Puas muaj zaum twg peb nug tias: Yog tias txoj kev ntseeg tsis tau muab qhia rau tiam txuas ntxiv, tsis paub nws puas yuav muaj nyob? Saib cov neeg Yixalayees, peb pom meej zaj kawm tseem ceeb hauv txoj kev qhia txoj kev ntseeg ib tiam dhau ib tiam. Yam dabtsi yuav tshwmsim tuaj thaum uas Yausuas tag sim neej thiab muaj dua ib tiam txuas ntxiv loj hlob tuaj, yog ib tiam uas tsis paub txog Vajtswv?

Hnub no, yog hnub 20/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm IB TIAM TXUAS IB TIAM

“Cov laus uas nyob tiam ntawd puavleej tuag tas huv tibsi lawm, ces tiam tom qab no tsis nco qab txog tus Tswv tej txiaj ntsig uas nws tau ua rau haivneeg Yixalayees li lawm” (Cov Thawj Tswj 2:10).

Yog thawj tus nyob hauv tsev neeg ntseeg Vajtswv, kuv pom tias yog ib lub nra nyhav tsuam rawv kuv lub xub pwg. Kev ntseeg tsis yog yam uas peb ceev cia rau peb tus kheej tiamsis yuav tau muab qhia, qhia rau tiam txuas ntxiv. Yuav ua li cas kuv thiaj yuav ua tau qauv rau kuv tej menyuam xyaum los ntawm txoj kev ntseeg uas kuv txais ntawm Vajtswv los? Qhov no yog ib yam uas nyhav siab nyob rau hauv kuv lub siab.

Thaum uas xav txog tej no nyob hauv qhov kaj ntawm Vajtswv txojlus, kuv txais tau ib zaj kawm tseem ceeb ntawm cov neeg Yixalayees, tshwj xeeb nyob rau ntu uas thaum Yausuas tag sim neej, yog ib lo lus ntuas txog qhov uas peb yuav tau qhia peb txoj kev ntseeg rau tiam txuas ntxiv.

Saib cov neeg Yixalayees txoj kev ua neej peb ntsia pom txoj kev sib txawv ntawm peb tiam – Mauxes tiam, Yausuas tiam thiab tiam tom qab Yausuas. Ib tiam twg nws muaj ib txoj kev coj txawv thaum ntsib Vajtswv, kuj txawv nyob hauv lawv txoj kev uas lawv nthuav qhia lawv txoj kev ntseeg rau Vajtswv, ib yam li tag nrho haiv neeg Yixalayees txoj kev ntseeg.

Mauxes, yog cov neeg Yixalayees ib tug thawj coj muaj koob nto npe, tsis yog tsuas coj haiv neeg dhau tom roob moj sab qhua xwb tiamsis nws tseem qhia kev ntseeg rau lawv. Yawg hais tias kev ntseeg yuav tau muab qhia rau tiam tom qab, yuav tau nco ntsoov hauv siab thiab qhia tiam no dhau rau tiam tod. Qhov uas qhia txoj kev ntseeg tsis yog tsuas yog ib txoj haujlwm tiamsis yog tib txoj kev uas pab tau cov pej xeem tawm tsam yeej tej kev sim siab thiab dag ntxias.

Tomqab Mauxes tag sim neej, Yausuas coj cov neeg Yixalayees mus txeeb teb chaws cog lus tseg. Yausuas los ua thawj coj, cov pej xeem tuav kev ntseeg ruaj ruaj, lawv ua lub neej nrog txoj koob hmoov thiab ncaj ncees rau Vajtswv. Tiamsis, thaum Yausuas tag sim neej, txhua yam hloov pauv. Ib tiam txuas ntxiv tshwmsim tuaj, thiab txaus nyuaj siab tshaj, lawv tsis paub Vajtswv lossis tej yam uas Vajtswv tau ua lawm. Ntawm no yog qhov uas lawv tsis qhia txoj kev ntseeg kom muaj zog. Txawm yog Yausuas yog ib tug thawj coj nto npe los, yawg kuj npaj tsis yeej rau ib tiam txuas ntxiv los pab, tsis muaj neeg los ua txuas ntxiv, tsis muaj kev cob qhia tawv kom txaus los tiv thaiv lawv txoj kev ntseeg.

“Cov laus uas nyob tiam ntawd puavleej tuag tas huv tibsi lawm, ces tiam tom qab no tsis nco qab txog tus Tswv tej txiaj ntsig uas nws tau ua rau haivneeg Yixalayees li lawm” (Cov Thawj Tswj 2:10).

Tsis muaj txaus neeg sawv los ua thawj coj tomqab Yausuas. Tiam txuas ntxiv tsis tau kawm txog Vajtswv tej lus cog tseg, tsis muaj neeg ntuas lawv txog tej yam uas Vajtswv tau ua pub rau lawv poj koob yawm txwv. Thiab txij ntawd los, lawv yoojyim poob mus rau hauv txoj kev pehawm tej mlom uas tej neeg ib ncig lawv pehawm. Qhov no tsis yog tsuas hnov qab xwb, tiamsis yog ib txoj kev txav deb Vajtswv txojkev uas Vajtswv tau coj.

