Cho-hòp ngăn, dilah tơnơ̆ mơ jơh ală bơta pơnđơl pran, bol he dòp geh phan ban he dê. Hơ̆ digơlan la phan ban he bơtê jak, gơs công nha niam tom broă lơh, hala tơm tŭ pơrlong tom bơta kơnhơl. Dòp geh công nha mơ phan ban tom dunnia lơh cho-hòp kờp nă cau in, mơ ya tơnggu lôi dùt rài kis he dê ò di ming behơ̆ lơm ò. Bol he pal ntoat pơrlong geh phan ban hơđang trồ.

Ngai dọ, ngai 14/11/2024, Bơta Hòi Dăn Kờp ngai dan jà oh mi kơlôi sơnơng bal Jơnau Yàng bal mơ cau cih Ana Zugheri bơh tơnggume SƠMBAT GEH PHAN BÀN HƠĐANG TRỒ.

“Añ ntoat song hơ tơnggu tô sơmbat geh phan bàn bơh bơta hòi-sac hơđang trồ Yàng Tom Trồ dê tom Yàng Jesu Krist.” (Philip 3:14)

Tŭ do, kòn ur ăñ jê gam bơtê năm sơnròp ‘cấp’ bar dê. Bơh tŭ bơtê ơdŭ bar, kon ur añ neh sơntom kơnhơl plai choh. Bulah neh tìp oă bơta sồt-rmăn, băl mơ oă tŭ jơ bơtê, gơs tŭ pal bơtê mơ dà mat gơklac bal mơ dà pơhàl. Mơ ya ăñ cho-hòp tom tŭ sên gọ̆ kòn ăñ bơtào tơngguh kờp năm. Tom bon Texas, tiah mơ trồ tơngai tus di 42’C, mơ ya kòn kung pal ntoat pơrlong. Jơh ală bơta gơlơh bol glar kalke ngăn.

Bulah behơ̆, kòn ur ăñ jê kung kư gam koñ bơta kơnhơl do, koñ cau gơp bơyô kơnhơl bal, mơ ñưk là tŭ geh công nha. Jơh ală bơta pơnđơl pran hơ̆ neh geh tòm wơl tom tŭ sơntòm bơh năm or, kòn ăñ jê là cau tề lăm mơ tŭ do la cau pran rlau jơh.

Là dô nă cau mè, ăn hừh nùs bơh kòn añ jê,mơ ya kung păl đal git lah kờp tŭ añ sên gọ̆ kòn sồt-rơman, hala sền gọ̆ cau at-bồ tề lăm kup kòn pal bơtê rlau mơ pran khai dê, gen nùs nhơm ò sup ò-iang kư gơ ơm sum tòm ăn. Añ mìng kơp koñ khai geh khat gơboh rlau bơh jơh ală bơta gơlơh bol glar ngan. Bơtoah ngăn tom tŭ bau klau ăn jê sùm dong kơl añ rgơi sền gọ̆ bơta di pal mơ nùs nhơm ăñ jê, khai kung tơngkah ăñ tŭ añ sền gọ̆ kòn tìp bol-glar. Pal gơs bơta pơndom pơndiang kòn la niam rlau mơ gơs nùs sơ-êt sơ-êl. Bơta do tơngkah ăñ rê wơl joi Jơnau Yang dê, jơnau dong bol he joi geh wơl bơta pran.
Philip 3 là seng sră goh ăñ koñ gơboh ngăn. Tom sră pơyoa dọ, ăñ geh tơngkah pal sên wơl bơta kơlôi sơnơng he dê. Añ koñ gùng mơ Pol đơs bơh ală bơta mơ ông neh geh:

“Añ neh kong siat gơltau tom ngai pham, añ la cau làng bol Israel dê, tom jơi bơtian Benjamin, cau Hebrơ, kòn cau Hebrơ dê, jat bơta boh lam gen la cau Pharisi; bơh nùs ngac-ngar gen la cau kup kơryan Hiu Jum Goh, ai bơh bơta song-ring bơta boh-lam dê gen ò gơs tiah geh lah pơrhơng.” (Philip 3:5-6).

