Neh gơs tŭ lơi oh mi gŏ he sơềt-sơêl tom tŭ sền gŏ cau lơi hơ̆ gơlik công nha rlau mơ he? Hala gơs tŭ oh mi ƀoah di đap dô bơta hon-chò oh mi he dê? Gơs ală tŭ oh mi tomlơh mơ să-tòm he, gŏ să-tòm he rgơi “ñim mơ cau ñim” mơ ya kălkê ngan nàng “chò bal mơ cau chò”. Ngai do, bơdơh wơl tĕ nàng sền sơwì nùs nhơm he, lah oh mi neh dòp ai bơta ƀoah mơ bơta hàm-kòñ mơ lơh kơnềs hơ̆ pơrdòn tiah tom nùs nhơm he dê hala ò.

Ngai do, ngai 16/06/2025 , Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnom di bơta dong kơl Ken Barnes dê bơh tơnggume TƠM RYÀS ALĂ BROĂ IƠH DÊ

Sră Goh: “Bơh tiah lơi gơs bơta ƀoah mơ bơta hàm-kòñ mơ lơh kơnềs hơ̆, gen tềng hơ̆ gơs bơta sơlồng-sơlàng mơ jơh ală broă iơh.” (Jakơ 3:16)

“Mơ tai, ală broă poăc-să dê la lọh-lang be do: hơ̆ la rềs-ar bơrnan, ngkòr-ngkàk, bung-jang, duh rup ràk, juh proh, sò-tom, jak tomlah, ƀoah, gơjrañ-mañ, tom-pơndang bal, cah is mpồl, jat gùng duh khoai tis, ƀoah gơjrañ, bơñul-lơmbè, jròk ñô-sa mơ ală bơta ndai ndròm bal behơ̆ sơl. Añ bơto tơngkah oh mi be añ neh bơto rau: dilah cau lơi tìs tom ală bơta behơ̆ gen ò geh pơrdòn lơgar Yàng Tom Trồ dê ò.” (Galati 5:19-21)

Tom tŭ añ cih ală sèng do, gen kơnhai phang neh tus, ală bơkao tom suơn neh sơntòm gơ-lì. Bulah behơ̆, tiah lơi gơs bơkao hang mơnĕ, tiah hơ̆ kung gơs ñhơt. Dilah ò mhar sền sơwì, ală mbur ñhơt gơlơh bè ò rgơi lơh bơta lơi gơ rơp mhar gơrề dờng ngan, rgơi sơrbơng roh jơh ală sươn in. Tom gơtha đah hwềng, bol he rgơi wă wờng ñhơt rŭng kung bè tôi glài, dilah ò “dus bơh ryàs”, gơ rơp têh dờng òm, mơ kơryan bơta têh dờng đah hwềng bol he dê.

Ƀoah, sò-tom mơ ham-kòñ mơ lơh kơnềs la bơta Sră Goh đơs lik bơh poăc să bol he dê. Nàng prap gàr bơta pràn kơldang hwềng nùs he dê, bol he pal pleh ngài ală tồi-glài do.

Tom ală năm do, bơh kòp-jê mơ tài bơh trồ tiah mhar tomgơl dô bă kalkê, bol he ò gam sền gàr ală rbòng bơkao tom suơn mơ he pal lơh bơh yau. Bau ùr añ jê kòñ gơboh broă lơh sươn, ai añ gen ò kơlôi oă tus gơ. Mơ ya tài bơh kòñ gơboh bau ùr, gen añ neh dong khai lơh broă do.

Gen tom poh lai òr, bol he kup tê tom broă lơh pal cang do, bulah kung gam dô-êt bơta bơklơn. Tom tŭ wàs goh ñhơt rung, bol he kah wơl bơta mơ he neh geh bơtê tom ală năm lai, lah gơwèt mơ ñhơt rung, dilah ò dus bơh tom ryàs, tơnơ̆ dô ềt kơnhai tai gơ rơp hòn.

Bơta do tơngkah añ lah ală broă poăc să dê bè sò-tom, jak tơmlah, ƀoah, gen gơs bal dô tơm ryàs, hơ̆ la nùs jòng să. Thomas Aquinas ai git lah bơta jòng să la tơm ryàs ală bơta tồi-glài ndai. gơ pun-ndơp hơđơm ryàs ñhơt rŭng dê. Dilah nùs jòng să ò geh tơnroh, gen òbat tai tơnơ̆, “sươn” hwềng nùs gơkol phà tơrlah.

Nàng wàs goh ală ñhơt rung mơ mbur rừp tom sươn. bol he pal kơrhia cang- king ndơp să tòm dô bă kơ̆-cê, nàng ò gơkol toh-kiăt hala tìp sơrbơng bơh gơ. Kung behơ̆ sơl, tom rài kis, dilah kòñ pleh klàs bơh ală “ñhơt rŭng” ƀoah gơjrañ mơ ƀoah hòn dờng tom nùs, bol he kung pal “cang-king” dơngoh kơlôi he mơ kơrhia mơ ală bơta kơlôi sơnơng hala jơnau đơs gơs bơta pơndròm să-tom he mơ cau ndai.

