Niaj hnub nim no, sib haum xeeb thiab kev kaj siab cuag li yog yam uas “muaj tsawg kawg”. Lub ntiajteb no puv npo kev tsis sib haum, tsis kaj siab. Txawm yog nyob kiag hauv Vajtswv Pawg Ntseeg los peb kuj pom muaj kev tsis sib haum tshwm tuaj ua rau muaj ntau txoj kev tu siab. Kuj yog qhov no, Vajtswv nqua hu kom peb dhau los ua cov neeg hais kom sawv daws sib haum, coj txoj kev sib haum no mus rau tej chaw tsis muaj kev sib haum, tseb txoj kev hlub rau tej qhov chaw sib ntxub. Thaum peb ua neej nyob sib haum xeeb thiab nthuav tawm kev kaj siab, peb lub neej yuav dhau los ua ib qhov pov thawj ciaj sia txog Vajtswv txoj kev hlub hloov pauv.

Hnub no, yog hnub 05/03/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Benjamin Brittain dhau ntawm Zaj kawm NROG LWM TUS NYOB SIB HAUM XEEB

“Nej xyaum ua siab ntev nrog sawvdaws sib nraug zoo, thiab xyaum ua nej lub neej kom dawbhuv” (Henplais 12:14).

Sib haum xeeb tsis yog thaum twg twb yooj yim! Ntau zaug, yuav muaj kev tsis sib haum, yuav tag kev cia siab, yuav npau taws sib ntxub ho yog tej uas peb ib txwm pom, tshuav sib haum xeeb cuag li nyob deb kawg. Ib yam li peb tau pom, kev tsov rog thiab tsis sib haum tshwm txhua qhov. Nyob ntawm tej kev hloov pauv ntawd, yeej tsis muaj ib yam dabtsi yooj yim ua rau kom peb muaj kev kaj siab, sib haum xeeb – ntawm sab nqaij tawv, kev xav, ntsujplig txog tej kev sib raug zoo. Vajtswv txojlus nyob hauv Henplais 12:14-15 ntuas peb: “Nej xyaum ua siab ntev nrog sawvdaws sib nraug zoo, thiab xyaum ua nej lub neej kom dawbhuv, rau qhov tus uas tsis ua lub neej zoo li ntawd yeej yuav tsis porn tus Tswv ib zaug li. Ceevfaj tsis txhob pub nej cov ib tug twg tso Vajtswv txojkev hlub tseg. Tsis txhob pub nej cov ib tug twg ua neeg zoo li tsob nroj iab uas hlob tuaj ua rau ntau leej muaj kev ntxhov siab”

Yog Vajtswv tus menyuam peb tau nqua hu los caum txoj kev sib haum xeeb thiab dawbhuv; ob yam no puav leej yog yam uas “ua rau pom Vajtswv” (Henplais 12:14). Ib lo lus tseem ceeb yuav tau ceev faj nyob hauv tshooj no yog “nrhiav kev” Sib haum tsis yog yam uas pheej zaum twj ywm tos ces yuav muaj, tiamsis yog yam uas peb yuav tau xub nrhiav. Qhov no yuam kom yuav tau siv zog thiab txiav txim siab tsis yog nyob twj ywm tos ces cia li tau.

Hauv txoj kev nrog tus Tswv mus, peb yuav tau hloov pauv kom dhau los zoo li Vajtswv. Thoob plaws Vajluskub Qub txog Vajluskub Tshiab, Vajtswv nqua hu kom Vajtswv haiv neeg yuav tau dawbhuv vim Vajtswv yog tus dawbhuv (Levis Kevcai 19:2; 1 Petus 1:15-16). Yog sib haum xeeb thiab dawbhuv mus ua ke, ces yim hnub yim dhau los dawbhuv, peb yuav dhau los ua cov neeg “hais kom sib haum” muaj nqis dua. Tswv Yexus hais meej meej hauv zaj lus qhuab qhia saum roob tias: “Cov uas ua rau neeg nyob sib haumxeeb, cov ntawd tau koob hmoov; Vajtswv yuav hu lawv hais tias, lawv yog Vajtswv cov menyuam! (Mathais 5:9).

