Buăl hăm băt khan Kră Yang ling lang oei hơdai hăm lu bơ̆n, mă khan lăm dôm lu jơ hmă đĕch hloh đơ̆ng tơdrong arih ưh? Tŏk bŏk dôm tơdrong hiơ̆k bơngơ̆t, hrăt hrot, Sư oei tơ‘bôh tơdrong ‘mêm mơnat ‘măn ăn kơ lu bơ̆n mă lei lu bơ̆n tă kơ ưh kơ băt. Mưh lăp, lăp kăl kơ nhăm tŏ sĕt, lu bơ̆n gô ‘bôh Sư oei jê̆ hloh kơ bơ̆n tơchĕng. Sư oei chang gô wă kơ bơ̆n chă ‘bôh Sư lăm dôm lu tơdrong hmă hloh.

Năr ‘nâu, ‘năr 14/05/2025 tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Martha Noebel hăm kơ̆l ‘bai CHĂ ‘BÔH KRĂ YANG LĂM DÔM TƠDRONG PƠM HMĂ ĐĔCH.

Sơ̆p Hla Bơar ‘Bok Kei-Dei: “Bĕ bơ̆n chơchă wă kơ băt Kră Yang. Ăn kơ bơ̆n băt kơnăl mă nhen Kră Yang. Tơdrong Sư truh sĭt tơpă thoi măt ‘năr lĕch gah pơgê hrôih, Sư truh tơ lu bơ̆n thoi đak ‘mi, thoi ‘mi jur chruh kơ teh tuch-luch bơyan.” (Hôsia 6:3)

Kră Yang ling lang wă yak hơdai hăm lu bơ̆n lăm tơdrong arih rim năr. Sư ưh kơ sĭ lăp hnhoi ‘moi đơ̆ng ataih na kŭm rơhing tơ‘bôh tơdrong ‘mêm mơnat kiơ̆ kơ dôm tơdrong hơdrô̆, gĭt kăl tơpă, hơđăl hloh. Tơdah lu bơ̆n hơdrin kơnhăm, Kră Yang gô pơm kơ lu bơ̆n hlĭch hlăch hăm dôm tơmam ăn iĕ mă lei ‘bĕnh tơdrong tơm kăl lăm đĭ dôm lu năr bơ̆n gơh arih tơ kơpal teh.

‘Nao hrei ‘nâu, mĭnh ‘nu bơngai buăl inh đei hlôi tơ‘bơ̆p tơdrong ‘noh. Duch ei ‘măn jơnăr wă chă Kră Yang. Mă lei ưh trŏ kiơ̆ thoi buăl tơchĕng- duch ei ưh kơ iung hrôih na pơdơh hơoei tơ ala mĭnh tơnơm ‘long tih, dui jơhngơ̆m bơyan puih rơngơp dah mơ̆ng kơtơ̆ng sem hmoi ư-ang kơ tơdrong mơsêh mơyang Kră Yang.

Duch ei kŭm ưh kơ ‘măn đĭ kơnăr lăp wă hơ oei ‘măn jơ krao khan ‘bơ̆t ala tŏ rang rŏ. Duch ei lăp hmă đĕch pơtơm blŭng a mĭnh năr thoi kơ rim năr- ‘măn jơnăr oei lăm Nơ̆r Kră Yang, păng wă krao wơ̆n Kră Yang oei hơdai, tơ‘bôh tơdrong mơsêh Sư lăm đĭ đăng jơnăr ayơ. Thoi tơdrong juăt, duch năm tơ anih jang, păng đei mĭnh tơdrong blư truh.

Pơge năr ‘noh, duch đei đŏk mĭnh Sơ̆p Hla Bơar ‘Bok Kei-Dei lăm hla ar Hơri Hiôk. Mĭnh trong gĭt kăl tơpăt mă duch nŏng kơ ‘blŏk răk lăm jơhngơ̆m đĭ lăm năr. Kơplah mơ̆t lăm anih bơ̆jang, duch ‘bôh mĭnh tơmam kiơ ‘noh tơ kơpal kơ‘bang.

