kis tòm pah rài do, bol he ờ rgơi pleh klas jơnau nggồr ur mơ bơta oă broă lơh kờp ngai – jơnau nggồr digolan tus bơh điện thoại, tus bơh ală broă gam kơp gơn he lơh. lik bơh hìu, tồr he dê kơno rơndeh, cau đơs, mơ oă jơnau ntas ndai. jơnau ntas tus bơh đah bơdìh mơ tòm nùs tồr lơh he in ờ tơl pràn mơ ro ran. Ngai do, lời té tú jơ, lời wơl ală bơta kơlôi rcang, mơ cơn đoà lòt mơ Yàng tòm tiah ngềt ngơt, tòm bơta gơtomklac mơ Yàng.

ngai do, ngai 18/06/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ ồng Gene Markland bơh tơnggume PLEH IS HƠ TIAH NGỀT NGƠT

Sră Goh: “Sơnđan Kơnràñ sơlo ngai sơlo tiơng pơnro, gơs mpồl làng bol oă pơjum nàng iat mơ geh sơmbòi ală bơta kòp jê bol khai dê. Mơya Kơnràñ pleh is hơ tiah ngềt ngơt nàng hòi dan.” (Luka 5:15-16)

Mary là dồ nă cau ùr kă bro geh dờng tòm dồ hìu nhă cau dờn Yàng mơ gơs bơta dờn nền cê ngan. mơya khai dờp git bơta ờ wil tơl, sơlơ ngai sơlơ roh bơta tomklac bal mơ Hìu Jum Goh kung bal mơ Yàng sơl. bulah broă do khai pal tòm dră is oă kơnhai, mơya khai kung ờ hềt git nchi bơtài gơlik gơs bơta kalke tòm bơta tomklac mơ Yàng Tòm trồ. digolan tài bơh Mary oă broă – dê gùl bơta kơlôi bơh broă lơh, bơta boăh gơjran, tú jơ lơh broă tus dê trồ măng, kung bè ală broă đah bơdìh – jơh ală broă do lơh khai in ờ tơl pràn tai.

gen bè hớ, Mary neh lơh nền rlô broă dồ êt ngai. khai lòt chòp mò khai dê tòm bòn dềt, tềng tiah tiểu bang Tennessee, nàng pleh ngài ală bơta nggồr ur tiah bòn dờng dê. tài bơh do kung la ală ngai dan rlô ing broă khai dê sơl.

Mary rơndap phan khai dê mơ hào rơndeh lòt tus tiah Tennessee. niam ngan tú khai tìp mat ồng mọ, cau gam nggui hơđang cơnờng dê đap hìu, ơm sền trồ tiah niam, mơ bơta ring lơngai trồ tiah cèng tus. tòm ngai dớ bàr khai ơm mơ ồng mọ, cau mò Mary dê nggui hơđang cơnờng yung yài, at tê khai mơ đơs lah: “ơ Mary, bơta lơi lơh sau in kơlôi rcang tiah?”

“Sau ờ git sơl mò ơi. sau sền goh gơlơh bè roh bơta lơi. bơta đềt mềr mơ Yàng mơ sau neh geh tú do ờ gam gơs tai. sau ờ gơs tú jơ să tờm sau dê, mơ sau kung ờ git lơh bơta lơi sơl. sau ờ git ală broă neh gơlik mơ sau”.

cau mò sền gùt dar, hùc dồ êt cafe duh mơ đơs tai lah: “buơn soh nga, sau. hớ là tài bơh sau kòl oă broă. cau sò tơm he dê là cà ràk, kờn sau ngài bơh dê Yàng”.
“Mò đơs bơta lơi? sau ờ lơh bơta lơi. sau kung ờ tìs glài, kung ờ kis jat poăc să sơl.”

“Mò ờ di đơs sau neh tìs glài. bơta ơnia lơh cau in tìs glài mìng là dồ pơnah cà ràk dê, gơ la cau kơnau bơta ring lơngai he dê tòm Yàng. pơnah do cà ràk dê iơh ngan, cèng oă bơta ờ niam tòm rài kis, nùs nhơm, mơ dut ndơl là hwềng soàn sau dê.

sau gó sơl ơ, bol he kis tòm dunnia bềng bơta nggồr ur. bơta nggồr tus bơh TV tòm hìu, bơh điện thoại, máy tính mơ oă phan ndai. bulah bol he bic hala guh bic, gơ sùm ơm tòm bol he, lơh ờ niam tus dê bồ tơngoh mơ at bồ nùs nhơm he dê. gen bè hớ, ngan bol he gam ai gơnoar gơ in nàng at bồ nùs kơlôi he dê sơl ơ?
tòm pah rài do, kalke ngan nàng jòi tú jơ ngềt ngơt, nhất la ngai do bol he gơs điện thoại, dồ nơm phan crih crài, mơya kung la dồ nơm phan lơh rài kis he in oă broă rlau. gen bè hớ, oă dớ bol he yoam joh lah: “Nchi bơtài he ờ gơs bơta ring lơngai lơi taih? Nchi bơtài he ờ rgơi kơno jơnau Yàng đơs taih?” Sèng hơ wơl hớ là: tài bơh jơnau nggôr ur, bơta kơlôi rcang rài do dê.

ơ sau kờn gơboh, bơta mơ kon mơ nus ngai do ai lơh krơi hớ la bơta ngềt ngơt. mbè lơi nàng bol he rgơi jòi bàn bơta ring lơngai, hala kơno iat jơnau đơs Yàng dê tòm tú kờp ngai he gơkòl tòm oă ală jơnau ntas bơh TV, điện thoại, mơ oă rơndap ndai tai? mò kung kờn ală bơta hớ bè sau. mơya oă dớ bol he pal ơm bơdơh wơl. ơm wơl nàng lời nùs kơlôi he dê rgơi lik bơh ală bơta nggồr ur hớ, mơ ơm ngềt ngơt dê đap Yàng.”

