13:35)

Ồng Pol jòng ro ală cau dòn Yàng tòm Hìu Jum Goh Kôlôse dê bơh “bơta dòn oh mi dê tòm Yàng Krist Jesu mơ bơh bơta kòñ gơboh oh mi dê gơwèt mơ jơh ală cau sàng goh”. (Kôlôse 1:4)

Jơnau Yàng kung bơto tơngkah bol he, “tòm tŭ gam gơs tơngai, gen bol he lơh tĕ broă niam jơh ală cau in, sơnròp ngan la ală cau tòm hìu nhă bơta dòn dê.” (Galati 6:10)

Ngan gơ dê la cau Dòn Yàng pal pơnđơl pràn nàng cèng cau chơt roh tus mơ Bơtau Krist, mơya bol he ò  di  lòi hŭi bơta gơ tòmklac bol he dê gơ wèt mơ ală cau sàng goh ndai. Tòm tŭ bol he gơ wèt bal mơ gơp behơ̆, bol he kung neh ràng tơlik Jơnau Niam dong klàs Yàng Jesu dê dô bă song ngan mơ pràn kơl dang.

Dan jà bol he dô nùs bal tòm bơta hòi dan: Ưnngai Yàng, tàibơh ơm tòm Yàng, kòp Ngai la ală Ngai Cau Sàng Goh dê, ngai bol kòn ràng tơlik bơta kòñ gơboh gơ wèt mơ ală oh mi ruh lŏ tòm bơta dòn. Dan ai bơta lơh lòt kòñ gơboh bal mơ gơp bol kòn dê rơp ràng tơlik Jơnau Niam dong klàs Yàng dê. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, ““tòm tŭ gam gơs tơngai, gen bol he lơh tĕ broă niam jơh ală cau in, sơnròp ngan la ală cau tòm hìu nhă bơta dòn dê.” Tòm Hìu Jum Goh, mpồl dờng, mpồl dềt bol he dê gơs oh mi ruh lŏ lơi tìp bơta kal ke, pal càng bơta dong kòl hala ò? Ngac ngar tĕ ràng tơlik bơta kòñ gơboh digùl ală cau sàng goh ngai do mơ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.