Yuav zoo kawg nkaus yog tias tom qab txoj kev siv zog, peb txais tau yus qhov khoom plig. Ntawd tej zaug yog nqi zog thaum kawm tau ntawv zoo, ua tiav haujlwm zoo, lossis sib tw tau zoo. Txais tau nqi zog thiab tej yam muaj nqis hauv lub ntiajteb no ua rau peb muaj kev txaus siab, tiamsis lub homphiaj kawg hauv peb lub neej tsis yog tsuas yog li xwb. Peb yuav tau khiav tiag kom tau qhov nqi zog nyob saum ntuj ceebtsheej.

Hnub no, yog hnub 14/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Ana Zugheri dhau ntawm Zaj kawm CAUM KOM TAU QHOV KHOOMPLIG CEEBTSHEEJ.

“Yog li ntawd, kuv thiaj li khiav ncaj nraim mus rau tus ciam tom kawg kom kuv tau nqi zog. Qhov nqi zog ntawd yog txojsia ntev dhawv mus ibtxhis uas Vajtswv khaws cia rau saum ntuj ceebtsheej tos peb cov uas ntseeg Yexus Khetos” (Filipis 3:14).

Kuv tus ntxhais kawm thawj xyoo hauv tsev kawm ntawv trung học. Thaum nyuam qhauv kawm qib ob xwb, kuv tus ntxhais twb pib ncaws pob lawm. Txawm yog nws ntsib ntau qhov txhab nrog rau siv ntau lub sijhawm los xyaum, ntau zaug yuav tau xyaum nrog kua muag, tiamsis kuv zoo siab thaum pom kuv tus menyuam txawj zuj zug tuaj. Nyob rau cheeb tsam Texas, kub txog 42 độ. Tiamsis kuv tus menyuam yeej tawm mus sib tw. Txhua yam cuag li nyuaj kawg nkaus.

Txawm li los kuv tus ntxhais nws yeej nyiam hom kev ncaws pob no, nyiam nws tej phooj ywg ncaws pob ua ke thiab nyiam tshaj plaws yog nws ncaws nkag lub qhov rooj. Tag nrho tej kev siv zog ntawd puav leej tau txais nqi zog rau xyoo dhau los, kuv tus ntxhais yog tus thawj coj ntawm lawv pab pawg thiab nws muaj zog heev.

Yog ib leej niam, kuv txaus siab rau kuv tus ntxhais. Tiamsis yuav tau hais tias txhua zaug kuv pom kuv tus ntxhais raug mob, lossis pom tus thawj yuam kom nws xyaum ntau tshaj nws lub zog, qhov ntawd ua rau kuv muaj kev tsis txaus siab. Kuv tsuas xav kom kuv tus menyuam ua neej zoo xwb vim txhua yam cuag li nyuaj dhau. Hmoov zoo ib qhov uas kuv tus txiv nws pab kom kuv ntsia pom yog rau kuv tus kheej txoj kev xav, nws kuj ntuas kuv txhua zaug uas menyuam ntsib kev txomnyem, tsis txhob npau taws tiamsis cia li txhawb tej menyuam zog. Qhov no ua rau kuv nco txog yuav tau tig rov qab los nrhiav Vajtswv tej lus, pab kom kuv nrhiav pom lub zog loj.

Filipis tshooj 3 yog ib feem nyob hauv tshooj Vajluskub uas kuv nyiam. Nyob hauv tsab ntawv no, kuv tau ceeb toom yuav tau hloov kuv txoj kev xav tus cwjpwm thiab tes haujlwm. Kuv nyiam txoj kev uas Paulus hais txog tej uas yawg muaj:

“Thaum yug kuv tau yim hnub lawm, lawv muab kuv ua kevcai txiav. Kuv yeej yog neeg Yixalayees, kuv yog xeem Npeenyamees, kuv yog neeg Henplais, kuv yug hauv haivneeg Henplais. Yog yuav hais txog qhov uas coj raws li cov Yudais tej kevcai, kuv yeej yog tus uas coj raws li cov Falixais pab. Yav tas los kuv coj txoj kevcai no nruj heev, kuv thiaj li tsimtxom cov ntseeg Yexus. Yog Vajtswv coj tus uas xyaum ua raws li Vajtswv txoj kevcai los nrog Vajtswv sib raug zoo lawm, ces Vajtswv yuav xub coj kuv los nrog Vajtswv sib rau zoo, rau qhov kuv yeej coj raws li txoj kevcai, kuv tsis tau ua txhaum ib nqes li (Filipis 3:5-6).