Mơ ya, ông Pol ò tŭ lơi jòng să hala pơnhừ să bơh ală bơta hơ̆. Bơh Bơtau Krist, ông sên ală công nha he gơs be la roh lơm, bơh bơta dòp git Yang dong klàs gơwèt mơ ông là kwơ mang rlau jơh. Gơwèt mơ bol he, la cau don jăt Yang, tơngu lôi dut là pal gơlik gơs bơsùt bè Yang, ò di joi ală công nha is hala công nha tòm dunnia dọ.

“Añ ntoat song hơ tơnggu tô sơmbat geh phan bàn bơh bơta hòi-sac hơđang trồ Yàng Tom Trồ dê tom Yàng Jesu Krist.” (Philip 3:14)

Buôn ngăn tò añ in jòng să bơh ală công nha kòn ăñ jê. Kòn ur ăñ jê di pal mơ ală bơta neh dòp geh, bơh khai neh jơh nùs lơh broă mơ bơtê-pơsrăm. Mơ ya ăñ kơlôi añ rơp tis nrah ngan bơh dilah mìng pơndom pơndiang kòn mơ bơta jòng să bơh ală công nha, mơ ya añ pal pơndom pơndiang kòn mơ Jơnau Yang, tom bơta sền sơwì cau gơnoar bơto dơng Pol dê bơh ală công nha tom rai dọ. Bulah behơ̆, tơm ală broă geh jao, pal lơh sir wil tơl mơ jơh nùs kung bè lơh Yang in mơ pơnjat cơnđoà tom ală bơta gơlòng bol glar, rlau mơ kong alah bơh sên gọ̆ bơta kalke.

“Hơ̆ ò di la añ neh geh rau, hala neh tus dê bơta wil-tơl rau ò, mơ ya añ gam ntoat tô sơmbat geh, bơh să-tòm añ neh geh Yàng Jesu Krist sơmbat rau.” (Philip 3:12)

Tŭ dọ, ăñ neh kơrhia rlau tom tŭ pơndom pơndiang kòn. Añ hòi dăn lah khai rơp pơnjat ngui bơta chai rgơi, bơta nđàc, ngac-ngar lơh broă mơ bơtê tò geh ală bơta mơ khai dê kơp kơñ, mơ ya kung păl kah lah Yang la bơta pran mơ tơnggu khai dê tom ală broă lơh. Ăñ hòi dăn dăn Yang ngui kòn ăñ jê nang ală cau gùt dar rgơi sên gọ̆ bơta dòn tom Yang Jesu bơh di ală bơta pơnđơl pran khai di.

Dăn Yang ngui bơta kơ̆ dơ̆n, kong-ơt, mơ công nha bol he dê nang dong cau ndai git bơh Bơtau Krist, bơh git lah sơnđăn Yang geh gơklọ̆ bơh di bơta pơnđơl pran bol he dê. Tò tơnơ̆ mơ jơh ală công nha hơ̆, bol he git he neh kis ò di là ò kwơ, hala lơh roh mơ bơta nđàc Yang ai, mơ ya neh ntoat mơ lơh broă niam nang sơndăn Yang geh gơklọ̆.

Dan jà bol he dô nùs bal tòm bơta hòi dan:
Khoai Yang, dăn Yang dong kòn băñ jong să bơh ală công nha mơ kòn dòp geh, mơ ya jòng să bơh Bơtau neh ai bơta nđàc nang kòn dòp geh ală công nha hơ̆. Dăn Yang ngui rai kis kòn, jơh ală bơta niam rlau jơh kòn dê tò lơh ang sơnđăn Yang. Kòn jơh nùs hòi dăn tom sơnđăn Yang Jesu Krist, Amen.

Ơ ală ông mò oh mi, ngăn he neh ơn ală công nha he dê hơđơm jơng Yang hala ò? Păl kah tĕ lah bulah oă bơta tom dunnia do la roh lơm, mơ ya bơta hơ̆ ò di la bol he sên ò dơng mang rai kis he. Mơ ya tŭ Yang găm ơn he tòm dunnia dọ. Pal lơh tĕ dô bă niam ală broă geh jao, tai bơh lôi dut Yang rơp ai phan ban ală cau lơi in don song tòm bơta ntoat pơrlong đah hwềng dọ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.