Tŭ Yàng Jesu guh ri hơ trồ, Yàng ò lơi ală cau jat Kơnràñ ơm is dô nă. Kơnràn ai Yàng Hwềng Goh nàng bơtô sồr, bơtô tơngka mơ tề lăm bol he tòm jơh ală bơta. Yàng Hwềng Goh lơh broă tòm kòp nă jat ală gùng dà pha is. Konràñ rgời bơtô găn dô sèng Sră Goh òs mòng, dô nơm rùp sơñio he rgời geh gŏ, hala dô jơnau đơs cau lơi hơ̆ nisơna tơngkah tùs. Tŭ he ơn nùs, bol he rờp dòp goit lah: Yàng găm bơtô mơ tề lăm bol he kòp ngai.

Ngai do, ngai 09/06/2025, tơnggu Hòi Dăn Kòp Ngai dan ja ông mò oh mi kơlồi sơnờng jơnau Yàng bơh bơta dong kơl Marsha Brickhouse Smith bơh tơnggu TƠM GƠL NÙS KƠLỒI TÒM BƠTAU KRIST.

Sră Goh: “Mơya Bơtau Pơndờm- pơniang, hơ̆ la Yàng Hwềng Goh mơ Bèp rơp ai sơnđăn Añ mơ sồr lòt tùs, Bơtau hơ̆ rơp bơtô sồr bol mê jơh ală bơta, mơ tơngkah wơl bol mê in jơh ală bơta Añ neh đơs mơ bol mê.” (Jang 14:26)

Neh tŭ lơi ồng mò oh mi gơlơh be Yàng kừ “ nisơna” đơs pràn dô sèng Sră Goh lơi hơ̆ nàng bơtô sồr ồng mò oh mi sơl? Gơlơh be Kơnràñ găm mgui oă gùng nàng ồng mò oh mi păl wềt tùs hơ sèng hơ̆- găn di jơnau ntas chò goh mơ ồng mo mi kơno, găn di dô bơta bơtô tòm Hiu Jum Goh, găn di mạng xã hội, hala gơs cau lơi hơ̆ nisơna đơs tùs. Yàng bol he di la Bơtau neh crơng gơs, mơ Kơnràñ gơs tơl gùng dà nàng lơh bol he in dòp git Kơnràñ găm đơs mơ ồng mò oh mi!

Să tòm añ neh git làm oă dơ̆ behơ̆, tŭ Yàng đơs wih đờs wơl dô nơm sềng Sră Goh gơwèt mơ añ, be kờñ sôr añ lah: “ơn nùs kơlồi tĕ tòm jơnau sŏng do.”
“Añ lơi wơl bơta lơngăp lơngi bol mê in; añ ai bơta lơngăp lơngai añ ji bol mê in; añ ai bol mê in ò di be dunnia ai. Nùs bol mê bañ dơcùl mơ bañ rngòt.” (Jang 14:27)

Añ kah tòm dô pah tơngai bềng bơta giga oă broă, mơ oă gonoăr broă mơ bòl glăr, Yàng kờñ tơngkah ăñ lah, bañ lơi nùs kơlòi he mơ bồ dơngoh he sơlồng sơlăng. Rlau mơ tŭ jơ ơm ngềt ngơt mơ Yàng, sèng Sră Goh dô kừ gơlik gơs tòm làm bă tiah. Tòm dô tŭ àng drim ne, tòm gung lòt lơh broă, añ nisơna ntoat tơnơ̆ dô nơm rơndeh tải gơs cih jơnau “vận Tải Bình An”- ò di mìng behơ̆ lơm mơ kùng gơđềt rùp bàr nơm sềm ntờp, rùp sơñio bơh Yàng Hwềng Goh tai sơl! Tŭ hơ̆ añ gìt nền cê lah Yàng gam tơngkah añ. Gùng lòt lơh broă mòr tùs dô jơ, tơl tŭ jơ nàng añ kơlồi sơnơng bơh sèng hơ̆.

Tih dờng tòm Hiu Jum Goh, añ git lah Yàng Hwềng Goh la Bơtau gơnăp gơnoăr mơ pờndòm-pơniang. Mơya ò di tŭ lơi añ kùng kah lah Kơnràñ kùng găm la Bơtau Bơtô Sồr- Bơtau dong kờl bol he wờng tơl Jơnau sŏng mơ tơngkah ală bơta mơ Yàng Tom Trồ neh đơs. Să tòm Yàng Hwềng Goh lơh pa nùs kơlồi bol he di, dong bol h wờng Sră Goh dô bă jrồ rlau tai (sền Rôma 12:1-2).