Tiamsis Paulus yeej tsis khav lossis txaus siab txog tej ntawd. Vim Yexus Khetos, Paulus saib txhua yam ntawd tsis muaj nqis thiab saib li khib nyiab, vim Tswv Yexus muaj nqis tshaj rau nws. Ntawm peb, peb yog cov nrog tus Tswv mus, lub homphiaj kawg yeej yog xav kom dhau los zoo li Vajtswv, tsis yog tsuas nrhiav “yam muaj nqis” lossis tau koob meej hauv ntiajteb xwb.

“Yog li ntawd, kuv thiaj li khiav ncaj nraim mus rau tus ciam tom kawg kom kuv tau nqi zog. Qhov nqi zog ntawd yog txojsia ntev dhawv mus ibtxhis uas Vajtswv khaws cia rau saum ntuj ceebtsheej tos peb cov uas ntseeg Yexus Khetos” (Filipis 3:14).

Yooj yim rau kuv qhuas txog tej uas kuv tus menyuam ua tau. Kuv tus ntxhais tsimnyog rau tej uas nws khwv tau, vim nws tau tag siab ua thiab kawm. Tiamsis kuv xav tias kuv tau yuam kev yog tias kuv tsuas txhawb tej menyuam los ntawm tej uas lawv ua tau, kuv yuav tsum txhawb tej menyuam los ntawm Vajtswv tej lus, raws li Paulus ntsia pom txog tej uas nws ua tau nyob rau hauv lub ntiajteb no. Tiamsis nyob hauv txhua yam tau muab rau yus ua, yuav tau ua kom zoo thiab ua tag siab hlo ib yam li ua rau Vajtswv thiab txhais ruam mus ntxiv hauv tej kev sim siab pauv qhov tso tseg vim txhua yam cuag li nyuaj dhau.

“Kuv tsis tau khav hais tias kuv twb tau tej uas kuv hais los no lawm lossis ua tau kuv lub neej zoo kawg nkaus lawm, tiamsis kuv tseem tabtom siv zog ua saib kuv puas tau tej ntawd los ua kuv tug, ib yam li Yexus Khetos tau coj kuv los ua nws tug lawm.” (Filipis 3:12).

Thaum no kuv paub ceev faj txhua zaug uas kuv txhawb kuv tus ntxhais lub zog. Kuv thov Vajtswv kom nws siv nws tej peev xwm thiab koob hmoov uas Vajtswv pub los rau siab ntso ua haujlwm thiab siv zog kawm kom ua tau tej uas nws ntshaw, tiamsis kuj yuav tau nco ntsoov tias Vajtswv thiaj yog lub hauv paus zog loj thiab yog kuv tus ntxhais lub homphiaj hauv txhua yam nws ua. Kuv thov Vajtswv kom Vajtswv siv kuv tus ntxhais kom tej neeg ib ncig yuav ntsia pom nws txoj kev ntseeg nyob hauv Tswv Yexus dhau los ntawm nws txoj kev siv zog.

Kuv thov kom Vajtswv siv txoj kev ua siab ntev, tiv kev txomnyem thiab tej uas peb ua tau los pab lwm tus paub Yexus Khetos, vim peb paub tias Tswv Yexus lub npe yuav tau koob meej dhau los ntawm peb txoj kev siv zog. Tom qab tej uas peb ua tau ntawd, peb paub tias peb tsis yog ua neej nyob tsis muaj qab hau, lossis siv tsis txog tej koob hmoov tej peev xwm uas Vajtswv pub, tiamsis twb siv zog khiav thiab ua txoj haujlwm zoo tshaj plaws kom Vajtswv tau koob meej.

Thov caw nrog kuv peb thov Vajtswv ua ke:
Tus Tswv, thov pab kom kuv tsis khav txog tej uas kuv ua tau, tiamsis khav hauv Yexus Khetos txog tej uas koj tau pub kom kuv ua tau tej ntawd. Thov kom Vajtswv koj siv kuv lub neej, siv txhua yam uas zoo tshaj plaws ntawm kuv los ua rau kom Vajtswv koj tau koob meej. Kuv thov hauv Tswv Yexus Khetos lub npe. Amees.

Cov kwv tij txhua tus, koj twb muab tej uas koj ua tau fij rau ntawm Tswv Yexus lawm tsis tau? Yuav tau nco ntsoov txhua yam uas nyob hauv ntiajteb no yog tsis muaj qab hau, tiamsis qhov ntawd yeej tsis tau txhais tias peb cia li tsis txuag peb lub neej, tiamsis thaum Vajtswv tseem cia koj nyob hauv ntiajteb no, yuav tau ua kom zoo rau txhua yam uas Vajtswv pub, vim thaum kawg Vajtswv yuav muab nqi zog rau tus uas ncaj ncees hauv txoj kev sib tw ntawm sab ntsujplig no.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj. Thiab peb xav kom txuas tau nrog koj.