Vim li cas peb ho yuav nrhiav kev ua lub neej kom sib haum xeeb? Ua ntej, Tswv Yexus twb ua qhov no lawm, thiab peb tau nqua hu los kom xyaum raws li Tswv Yexus tus qauv. Tsis tas li, qhov kev sib haum no tsis yog tsuas yog yooj yim xwb tiamsis yog tib neeg tus cwjpwm ib txwm coj thaum muaj teeb meem – ntawd yog ib qhov haujlwm yuam kom yuav tau muaj lub siab tawv thiab muaj qhov kev txawv. Nyob hauv lub ntiajteb puv npo kev txhaum no, kev sib haum xeeb tsis yog xwb tim muaj, yog li cov ntseeg yuav tau koom ua ib lub siab hauv txoj kev sib haum xeeb vim Txojmoo Zoo. Thaum lwm tus ntsia pom kev sib haum xeeb thiab koom ua ib lub siab hauv cov ntseeg Vajtswv, lawv yuav xav tsis thoob – ntawd yog tej lus pov thawj muaj zog txog tes haujlwm dawbhuv uas Vajtswv tab tom ua hauv peb txhua tus.

Kuv twb muaj ib zaum ntsib dhau txoj kev sib haum zoo kawg nkaus thaum kuv ua haujlwm ua ke hauv pab cov neeg pab dejnyab kub nyhiab thoob ntiajteb. Kuv ua haujlwm nrog cov ntseeg Vajtswv tuaj ntau lub tebchaws sib txawv tuaj, hais ntau hom lus thiab ntau txoj kev coj noj coj ua sib txawv, tiamsis yam uas ua rau peb nyob ua ke ho yog Tswv Yexus. Txawm yog nyuaj kawg, qaug zog zis los ntawm Vajtswv txoj kev hlub, peb sawv daws puav leej txais tau kev sib haum xeeb thiab koom ua ib lub siab – vim peb koom ua txhua yam rau Vajtswv lub tebchaws.

Thaum peb muab kev khav theeb tshem tawm thiab muab lwm tus kev cheem tsum tso ua ntej tus kheej, ntawd yog lub sijhawm uas kev sib haum xeeb yuav nthuav dav. Ib yam li Paulus tau ntuas Pawg Ntseeg: “Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug.” (Filipis 2:3). Thaum peb tsis xav rau tus kheej, sawv tsees ua tus sib haum nyob hauv cov ntseeg, qhov no yuav tu txoj kev koom ua ib lub siab thiab nthuav tawm Tswv Yexus txoj kev hlub uas tau nqua hu peb nthuav tawm. Dhau los ua ib tug neeg sib haum xeeb hauv lub ntiajteb ib ncig yus kuj yog txoj kev uas lwm tus ntsia pom txoj kev hlub hloov pauv peb lub neej.

Thov caw nrog kuv peb thov Vajtswv ua ke:
Tus Tswv, ua Vajtswv tsaug vim Koj yog lub hauv paus kev kaj siab rau kuv. Nyob lub ntiajteb puv npo kev tsis sib haum xeeb thiab tsis kaj siab, thov Vajtswv pab kom kuv dhau los ua tus neeg hais kom sawv daws sib haum xeeb, nthuav tawm txoj kev sib haum xeeb rau txhua qhov. Thov Vajtswv tshem kev khav theeb, qia dub thiab tej yam uas tav kuv txoj kev ua raws li koj lub siab nyiam mus. Thov Vajtswv pub kom kuv muaj lub siab txo hwjchim, hlub thiab zoo siab hlo tso lwm tus qhov kev cheem tsum ua ntej. Thov Vaj Ntsujplig ua tus coj kuv kev kom paub tuav txoj kev koom ua ib lub siab hauv Yexus Khetos, hlub tej kwv tij hauv Vajtswv thiab ua lub neej sib haum xeeb nrog txhua tus. Kuv thov hauv Tswv Yexus Khetos lub npe. Amees.

Cov kwv tij, yuav tau dhau los ua tus neeg sib haum xeeb hauv yus tsev neeg, yus Pawg Ntseeg, yus pab pawg lossis pawg me, thiab hauv tej phooj ywg, qhov chaw ua haujlwm lossis tej chaw uas nyob ib ncig koj. Kev sib haum xeeb tsis yog xwb tim cia li muaj, tiamsis muaj tej zaug peb yuav tau cim civ xub nrhiav kev, muab kev hlub thiab txo hwjchim tso ua ntej, peb thiaj yuav txais tau kev hloov pauv ntawm tus kheej thiab tej neeg ib ncig. Cia siab tias txoj kev kaj siab Vajtswv pub yuav pib ntawm peb txhua tus thiab nthuav mus rau tej neeg ib ncig, dhau los ua cov pov thawj ciaj sia rau Txojmoo Zoo hauv Vajtswv lub tebchaws.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.