Gơwet mơ oă cau, sơnăm rgơi la dô nơm số kir rngòt, tòm tŭ ală gơltau kra dê muh mat sơlơ ngai sơlơ loh lang mơ bơta pràn kơldăng sơlơ gơhùc. Mơ ya tòm Yàng, hơ̆ la dô gùng cơnđoà lòt bal mơ Kơnràñ, nàng joi bàn ală bơta pa mơ kas mang rlau tai kơp ngai. Ala bơh kơlôi rcăng tòm tŭ jơ neh lòt găn, bol he rgơi sac gùng dơp rò ală bơta git lam pa mơ Yàng ai, kung be pơnjat lơh jat gơnoăr sô mơ Yàng jao tòm bơta ringf lơngai mơ hòn chò.

Ngai do, ngai 11/11/2024, Bơta Hòi Dan Kơp Ngài dan jà ală ồng mò oh mi bơtê bal jơnau Yàng kơnòm dê bơta dong kơl mò Linda Gilden dê bơh tơnggumê AÑ NEH KRA, KRA NGĂN!

“Sŏ kò la sơgơn bơtau bơta gơklŏ, Gơ dòp geh bơh gùng dà song ring.” (Pơnđik 16:31)

Kơmòn klau poan sơnăm añ jê koăr măt añ mơ tê dềt khai dê, hwoài añ tus rềp mơ đơs: “Mò ơi, mò neh kra, kra ngăn!”

Ai lơh krơi bơh jơnau đơs bă liă kơmòn dê, añ ming git ñŏ hơ wơl. Nền cê khai rơp ò kòñ git ală bơta kơlôi ngăn añ jê bơh bơta hơ̆!

Tòm tŭ khai tus rèp di măt añ, muh bol he mor tơm tìp bal. Gar mat dềt khai dê be pôn prăp dô bơta ndơp ndơr, khai đơs ơm: “Mơ ya bañ kơlôi sơnưng, kòn rơp ò đơs mơ cau lơi bơta hơ̆ ò!”

Añ la cau ò tŭ lơi wèt tus hơ sơnăm, gen kùng ò sền dơng mang dilah gơs cau lơi hơ̆ git lah añ “ngan neh kra, kra ngăn.” Mơ ya gơwet mơ oă cau, broă cih lơi wơl ală sơnăm kơnhai lòt găn la dô bơta dơng mang ngăn.

Gơp bơyô añ ờs lơh gơs ală bơta yò sao dơng ală ngai chò hơp ngai deh in, hala git lam ală bơta chò hop pa, tian gơs la lòt kơnhơl gut dar lam plai ù. Mơ añ ò di la cau kòñ ală bơta yò sao hala ală bơta kơnhơl chò hòp, gen añ lơh bơta lơi nàng kirsơnre kơp dơ̆ kah ngai deh?

Gơwet mơ añ, sơnăm ò di ming la số gợi. Bulah số ồs đèng hơđăng băn kah ngai deh sơlơ ngai sơlơ oă, añ sac dơp rò sơnăm pa mơ bồ hwing nùs hòn chò mơ sền hơ̆ la phan ban kas mang bơh rài kis, ala bơh lơi bơta kơlôi hala bàssil gom gơrwang.

Dô bơta niam mơ sơnăm cèng wơl la bơta dòn kơnòm bơh sătòm sơlơ ngai sơlơ dơng. Gơs dô tŭ lơmpah, añ đăl git lah Yàng neh crơng gơs añ mơ dô gơnă broă krơi is tòm gùng rơndap Kơnràñ dê – dô gơnă broă mơ ò cau lơi rgơi ala geh. Kơnòm bơta hơ̆, añ gơlơh roh bơta kơlôi tơmpit tòm rai kis, mơ tŭ do, añ dơp lèng kơp tŭ jơ digal gơp bơyô mơ hiu nhă mơ ò pal kơlôi rcăng bơh broă he pal lơh. Gơnă broă añ jê neh geh Yàng lơh nền, mơ ò cau lơi rgơi ai bơta hơ̆. Lơngai nùs ngăn ò git nđờ!

“Bơh bol he la broă lơh Kơnràñ dê, neh geh Kơnràñ crơng gơs tòm Yàng Krist Jesu nàng lơh broă niam, mơ Yàng Tom Trồ neh rcang lài nàng bol he in lơh jat.” (Êphếô 2:10)

Bơta dơp git do neh lơh nền ală pơnah tòm rài kis añ. Tòm tŭ añ sơntơm kơp tê cih dô păng sră, añ ò găm wèt tus tai lah cau ndai kung rgơi cih sră drơm bal, hala kơlôi rngòt lah cau tòm rơp sac sră cau lơi ndai dê. Păng sră añ jê la dô nơm sră mìng dùl lơm. Mơ tòm gùng lòt joi dô ơnih tiah di pal nàng tơmpà sră he dê, añ neh gơs tŭ lơmpah tìp ală cau crih crai, la ală cau niam nùs ai añ in geh ràng tơlik să tòm he!

