Txhua zaug uas koob tsheej Tswv Yexus yug los txog, peb rov qab tau ntuas txog Vajtswv txoj kev hlub tsis muaj nrim tau muab pub rau tib neeg, thaum Nws pub Nws tib leeg tub los rau hauv ntiajteb. Lub npe ntawd yog Yexus – tus Cawm Seej tau los yug ua neeg, tso ntuj ceebtsheej ci ntsa iab tseg los rau hauv lub ntiajteb tsaus ntuj nti no. Tswv Yexus tso peb dim ntawm txoj saw hlau kev txhaum, pub lub neej tshiab rau peb kom peb ywj pheej nyob hauv Nws.

Hnub no, yog hnub 23/12/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Wally Odum dhau ntawm Zaj kawm TUS CAWM SEEJ LUB NPE DAWBHUV

“Malis yuav yug ib tug metub, koj yuav tsum tis tus metub ntawd npe hu ua Yexus, rau qhov nws yog tus uas yuav los cawm nws haivneeg kom lawv dim lawv lub txim” (Mathais 1:21).

Ib tug neeg twg ntawd lub npe yuav nthuav tawm tus neeg ntawd lub neej. Nyob hauv Vajluskub lub npe hu tseem ceeb tshaj qhov no. piv txwv li, nyob hauv Vajluskub Qub, Yakhauj lub npe muaj lub ntsiab tias “tus tuav luj taws”, thiab lub npe no nthuav tawm yawg lub neej yog tus tuav, tus txeeb ntawm nws tus tij laug. Tiamsis Vajtswv pauv yawg lub npe ua Yixalayees, muaj lub ntsiab tias yog “tus neeg nrog Vajtswv sib mos” nthuav tawm txoj kev hloov pauv hauv yawg tus cwjpwm. Kuj ib yam li ntawd, Tswv Yexus nkag siab nws tus thwjtim uas yog Ximoos thiab tis lub npe rau yawg hu ua Petus, muaj lub ntsiab tias “pob zeb” tus tub txawg Elton Trueblood tau tso dag li no tias thaum Tswv Yexus hu Ximoos ua “pob zeb”, tej zaug lwm tus thwjtim lawv kuj npo tsis tau luag, vim “pob zeb” yeej ib txwm ntsiag to tsis ua lus, nws txawv Ximoos tus cwjpwm kub kub npau taws sai!

Vim lub npe hu tseem ceeb nyob hauv Vajluskub yog li timtswv thiaj hais meej meej rau Yauxej yuav tis lub npe tshwj xeeb no rau Yexus:

“Malis yuav yug ib tug metub, koj yuav tsum tis tus metub ntawd npe hu ua Yexus, rau qhov nws yog tus uas yuav los cawm nws haivneeg kom lawv dim lawv lub txim” (Mathais 1:21).

Thaum timtswv taw kev rau Yauxej tis tus metub lub npe hu ua Yexus, ntawm no tsis yog ib lub npe siv los sib hu txhua hnub. lub npe no muaj lub ntsiab lus tob, nthuav tawm Vajtswv tus tub lub homphiaj. Qhov txujci Tswv Yexus los yug tsis yog ib qhov xwm txheej li txhua qhov xwm, tiamsis yog ib kaujruam hloov pauv tag nrho lub ntiajteb. Lub ntsiab lus tiag nyob hauv zaj xwm txheej Tswv Yexus los yug yog: Vajtswv los rau hauv lub ntiajteb no pub txoj kev cawm dim rau peb.
Lub npe “Yexus” nyob hauv lus Henplais yog Yeshua, yog txuas ntawm lo lus “Yahweh” (hu ua “Yehova”) thiab “yasha”. Lub npe no txhais tias “Vajtswv yog txoj kev cawmdim”.

Timtswv tau hais meej meej rau Yauxej tias Cawm Seej Tswv Yexus yog tus Cawm Seej uas Vajtswv pub rau tib neeg txhaum. Thiab tseeb tiag, kev txhaum yog ib qhov teeb meem uas tag nrho peb txhua tus ris.

Kuv xav tsis thoob thaum uas paub txoj kev uas tus kab nkag rau hauv lub txiv. Kuv xav tias nws tho sab nraud mus, tiamsis tseeb tiag tsis yog li ntawd. Cov tub txawg lawv nrhiav tau tias tub kab nws yug nyob rau sab hauv lub txiv. Kab nteg qe rau cov paj, tas ib ntus, tus kab no thiaj daug rau hauv lub txiv lub plawv tas pib noj sab hauv. Kev txhaum kuj zoo li tus kab ntawd, nws pib hauv siab thiab maj maj nkag rau ntawm txoj kev xav, tib neeg lo lus thiab tes haujlwm. Ntawm sab ntsujplig, peb yug los twb yeej ib txwm muaj kev txhaum hauv siab. Yog li, peb cheem tsum ib tug Cawm Seej los cawm peb dim hauv txoj kev txhaum.

Thaum ntsib tus kheej qhov kev txhaum tim ntsej tim muag yog ib qhov uas tsis yooj yim. Peb pheej xav khiav tsis ris peb lub nra. Ntau tus xav tias kev cawmdim muab khi cia rau hauv lawv lub neej lawm, tiamsis tseeb tiag, kev cawm dim coj txoj kev ywj pheej los. kev cawm dim tso peb dim, pab kom peb dhau los ua ib tug neeg dawbhuv zoo li Vajtswv yeej ib txwm tau tsim peb los.

Peb zoo siab rau Tswv Yexus txoj kev los yug ua neeg, vim ntawm no yog tus yausij tso kom tib neeg dim txhua txoj saw hlau khi. Timtswv hais rau Yauxej tias: “Tus tub ntawd yuav tso nws haiv neeg dim” ntawm no yog lub ntsiab tiag ntawm koob tsheej Tswv Yexus yug, thiab kuj yog lub homphiaj hauv Tswv Yexus lub neej thiab Nws txoj kev tuag.

Thov caw nrog kuv peb thov Vajtswv ua ke:
Tus Tswv, koj lub npe yog Yexus Khetos, kuv txais tau lub ntsiab lus zoo no txog txoj kev hlub thiab kev cawm dim. Ua Vajtswv tsaug vim Koj tau los cawm kuv kom kuv dim tej kev txhaum, pub kuv kom muaj ib lub neej tshiab, ywj pheej thiab puv npo kev cia siab. Thov Vajtswv pab kom kuv ua lub neej tsimnyog rau txoj kev hlub uas Vajtswv muab pub rau kuv. Thov kom Koj lub npe ruaj khov mus ib txhis! Kuv thov hauv Tswv Yexus Khetos lub npe. Amees.

Cov kwv tij txhua tus, koob tsheej Tswv Yexus yug xyoo no, cia li txais yuav qhov khoom plig cawm dim uas Yexus Khetos tau nqa los pub rau koj. Txoj kev cawm dim nyob hauv peb tes dhau los ntawm Tswv Yexus. Nws los rau hauv lub ntiajteb cawm koj dim ntawm tej kev txhaum, pub kom koj muaj lub neej ywj pheej nrog ntau lub sijhawm los ua Nws dej num. Cia li txais yuav tus metub Yexus los yug hauv koj lub siab thiab txais yuav txoj koob hmoov phwj yaws!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.