Hauv txoj kev nrog tus Tswv mus, peb tsis yog tsuas tau hu los tuav thiab tiv thaiv peb txoj kev ntseeg xwb, tiamsis tseem yog xyab peb txhais tes los hlub sawv daws. Vajtswv npaj rau peb txhua tus zoo li tej tub rog, tsis yog cia los tiv thaiv Vajtswv lub nroog tiamsis tseem ua rau kom peb coj txoj kev cia siab thiab kev cawmdim mus pub rau txhua tus. Tag nrho tej neeg uas tshwm nyob hauv peb lub neej puav leej muaj nqis ntawm Vajtswv qhov muag, puav leej tsimnyog los paub Vajtswv txoj kev hlub.

Hnub no, yog hnub 18/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Ben Ledger dhau ntawm Zaj kawm LUB TSEV RUAJ KHOV RAU TXHUA TUS

“Peb thov Vajtswv pab kom nej ib tug txawj hlub ib tug heev dua yav tas los lawm, ib yam li uas niaj hnub no peb hlub nej.” (I Thexalaunikes 3:12)

Thaum tseem yau, kuv nyiam tej khoom ua si qub qub thaum ub, niaj hnub saib movies txog cov tub rog thiab xav tias yus koom tes nrog tej kev ua rog nrog cov neeg muaj koob nto npe, muab ib tug pas los ua ntaj. Twb muaj hnub nyoog lawm kuv mam mus txog rau sab tebchaws châu Âu. Txoj kev mus zaum no, kuv kub siab lug npaj homphiaj kom pom kiag ib lub tsev loj ruaj khov – yog yam uas kuv ib txwm npau suav los lawm ntev.

Thawj zaug ntsia pom ib lub tsev loj tiag tiag, kuv xav tsis thoob li. Tiamsis thaum nkag mus saib nws ho yog lwm yam. Tom qab yuav vé nkag hauv thiab saib ib ncig ntawm lub tshav puam, thawj qhov chaw uas luag coj qhua mus ncig ho yog ib qhov chaw muag tej khoom khaws cia ua kev nco txog. Kuv txeem ntawm cov qhua uas lawv tab tom tham lawv lus mus. Tamsim ntawd, kuv cim civ nug: thaum ub, tej tsev no tau puab coj los tawm tsam cov yeebncuab uas tuaj ntawm txhua lub tebchaws tuaj ua rog, thaum no, tsis paub li, muaj coob tug qhua tuaj ntawm cov tebchaws uas yav dhau los lawv “yog yeebncuab” tuaj ntawm no saib tej chaw no?

Txawm yog thaum pib ua rau xav tsis thoob los, tej tsev no nws loj tshaj qhov uas kuv xav. Zoo heev thaum uas ntsia pom cov neeg thaum ub txoj kev ua neej. Tamsim no, tej tsev no tsuas yog tseg rau qhua tuaj saib, tiamsis thaum ub – tom qab lub tuam tsev ces tej no yog tej tsev uas tseem ceeb tshaj plaws. Ib lub tsev zoo yuav tsum tau ua rau ntawm ib qhov chaw zoo. Muaj ntau lub tsev luag puab rau nws nyob nws ib leeg saum tej roob, lossis saum tej lub roob hluav taws uas twb tuag lawm, saib mus rau hauv ces yog tej tiaj nrag lossis tej ncov roob nyob hauv. Tiamsis qhov tseem ceeb dua ntais yog tej uas nyob ib ncig ntawm lub tsev, xws li tej zej zog, tej chaw ua noj ua haus, lossis tej qhov zeb. Muab ua lwm lo lus hais, cheeb tsam no yuav tsum yog ib cheeb tsam uas tsimnyog tiv thaiv.

Thib ob, yuav tau muaj kev koom tes ntawm cov neeg txawj ua tsev, tej thawj coj txawj ntse thiab tej tub qhe nquag. Kev yuav ua ib lub tsev zoo tsis yog xwb tim cia li muaj, tiamsis nws yog tej uas lub caijnyoog teeb tseg. Thiab qhov uas tsim kom tau ib lub tsev loj li ntawd nws tsis yog tias tib pliag cia li ua tau. Nws yuav tau tsimnyog rau sawv daws txhua tus txoj kev siv zog thiab tej zog uas lawv tau siv los ua.

