Yàng bol he dê la Bơtau lơh ală bơta crih crai! Kơnràñ neh lơh cua gơltê geh lòt, cau jơngo geh àng, tian gơs cau chơt kung geh kis wơl. Mơ ngai do, Kơnràñ kung găm lơh ală bơta crih crai tòm rài kis ală cau dòn kơnòm Kơnràñ. Digơlăn digul rai kis oă broă lơh, bol he buôn soh hŭi lah Yàng găm sùm iat kơno, mơ rcăng sir hơ wơl ală nùs nhơm găm jôi jat Kơnràñ. Ngăn ơs bol he găm gơs dòn lah Yàng găm lơh broă dô bă crih crai tòm dunnia dô tơn, tòm să tòm rài kis kơp nă bol he dê?

Ngai do, ngai 13/06/2025, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng kơnòm dê bơta dong kơl ồng Benjamin Brittain bơh tơnggumê BƠTA KRƠI MƠ TỀL KRƠI.

Sră Goh: “Oă bơta krơi tềl is geh lơh gơs digùl làng bol bơh tê ală cau gơnoar bơto dờng. Jơh ală cau dòn dô nùs bal pơjum di mpồng rơng Salômôn.” (Broă 5:12)

Sră goh Broă 5:12, 14, 16-18 yal wơl bơta bơtao tơngguh Jơnau Niam dê be tơnơ̆ do:

“Oă bơta krơi tềl is geh lơh gơs digùl làng bol bơh tê ală cau gơnoar bơto dờng. Jơh ală cau dòn dô nùs bal pơjum di mpồng rơng Salômôn. …Ntum cau dòn Yàng sơlo ngai sơlo gơbơtơl oă tai, cau ùr cau klau gal ngan,…Mpồl làng bol ơm tòm ală ƀòn dờng gùt dar Jerusalem kung lòt tus, cèng ală cau kòp jê, cau cà lơh, mơ jơh ală cau geh sơmbòi lơm. Tŭ hơ̆ cau gơnoar dờng lam bồ ơn phan duh khoai mơ ală cau jat khai, hơ̆ la bơnòr cau Saduse, ñă ntào bềng nùs ƀoah gơjrañ di cau gơnoar bơto dờng, gen lơh nền kup ală cau gơnoar bơto dờng mơ krơ̆ tòm hìu jàm.”

Tòm tŭ sền Sră Goh, oă dơ̆ bol he buôn lòt găn mơ ò sền ní jơh ală bơta dơng neh gơlik gơs. Ơm bơdơh wơl tĕ nàng kơlôi sơnưng sèng do: “Oă bơta krơi tềl is geh lơh gơs digùl làng bol bơh tê ală cau gơnoar bơto dờng.” (Broă 5:12). Lăng kơlôi sơnưng oh mi găm ntao tềng hơ̆, digah ală cau gơnoăr bơto dơng, sền gŏ mơ măt ală cau gơltê geh sơmbơi, sền gŏ ală hwềng iơh kol bơtrơh, hala dô nă cau kwèt gơltê nisơna ñă ntao geh lòt. Nền cê, tŭ sền gŏ gơnăp gơnoăr Yàng Tòm Trồ dê geh ràng tơlik loh làng behơ̆, ngăn la ală cau dòn tŭ hơ̆ hòn chò mơ geh chôl bơtrồt ngăn.

Ngai do, bol he găm gơs dòn lah Yàng Tòm Trồ kung găm lơh ală broă crih crai mơ krơi is hala ò? Jơnau hôi dan bol he dê gơs yăl tơlik bơta dòn hơ̆ ò?

Añ kah wơl dô bơta git lam bềng bơta gơboh pa dô. Dô nă cau gơboh tòm hiu nhă añ jê pal lòt sền bơta kòp ji mơ ai mham nàng sền sơwì – lai or, kơp dơ̆ ai mham gen ji sồt ngăn mơ sơ ỏi. Dơ̆ dô, git pal ai mớ mham, gen tang lai mơ tŭ lòt, bol he neh hôi dan dan Yàng ai ală bơta gơlik buôn. Mơ công nha gen crih crai ngăn: hơ̆ la dơ̆ ai mham mhăr rlau jơh, buôn nggờc rlau jơh mơ cau hơ̆ neh lòt găn! Mơya tŭ lik bơh ơdŭ sền sơwì, añ đăl git lah he …ai lơh krơi, tŭ sền gŏ ală bơta buôn soh behơ̆. Gen tơnơ̆ mơ hơ̆, añ dơp git tơn añ găm kol Yàng lơh nền glài. Ñchi bơh tai añ ai lơh krơi taih? Hala añ ò dòn lah Yàng rgơi dơp jơnau hôi dăn he di wil tơl ò ơ?

