Gơs ală tú tòm rai kis, bol he tìp oă bơta gơlong bol glar tồn lah ò rgơi lòt gan, kung bè tú he hao ơhò lòt gan dà ryà dơng. Hớ la tú bol he dòp git lah, dilah ò gơs bơta dô nùs dô bă bal , gen bol he buôn ngan dà bú hala sơrlớu. Mơya, tú bol he dô nùs dô bă bal lòt gan, ală bơta gơlong bol glar rơp gơlik gơs dô bă buôn soh. Do kung la bơta bơtê mơ Yàng kỡn bol he dòp leng: Bơta pràn kơldang bơta dô bă bal tòm Kơnrẵn.

Ngai do, ngai 05/11/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl Rich Miller dê bơh tơnggume: DÔ BĂ BAL TÒM BƠTA GƠLONG BOL GLAR.

“Jơh dô nơm hìu hơ̆ tơrbŏ bal tòm Kơnràñ, rhòi dờng gơlik Hìu Duh Khoai Sàng Goh Yàng dê.” (Ephesô 2:21)

Tòm dô ngai tòm kơnhai rlô klơng, ẵn mơ mè bèp mơ ală cau gơp hào ơhò chò hòp ngan. Bol he neh mơng mơ bơta hào rơndeh lòt gan bòn dềt lơngap lơngai, mơ kung gơs tú lòt jơng gung jong. Mơya bơta git lam hào ơhò hơđang dà lơngap lơngai tòm bòn dềt do la bơta pha is mơ ò hoàn gơs. Lòi dà bồ he lòt tú duh tơngai kơnhai rlô klơng ngan la dô bơta niam ngan nàng sang ală bơta bol glar ală ngai bơtê tòm klơng.

Mơya, tú do ò di nàng lơh rài bơta bol glar hớ; bol he kung neh kơlôi lai ală bơta gơlong bol glar mơ dơrcul. Rlau mơ dô jơ lơh mơng mơ bơta hào ơhò, bol he tus tiah dà lơnggơr. Dilah bơta do ming la bơta hào ơhò bè òs, gen ală bơta do ò lơh he in rngòt ò, ming la bơta sơnròp tòm bơta gơlong. Mơya mơ ơhò dềt do, ming la dô bơta kal ke dềt lơm kungh rơp gơlik gơs ală bơta sơbơng roh dơng ngan dilah ò hào ơhò dô bă niam.

Nisơna, bèp ẵn jê gơs dô bơta kơlôi sơnưng. Ồng sôr ẵn chồl ơhò pràn nàng ẵn mơ ò rngơi lòt sơnròp tòm mpôl hớ. Tus di tiah rlú rlun, bol he neh at ơhò dô bă niam mơ kơp kỡn lah ală bơta rơp gơlik niam lơm. Bơtoah ngan, bol he neh lòt gan dô bă buôn soh. Bol he hào tus dê ù di gal hiòng, ẵn sơmbat rias chi, mơ bèp ẵn mhar ai máy quay nàng rcang quay wơl mpôl hào ơhò.

Mơ ală bơta ồng quay ngan la dô bơta lơh cau in nõ.

Ală ơhò lòt gan di đap mat bol he dê, bà kwel kiau ma, bà sơrlớ. Ală cau tòm mpôl ai dô đah tê nàng kup hơđang ơhò hala mhar sơmbat kơldung hala chi hào ơhò.

Ẵn ming ngoh nghe bồ, lùp is lah nchi bơh tài ming gơs bèp mơ kon bol he lơm rgơi lơh ală bơta hớ. Bulah ò git bol khai neh tis tú lơi, mơya gơs dô bơta nền cê lah: ẵn mơ bèp ẵn neh di tú bol he dô nus bal tú lòt gan bơta kal ke hớ.