Thaum kawg, txawm yuav ruaj luaj twg los, lub tsev no yuav tsis muaj nqis yog tias tsis tso ib yam dabtsi rau hauv. Tus tswv ntawm lub tsev no yuav tau tseg tej tub rog txawj tuaj zov. Lawv kuj tshua txog tej pej xeem, npaj qhov chaw nkaum tso siab muaj ntsa yeej tiv thaiv thaum muaj yeebncuab tuaj txeeb. Lub tsev no tej zaug nws yuav tso tej khoom muaj nqis rau hauv, tiamsis qhov uas luag ua los yog tseg los tiv thaiv cov neeg uas tab tom ua neej nyob rau hauv thiab ib ncig ntawd.

Vajtswv pub rau peb muaj tus cag ruaj khov los txhim kho lub neej. Txhua hnub peb yuav tau txhim rau saum tus cag ntawd, Vajtswv txoj kev tshwm ntsej muag yuav ntuas kom peb nco ntsoov tias: Ua Vajtswv haujlwm tsis yog thaum twg twb yooj yim, tiamsis yuav tau qhov khoom plig kom tsimnyog, tiamsis, peb lub tsev txawm yuav ruaj npaum twg los nyob rau hauv lub ntiajteb muaj kev hloov pauv li no, peb tsis yog tsuas puab xwb tiamsis yuav tau tiv thaiv rau peb tus kheej. Vajtswv hais nyob hauv Yaxayas 45:20,22:

“Tus Tswv hais tias: Nej txhua haivneeg uas dim kev tuag ntawd, nej cia li sib sau los ua ke thiab txav los kom ze! Tej neeg nqa rawv tej mlom ntoo thiab thov tej vajtswv uas cawm tsis tau lawv. Lawv tsis paub dabtsi…Txhua haivneeg uas nyob hauv ntiajteb, cia li tig los cuag kuv nej thiaj yuav dim! Kuv thiaj yog Vajtswv yeej tsis muaj dua lwm tus vajtswv li.”

Thoob plaws Vajluskub Qub peb pom muaj ib tug Vajtswv saib xyuas thiab ua haujlwm hauv cov neeg Yixalayees. Kuv ntseeg tias Vajtswv tau cob lawv zoo li cov tub rog, tsis yog tsuas tseg tiv thaiv Vajtswv txoj kev tseeb, tiamsis tseem yog qhib lub qhov rooj kom dav caw txhua xeem neeg, vim tag nrho sawv daws puav leej tsimnyog tau txais kev cawmdim.

Niaj hnub nim no, qhov no yeej tseem yog rau tej neeg ib ncig peb – ntawm tej neeg txheeb ze, cov neeg hauv tsev neeg, phooj ywg, zej zog, tej neeg txheeb ze, phooj ywg ua haujlwm, nrog rau tus uas peb ntsib. Txhua tus puav leej tsimnyog tau txais kev cawmdim thiab tsimnyog rau peb siv peb lub zog, lub sijhawm los mus pab lawv puab – lossis rov qab kho peb lub neej nyob rau ntawm tus cag uas ruaj khov: Yog Tswv Yexus, thiab kev hlub yog lub zog pab kom peb ua tau tag nrho tej no. Ib yam li Paulus tau ntuas cov ntseeg hauv Thexalaunikes:

“Peb thov Vajtswv pab kom nej ib tug txawj hlub ib tug heev dua yav tas los lawm, ib yam li uas niaj hnub no peb hlub nej.” (I Thexalaunikes 3:12)

Thov caw nrog kuv peb thov Vajtswv ua ke:
Ua Vajtswv tsaug vim kuv tau nyob rau hauv lub tsev zoo yog Koj. Thov pab kom kuv muaj lub siab tawv xyab tes los txais yuav tej neeg ib ncig nkag los rau hauv koj txoj kev tiv thaiv. Thov coj kuv mus kom txog rau tus uas tab tom nrhiav qhov kaj uas yog kev hlub thiab koj txoj kev cawmdim. Thov Vajtswv foom koob hmoov rau ib tug zuj zus nyob hauv kuv zej zog, kom sawv daws puav leej muaj caij los saj koj txoj kev hlub thiab kev tiv thaiv. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv nqua hu peb xyab tes los txais tos tej neeg ib ncig, pab kom lawv nrhiav tau qhov chaw ruaj khov nyob hauv Tswv Yexus. Thaum txoj kev hlub dhau los ua lub zog, peb yuav ua neej nyob taus ua ke rau hauv ib lub tsev uas ruaj khov, qhov chaw uas sawv daws puav leej muaj caij los saj txoj kev hlub thiab kev cawmdim uas Vajtswv tseg rau peb txhua tus. Cia li koom siab ua ke tsim kom muaj ib lub zej zog puv npo kev cia siab, qhov chaw uas peb txhua tus lub siab puav leej tau txhawb kom sov so hauv txoj kev hlub thiab kev tiv thaiv.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj. Thiab peb xav kom txuas tau nrog koj.