Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai

Rài kis bơsut be dô bơta ntoat pơrlòng bềng bơta gơlòng bòl glar. Tŭ hơ̆, bañ tòm dră, tompìt nàng ntoat tus tơnngu lài mơ cau ndai, bol he rgơi sac rwah dong kòl mơ lòt bal, tồ jơh tơl nă cau guh bal hơ đap mơ ò dô nă cau lơi kòl sang lòi. Hơ̆ kung la bơta Yàng kơp kòñ Cau Dòn Yàng ràng tơlik bal mơ gơp bal mơ kòp nă cau tòm dunnia. 

Ngai do, ngai 27/08/2022, bơta Hòi Dan Kòp Ngai dan jà ông mò oh mi bơtê bal jơnau Yàng dê kơnòm dê bơta dong kòl mò Belinda Elliott dê bơh tơnggume Ò DÔ NĂ CAU LƠI KÒL SANG LÒI

“Àñ tĕ ơnòng kơnjơ̆ bal mơ gơp” (Galati 6:2a)

Bơta rơndap kòñ gơboh añ jê sơnđơn la NBC’s The Biggest Loser pa gơs bơta rơndap pa. Kòp poh, ală cau cih sơnđan mat tòm bơta lòng, bơtê jơh nùs, jòi git ală broă lơh niam rlau jơh nàng gơ hùc kì mơ sơntòm kis dô rài kis niam. 

Añ gơboh gơbài ngan bơta rơndap do, tàibơh gơ ò đơs tus broă pha lìn nàng geh jền priă, be dô êt bơta rơndap ndai. Ală cau cih sơnđan mat nàng tòm gơl rài kis, bơta do bơtào gơs dô bơta rơndap niam hơđang TV. 

Mơya, do là dô bơta rơndap dờng hơ pơgòn phan ƀàn crap wơl dờng ngan, tàibơh hơ̆, rơp ò roh oă tŭ tơngai nàng ală cau cih sơnđan mat sơntòm ràng tơlik bơta pơnđơl. Tòm ală dơ̆ lài, gơs tŭ bơta rơndap gơlik gơs ò niam tài bơh ală cau gơs mat neh tomdră bal mơ gơp nàng gơs mut tòm ngai crap wơl. Mơya tòm bơta rơndap pa do, dô bơta niam neh gơlik gơs. Broă hơ̆ tơngkah añ bơh broă mơ bol he pal càng pơnđơl nàng lơh.

Nam do, geh dô nă cau sơnđan la Daniel, la cau geh khà kì kơnjơ̆ rlau jơh neh cih sơnđan mat tòm bơta pơrlòng do. Khai pa 19 nam, mơya khà kì khai dê la 205 kì. Tòm bơta rơndap poh do, bơta pơrlòng mơ ală cau neh cih sơnđan mat pal tìp la wàs ơhò lòt gan tơnau dà, tơnơ̆ hơ̆ guh mơnơm. Phan ƀàn dờng kơp gơn cau lơi tus tơnggu sơnròp rlau jơh.

Tơnơ̆ mơ tŭ bòl glar wàs ơhò lòt gan tơnau dà, Daniel tìp oă bơta kal ke rlau tŭ sơntòm guh mơnơm. Jơh cau tòm mpồl Daniel dê neh lòt ngài ngan, mơ oă cau neh tus tơnggu. Bulah neh ò jai tă nhờm tai, Danien kư̆ pơnjat drĕ drĕ lòt tus tơnggu.

Tơnơ̆ mơ tŭ jơh ală cau ndai neh lơh sir bơta ntoat pơrlòng, nisơna gơs bơta lơi hơ̆ gơlik gơs. Tŭ Daniel gam ơn ngài tơnggu, kòp nă, kòp nă cau ntoat pơrlòng bal mơ khai lòt tus wă rò khai. Bulah bol khai neh lơh sir bơta guh mơnơm bòl glar mơ gam tă nhòm bòl glar, bol khai kung neh lik nàng chồl bơtrut mơ hơ pơgòn lah bol khai rơp lòt bal mơ Daniel tus lồi dut.

Bal mơ bơta chồl bơtrut oă cau dê, Daniel neh jòi bàn bơta pràn nàng pơnjat guh gơđap. Tŭ sền gŏ tơnggu, Daniel đơs mơ bol khai lah khai kòñ lơh is bơta hơ̆. Bơta chồl bơtrut bol khai dê neh cèng wơl Daniel in bơta khin cha nàng dòn lah khai rơp lơh sir bơta ntoat pơrlòng do. Tòm tŭ hơ̆, cau lơi phalìn, cau lơi kong ơlah ò gam dờng màng tai; dờng màng la kòp nă dô bă bal nàng lơh nền lah ò dô nă cau lơi kòl sang lòi. 

Tŭ sền bơta rngoh rngac do, añ geh tơngkah lah: Cau Dòn Yàng gơs gơnoar broă pal dong kòl mơ chồl bơtrut cau gùtdar war wĕ he. Sră Galati 6:2 bơta bol he “Àñ tĕ ơnòng kơnjơ̆ bal mơ gơp”. Bơta do gơs jơnau gơtha mbe lơi taih?

Tŭ kơlôi sơnơng bơh sèng lùp hơ̆, añ dòp git oă jơnau gơtha. Dilah ông mò oh mi sùm kòñ dong kòl mơ pơndòm pơniang cau ndai, mơya ò git pal lơh bơta lơi, do la dô êt bơta sơnnio dong bol he sơntòm:

Đơs tĕ jơnau pơndòm pơniang cau ndai. Sră Pơnđik 10:11 cih lah: “Bơr cau song ring la dô nơm croh dà bơta kis.” Ông mò oh mi rgơi pơyoa jơnau pơndòm pơniang nùs nhơm cau jê sồt in. 