Kơp kòñ lah ngai do Yàng rơp lơh dơng pràn bơta dòn tòm kơp nùs bol he, nàng bol he dòn nền lah Kơnràñ rgơi – mơ Kơnràñ niam nùs lơh broă dô bă crih crai; nàng kơp jơnau hôi dăn bol he dê ơ hơ Kơnràñ geh ràng tơlik bơta dòn kơ̆ cê hơ̆.

Ma-thi-ơ 7:7 mơ 11 tơngkah:
“Dan tĕ, rơp ai; jòi tĕ, rơp bàn; teh tĕ, rơp geh pò bol mê in. … Behơ̆ dilah bol mê la cau iơh, mơ git ai kòn he in ală phan niam, tơ ài lah Bèp bol mê ơm hơđang trồ, ò ai phan niam ală cau in dan mơ Kơnràñ ò ơ?’’

Bol he pal dăn! Mơ ya kung pal wơng loh lah: kơ̆ win hôi dan ò gơs gơtha la tŭ lơi bol he kung geh bơta he kòñ. Jơnau Yàng tòm Jakơ 4:3 tơngkah bol he:
“Oh mi hòi dan mơ ò dòp geh tài bơh dan tìs jơnau, nàng ngui jat nùs hàm kòñ is he dê.”

Bol he pal cang hôi dan tòm toh jat nùs kòñ sàng goh Yàng dê, ò di păl sền r’mê tòm bơta he kơp kòñ.

Tòm sèng sră goh dô, gơs dô bơta bơtê tai kung dipal nàng kơlôi sơnưng. Sền wơl sră Broă 5:15, bol he sền gŏ ală cau gơnoăr ơn phăn duh khoai mơ ală cau Saduse neh gơjràñ mơ ală cau gơnoăr bơto dơng. Tòm tŭ ală bơta krơi tềl is pơnjat gơlik gơs, bol khai ming ơm ntao bơdih lăng gợi. Digơlăn bol khai ƀoah gơjrañ mơ bơta cau ndai sền kơlôi, bơta gơring mơ gơnăp gơnoăr mơ ală cau gơnoăr bơto dơng găm gơs.

Tòm rai kis jat Yàng ngai do kung behơ̆: tŭ sền gŏ cau ndai geh Yàng ngui dô bă pràn kơldăng, ai he gen gơlơh be ò geh jao broă lơi krơi is, nùs bol he buôn lúi gơlik gơs ƀoah gơjrañ. Mơya bol he ò di lơi bơta ƀoah gơjrañ kơryan broă Yàng găm lơh. Gơs nùs ring lơngai tĕ: Yàng gơs dô bơta rơndap wil tơl ai kơp nă bol he in, mơ Kơnràñ rơp lơh broă di di tŭ lơmpah niam rlau jơh. Ala mơ ƀoah gơjrañ, hòn chò tĕ bơh Yàng găm lơh broă găn dê ală cau gut dar bol he, mơ pơnjat tĕ pờ nùs rcăng sir nàng Kơnràñ ngui bol he di di tŭ lơmpah Kơnràñ dê.

Dan jà bol he dô nùs bal tòm bơta hòi dan:
Khoai Yàng Dong Jêsus, sơnđăn Kơnràñ crih crai ngăn! Kơnràñ la Yàng Tòm Trồ gơnăp gơnoăr, Bơtau neh lơh ală broă krơi tềl is găn dê ală rài. Dăn ai kòn in bơta dòn dơng rlau tai tòm jơnau hôi dan, dòn kơ̆ lah Kơnràñ rơp lơh broă dô bă crih crai tòm rai kis kòn, tòm mpôl kòn dê mơ lam bă tiah tòm dunnia. Dăn ngui kòn tòm nùs kòñ niam Kơnràñ dê, mơ tơmgơl nùs nhơm kòn gơlik gơs niam nùs Kơnràñ kơp ngai. Ưnngai Yàng bơh ală bơta Kơnràñ găm lơh găn dê ală cau gut dar kòn, mơ dăn bơto kòn git kòñ gơboh, duh broă Kơnràñ dô bă wil tơl rlau. Kòn jơh nùs hôi dan tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, bañ pơng n’hal Yàng Tòm Trồ tòm ală ală n’hal kòn mơnùs dê. Kơnràñ rgơi lơh tiă rlau ală bơta bol he hôi dăn hala kơlôi. Tòm tŭ bol he dòn kơnòm wil tơl dê Kơnràñ, broă crih crai Kơnràñ dê rơp hor lik hơđăng rài kis bol he, mơ kung pờ ơnang tus ală cau gut dăr tai. Pơnjat tĕ hôi dăn, jôi jat Kơnràñ mơ nùs dòn kơ̆ nền. Yàng Tòm Trồ gơnăp gơnoăr găm jôi ală nùs nhơm rcăng sir, nàng Kơnràñ, nàng Kơnràñ lơh ală broă dơng rlau găn dê ală kòn lang Kơnràñ dê!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.