Tơchĕng khan ‘noh bơih tơmam ‘mê̆, duch wă dônh iŏk păng hŭt lê̆ wă hơdai tơgŭm bơwei kơ anih jang rơgoh. Mă lei tă kơ, ‘noh bơih mĭnh pôm pơkao iĕ. Hơbŏ buăl gô tơchĕng: “Lăp mĭnh pôm pơkao đĕch, đei kiơ gĭt kăl ưh?” Mă lei tơdrong kăl kơ pơma bơih ‘nâu trŏ kơ trong lăm Sơ̆p Hla Bơar ‘Bok Kei-Dei duch ‘nao đŏk lăm pơge ‘nâu hei:

“Yua kơ bơyan tơngiĕt kư̆m đĭ hloh, Đơ̆ng noh bơyan ‘mi hlôi. Pơkao lăm teh đĭ tơlang. Bơyan sem kơtơp asi, Bơyan hơri chơt hiôk truh bơih, Jơ̆p lăm tơring bơ̆n.” (Hơri Hiôk 2:11-12)

Lăm kơplah ‘noh, duch đei hiĕk păng pơma mơmơnh: “Bơnê kơ ‘Bă!”- kiơ̆ thoi duch oei juăt pơma dơnuh hăm Kră Yang. ‘Noh lăp mĭnh pôm pơkao iĕ, mă lei duch băt kơ ‘noh ưh kơ trŏ kơ tơdrong pơlăp. Kră Yang oei tơ‘blŏk kơ duch ei khan bơyan puih đei truh, ưh kơ sĭ truh hăm bơyan mă kŭm lăm kơdih tơdrong arih bơhngol kơ duch. Păng thoi bu kŭm băt, pơkao ‘noh bơih tơ‘bôh đơ̆ng bơyan puih.

Hơbŏ lăng bu ‘noh đei dan pơkao iĕ ‘noh tơ kơpal kơ‘bang. Mă lei hăm duch, ‘noh bơih mĭnh tơmam ăn ‘mêm mơnat Kră Yang ăn. Tơdrong ‘nâu ‘bơm truh jrŭ să truh tơ jơhngơ̆m duch, păng kơdih inh kŭm đei mĭnh jơhngơ̆m mơn gĭl kăl tơpă kơplah đei lăng ‘bôh lăm jơ ‘noh- yua kơ inh oei ‘bơ̆t rŏng duch kơplah mơ̆t lăm anih jang pơge năr ‘noh.

Kơplah ‘noh, inh tim mă băt kơ duch đei đŏk trong Sơ̆p Hla Bơar ‘Bok Kei-Dei ayơ, mă lei inh mơn đei hơđăl lăm jơ gĭt kăl ‘noh. Kơplah mơ̆t lăm kung kơ măy, inh thar kơtơ̆ng thoi Kră Yang tơ‘blŏk lăm jơhngơ̆m: “Duch ei đei ‘măn jơnăr wă chơ chă Inh.”

‘Măn jơnăr chơ chă Kră yang ưh kơ trŏ tơm ‘noh bơih lu bơ̆n kăl kơ hơ oei mĭnh dơnơ̆ng prăt năr. Duch buăl inh oei năm jang, oei hiơ̆k kơ tơdrong jang, oei hrăt hrot thoi dôm lu bơngai nai. Mă lei tŏk bŏk dôm lu tơdrong hrăt hrot ‘noh, duch oei bơwei jơhngơ̆m kơdih lăng tơ Kră Yang, wă kơ ưh kơ đei achăng dôm lu tơmam ăn ‘mêm mơnat hmă đĕch mă Kră Yang gưih truh.

Nhen thoi Hôsia 6:3 pơdrŭt buăl păng inh:
“Bĕ bơ̆n chơchă wă kơ băt Kră Yang. Ăn kơ bơ̆n băt kơnăl mă nhen Kră Yang. Tơdrong Sư truh sĭt tơpă thoi măt ‘năr lĕch gah pơgê hrôih, Sư truh tơ lu bơ̆n thoi đak ‘mi, thoi ‘mi jur chruh kơ teh tuch-luch bơyan.”