Rcang sir tĕ iat kơno. Tŭ tìp kal ke, dơ̆ dơ̆ bol he ò khin ai cau ndai in git. Dilah bol he dòp git gơs cau kơp kòñ tompà bơh broă bol khai tìp, jà tĕ bol khai lòt sa ngùl ngai hala hòi điện thoại lùp còp să tồ git bol khai mbe gơ lơh.

Dilah neh tìp bơta behơ̆, tompà tĕ bơta git làm he dê. Yàng sùm lam bol he tus mơ ală cau gap tìp bơta gơlòng bòl glar be bol he neh tìp. Sră Goh ai he in git Yàng la Yàng Tom Trồ ală bơta pơndòm pơniang dê, Bơtau “pơndòm pơniang bol hi tòm jơh ală bơta bòl glar bol hi dê, tồ bơh bơta pơndòm pơniang mơ Yàng Tom Trồ neh pơndòm pơniang bol hi, gen bol hi kung rgơi pơndòm pơniang cau ndai tòm bơta bòl glar lơi bol khai tìp sơl.” (2 Kô rintô 1:4). Bol he rgơi tơmpà ală bơta bơtê jak chài bơh bơta git làm he dê tòm ală ngai neh rlau.

Jòi tĕ broă lơh tòm toh nàng dong kòl cau ndai. Gơs jơnau pơnđik đơs bè do “Broă lơh dờng màng rlau mơ jơnau đơs”. Kơlôi sơnơng tĕ tus broă ông mò oh mi tìp bơta be cau ndai tìp. Bơta lơi rơp kwơ màng ông mò oh mi in rlau jơh taih? Pơnyơu: dilah cau bơyô ông mò oh mi dê gơs kòn dềt mơ sền cau bơyô hơ̆ gơlơh lơgah lơgañ mơ bòl glar ngan, ông mò oh mi rgơi dong kòl khai sền gàr kòn dềt hala lơh broă hìu tòm dô ngai, nàng cau bơyô in geh tŭ rlô bòl. 

Digơlan ồng mò oh mi git dô êt nă cau bơyô, cau gơp ƀòn, hala cau nac crih tìp kal ke tòm pơnah jền priă. Ông mò oh mi rgơi cèng tus bol khai in dô kơldung phan ngui pal càng, hala pơyoa dô êt jền mơ ò ai cau hơ̆ in git. Tŭ bơta lơh sa ò bơtoah bơtwài mơ oă cau roh broă lơh be ngai do, gơs oă ngan cau càng geh bơta dong kòl bơh pơnah jền priă. Bol he cèng tus bơta gơklŏ Yàng Tom Trồ in tŭ jòi duh broă cau gùtdar war wĕ. Yàng Jesu đơs: ‘Di ngan Añ đơs mơ bol mê, tòm tŭ bol mê neh lơh broă hơ̆ mơ dô nă cau dềt rhền rlau jơh tòm ală oh mi Añ, hơ̆ la lơh să tòm Añ in.’(Mathiơ 25:40).

Rlau jơh, hơ̆ la hòi dan tĕ! Bơta dờng màng rlau jơh mơ bol he rgơi lơh la hòi dan gơp in. Sră Goh ai git: “Jơnau hòi dan cau song ring dê gơs gơnap gơnoar dờng ƀă tàm ngan.” (Jakơ 5:16). Gơs tŭ, kơnòm bơh jơnau hòi dan cau ndai dê, añ rgơi lòt gan bơta gơlòng bòl glar. Bañ tŭ lơi sền ò sơp gơnap gơnoar jơnau hòi dan dê!

Sră Goh cih lah, gơnap gơnoar lơh Bơtau Krist in kis wơl bơh bơta chơt kung gam lơh broă tòm bơta tòm lơh đah hwềng bol he dê ngai do. Bơtau Krist ò di mìng iat jơnau hòi dan bol he dê, mơya Kơnràñ kung hòi dan ala bol he in (Rôma 8:34).

Lơh nền tĕ hòi dan ala cau ndai in tòm tŭ bol he gơs tŭ hòi dan kòp ngai.

Dan jà bol he dô nùs bal tòm bơta hòi dan:

Khoai Yàng, tòm tŭ kis tòm dunnia do, dan Yàng dong kòn git dong kòl oh mi ruh lŏ kòn dê lòt gan mơ guh hơđap; gan dê broă đơs jơnau pơndòm pơniang, rcang sir iat kơno, tompà bơta git làm, dong kòl cau ndai gan dê broă lơh tòm toh mơ hòi dan ala gơp in. Dan Yàng dong bol kòn dô nùs bal guh hơ tiah gơklŏ mơ ò dô nă cau lơi kòl sang lòi. Kòn hòi dan tòm sơnđan Yàng Jesu Krist. Amen.

Ơ ală ông mò oh mi kòñ gơboh, kòp nă bol he cau lơi kung tìp ală bơta kơryan kơrdơl tồn lah ò rgơi lòt gan. Cau dòn Yàng git lah Yàng sùm ơm bal. Kơnòm dê Kơnràñ, bol he jòi bàn bơta pràn mơ bơta ring lơngai nàng lòt gan bơta gơlòng bòl glar. Mơya chò hòp ngan tŭ git lah gơs oh mi ruh lŏ tòm bơta dòn kung dô nùs bal mơ bol he.

Bol he gam dô nùs bal cơnđoà lòt tòm rài kis do. Sơmbat tĕ tê gơp nàng lơh nền lah jơh tơl nă cau rơp lơh sir bơta ntoat pơrlòng do.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.