Tòm gùng lọt bơta dờn, gơs tú bol he duh hur ngan nàng geh yờ tơnggụ, kờn gó să tờm pràn rlau, jak chài rlau, kờn geh dờng mhar. Bol he tơhìr bơta geh gơtom gơl, ală cồng nha dờng. Mơya Yàng la Bơtau jak chài mơ ơt ơl. Yàng ờ lơh dồ broă lơi ờ kơlôi sơnơng nền cê, bơh Kơnràn git cồng nha niam mìng tus bơh dồ nơm gùng ngài mơ kơnùs.

Ngai do, ngai 11/06/2025, rơndap bơta hòi dăn kòp ngai hòi jà ông mọ oh mi kơ-lôi sơ-sơng Jơnau Yàng bal mơ ồng Jordan Buntgen bơh tơnggume ƠT ƠL KƠP GƠN PLAI LNGỘT

Sră Goh: “Mơya plai Yàng Hwềng dê hơ̆ la kòñ gơboh, hòn chò, lơngap lơngai, kong ơt, kơ̆ dơn, lơbơn niam, dòn song, niam lơnhơn, git kơrhia. Ò gơs bơta boh lam lơi bơkơŭ ală bơta hơ̆.” (Galati 5:22-23)

Rlau mơ do dồ nam, an neh dan mơ Yàng dong an git nền cê bơh Yàng Hwềng Goh. tú hớ, an tơhìr ală bơta nđàc krơi is mơ Sră Goh đơs tus. An kờn ngan dờp git bơta crih crài bè hớ. Mơya rlau mơ hớ, Yàng cèng an tus mơ rùp sơnio ală plai cồng nha dê.

Sơnrờp, tòm dồ êt tú tơngai, an sùm sền gó rùp sơnio tus dê plai sơ-kệ! Gơlơh bè Yàng đơs ờm mơ an lah: “bol he sơn tờm mơ plai do lài đap”. An đơs ngan, tú hớ an ờ gơboh dồ ết lơi. An sền gơlơh bè Yàng kờn cèng an tus tòm ơdú cau kơ-nòm dềt dê, rlau mơ pà an nggui mơ ơdú cau dờng dê. Să tờm an pal roh dùl, bar poh, gen an sùm rgơi sang nùs jòng să mơ pờ nùs an nàng Yàng bơto sồr an.
Plai sơkiệ roh 18 tus 32 kơnhai nàng gơlik dờng. Bol gơ kung kờn geh trồ tơngai niam nàng geh dờng, dilah ờ gen ờ rgơi gơlik plai. Phan do pal deh tam dê tiah ram ram mơ tú lơi kung pal gơs bơta àng mat tơngai dê. Kờp nơm tờm sơkiệ mìng gơlik plai dồ dớ lơm.

Yàng pà ai an in git bơta crih crài bơh rùp sơnio tờm sơkiệ dê. Bơta do gơlơh kung bè rài kis an dê. Tòm bơta ròng siăm Yàng dê, Kơnràn ai an in lơmpah niam nàng an deh dờng, bơta àng Yàng dê prap gàr an dồ bă niam, mơ ròng siăm hwềng soàn an dê. bè dồ nă cau lơh suơn, Yàng koh ală ntê ờ niam, lời wơl ală ntê niam nàng dong an geh yờ tơngguh, mơ ơt ơl tus dê tú tơngai niam. Yàng ờ dil tài bơh bơta yờ tơngguh ờ gơlik mhar, kung ờ duh nùs dilah an pal roh tus 32 kơnnhai nàng gơlik plai. Să tờm Kơnràn git loh làng bơta dờng màng bơta geh dờng dê.