Bơh dớ do tus dớ ne, Yàng Jesus kừ tơngkah ală cau bơtê Kơnrẵn dê pal dô bă bal mơ dô nùs bal duh broă. Tòm mang lài mơ tú kong bol glar jê sồt, Kơnrẵn kung lòi tú jơ nàng hòi dan ală cau mơ Kơnrẵn “sồr bol khai lòt tus tòm dunnia” (Jang 17:18) mơ ală cau “ală cau rơp kơnòm di jơnau bol khai mơ dòn Añ sơl” (Jang 17:20). Bơta Kơnrẵn kơp kỡn la nchi taih? La “nàng jơh ală bol khai gơs dô bă bal… mơ bol khai kung ơm tòm Bol He.” (Jang 17:21)

Bơta hòi dan bơh bơta dô bă bal do ồng Pol kung cih wơl tòm sră Ephesô
“Bơh Kơnràñ la bơta ring lơngai bol he dê, neh lơh cau Juda mơ cau làng bol bơdìh in gơs dô bă bal, lơh tơrlah dơrñang cah is tòmsò digùl bol he… Jơh dô nơm hìu hơ̆ tơrbŏ bal tòm Kơnràñ, rhòi dờng gơlik Hìu Duh Khoai Sàng Goh Yàng dê.” (Ephesô 2:14,21)

Yàng Jesus neh tơrgòm wơl ală jơi bơtian pha is dô bă bal tòm Kơnrẵn. Kơnrẵn dô bă bal mơ Yàng Tòm Trồ mơ Yàng Hwềng Goh, mơ jơl tơl nă cau dòn Kơnrẵn. Kung bè Kơnrẵn ơn jơh tơl nă bol he hơđang dô nơm ơhò, mơ lòt gan dà lơnggơr – bulah la tú lơngap hala càl rbut. Tú ală dà ơm đap mat bol he, ală cau hơđang ơhò ò dô nùs bal gen jơh tơl nă rơp gơplớ. Mơya tú bol he dô nùs bal, dô bă bal tòm dră mơ ală càl rbut dơng mơ lơh jat bơta tề lam Bơtau Lam Gung dê, bol he rơp lòt gan mơ pơnjat tai gung lòt “tồ tòm ală rài tơnơ̆, Kơnràñ rgơi yal tơlik bơta nđàc dờng ơnàng ò git lơh Kơnràñ dê tòm bơta kơ̆ dơn gơwèt mơ bol he tòm Yàng Krist Jesu.” (Ephesô 2:7)

Dan jà bol he dô nùs bal tòm bơta hòi dan:
Khoai Bèp gơboh, kon ưnngai Kơnrẵn bơh bơta dô bă bal mơ bơta kỡn gơboh ò git nđò Kơnrẵn neh ai kon in tòm Bơtau Dong Klàs Jesus. Dan bơto kon kis dô bă bal mơ oh mi tòm Kơnrẵn, nàng rgơi lòt gan ală bơta gơlong bol glar tòm rai kis. Dan Yàng Hwềng Goh tề lam kon, nàng kon sùm cơnđoà lòt jat nùs kỡn Kơnrẵn dê, bulah tú lơngap lơngai hala tú dơrcul lơnnggơr. Kon jơh nùs hòi dan tòm sơnđan Yàng Jesus Krist, Amen.

Ơ ală ồng mò oh mi kỡn gơboh, kung bè dô nơm ơhò pal geh ring bal nàng lòt gan tiah dà lơnggơr, bol he pal dô bă bal tòm rai kis mơ kớ nùs jat bơta tề lam Yàng dê. Tú bol he ơm di đap bơta dơrcul lơnggơr, bol he ò di ming lòt gan bơta gơlong bol glar mơ kung cơnđoà lòt ngai rlau tai tòm gùng lòt bơta dòn he dê. Tú bơta gơlong bol glar tòm rai kis tus, dan bol he dô bă bal mơ kớ bơta dòn nàng pha lin, tôpf sơnđan Kơnrẵn dê geh gơkló tòm rai kis bol he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.