Añ ngăn jơh nùs ưn ngài bơYàng Jêsu neh ai Yàng Hwềng Goh tùs nàng bơtô bol he dô bă kơ̆ nùs. Dùl tòm ală cnđòa dờng tòm rài kis añ jê là Yàng Hwềng Goh pờ mat añ jê, nàng wờng lah he geh kòp la song ring kơnòm Bơtau Krist – mơ añ ò càng pơnđơl pràn nàng gơlik gờs wiltơl kơnòm pràn is he di. Ngăn, ìs he pơnđơl pràn golik gơs cau wil tơl là ò tŭ lơi cèng wơl bơta khat gơboh. Añ rờp ò tŭ lơi hŭi tŭ jơ hơ̆, bulah neh rlau mơ 25 sơnăm lòt găn.

Dô dơ̆ ndài, Yàng ai añ in kơnô dô bơta bơtô đờs pràn bơh rùp Yàng Tom Trồ “A-ba”- bềp kờn gơboh. Bơh lai, añ găm kơlồi bơh Yàng be la dô Bơtau ơm ngài tiah lơi hơ̆, Bơtau mìng sền gŏ tồ glài añ jê. Mơya tŭ añ dòp gt Kơnràn là Bèp-lơbơñ niam, rềp đèt mềr- nùs añ sơntòm gơlik lơbờñ niam.

Dô dơ̆ sền sră jang dap 14, añ ai lơh krơi bơh nùs nhờm duh broă mơ Yàng jêsu neh ai ală cau bơtê in, mơ tòm măng Kơnràñ mòr kŏng cau pơrlơ̆ dră. Kơnràñ rào jơng bol khai in, hơ rờp ai Bơtau pờndòm-pơniang tùs mơ bol khai, mơ bơntăn bol khai băñ rngòt, băñ kơlồi. Ngai lai tŭ păl cơnđòa tùs hơđăng chì pơng kong bol glăr bơh tồi glài jơh dunnia dê, Kơnràñ găm ròng siam, kờñ gơboh. Kơnràñ ngăn la Bơtau Dong Klàs Dunnia niam rlau jơh ò git nđờ!

Ngai do, añ kờñ chồl bơtrồt ông mò oh mi: kah wơl tĕ jơh ală bơta mơ Yàng neh đơs mơ ồng mò oh mi. Lời tĕ Yàng Hwềng Kơnràñ lơh pa wơl nùs nhòm ông mò oh mi, tơngkah ồng mò oh mi lah: ală jơnau hơ Kơnràñ dê sùm gơs kwờ jơl tùs di ngai do.

Dan jà bol he dô nùs bal tòm bơta hòi dan:
Khoai Yàng, kòn ưnngai Kơnràñ bơh neh ai Yàng Hwềng nàng tề lăm mơ sùm tơngkah kòn kòp ngai. Dăn pờ nùs mơ nùs kơlồi kòn, dong kòn mhăr kơno jơnau Kơnrañ bơtô sồr. Digùl ală bơta kơlồi rngòt mơ giga oă broă rài kìs kòp ngai, dăn jơnau Kơnràñ gơlk gơs loh làng, đơs òm, mơ cèng wơl bơta rìng lơngai ngăn kòn in. Dăn dong kòn kứ sùm cơnđòa lòt tòm bơta tề lăm Yàng Hwềng dê, nàng bồ dơngoh mơ hwềng soàn kòn geh tòm gơl pa tòm Bơtau Krist kòp ngai. Kòn jơh nùs hoi dăn tòm sơnđăn Yàng Jêsu Krist, Amen.

Ơ ală ồng mò oh mi kờñ gơboh, bol he neh kah kìrsơnre Ngai Wèr Prăm Jơt, la ngai Yàng Hwềng Goh mù, ngai pờtơlik dô pàng sră pa tòm sră yăl yau Hiu Jum Goh. di gơlăn tòm ngai do, Yàng Hwềng Goh găm kờñ tơngkah bol he kah wơl dô jơnau hơ Yàng Tom Trồ dê, nàng chồl bơtrồt mơ lơh pa wơl bơta dòn kòp nă bol he dê. Kơnràñ la Bơta kơ̆ dơn bơtô sôr, Kơnràñ la jơnau đơs ờm pràn kơldăng ò dơh tòm bơta ai pà jơnau sŏng. Pờndềt tĕ să di đăp Kơnràñ, mơ lời nùs nhờm he geh Yàng Hwềng Goh tơngkah, tề lăm, tồ bol he geh pràn kơ̆ wơl tòm bơta kờñ gơboh mơ bơta rìng lơngai mơ mìng dô nă Kơnràñ rgời ai pà.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.