Đơ̆ng lăm kơplah jơ ‘noh, inh pơdrơ̆ng ‘măn đĭ kơ ‘năr năr ‘noh wă “chơ chă Kră Yang” kiơ̆ thoi đơ̆ng kơdih inh. Inh kơnhăm lăng lăm măt dôm lu bơngai inh tơ‘bơ̆p, ‘măn ăn kơ lu sư mĭnh tơdrong hiĕk, mĭnh nơ̆r pơlung. Inh ‘maih ‘bôh Kră Yang đơ̆ng lăm rim kơ jơ, rim năr inh đei arih. Păng hloh kơ noh dơ̆ng, inh kŭm ‘maih gơh hơdai lăm tơdrong ‘mêm mơnat Kră Yang ăn kơ đĭ đăng kon bơngai- hăm dôm tơdrong bơ̆jang iĕ ioch mă lei ‘bĕnh tơdrong ‘mêm.

Kră Yang ưh kơ tơ yơ ataih. Kră Yang ưh mah hrăt hrot truh kơ ưh kơ gơh bơngơ̆t truh kơ dôm tơdrong kăl wă đơ̆ng lu bơ̆n. Sư ling lang oei ‘bơt dâu, chang gô lu bơ̆n kơnhăm truh tơ dôm tơmam ăn ‘mêm mơnat đơ̆ng Sư.

Năr ‘nâu, buăl tam đei ‘măn jơnăr wă chơ chă Kră Yang ưh?

Apĭnh đĭ đăng krao khan hơdai:
Kơkuh kơ Kră Yang ‘mêm mơnat, kon bơnê kơ Ih yua kơ Ih ling lang oei hơdai kon, mă khan mưh lăp kon hrăt hrot dah hiơt kơ Ih. Apĭnh pơih măt kon wă kơ kon băt kơnăl tơpang ti ‘mêm mơnat, wei lăng đơ̆ng Ih lăm dôm lu tơdrong hmă đĕch rim năr. Apĭnh pơtho jơhngơ̆m kon băt chơ chă Ih, mơ̆ng kơtơ̆ng nơ̆r Ih păng yak năm lăm tơdrong ‘mêm mơnat đơ̆ng Ih. Hơpơi kơdih tơdrong arih kon gô pơchrang tơdrong hơdah păng tơdrong hiôk hian đơ̆ng Ih truh hăm đĭ đăng bơngai jum dăr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, Kră Yang oei ling lang ‘bơ̆t dâu, ‘bơ̆t cheng lu bơ̆n, tŏk bŏk dôm lu năr hmă đĕch hloh. Kŭm phŏ Kră Yang oei chang gô buăl băt kơnăl Sư đơ̆ng lăm mĭnh kial dơhlu dơdar rơngơp, dah mĭnh pôm pơkao iĕ cheng trong. Kŭm phŏ Sư oei gưih truh kơ buăl mĭnh tơmam ăn ‘mêm mơnat đơ̆ng lăm mĭnh tơdrong hiĕk tơnŏ, dah mĭnh nơ̆r pơlung tơpăt đơ̆ng mĭnh ‘nu bu ‘noh. Athei pơlong ‘măn tŏ sĕt jơnăr wă chơ chă Sư năr ‘nâu- păng rŏ lăng, buăl gô hlĭch hlăch ‘bơ̆t anăp dôm lu tơdrong ‘lơ̆ng rŏ dêh mă Sư đei ‘măn ăn bơih kơ buăl. Athei ră roi hăm dôm lu bơngai jum dăr păng ră roi hăm tơdrong tơdă

Amăn Jơ Krao Khan Rim Năr gah dôm lu tơdrong pơm hmă đĕch mă Kră Yang oei wei lăng bơwei buăl lăm năr ‘nâu hŏ!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.