Gen bè hớ an kờn tơngkah lah: pal lời Yàng Hwềng Goh tề lăm rài kis he, tú hớ he rơp ờ lơh jat bơta ham kờn poăc să dê. Rài kis yau sùm kờn lơh ală broă ờ niam, pơrlớ wơl mơ ală bơta Yàng Hwền Goh kơp kờn. Yàng Hwềng Goh pà ai bol he in ală bơta kơp kờn tomdră mơ bơta kơp kờn poăc să dê. Bar pơnah do sùm tomdră bal mơ gơp, lơh he in ờ rgơi khat gơboh nàng lơh ală broă niam mơ he kờn. Mơya tú lời Yàng Hwềng Goh tề lăm., he rơp ờ gơkòl bơta bohlam at bồ tai. (Galati 5:16-18)

Gơs dồ bơta ngan hớ la bolhe ờ rgơi geh dờng bơh bơta pràn is he dê. Bơta gơlik dờng pal càng gơs tú jơ tơngai. Yàng neh crơng gơs bol he bè hớ. Bol he ờ rgơi lơh să tờm he in gơlik niam lơhơn rlau, lơbơn niam rlau ờ. Mìng gơs bơta tề lăm Yàng dê sùm rgơi gơlik ală plai lơngột bè hớ tòm rài kis bol he dê. Rlau mơ he đơs: “kon pal gơlik niam rlau tai. Dan Yàng toh glài kon in, tú tơnớ kon rơp jơh nùs rlau tai!” – gen he pal bơtê đơs lah: “Ơ Yàng Hwềng Goh, kon kờn Yàng dong kon. Dan Kơnràn bơtê kon in pơnah git lơh broă niam!”

Bơta bơtê mơ an kơlôi la lời kòn dềt in gơlik gơs bơta bơtê să tờm an in mơ lơh an in git loh làng rlau bơh Yàng Hwềng Goh. hớ ờ di là dồ bơta bơtê dềt rhền ờ, mơya la jơnau hòi jà dờng màng, cèng an mut tòm bơta đal git loh làng jơnau song mơ an kơlôi is la an neh git. Mơ tú do, an kung kờn plai sơkiệ mơ sền dờng màng ală cau tam gơ sơl!

“Mơya plai Yàng Hwềng dê hơ̆ la kòñ gơboh, hòn chò, lơngap lơngai, kong ơt, kơ̆ dơn, lơbơn niam, dòn song, niam lơnhơn, git kơrhia. Ò gơs bơta boh lam lơi bơkơŭ ală bơta hơ̆.” (Galati 5:22-23)

Dan jà bol he dô nùs bal tòm bơta hòi dan:
Khoai Bèp kờn gơboh, kon ừn ngài Yàng tài bơh Yàng bè dồ nă cau lơh suơn dờng màng hơđang ù rài kis kon dê. Dan dong kon pờ nùs nàng Yàng bơto kon in git ală plai niam mơ Yàng kờn gơlik tòm rài kis kon dê. Ơ Yàng Hwềng Goh, dan tề lăm kờp cơnđoà jơng kon lòt tòm gùng yờ tơngguh dờng đah hwềng kon dê. Dan bơta àng Yàng dê sòl pơnđàng tus ală tiah lơbơn lơnio kon dê, mơ cèng bơta duh hul tus dê tiah gam noat mrềt kon dê kơnờm mơ bơta niam lơbơn Yàng dê. Kon kờn Yàng jơh nùs! Kon hòi dăn ai sơnđan Yàng Jêsus Krist, Amen.

Ơ ală ồng mọ oh mi kờn gơboh, digơlan bol he gam kơp kờn he mhả geh tomgơl, gơlik cồng nha niam Yàng in. mơya Yàng git lah ală công nha niam rlau jơh pal càng gơs tú jơ tơngai oă. He pal ơt ơl, tài bơh he gam ơm tòm mpàng tê jak chài Yàng dê. Yàng sùm tề lăm kờp cơnđoà dềt tòm rài kis he dê, nàng ală gar sơntìl niam Yàng neh tam rơp gơlik cồng nha niam rlau jơh. Pờ té nùs mơ lời Yàng Hwềng Goh lơh broă crih crài hớ tòm hwềng soàn he dê kờp ngai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.