C.S.Lewis neh đơs: “Bơta jòng-să ò di buôn-soh la tus bơh bơta lơi oh mi gơs, mơ la tus bơh broă oh mi gơs oă rlau mơ cau gơp ƀòn he. Bơh bơta pơndròm hơ̆ lơh nùs oh mi gơlik gơs jòng-să, tom tŭ bơta hừh-nùs oh mi dê tus bơh broă oh mi gọ̆ he sơrlèt rlau mơ cau ndai.” Pơndròm bal la tơnggu sơrbơng lơh nùs nhơm bol he bîng bơta ƀoah mơ hàm-kòñ mơ lơh kơnềs.

Añ kung đal git lah ală chi bih-khih oă la ală chi mơ rềp di tiah. Gơ òs gơkòl jrơm ndơp bơh ñha chi hala bơkao ală chi ndai dê. Bơta do kung dròm be bơta ƀoah gơjrañ mơ ƀoah. Gơ òs pun să tơnơ̆ mơ ală jơnau gơlơh be lơbơn niam be jơnau jòng-ro hala yò tơngguh. Tài bơh ală jơnau hơ̆ lơh bol he chò-hòp, gen tang bol he ò đal git bơta gơchôl ngan tơnơ̆ mơ ală jơnau hơ̆. Ală bơta do ròng bơta jòng-să tom bol he, la tom ryàs ală bơta dê.

Tom tŭ bư di ală chi bih-khih, ñtàu gơlik pò brông mo. Mơ ya kung gơs tŭ, tơnơ̆ dô tŭ tơngai tai gen song gọ̆ ală tềl sơntòm gơlik loh. Bơta ƀoah gơjrañ mơ ƀoah kung behơ̆ sơl. Gơs tŭ bol he đal git mo, mơ ya gơs tŭ gơ têh dờng òm tom nùs mơ he ò git. Dilah ală bơta kơlôi sơnơng iơh hơ̆ ò geh kơrmap gàr mhar, gen tus di tŭ gơ pal gơlik tus, gơ rơp cư̆t jrô ryàs tom bơta kơlôi sơnơng mơ nùs nhơm, lơh jê-sồt să-tòm he mơ ală cau gùt-dar.

Cau gơnoar bơto dơng ồng Pol đơs lah, bol he tomlơh mơ tồi-glài la kơnom di gơnap-gơnoar Yàng Tom Trồ dê, kơnom di gơnap-gơnoar hơ̆, bol he rgơi “kup jơh ală bơta kơlôi sơnơng nàng dòn bơr Bơtau Krist” (II Kôrinhtô 10:5). Dilah bol he ò kup geh ală bơta kơlôi sơnơng he dê, gen gơ rơp at-bồ bol he.

Dan jà bol he dô nùs bal tòm bơta hòi dan:
Ơ Yàng, ngai do kòn tùs mơ Kơnràñ, đal git lah nùs nhơm kòn neh gơs tŭ bîng bơta ƀoah mơ hàm-kòñ mơ lơh kơnềs. Dan Yàng dong kòn git sền cau ndai mơ gar mat să-tom Kơnràñ dê, la Bơtau kòñ gơboh mơ bîng bơta nđàc. Dan plai kòñ gơboh sùm bîng liu tom nùs kòn, nàng kòn sùm kòñ gơboh cau gùt dar he, mơ sơlo gơlik oă broă niam rlau. Kòn jơh nùs hòi dan tom sơnđan Yàng Jesu Krist, A-men.

Ơ jơh ală ông mò, oh mi kòñ gơboh, tồi-lài tom nùs bol he ò gơkrơi be ală lò mơ ñhơt rung hòn tom lam sươn hwềng nùs. Dilah tồi-glài ò geh sùm kơrmap gàr mơ klò sang, gơ rơp mhar gơcat ryàs, pò-ơnang, mơ rhòi rhòi lơh jê-sồt nùs nhơm bol he. Neh nđò dơ̆, oh mi neh lòi bơta ƀoah gơjrañ, pơndròm, hàm-kòn mơ lơh kơnềs,…têh dờng òm tom nùs nhơm he dê, lơh să tòm oh mi mơ cau ndai gơkòl jê-sồt taih? Ngai do, kah wơl tĕ ñcau la cau mơ oh mi neh ƀoah gơjrañ mơ prap nùs hàm-kòñ mơ lơh kơnềs? Cèng tĕ bơta hơ̆ tus mơ Yàng tom bơta git gơjrañ sang-glài ngan, mơ ho pơgon mơ Kơnràñ lah oh mi rơp ò lòi ală bơta pơndròm lơh gơcah bơta gơtom klac kòñ gơboh mơ ală cau gùt dar he. Kah tĕ lah kờp nă bol he geh Yàng crơng gơs dô bă pha is, gơs bơta kwơ màng ndòm bal, mơ geh Kơnràñ kòñ gơboh, Gen tang, jơh ală bơta pơndròm la ò kwơ, mìng lơh bol he ngài bơh bơta hon-chò, bơta ring-lơngai, mơ bơta dô bă bal mơ gơp. Dan nùs bol he geh sơmbơi, geh tơm pơrgơl, nàng kòñ gơboh cau ndai mơ gar mat bîng bơta nđàc mơ lơbơn niam Kơnràñ dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.