Tŭ bơta dòn kơnòm sơlơ bơtao tơngguh, añ kung ò găm wèt tus bơh gùng cau ndai kơlôi bơh añ. Ngăn la añ kung kơp kòñ lơh niam, tai bơh añ la ala măt Bèp Hơđang Jong digùl dunnia. Mơya tŭ do, bơta dơng mang rlau jơh la Yàng chò hòp bơh broă añ lơh.

Digơlan phan bàn dơng rlau jơh tŭ gơlik gơs “neh kra, kra ngăn” la bơta têh dơng pơnah đah hwềng mơ añ neh git lam geh. Añ gơlơh dơp geh dô bơta git lam pa bơh ală bơta gam gơn hơđap nê. Kơp păng Sră Goh gơlik gơs kis rlau, mơ añ dơp rò jơnau Yàng ai mơ nùs nhơm hòn chò. Tŭ añ duh khoai, bơta gơtomklac geh gơrềt rlau, be dô nơm cho ò gơs rùp hwoai añ rềp tus hơ Kơnràñ. Mơ ya bơta tìp măt mơ ală cau gơs dô bơta dòn bal ò di ming chôl bơtrồt mư kùng ròng siam hwìng nùs añ.

Ò di nisơna dô drim guh bic, añ gơlơh git lam jơh ală bơta do. Yàng neh bơto tòm añ nglul rai. Gơs ală bơta bơtê añ prăp mhăr, mơya kung gơs ală bơta añ bơtê ngan mơ ò prăp. Gơs dơ̆, Yàng cèng añ in ală bơta bơtê ò niam nùs dô ít lơi, lơh añ nggui di jơng Kơnràñ mơ lơi Kơnràñ bơto añ. Găn dê ală bơta git lam, Kơnràñ neh tơmgơl mơ rong hwing nùs añ gơlik gơs cau mơ Kơnràñ kơp kòñ.

Ngăn añ găm nggui tìng do, tê ăt phan neh rcăng sir lai, gơn rdeh bơh hơđăng trồ lòt rò añ sơl? Nền cê la ò! Rài kis añ kung gam kis chò hơp mơ bềng ală bơta niam, kơp ngai cèng tus ală bơta nisơna bơkah lơngồt.

Đơs ngăn, añ gơs kơlôi tòm tŭ kơmòn añ đơs mơ ală cau lah añ neh kra, kra ngăn hala ò? Ò tŭ lơi!
“Sŏ kò la sơgơn bơtau bơta gơklŏ, Gơ dòp geh bơh gùng dà song ring.” (Pơnđik 16:31)

Añ neh lòt găn ală sơnăm kơnhai kơnòm să añ jê bềng tơl bơta chò hop mơ hòn chò, mơ tŭ do, añ pơnjat tai joi geh ală tŭ lơmpah crih crài rlau tai, tŭ añ “neh kra, kra ngăn!

Dan jà bol he dô nùs bal tòm bơta hòi dan:
Ưnngai Yàng bơh Kơnràñ găm prăp gar kơp nă bol he tòm kơp ală sơm kơnhai kis hơđăng ù. Ưnngai Kơnràñ bơh kơp tŭ lơmpah, kơp bơta git lam mơ Kơnràñ neh ai bol he in tòm jơl jơh rài kis. Dan dong kòn kah bơh kas mang mơ gơnă broă dơng màng tòm gùng rơndap Kơnràñ dê, bulah ơm tòm pah rài gô tòm rài kis dê. Kơp kòñ yal yau bơh rai kis bol kòn gơlik ryas kơp kòñ mơ gơchôl ală cau gut dar in, nàng kơp ngai bol kòn geh kis hơđăng ù la dô nơm gùng lòt lơh ang gơklŏ sơnđăn Kơnràñ. Kòn jơh nùs hoi dan, ai sơnđăn Yàng Jêsus Krist, Amen.

Ơ ală ồng mò oh mi kòñ gơboh, tŭ ală tŭ lơmpah lòt găn, bàñ kơlôi oă ir bơh broă gơs tai nđờ gơltau kra hơđang muh mat. Ala tềng hơ̆, wet tus tĕ broă bol he neh tơrgom geh nđờ tŭ lơmpah dơng màng tòm gùng lòt jat Yàng. Dơp lèng tĕ kơp ngai be la dô nơm phan ban crih crài mơ Kơnràñ ai pà, kis wil tơl hơ să tơm he mơ dô nùs bal lơh gơs ală bơta kirsơnre dipal kah digah gơp bơyô mơ hiu nhă. Tòm tŭ sền tòm krơh, kơp kòñ lah bơta bol he sền gŏ ò dii la bơta gơlik bơh di sơnăm dê, mơ la dô rài kis chò hòp mơ bềng kwơ mơ Yàng neh rcăng sir bol he in hơđap nê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.