Nyob ntawm cov tub sib tw, tej zaug yam uas txaus ntshai tshaj yog lub sijhawm uas lawv raug sawv daws tso poob tom qab. Tsuas yog tsis nco qab ceev faj xwb lwm tus yuav khiav fuas ua lawv ntej. Txoj kev ua lub neej rau Vajtswv los kuj piv zoo li ib txoj kev sib tw thiab nyob hauv txoj kev ntawd, peb tsis yog khiav kom muaj yeej swb nrog lwm tus, tiamsis Vajtswv xav kom peb rau siab ntso, tsis so, siv zog kom tau txais nqi zog.

Hnub no, yog hnub 21/05/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia John P. King dhau ntawm Zaj kawm KHIAV KOM TAU NQI ZOG

Vajluskub: “Nej yeej paub hais tias cov neeg uas sib tw khiav yeej tib txhij khiav, tiamsis tsuas muaj tib tug thiaj khiav yeej thiab tau nqi zog xwb. Nej cia li khiav tiag kom yeej , nej thiaj tau nqi zog” (I Kauleethaus 9:24).

Yuav tau txais yuav qhov tseeb: Peb tab tom ua neej nyob rau lub ntiajteb muaj kev sib txeeb heev tshaj plaws. Qhov twg muaj kev sib tw – hauv tes haujlwm, hauv tej kev ua si, txawm yog hauv Pawg Ntseeg lossis ntawm peb pluas noj hauv tsev neeg los muaj tib si. Kuv khwv tau nyiaj ntau dua koj. Kuv pawg txawj dua koj pawg. Kuv Pawg Ntseeg cov ntseeg coob dua koj pawg. Kuv ua ntau txoj haujlwm dua, tiamsis kuv yeej tseem tiv taus dua koj, koj puas pom lawm tau.

Peb raug nqus mus rau ib txoj kev sib tw tsis muaj qhov xaus li ntawd- leej twg los twb xav kom yus yog tus yeej, xav yog tus ib. Yog li thaum twg peb twb xav muab yus tus kheej piv rau lwm tus, los ua tus tshim ntsuas ntaus nqi rau yus tus kheej. Yog tsis yog tus thawj, tsis heev dua lwm tus, ces peb hnov cuag li yus yog tus swb ntawm ib pab neeg coob coob. Nyob hauv kev ua si, muaj ib lo lus taw ncaj qha rau tej ntawd: “Tus neeg los thib ob ces yog thawj tug neeg swb”. Hnov cuag li tsis yog tiamsis nws yog qhov tseeb?

Yog peb tsis yog tus txawj tshaj ces suav tias peb zoo tsis tau txaus. Tab tom zoo siab cia li ua rau qaug zog. Peb raug “teem tseg” kom xav li ntawd – vim ntiajteb no ua haujlwm li no. Sim xav txog tej kev sib tw. Ib yam li Olympic – tomqab ib txoj kev sib tw twg, tsuas muaj peb tug thiaj tau txais nqi zog xwb: Kub, tooj dawb, tooj daj. Tiamsis tus uas zoo siab tshaj yog tus uas tau lub kub. Ntau xyoo xyaum, tso ntau yam tseg, thaum no tau txais nqi zog kom tsimnyog.

Tiamsis koj puas paub? Tus neeg uas hnov zoo siab ob yog tus tau lub tooj daj. Vim lawv paub tias ib mentsis thiab xwb ces lawv yeej tsis muaj dabtsi nqa mus tsev. Tau nqi zog ces – ntawd yeej yog kev txhawb zog loj lawm.

Tshuav tus uas nyuaj siab tshaj? Tej zaug yog tus uas tau lub tooj dawb! Sawv kiag ib sab ntawm tus tau lub kub, saib ntsoov thiab xav tias: “Yus twb nyob ze heev lawm… tiamsis yeej tsis tau txaus”. Siv zog luag, tiamsis hauv lawv lub siab cia li tag kev cia siab. Txawm yog tsuas yog muaj ib tug thiaj khiav ua nws ntej ntawm tsheej tỉ tus tib neeg los hauv ntiajteb los lawv yeej hnov cuag li yus yog thawj “tug swb”.

