Geh tŭ lơi bol he rac dăn mờ Yàng: Ñchi bơh tài kòn păl tìp oă bơta bol glăr, gơlòng bè do taih? Gớs bơta jê sồt ò gớs jơnau lơi rgơi ràng tơ lik, lơh bol he in gớs bơta jê nùs mờ ò rgơi lik bơh hơ̆. Bol he git sơl, oă dơ̆ Bèp koñ gơboh păl lòi kòn lòt găn bơta bol glăr, bơh hơ̆ là broă nàng he rgơi dờng. Bèp Đăng Trồ ai gơnoăr kòn Kơnràñ lòt găn bơta gơlòng ò di bơh Kơnràñ neh hŭi bol he, mờ là bơh Kơnràñ ai bol he in sền tús dồ tơng gu màng ryŭ rlau tòm rài kís bol he dê.
Ngai do, ngai 15/6/2025, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Jonathan Santiago bơh tơnggume TƠNG GU MÀNG RYŬBÈP HƠ ĐĂNG TRỒ DÊ

Bơh bơta bòl glar nggòc mơ ing bol he dê tơnggơs bol he in bơta gơklŏ màng ryŭ gam sùm sùm, ò git lồi ò git jơh (II Kôrintô‬ ‭4‬:‭17)

Dồ nă bèp koñ gơboh sùm jê nùs tŭ sền gŏ kòn he dê jê sồt. Tŭ kòn ñìm, nùs bèp jê ngăn. Mơya, oă dơ̆ dồ nă cau bèp păl lời kòn he lòt găn bơta kal ke hơ̆ tòm dồ êt tŭ, bơh bơta ñiam jŏ jòng rơp geh tòm rài kís kòn he dê.
Bơta jat gùng dà dồ bă krăñ cê rơp lơh dồ nă kòn dêt moat jrùng, gơ jrañ tòm tŭ hơ̆, mơya rơp tam tòm nùs kòn dêt ala bơta bơtê kwơ màng ò rgơi lời nhờt tòm gùng dà geh dờng.
Hìu nhă añ gớs dồ bơta krăñ cê: “pe dơ̆ tơng kah”. Bàr dơ̆ sơn rờp mè bèp mìng tơng kah lơm, mơya tús dê dơ̆ pe gen rơp dòp cồng nha. Ala kòn añ dê mìng tơng kah tús dơ̆ bàr gen rơp sền sơwì ís să he. Mờ ya kung ò lời nhờt bơta tơ nơ̆, ùr klau bol hi păl lơh tơ màl kòn-mờng òs là ờ ai ngui điênj thoại hala máy tính jơh ngai tơnơ̆.
Geh tŭ, añ tơng kah kòn ùr dut añ dê, tơnơ̆ sồng añ git bau ùr añ neh tơng kah bàr dơ̆ bơh lài. Gen tàng, jơnau tơng kah añ dê là drờm mờ broă kòn añ dê neh lòt găn “pe dơ̆” tơng kah, mờ păl dòp cồng nha. Tŭ hơ̆, añ kung jê nùs, wi wơ koñ “lơh hwang tê” bol kòn in. mơ ya, añ neh lơh nền tòm gùng dà, dòn lah dồ êt bơta kal ke tòm ngai do rơp dong kòl kòn añ tòm ala ngai tơnơ̆.
Gen cồng nha lah, kòn añ dê ờ đơng điện thoại sền ala bơta chơh tòm hơ̆, mờ ya kòn añ dê neh nggui nàng vẽ rùp niam hàng ngăn- tŭ do, añ găm yồng dồ bă kwơ màng tòm tiah añ lơh broă.
Sră Goh ai bol he in sền gŏ dồ nơm rùp lơh jat gùng dà dồ bă nền cê bềng lìu bơta koñ gơboh Bèp Đăng Trồ dê.

