Vajtswv tau tsim tus pojniam los muaj tus yamntxwv zoo kawg nkaus. Thaum chiv keeb, Vajtswv tsis yog tsuas tsim tus pojniam los muaj lub cev zoo nkauj xwb tiamsis Vajtswv tseem tsim tus pojniam muaj lub tswvyim kev txawj ntse, ua tau siab ntev thiab muab kev hlub tsis tseg rau txhua tus. Txhua tus pojniam puav leej tau tsim los tshwj xeeb thiab tsimnyog saib taus hauv Vajtswv lub qhov muag! Thaum tus pojniam ua neej yog raws li Vajtswv lub homphiaj, lawv yog tus pojniam uas tsimnyog tau qhuas.

Hnub no, yog hnub 08/03/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dina Sleiman dhau ntawm Zaj kawm QHUAS TUS NIAM TSEV ZOO

“Nws ua taus niam thiab sawvdaws hwm nws, nws tsis txhawj txog lub neej yav tom ntej.” (Pajlug 31:10).

“Tus pojniam uas tsimtxiaj muaj nqis dua nyiaj thiab kub, tiamsis laj nrhiav tau ib tug pojniam zoo li ntawd… Nws ua taus niam thiab sawvdaws hwm nws, nws tsis txhawj txog lub neej yav tom ntej.” (Pajlug 31:10-25).

Ntu Vajluskub no qhia peb pom txog ib tug pojniam uas muaj zog, kam ua thiab puv npo lub siab tawv. Ntawm kuv, ntu Vajluskub no muaj nqis tshwj xeeb, vim muaj qee zaug kuv twb tau qaug zog. Tiamsis kiag thaum uas kuv qaug zog ntawd, Vajtswv tau ua rau kuv pom txog tug uas muaj zog thiab ua siab tawv. Yav dhau los kuv twb muaj sijhawm zoo li tus ntawd, thiab kuv xav rov qab nrhiav kom tau kuv tus kheej dua ib zaug ntxiv. Yog li hnub no, peb koom saib ntu Vajluskub no ua ke raws li ib seem tshiab.

Ua ntej, Pajlug 31 yog ib zaj lus pajhuam, yog ib hom pajlug “qhuas tus pojniam uas txawj” Lus paj huam tiam thaum ub yeej siv tej lo lus uas zoo tshaj plaws los qhia tawm ib yam dabtsi uas zoo, thiab cov pojniam neeg Yudais lawv nkag siab txog qhov no. Los txog niaj hnub nim no, thaum txog hmo rau, ua ntej yuav txog hnub Xanpataus, cov txiv neej Yudais yuav nyeem Pajlug 31 los qhuas txog tus pojniam tus cwjpwm, txawm yog kuv xav tias txhua tus pojniam tamsim no tej zaug lawv yuav tsis ntos ntaub ib yam li tau hais hauv Vajluskub lawm.

Tsis tag li ntawd, ceev faj txog tus pojniam no nws muaj tub qhe. Nws nquag ua nws qhov haujlwm lag luam tsis yog tsuas tu tej menyuam mos. Qhov no ua rau pom tias tej zaug tus pojniam no yog ib tug neeg nplua nuj tab tom nto hnub nyoog thiab nws lub neej ntu no tabtom ywj pheej. Muaj ib txhia tub txawg lawv tseem hais tias tus pojniam no yog Npexenpas, uas yog cov neeg Yixalayees tus niam vajntxwv. Paub tau tej no yuav pab kom peb ntsia pom qhov tseeb nyob hauv ntu Vajluskub no, kom peb tsis txhob tsim ib tus nrimm uas siab dhau uas tsis muaj ib tus pojniam twg yuav ua tau.

Nws muaj zog nrog tus cwjpwm zoo kawg nkaus, nws txawj ntse thiab ntsia mus rau tom hauv ntej!

Lo lus “tus pojniam tsim txiaj” lossis “tus pojniam zoo” nyob hauv lus Yudais yog “eshet chayil”. “Eshets” muaj lub ntsiab tias pojniam, kuj txhais tau tias yog ib tug uas muaj txiv lawm, lo lus “chayil” siv los hais txog tus txiv neej uas tawm mus ua rog, hais txog lub zog, lub hwjchim thiab lub siab tawv. Yog li, “siab tawv” tej zaug yuav txhais ze lub ntsiab tshaj. Muaj dua lwm phau txhais Vajluskub kuj hu tus pojniam no yog ib tug “muaj lub siab tawv” lossis “muaj zog”.

Thaum xav txog Pajlug 31, kom pom tias ntu Vajluskub no nws tau sau los qhuas los txhawb tus pojniam, kom rub tes thiab ntxiv zog kom lawv muaj lub siab tawv – zoo li cov pojniam neeg Yudais lawv sib qhuas thaum hais lo lus “eshet chayil”.
Tej zaug kuj zoo ib yam li kuv yav dhau los – yog ib tug pojniam tab tom nrhiav lub zog, lub siab tawv lossis ib txoj kev tshiab hauv lub nej. Lossis tej zaug koj yog ib tug txiv neej xav pab xav txhawb tej pojniam ib ncig. Txawm koj yog leej twg los, kuv cia siab tias ntu Vajluskub no yuav txhawb koj kom ntsia tus pojniam raws li txoj kev uas Vajtswv tau tsim lawv los – zoo li Vajtswv cov ntxhais uas muaj nqis.

Thov caw nrog kuv peb thov Vajtswv ua ke:
Tus Tswv uas muaj kev hlub! Kuv ua Koj tsaug vim Koj tau tsim tus pojniam muaj tus cwjpwm zoo thiab muaj lub siab tawv. Koj tau tso txoj kev txawj ntse thiab ib lub siab puv npo kev hlub los saib xyuas tsev neeg thiab zej zog rau hauv txhua tus pojniam kom lawv yuav ua koj dejnum raws li koj lub siab nyiam thov Vajtswv koj ntxiv rau txhua tus niam tsev kom lawv muaj kev kaj siab, muaj lub siab tawv, thiab muaj kev ntseeg ruaj khov. Thov kom lawv yuav paub tseeb tias lawv muaj nqis ntawm koj thaum koj tso rau hauv lawv lub siab, kom lawv muaj lub siab tawv hauv txoj kev cia siab uas koj pub. Kuv thov hauv Tswv Yexus Khetos lub npe. Amees.

Cov kwv tij txhua tus, txhua tus pojniam uas Vajtswv tso rau hauv peb lub neej puav leej tsimnyog saib taus. Yog li yuav ua li cas kom thiaj yuav rub tau lawv sawv? Ntau zaug, tsuas yog ib lo lus txhawb, lossis mloog lawv hais xwb twb txaus ntxiv lub zog loj rau lawv lawm. Yog koj yog ib tug pojniam, nco ntsoov tias koj tau Vajtswv tsim los muaj zog, muaj nqis. Yog koj yog ib tug txiv neej, nco ntsoov los ua qhov chaw pheeb, qhov chaw txhawb zog tseg rau tej pojniam ib ncig kom lawv yuav pom kev. Koom siab qhuas cov pojniam uas muaj lub siab tawv, pab kom lawv ua lub neej ntseeg puv npo kev cia siab hauv Vajtswv txoj kev hlub.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau ntawm peb tus email: [email protected]. Tswv Yexus hlub koj. Thiab peb xav kom txuas tau nrog koj.