Cov neeg Yixalayees zaj xwm txheej yog ib lo lus ceeb toom tseem ceeb tseg rau peb niaj hnub nim no. Kev ntseeg tsis yog yam uas peb ceev cia rau peb tus kheej tas tsis qhia rau tiam txuas ntxiv. Qhov uas tsis qhia txoj kev ntseeg thiaj ua rau txoj kev phem tshwm tuaj. Yog tiam ua ntej tsis qhia txog Vajtswv txoj kev hlub thiab Vajtswv lub hwjchim, ces tiam txuas ntxiv yuav tsis paub Vajtswv thiab lawv yuav yuam kev rau tej kev ntxeev ntxias hauv ntiajteb.

Peb yuav tau ua ib lub neej ntseeg ua qauv, tsis yog tiv thaiv peb xwb tiamsis tseem yog txoj kev peb muab txoj kev ntseeg no khaws cia rau tiam txuas ntxiv. Ib yam li Paulus cov lus tau txhawb Paulus Kauleethaus:

“Nej xyaum ua raws li kuv tus yamntxwv, ib yam li kuv tau ua raws li Yexus Khetos tus yamntxwv” (1 Kauleethaus 11:1). Thaum peb tej menyuam xeeb ntsia pom txoj kev ntseeg muaj sia hauv peb lub neej, peb yuav tau txhawb zog thiab sawv khov kho hauv txoj kev ncaj ncees nrog Vajtswv.

Kuv yog thawj tiam ntseeg Vajtswv hauv kuv tsev neeg. Kuv nkag siab kuv lub nra thaum uas tsis yog tsuas tuav txoj kev ntseeg rau kuv xwb tiamsis yuav tau qhia rau kuv tej menyuam. Kev ntseeg tsis yog tias lam muab qhia, nws yuav tau muab cob, txhawb zog thiab ua lub neej nrog txoj kev xav, lo lus hais thiab peb tes haujlwm ua. Tshuav koj ne yuav ua li cas? Koj thiab koj tej menyuam tab tom nyob qhov twg ntawm peb tiam no? Yog Mauxes tiam, Yausuas tiam lossis tiam tom qab Yausuas? Cia siab tias Vajtswv yuav pab kom peb ntsia pom qhov tseem ceeb ntawm txoj kev tuav kev ntseeg kom ruaj thiab qhia rau tiam txuas ntxiv.

Thov caw nrog kuv peb thov Vajtswv ua ke:
Kuv tus Vajtswv, kuv ua Koj tsaug vim Koj tau pub kom kuv muaj kev ntseeg thiab txoj sia tshiab hauv Koj. Thov pab kom kuv paub muab kuv txoj kev ntseeg qhia rau kuv tej menyuam xeeb thiab tej neeg ib ncig kuv, kom kuv txoj kev ntseeg nthuav tawm koj thiab dhau los ua lub pauv txhawb zog rau kuv tej menyuam xeeb, tej neeg ib ncig kuv lawv nrhiav tau txoj kev ntseeg ntawm lawv tus kheej hauv Vajtswv. Thov pab kom kuv lub neej ntseeg yuav saj tau koj, muaj sia thiab tob, kom kuv muaj zog qhia txoj kev ntseeg ntawm Vajtswv, thiab ua tim khawv txog Vajtswv, kom tiam txuas ntxiv yuav ntsia pom Vajtswv dhau ntawm kuv lub neej. Kuv thov hauv Tswv Yexus Khetos lub npe. Amees.

Cov kwv tij, hnub no yog hnub nco txog cov kws qhia ntawv hauv tebchaws Nyab laj, kom peb nco txog cov neeg tau qhia peb lawv txiaj ntsig txog tej kev kawm, thiab tus kws qhia peb ntawm sab ntsujplig tau qhia rau peb paub txog tej yam muaj nqis hauv peb txoj kev ntseeg. Tseg sijhawm los ua Vajtswv tsaug, thov Vajtswv, nug moo thiab txhawb nqa, ua cov kws qhia ntawv ntawm sab nqaij tawv thiab sab ntsujplig tsaug.

Kev thov Vajtswv txhua hnub kuj txhawb cov mloog sawv daws tseg sijhawm los xav txog lub meej mom uas Vajtswv tau muab rau peb txhua tus, qhov chaw uas peb yuav tau ua qauv rau ib tug twg ntawd, tshwj xeeb yog tiam tom qab peb. Tej zaug yuav yog peb tej menyuam xeeb, yog tej tub txhais hluas, tej menyuam yaus nyob hauv Pawg Ntseeg, lossis pab pawg me uas Vajtswv tau muab cob rau peb. Cia li xav txog txoj kev uas peb txhua tus yuav muaj lub siab tawv qhia, peb txoj kev ntseeg rau tiam txuas ntxiv. Ntau zaug nws tsuas yog tej yam me me xwb los txoj kev uas tau ntsib Vajtswv, lossis tej lus cob qhia txhua hnub tseg rau tej menyuam lossis ua lub neej ncaj ncees ntawm Vajtswv xub ntiag. Cia li ua lub neej muaj kev ntseeg raws li Tswv Yexus tus qauv kom tiam txuas ntxiv yuav paub Vajtswv dhau ntawm peb txhua tus.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.