Tiamsis nyob hauv Vajtswv lub tebchaws, txhua yam nws tsis tshwmsim mus zoo li ntawd. Paulus sau nyob hauv 1 Kauleethaus 9:24-25:

“Nej yeej paub hais tias cov neeg uas sib tw khiav yeej tib txhij khiav, tiamsis tsuas muaj tib tug thiaj khiav yeej thiab tau nqi zog xwb. Nej cia li khiav tiag kom yeej , nej thiaj tau nqi zog. Txhua tus uas sib tw khiav, nws niaj hnub xyaum khiav raws li txoj kevcai, nws ua li ntawd los nws tsuas tau lub kausmom uas nyob tsis ntev xwb; tiamsis peb sib tw khiav kom peb tau lub kausmom uas nyob mus ibtxhis”

Koj puas pom lawm tau? Paulus hais tias “peb” – yog txhua txhia tus tau txais qhov nqi zog mus ib txhis. Tag nrho peb puav leej yog tus yeej! Tag nrho peb puav leej tau mus ntuj ceebtsheej, tsis yog vim txawj dua lwm tus, vim Tswv Yexus twb tuag saum Ntoo Khaub Lig rau peb.

Tiamsis tsis yog tas rau ntawm qhov uas tau mus hauv ntuj ceebtsheej xwb. Paulus sau ntxiv nyob hauv 2 Kauleethaus 5:10:

“rau qhov peb txhua tus yuav tsum mus sawv ntawm Yexus Khetos lub xubntiag. Nws yuav taug pab zaj thiab muab nqi zog rau txhua tus raws li tej haujlwm uas sawvdaws tau ua los lawm, thaum sawvdaws tseem ua neej nyob no, tsis hais ua zoo lossis ua phem.”

Muab ua lwm lo lus hais, peb txhua tus nyias khiav nyias ib txoj kev sib tw txawv. Vajtswv muab ib leeg ib txoj kev rau txhua txhia tus zoo tsis sib thooj. Kuv khiav hloov tsis tau koj chaw, koj khiav hloov tsis tau kuv chaw. Kuv tsis raug muab los piv rau koj, thiab koj kuj piv tsis tau rau lwm tus.

Vajtswv tsis muab peb piv rau tus nyob ntawm ib sab. Hauv Vajtswv lub qhov muag, “tus muaj yeej” tsis yog tsuas tau nkag mus rau hauv ntuj ceebtsheej xwb. Kov yeej yog tus thaum peb ua haum Vajtswv siab. Kov yeej yog thaum peb ua lub neej nthuav tawm txoj kev ntseeg txhua hnub kom ncaj ncees. Kov yeej tsis tau txhais tias yus ntse dua lwm tus, tiamsis saib seb peb puas ncaj ncees mus raws txoj kev uas Vajtswv tau tseg rau peb.

Ib yam li Paulus tau hais: Cia li khiav kom tau nqi zog! Ua lub neej tag siab rau Vajtswv, ib yam li koj tus kheej, ib yam li txoj kev uas Vajtswv tau tsim koj los.
Vim nkag rau ntuj ceebtsheej tsis yog tsuas yog qhov pib xwb – Vajtswv tseem muaj ntau yam loj dua tseg rau koj.

Thov caw nrog kuv peb thov Vajtswv ua ke:
Tus Tswv, kuv ua Koj tsaug vim Koj tau tsim ib txoj kev tshwj xeeb rau kuv. Thov pab kom kuv ncaj ncees rau txoj kev uas koj twb tseg rau kuv. Thov pab kom kuv tsis muab kuv piv rau lwm tus, tiamsis ncaj ncees nrhiav kev ua lub neej kom haum koj siab txhua hnub. thov pub kom kuv muaj lub zog ua lub neej nthuav tawm txoj kev ntseeg thiab ua tiav txoj kev sib tw thiab saib ntsoov mus rau ntawm Koj. Kuv thov hauv Tswv Yexus Khetos lub npe. Amees.

Cov kwv tij txhua tus, koj tsis tas yuav tsum yog tus “neeg yeej” raws li ntiajteb tus tshim ntsuas – koj tsuas yog ncaj ncees khiav txoj kev uas Vajtswv twb teem tseg rau koj lawm xwb. Yog li koj yuav khiav li cas? Koj puas npaj txhij yuav khiav kom tag siab rau Vajtswv lub npe? Tsis yog cia kom koj khiav ua lwm tus ntej, tiamsis yog ua rau tus uas hu koj zoo siab? Cia li pib kiag hnub no. khiav kom tau txais qhov nqi zog nyob mus ib txhis tab tom tos koj saum ntuj ceebtsheej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.