Yàng Jêsus, tòm gơnoar broă Yàng dê, nàng ơm rềp mơ Bèp tòm bơta tomklac, Kơnràn ờs mờng pleh is hơ tiah ngềt ngơt nàng hòi dăn: “Sơnđan Kơnràñ sơlo ngai sơlo tiơng pơnro, gơs mpồl làng bol oă pơjum nàng iat mơ geh sơmbòi ală bơta kòp jê bol khai dê. Mơya Kơnràñ pleh is hơ tiah ngềt ngơt nàng hòi dan.” (Luka 5:15-16)

bơh bơta yal wơl ồng Luka dê, bol he sền gó lah, bulah sơnđan Yàng Jêsus gơs oă cau git mơ gơnoar broă Yàng dê sơlơ ngai sơlơ oă, mơya Yàng sùm lòi tú jơ nàng hòi dăn mơ pleh bơh bơta nggồr ur. bơta do lơh he in pal kơlôi is: dilah să tờm Kòn Yàng Tòm Trồ – Bơtau bềng gơnap gơnoar kung pal càng gơs tú jơ ngềt ngơt mơ Bèp, gen bè hớ gơwèt mơ bol he, la kon mơnus lơbơn lơnio, pal càng kờn oă tú jơ ngềt ngơt nàng ròng siăm đah hwềng he dê sơl.

tòm dunnia ngai do, bơta ngềt ngơt la dồ nơm bơta kalke ngan. bơta nggồr ur bơh điện thoại, mạng xã hội, broă lơh mơ oă bơta kơlôi rcang lơh he in bòl glar mơ mhar gơcèng tòm bơta kơlôi rcang rài kis dê, tiah gơs bol he lơh roh tú jơ ngềt ngơt mơ Yàng. mơya, tú he kơlôi sơnơng Jơnay Yàng, bol he sền gó lah să tờm Yàng Jêsus kung pleh is hơ tiah ngềt ngơt nàng hòi dan. bơta do dong he kơlôi lah, nàng cơnđoà pơnjat tai, pơnjat lơh broă, cơnđoà mut tòm taih ngềt ngơt la tiah niam nàng ròng siam nùs kơlôi he dê gơlik pa sùm, nùs nhơm geh lơh goh, nàng he rgơi kơno jơnau đơs Yàng dê dồ bă loh làng oă rlau tai.

“sau lòng is să tờm sau dê ơm mo mó tòm 10 fuk yơ. dilah sau jơh nùs kờm jòi bàn bơta ring lơngai tòm nùs mơ kờn kơno jơnau đơs Yàng dê, gen do là tú sơntờm ngan. tú do mò mut tòm hìu dồ êt, sau kứ nggui tềng do, nàng kơnơ iat mơ bàr nơm tồr he dê, lời să tờm sau dê gơkram tòm bơta ngềt ngơt mơ kơno iat jơnau đơs Yàng Hwềng Goh yơ.”

tú ơm ngềt ngơt mơ Yàng, Mary neh jòi bàn bơta ring lơngai mơ geh tơrbó wơl bơta tomklac mơ Yàng, tềng tiah cơnơng yung yài cau mò khai dê.
tú do, ơ ồng mọ oh mi, tus té mơ Yàng mơ ơm ngềt ngơt dê đap Yàng tòm ngai do.

Dan jà bol he dô nùs bal tòm bơta hòi dan:
Ơ Yàng, tòm ală ngai lòt gan kon neh lơi bơta nggồr ur dunnia dê at bồ rài kis kon dê, lơh kon in bòl glar mơ ờ mhả kơno iat jơnau đơs Yàng dê. dan Yàng nđàc sơngit mơ tề lăm kon tus rềp mơ Yàng tòm bơta ngềt ngơt, la tiah kon rgơi sền gó bơta gơkló mơ bơta kờn gơboh Yàng dê. dan ală tú jơ ơm ngềt ngơt mơ Yàng là tú kon geh tìp mat Yàng, mơ geh dờng tòm bơta tomklac mơ Yàng đềt mềr. kon jơh nùs hòi dăn, ai sơnđan Yàng Jêsus Krist, Amen.

ơ ală ồng mọ oh mi kờn gơboh, bulah kòl oă broă kàr lơi, Yàng Jêsus kung lời tú jơ nàng lòt tiah ngềt ngơt mơ hòi dăn. dilah Yàng Jêsus kờn tú ngềt ngơt nang tomklac mơ Yàng Bèp, nàng lơh pal wơl hwềng soàn, gen bol he, la kon mơnsu lơbơn lơnio, pal càng kờn oă rlau bơta do. ngai do, Yàng gam hòi jà bol he đòm krớh Yàng dê, pleh is tòm tiah ngềt ngơt nàng kơp gơn Yàng, tom boh bơr mơ Yàng, kơno iat jơnau Yàng đơs mơ he.

gen bè hớ, pal jòi he in dồ bă tiah ngềt ngơt, kal jơh ală phan điện thoại, mơ lời tú jơ nggui, kơlôi sơnơng mơ hòi dăn mơ Yàng. tú he lơh broă do dồ bă ờs mờng, he rơp dờp git bơta ring lơngai mơ geh dờng tòm bơta tomklac mơ Yàng. sơntờm té bơh ngai do, tài bơh git lah tiah ngềt ngơt hớ, he rgơi jòi bàn să tờm he mơ să tờm Yàng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.