Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Tòm rài kis, digơlan ò êt dơ̆ bol he tìp bơta gơlòng bòl glar, mơ kal ke. La cau gơ rê mơ Yàng, bol he pal càng git lah Yàng Tom Trồ rgơi lơh jơh ală bơta, lơh sir ală bơta. Ală bơta kal ke mơ bol he tìp mìng la dô bơta lòng sền Yàng dê, nàng sền ngan la bol he dòn kơnòm Yàng mơ dòn bơr Yàng hala ò.

Ngai do, ngai 21/01/2022, bơta Hòi Dan Kòp Ngai dan jà ồng mò oh mi bơtê bal Jơnau Yàng dê kơnòm dê bơta dong kòl mò Missey Butler dê bơh tơnggume MÌNG LA BƠTA LÒNG SỀN

Khai sơnđan tiah hơ̆ la Masa mơ Meriba, tài bơh cau Israel jòi jơnau mơ lòng Yàng Jehôwa lah: “Gơs Yàng Jehôwa ơm digùl bol he hala ò? (Lik Ejiptơ 17:27)

Bơta gơlik gơs chò hòp ngan. Jơh làng bol Ysơrael neh geh dong tă dô bă crih crài bơh bơta lơh dĭ kờn jơ̆. Bol khai rơm să tòm tŭ sền gŏ Yàng wàs Dà Lềng Pơrhê gơlik bàr gah nàng bol khai rgơi chò hòp cơnđoà mut be lòt hơđang ù rsơh. Bol he geh sền bơta yal wơl do tòm sră Lik Ejiptơ.

Miriam, bi ùr Môise dê, lam bồ mpồl làngbol bal mơ ală cau ùr pờng sơnggơr tòm dô bơta pơ jum jòng rơ Yàng dờng rlau jơh ală rài dê. Bol khai neh sền gŏ Jehôwa Yàng Tom Trồ gơnap gơnoar neh dong tă bol khai lok klàs bơta rồn bơklơn Pharaôn dê mơ bơta ting jat mpồl ling Ejiptơ dê.

Digơlan ồng mò oh mi kơlôi lah cau Ysơrael rơp hào hơđang “ryà bơta dòn” do tòm oă tŭ tơngai. Mơya mìng pe ngai tơnơ̆, bol khai yoan mơ Môise lah, “Ñchi bơh tai ồng lam bol hi bơh Ejiptơ tus tềng do nàng lòi bol hi in chơt tơ hìr taih?”

Să tòm Môise kung neh roh bơta ơt ơl. Ồng yoan wơl mơ Yàng lah, “añ pal lơh bơta lơi gơwèt mơ làngbol do taih?”

Yàng Tom Trồ lơbơn niam ho wơl Môise (be la Yàng ò nrơt dô êt lơi bơh nùs nhơm bol khai dê).

“Mê kư̆ lòt tĕ hơđap làng bol…Mê pòng tĕ pơnai lŭ, gen dà rơp bơh di pơnai lŭ hơ̆ gơhòr lik ai làng bol in hùc.”  Tài behơ̆, Môise pòng dê pơnai lŭ mơ dà hòr lik di đap bơta sền gŏ ală kwang kra dê. Môise sơnđan tiah do la Masa, gơs gơtha la “lòng”, mơ Mêriba, gơtha la “jòi jơnau” tài bơh làng bol Ysơrael jòi jơnau mơ Môise mơ lòng Yàng Jêhôwa tòm tŭ đơs lah, “Gơs Yàng Jehôwa ơm digùl bol he hala ò?” (Lik Ejiptơ 17:5-7)

Bol khai lòng Yàng mơya ngan gơ dê la Yàng lòng bol khai.

Tòm tŭ bol he pơn jat tai lòt gùng mơ bol khai tòm ƀlàng ngềt ngơt duh tơ àl, bol he sơntòm đal git lah bơta lik lòt sơlo ngai sơlo moat jrùng rlau. Bơta mơ làngbol Ysơrael ò gŏ la Yàng Tom Trồ sùm cèng bòl khai mut tòm “ƀlàng ngềt ngơt nàng lòng sền” bơh dô tơnngu broă, hơ̆ la: nàng sền tòm nùs bol khai  dê gơs bơta lơi, sền bol khai dòn kơnòm mơ dòn bơr Yàng mơ ò càng tus ală bơta krơi dờng hala ò.

Tòm rài kis bol he dê, bol he kung  lòt ngan ală tiah gơlòng pha is. Yàng Tom Trồ ngui jơnau yal yau do tòm rài làng bol Ysơrael be la dô nơm pơn yơu bơh broă bol he pal lơh mbe lơi tòm tŭ tìp bơta gơlòng. 

“Behơ̆ gen, bol he pơnđơl tĕ jơh nùs nàng mut tòm bơta rlô lơngai hơ̆, tồ ò gơs dô nă cau lơi rơp gơpừ đòm krơh cau ò gơs bơta dòn ne.” (Hebrơ 4:11)

Bơta dờng màng la Yàng Tom Trồ ting jat bơta lơi hơ̆ tòm bol he. Bơta mơ bol he sơnđan la “rài kis” mìng la ƀlàng ngềt ngơt gơlòng bol glar bol he dê. Ñchi bơh tai bol he ò lòi Yàng in wàs ală “Dà Lềng Pơrhê” mơ bol he tìp tòm rài kis taih? Yàng eh “lơgar hơ ai” kờñ cèng bol he mut nàng Yàng rgơi ràng tơlik să tòm Kơnràñ dô bă gơnap gơnoar mơ pràn kơldang.

Bal mơ bơta pràn mơ bơta khin cha, bol he bơtê tĕ bơh ală cau lòt lài bơta bơtê dờng màng bơh bơta dòn mơ tơngkah is tĕ să tòm lah “do mìng la dô bơta bơtê lòng sền”.

Dan jà bol he dô nùs bol tòm bơta hòi dan: Khoai Yàng, rài kis do cèng tus kòn in ală bơta gơlòng., dan Yàng dong kòn git bơtê bơh bơta git làm ală cau lòt lài dê nàng rgơi dòn kơnòm Yàng tòm ală bơta. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kờñ gơboh, Yàng Tom Trồ rgơi lơh jơh ală bơta, lơh sir ală bơta, mơya bơta Yàng kờñ sền gŏ tòm bol he la nùs dòn kơnòm mơ dòn bơr Yàng. Ngai do, bol he gam tìp bơta gơlòng lơi taih? Bol he lah pơrhơng Yàng hala bol he rơp dòn kơnòm Ynàg nàng lòt gan bơta gơlòng do taih?

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.