Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Là cau dòn Yàng, bol he pal git Yàng, git nùs nhơm mơ nùs kờñ Kơnràñ dê nàng kis dô bă di pal. Bơta chò hòp la ală bơta lơi bol he pal càng git bơh Yàng neh geh ràng tơlik tòm Sră Goh la Jơnau Kis Sùm Kơnràñ dê. 

Ngai do, ngai 16/02/2022, bơta Hòi Dan Kòp Ngai dan jà ồng mò oh mi bơtê bal Jơnau Yàng dê kơnòm dê bơta dong kòl mò Daphne Delay dê bơta tơnggume GIT YÀNG

Ală bơta ndơp ndơr gơrê bal mơ Jehôwa Yàng Tom Trồ bol he dê, mơya ală bơta neh ràng tơlik gơrê bal mơ bol he mơ kòn sau bol he dê gam sùm sùm, tồ bol he lơh jat jơh ală jơnau neh cih tòm bơta boh lam do. (Yal wơl 29:29)

Ală bơta ndơp ndơr gơrê bal mơ Jehôwa Yàng Tom Trồ bol he dê, mơya ală bơta neh ràng tơlik gơrê bal mơ bol he mơ kòn sau bol he dê gam sùm sùm, tồ bol he lơh jat jơh ală jơnau neh cih tòm bơta boh lam do. (Yal wơl 29:29)

Ngai do, bol he òs kơno wêh kơno wơl ală jơnau be la gơnoar broă mơ bơta yal tơlik. Mơ kòp nă bol he gơs lơm gơnoar broă bơh ală bơta lơi he lơh tòm ală pơnah, bơh tòm hìu nhă tus dê đah bơdìh ne mơ cau gơp ƀòn. Yàng Tom Trồ ò mìng kah kơlôi tus ală bơta hơ̆ mơya Sră Goh bơto dô bă loh làng lah bol he pal yal tơlik bơh bơta lơh nền tòm rài kis be tòm sră Rôma 14:12 cih, 

“Behơ̆ kòp nă tòm bol he rơp yal tơlik broă he dê Yàng Tom Trồ in.”

Bơta do lơh bol he in rngòt sơl? Anh kơlôi lah rơp rngòt rngơt ngan dilah bol he ò git Yàng mơ nùs nhơm Yàng dê. Mơya añ ò dòn lah bơta kơp kờñ Yàng dê la nàng lơh bol he in rgòt. Añ dòn lah gơnoar broă yal tơlik bol he dê kơnòm dê ală bơta lơi he wă wờng mơ ală bơta lơi neh geh ràng tơlik he in. Hala, gơs ală bơta Yàng Tom Trồ pồn ndơp, mơya kung gơs ală bơta Yàng neh ai tơnggit bol he in nàng bol he rgơi lơh jat ală bơta rơndap Yàng dê tòm ù do. Mơ sơlo ai tơnggit oă gen bol he rơp sơlo lơh jat oă bơta rlau. Dunnia bềng ală cau cau ò git nùs nhơm mơ nus kờñ Yàng dê. Hơ̆ la broă ñchi bơh tai dunnia do sơrlồng sơrlàng, gơ sềl, tồi glài mơ chơt roh. Tiah lơi ò gơs bơta git wă gen tiah hơ̆ cau sòtơm at bồ. Jơnau “ò git wă ” gơs bàr jơnau gơtha. Dùl la siơ̆u bơta bơtê git, bàr la ò bài dòp bơta lơi hơ̆. Ai bơnyơu, tŭ đơs añ ò git wă bơh bơta lơh niam wơl rơndeh gen hơ̆ digơlan la añ ò gơs bơta bơtê git bơh broă do, mơya añ kung ò bài jòi git, bơtê git gơ.

Ngan gơ dê la ò bài bơtê ală bơta nàng lơh niam rơndeh gen kung ò gơs glài lơi, mơya gơs oă pơnah tòm rài kis, rlau jơh la tòm pơnah đah hwềng gen ò di behơ̆. Ò git wă ò di la dô bơta lơngai. Ò git wă ală bơta đah hwềng gèn sơrbơng roh ngan. 

