Ib tug ntseeg lub neej loj hlob yuav tsis muaj ib zaum twg uas tsis ua haujlwm. Ua haujlwm tau nthuav tawm dhau ntawm lub neej xyaum raws li Tswv Yexus tus qauv, tus uas tau los ua haujlwm pab ntau tus. Yog ib tug tau tsim los muaj tus yamntxwv zoo li Vajtswv, peb tau nqua hu los ua ib lub neej rau lub homphiaj loj dua, ntawd yog txhawb nqa thiab ua rau kom Vajtswv tau koob meej dhau ntawm tes haujlwm pab rau lwm tus.

Hnub no, yog hnub 13/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Esther Griffin dhau ntawm Zaj kawm TAU TSIM LOS UA HAUJLWM

“Txawm yog Neeg Leej Tub los, nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej” (Malakaus 10:45).

Tej zaug koj yuav zoo siab heev thaum uas muaj ib tug neeg twg npaj zaub mov tseg rau koj, caw koj haus ib khob café, lossis ua ib yam dabtsi twg rau koj. Txawm yog tej haujlwm me me los kuj ua tau qauv nrog txoj kev zoo siab tshaj qhov uas peb xav txog, ntawd yog tag nrho tej uas peb txhua tus puav leej xav tau lwm tus saib taus thiab tabncuab txog yus.

Lub siab ua haujlwm pab yog txojcai tseem ceeb nyob hauv peb txoj kev ntseeg, tiamsis ua haujlwm pab cuag li yog ib teg haujlwm uas nyuaj ua tshuaj plaws. Vim kev txhaum, raws li tus cwjpwm ib txwm coj, peb dhau los ua neeg qia dub, nyiam txhawj rau tus kheej dua. Tiamsis qhov no tsis tau txhais tias peb yuav tau raug khi ua ke nrog txoj kev ua neej ntawd.

Tswv Yexus yog tus qauv zoo txog lub neej ua rau Vajtswv tau koob meej hauv ntiajteb. Tswv Yexus nthuav tawm lub neej puv npo Vaj Ntsujplig, yog Vajtswv ib tug tub qhe tiv kev txomnyem (Yaxayas 52:13-15). Tswv Yexus los rau hauv lub ntiajteb tsis yog cia lwm tus tu nws tiamsis nws tu lwm tus:

“Txawm yog Neeg Leej Tub los, nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej” (Malakaus 10:45).

“Tsimnyog nej muaj lub siab zoo ib yam li Yexus Khetos lub: Yexus yeej muaj hwjchim sib luag zos li Vajtswv, tiamsis nws tsis tau xav hais tias nws yuav tuav lub hwjchim ntawd mus li. Tiamsis nws zoo siab tso ib puas tsav yam tseg, nws los yug ua neeg. Nws ua nws lub neej zoo li ib tug tubqhe, thiab nws txo hwjchim. Nws txo hwjchim thiab niaj hnub ua raws li Vajtswv lub siab nyiam, txawm yog neeg muab nws ntsia rau saum ntoo khaublig los nws tseem mloog Vajtswv lus (Filipis 2:5-8).

Kev hlub loj tshaj plaws yog kev hlub muab nws txojsia tuag theej (Yauhas 15:13). Txawm yog kev ua haujlwm pab lwm tus tsis yog ib txoj kev hlub loj npaum ntawd los, nws yog ib qhov haujlwm qhia tawm txoj kev hlub.

Filipis 2:1-8 qhia paub tias txawm yog Paulus tab tom nyob hauv tsev rau txim los, yawg yeej nco ntsoov ntuas cov ntseeg hauv Filipis ua lub neej txawv ntiajteb. Paulus qhia lawv txog tus qauv zoo tshaj plaws yog Tswv Yexus, thiab ntuas kom peb dhau los zoo li Nws. Yuav tau xav txog lwm tus ua ntej uas xav txog peb tus kheej.

“Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug” (Filipis 2:3).

Ntawm no yeej tsis yog ib txojcai tshiab, vim Tswv Yexus twb qhia kom peb yuav tau hlub kwv tij zej zog ib yam li peb tus kheej:

“Thiab nqe ob uas tseemceeb hais li no hais tias: ‘Hlub koj tej kwvtij zejzog ib yam li koj hlub koj lub cev” (Mathais 22:39).

Sim xav saib lub ntiajteb uas peb nyob yuav zoo li cas yog tias tus twg twb nkag siab thiab ua raws li Vajtswv tej lus txog kev ua haujlwm? Tseeb tiag yeej tsis muaj li ntawd, tsuas yog thaum peb mus saum ntuj ceebtsheej thiaj muaj xwb. Tiamsis yog peb coj raws li Vajtswv tej lus thiab muab lwm tus tso ua ntej peb tus kheej, ces qhov no yuav muaj kev hloov pauv loj hauv peb lub neej, peb tes haujlwm, thiab peb tes num. Hnub no sim xav txog tej haujlwm uas peb tuaj yeem ua tau kom pab peb tej kwvtij. Nco ntsoov Vaj Ntsujplig yog tus coj peb thiab nrog peb ua ke thaum peb ua haujlwm hauv ntiajteb no.

Thov caw nrog kuv peb thov Vajtswv ua ke:
Ua Tswv Yexus tsaug, rau qhov Koj tau tseg ib tug qauv txo hwjchim los ua haujlwm zoo kawg nkaus rau kuv. Thov pab kom kuv yuav muaj lub siab ua haujlwm, saib taus thiab hlub lwm tus ib yam li kuv tus kheej. Kuv thov hauv Tswv Yexus Khetos lub npe. Amees.

Cov kwv tij txhua tus, paub txog Tswv Yexus twb tau mloog lus thiab txo nws tus kheej, tuag theej peb, koj puas yuav txaus siab los vam khom Vajtswv pab koj kom koj ua tau lub neej txo hwjchim thiab ua dejnum? Cia li thov Vajtswv pab koj kom tsis yog tsuas txhawj rau tus kheej xwb, tiamsis tseem paub txhawj rau lwm tus thiab, txawm yog kwv tij tsis koom kev ntseeg. Vim paub tias kev hlub thiab kev cawmdim yuav tau nthuav tawm dhau ntawm lub neej sib hlub thiab ib leeg pab ib leeg.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj. Thiab peb xav kom txuas tau nrog koj.