Tòm di ngai pơjum sa Ngai Pram Jơt, cau bơtê Pier neh ntào nàng đớs bơh ala broă màng ryŭ Yàng Tòm Trồ dê, ràng tơlik Yàng Je-su là Bơtau Dong Klàs, bulah git bơta hơ̆ rơp cèng tús bơta kong bòl glăr Kơnràñ in.
Yàng Bèp neh lời Kòn koñ gơboh Kơnràñ dê kong cau gơ jrăñ rmăñ, cau tòm dră, kong pơng đìn hơđăng chi phơng, Pier neh đớs tòm sră Broă 2:22-24
“Ơ ală cau Israel, iat tĕ jơnau añ đơs do: Yàng Jesu Cau Nasaret la Cau neh geh Yàng Tom Trồ lơh cơng nền nàng lơh ală broă gơnap gơnoar, ală bơta krơi mơ ală tềl is. Kơnòm di Kơnràñ, Yàng Tom Trồ neh lơh ală bơta hơ̆ digùl oh mi, be să tòm ală oh mi neh git loh. Yàng Jesu neh kòl bơtào jat bơta lơh nền mơ bơta git lài Yàng Tom Trồ dê, mơ ală oh mi neh jồm tê cau iơh bơsak nàng pơng Yàng Jesu hơđang chi pơng mơ tơnchơt tơn. Mơya Yàng Tom Trồ neh dong tă Kơnràñ bơh bơta jê sồt bơta chơt dê mơ lơh Kơnràñ in kis wơl, tài bơh bơta chơt ò rgơi kup Kơnràñ.”
“Yàng Tom Trồ neh lơh Bơtau ò git tồi glài gơlik gơs tồi glài bơh bol he, tồ ơm tòm Kơnràñ bol he geh gơlik gơs bơta song ring Yàng Tom Trồ dê.”
‭‭(II Kôrintô‬ ‭5‬:‭21)
Mơya bơh bơta kong bol glăr mờ bơta chơt Kơnràñ dê, Yàng Tòm Trồ neh lơh sir tơng gu màng ryŭ: Kơnràñ kong ala bol he in- là kòn mơnus di păl nàng dờp bơta hơ̆-nàng bol he geh dòp bơta dong klàs.

Yàng neh kong ala bol he in dồ bă oă ngăn rlau jơh dờng rlau rbô rhiăng mờ ala bơta tơ mal dêt rhền tòm rài kís kòp ngai bol he dê.
Gen tàng, kòp tŭ he tìp bơta bòl glăr, gơ lòng, gen kah té lah: ngăn hơ̆ là dồ pơnah tòm bơta bơtê bơto gơboh Yàng dê, bơh Kơnràñ găm lơh ala broă màng ryŭ rlau tòm rài kís bol he.

Bè jơnau Sră Goh II Kôrintô‬ ‭4‬:‭17 neh cih: “Bơh bơta bòl glar nggòc mơ ing bol he dê tơnggơs bol he in bơta gơklŏ màng ryŭ gam sùm sùm, ò git lồi ò git jơh.”
‭‭
Gùng dà Yàng dê rơp tòm gơl ala tŭ kal ke ngai do gơlik gớs niam rlau mờ bơta he kơlôi gớs. Kư̆ hòn chờ té, ntào kơ̆ mờ ưn ngài Kơnràñ tòm kòp bơta he tìp.

Dan jà bol he dô nùs bal tòm bơta hòi dan:

Khoai Bèp koñ gơboh, dăn Yàng lơh sir bơta kơp koñ Kơnràñ tòm rài kís kòn dê tòm ngai do. Dăn tơng kah kon kah ala bol glăr, jê sồt kòn lòt găn ò di là ờ kwơ, mờ là ơn pơnah tòm tơng gu màng ryŭ rlau jơh Kơnràñ ai kòn in. Ưn ngài Yàng neh ai Yàng Je-su mù tòm dunnia, Kơnràñ là krơh àng bơh hwềng nùs duh rngòt mờ koñ gơboh. Dăn kư̆ ngui kòn kòp ngai, nàng kòp ngai kòn gơlik gớs bè Bơtau Krist. Kòn jơh nùs hòi dăn, tòm sơnđăn Yàng Je-su Krist, A-men.
Ơ ồng mọ oh mi koñ gơboh, Yàng ngui dê bơta gơ lòng, jê sồt ngai do nàng lơh kòn in gơlik gớs bè rùp Kòn Kơnràñ. Bulah tŭ do bol he rơp ò rgơi git lăm, mơya kư̆ kơ nùs bơta lơh tơmàl koñ gơboh Bèp Đăng Trồ rơp cèng bol he tús taih gơklŏ sùm sùm. Dòn duh mờ jào jơh ala bơta Kơnràñ in, nàng kòp bơta gơlòng ngai do rơp lơh gớs tùng hào cèng tús broă màng ryŭ mờ Kơnràñ găm lơh sir tòm rài kís bol he dê.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.