Ồng Pol neh đơs, “tồ cà Satan in ò geh pha lin mơ bol he, bơh bol he git kai lac lèo gơ dê.” (2Kôrintô 2:11)

Hala đơs be do, “tồ cà Sa-tan in ò gơs tŭ lơmpah niam rlau mơ bol he”. Mơ hơ̆ la bơta mơ Yàng kờñ ràng tơlik jơnau song kòn sau Yàng in bal mơ oh kòn bol he in. Yàng ò kờñ bol he kư̆ kis tòm bơta ò git wă, kòl pơrlồm mơ roh tŭ lơmpah niam. Bơta git wă geh ràng tơlik rgơi dong klàs bơta kis, bơta kis đah poac să, bơta kis đah hwềng mơ jơh ală bơta. Cà Sa-tan git bơta do mơ Yàng git bơta do rlau jơh.

Ală bơta ndơp ndơr gơrê bal mơ Jehôwa Yàng Tom Trồ bol he dê, mơya ală bơta neh ràng tơlik gơrê bal mơ bol he mơ kòn sau bol he dê gam sùm sùm, tồ bol he lơh jat jơh ală jơnau neh cih tòm bơta boh lam do. (Yal wơl 29:29)

Bol he gơs gơnoar broă bơtê git, jòi jat, prap lòi mơ bơto tơngkah. Añ ò kơlôi lah tòm jây phuk lồi dut rài kis dê, bol he rgơi đơs lah, “Ui, añ neh lơh roh jơnau chồl bơtrut hơ̆”. Mơya Yàng gam la Bơtau lơbơn niam mơ bềng nùs nđàc sơngit. Mơya broă Kơnràñ ràng tơlik, yal tơlik bol he in la gơs jơnau gơtha. Jơh jơi bơtiàn rgơi git jat gùng do hala gùng ne tàibơh ală bơta lơi bol he git mơ ală bơta lơi bol he lơh jat bơta he git.

Bol he rgơi kơlôi sơnơng lah Yàng Tòm Trồ gơs nùs nhơm mbe lơi tŭ sền gŏ kòn sau Yàng dê jê sồt, moat jrùng, roh rui, pin wil wơl, tòm tŭ Yàng neh rcang sir bơta dong kòl gan dê Jơnau Yàng. Sră Goh la tòm ryas bơta ràng tơlik dờng rlau jơh bol he in. Yàng Tom Trồ kung neh ai bol he in Yàng Hwềng Goh, Bơtau dong kòl bol he. 

Bol he gơs gơnoar broă yal tơlik, mơya ò di să tòm he rgơi lơh jơh ală bơta mơ ò geh bơta dong kòl. Kơp kờñ lah kòp nă bol he rơp dòp git gơnoar broă  he dê mơ lơh jat gơ dô bă kràñ cê. Mơ añ hòi dan lah bol he rơp jòi bàn bơta hòn chò dờng tòm tŭ bơtê git, be cau cih sră Đơs Crih neh đơs,

“Añ chò hòp ngan bơh jơnau Kơnràñ dê, Ò gơkrơi be cau jòi geh phan dờng màng.” (Đơs Crih 119:162)

Dan jà bol he dô nùs bal tòm bơta hòi dan: Ưnngai Yàng tàibơh ală bơta geh ràng tơtik tòm Jơnau Yàng dong kòn git Yàng, git nùs nhơm mơ nùs kờñ Yàng dê. Dan ai kòn in git kờñ gơboh Jơnau Yàng kòp ngai, mơ jơh nùs kis jat nùs kờñ Yàng dê. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kờñ gơboh, ồng mò oh mi git Yàng mbe lơi taih? Tòm poh do, ồng mò oh mi rơp lơh bơta lơi nàng git nùs nhơm mơ nùs kờñ Yàng dê oă rlau taih?

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.