Kờp nă bol he geh deh cau lơi kung gơs nùs nhơm, bơta pha ìs. Bơh bơta pha is tom oă pơnah lơh bol he in buôn ngan gơlik gơs ală bơta ò ring bal tom tŭ ơm tom dô mpôl. Bulah behơ̆, bơta dòn tom Yàng pal lơh gơs bơta pha is tom cau dòn dòp Kơnràñ. Kis tom dunnia bîng bơta cah is mơ gơjrañ-mañ, cau dòn Yàng la ală cau geh hòi sac nang gơlik gơs krơh dô bă bal mơ koñ gơboh.

Ngai do, ngai 07/11/2024, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng dê bal mơ Jessica Teed gan tơnggume DÔ BĂ BAL TOM BƠTAU KRIST.

“Tom ală bơta pal pơndềt să, niam-lơnhơn, ơt-ơl, ai nùs koñ gơboh mơ kong ơt bal mơ gơp. Jơh nùs tĕ ai bơta ring-lơngai be dô nơm che kơt oh mi dô bă bal tom Yàng Hwềng. Gơs mìng dô nơm să jan, dô nă Yàng Hwềng, kung be oh mi neh geh hòi-sac tus tom dô bơta gơn-kơnòm gơrê bal mơ bơta hòi sac oh mi dê.” (Ephesô 4:2-4)

Añ ò di la cau geh têh dờng tom Hiu Jum Goh, tai bơh tus di năm 20 sơnăm, gen song añ git bơh Yàng. Tom tŭ hơ̆, ală seng đơs chò tom Hiu Jum Goh gam pa ngan gơwèt mơ añ. Bulah behơ̆, añ joi geh wơl bơta hon-chò tom broă bơtê git dô seng đơs chò goh hala dô nơm chò jong ro lơi hơ̆. Krơi is, añ gơboh ngan ală chò đơs bơh bơta gơlik gơs dô pơnah tom hiu nhă Yàng Tom Trồ dê, bơh tŭ tơngai jọ̆ jọ̀ng lai mơ tŭ hơ̆, bơta kơp koñ dòp geh gơrê sùm la bơta añ joi jat.

Tom tŭ git añ gơrê mơ să jan Bơtau Krist dê mơ geh sơnđan la kòn Kơnràñ dê, añ git rài kis añ gơs gơtha. Jơnau Song do ai añ in git lah añ la dô pơnah tom să jan Bơtau Krist, mơ bơta dô bă bal digùl ală pơnah la dờng mang ngan, tai bơh bơta hơ̆ rơp dong ceng bơta ang Jơnau Niam mơ bơta gơn-kơnòm ai dunnia roh-rui do in.

Tom sră pơyoa Ephesô 4, cau gơnoar bơto dờng Pol ai bol he in git mbe lơh nang dòp geh bơta dô bă bal tom să jan Bơtau Krist dê, hơ̆ la:
“Tom ală bơta pal pơndềt să, niam-lơnhơn, ơt-ơl, ai nùs koñ gơboh mơ kong ơt bal mơ gơp. Jơh nùs tĕ ai bơta ring-lơngai be dô nơm che kơt oh mi dô bă bal tom Yàng Hwềng. Gơs mìng dô nơm să jan, dô nă Yàng Hwềng, kung be oh mi neh geh hòi-sac tus tom dô bơta gơn-kơnòm gơrê bal mơ bơta hòi sac oh mi dê.” (Ephesô 4:2-4)

Tom dunnia mơ bol he kis ngai do, bơta dô bă bal hala dô nùs bal la dô bơta mơ jơh kờp nă cau kơp koñ. La cau dòn Yàng, bol he geh Yàng sac rwah nang lơh krơh dunnia in bơh rài kis gơtomsor bal mơ gơp. Kơnràñ ơn is bol he nang gơlik gơs bơta àng dunnia in, kung bè dô nơm bon geh bơt hơđang mơnơm ò rgơi pun-ndơp (Mathiơ 5:14-16). Bol he geh hòi sac nang dô bă bal tom dô nơm să jan, dồ nă Yàng Hwềng, dô Bơtau Dong Klas, nang tề lăm cau ndai tus hơ bơta gơn-kơnòm mìng rgơi joi geh tom Yàng Jesu. Tom tŭ să-jan Bơtau Krist dê geh dô bă bal, Yàng Tom Trồ rơp lơh oă bơta dờng crih-crài digùl lang bol, Hiu Jum Goh bol he dê.

Kờp nă bol he geh ai ală bơta nđàc đah hwềng pha is tò lơh broă bal tom bơta dô bă bal. Tai bơh, ò gơs dô nă cau dòn lơi la wil tơl. Jơh tơl nă gơs bơta ò wil tơl. Bulah ò wil tơl, mơ ya bol he geh hòi jà nang lơh broă bal, kis bal tom bơta gơtomsor, tò koñ gơboh bal kung bè Yàng neh koñ gơboh bol he.

Ngan ò di buôn nang koñ gơboh ală cau ò di pal koñ gơboh, mơ ya bol he geh Yàng hòi jà nang pơndềt să mơ lơh jat rài kis koñ gơboh. Tai bơh tơnơ̆ mơ jơh ală bơta, Yàng Jesu neh tơnliah is să he mơ rcang sir phi să hơđang chi pơng kung bè dô bơta pal tom, tò bol he in geh gơtomsor mơ geh sơnđan la song-ring di đap Yàng Tom Trồ. Yàng neh sac rwah mơ koñ gơboh bol he bulah bol he ò wil tơl mơ tôi glài. Gen tang, bol he pal don kơnòm tĕ di pràn Yàng nang kung hoi sac mơ koñ gơboh cau ndai.