Đei lu tơdrong tơblah ưh kơ đei re, ưh kơ đei bu băt, mă lei oei đei tơblah thĕng hreh lăm jơhngơ̆m lu bơ̆n rim năr. Noh jơ̆ đon tơchĕng păng jơhngơ̆m ‘maih wă dui lu bơ̆n năm tơ ‘bar pah kơnhăm phara băl. Kơplah jơhngơ̆m lu bơ̆n ‘maih wă arih ‘lơ̆ng kiơ̆ kơ Kră Yang lăp đon, mă lei đei tơdrong pơhlŭ na rai đunh rai ataih đơ̆ng Kră Yang. Păng bơ̆n gô đei jet kơdih: “Yua kơ kiơ inh ngăl pơm mă inh băt hơđăl tơdrong noh ưh kơ trŏ kơ pơm?” Tŏk bŏk hơbŭt tơdrong yoch ‘nâu, oei đei trong wă ăn kơ lu bơ̆n lĕch hlôi: Noh jơ̆ Yang Yêsu Krist, Sư kĕ jei tơplih ăn kơ lu bơ̆n.

Năr ‘nâu, ‘năr 21/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Miriam Drennan kơ̆l ‘bai TƠBLAH LĂM JƠHNGƠ̆M.

Sơ̆p Hla Bơar ‘Bok Kei-Dei: “Na inh đĭ pă hiôk boih, đon hơdơ̆r ‘bơ̆r apơi wă kơ pơm ‘lơ̆ng ngăl ră, mă-lei ưh kơ pơm; kuă kơ pơm yoch ră mă-lei oei pơm.” (Rôm 7:15)

“Inh ưh kơ hlôh tơdrong inh pơm. Yua kơ inh kuă kơ pơm yoch ră mă lei oei pơm.” Noh jơ̆ nơ̆r ‘bok Pôl đei pơma lăm Rôm 7:15.

Buăl hăm đei tơchĕng kiơ kơplah đŏk dôm kơ nơ̆r ‘nâu ưh? Nơ̆r ‘bok Pôl đei lơ wơ̆t kư̆m pơpơn thoi noh. Buăl đei mơn tơdrong tơgar băl lăm jơhngơ̆m sư, nhen thoi bŏng lŏng klơ̆m tơ to klơ̆m tơ âu. Jơhngơ̆m bơngơ̆t, jơhngơ̆m ‘maih wă dui tơ pah âu, tơdrong pơm grê tơ pah to – nhen thoi ‘ban ‘bŏng lŏng ‘ban tŏk bŏk đon wă pơm thoi âu păng jơhngơ̆m ‘maih wă thoi to.

‘Bŏng lŏng ‘ban jơ̆ tơdrong pơchơt tơpôl chơt hơ-iă tơpă. Mă buăl bơngai ‘ban dah bơngai lăng, tơdrong pơchơt ‘nâu pơm kơ jơhngơ̆m bơngơ̆t tơpă. Mă hloh kơplah ‘bŏng lŏng oei đông dơ̆ng tơ kơpal, klơ̆m ăn tơ âu klơ̆m ăn tơ to, bu bu kư̆m bơngơ̆t gô lăng bơngai ‘ban ayơ gô ‘ban bloih ưh kơ ‘bơm.

Dôm kơ “pơjei lăm jơhngơ̆m” mă ‘bok Pôl đei pơma lăm Rôm chăl 7 ưh kơ đei ‘bôh hơ-iă tŏ sĕt hloi. Noh jơ̆ tơdrong tơ’blah mă bu lui kơ Kră Yang gô đei hlôi mơn. Kư̆m đei buăl băt hơđăl tơdrong noh glăi, mă lei oei pơm. Pơm đang bơih na ơh sơ’ngon, hil kơdih, na jet kơdih: “Inh hăm ‘mêm kơ Kră Yang ưh? Inh hăm đei đon lui tơpă ưh?” Kư̆m đei buăl đei mơn gleh lap, ‘maih wă achăng hŭt lê̆. Păng tơpă, kư̆m đei năr lu bơ̆n achăng lê̆.

Mă lei Kră Yang ưh kơ thoi noh. Đơ̆ng blŭng a, Kră Yang băt hơđăl kơ lu bơ̆n jơ̆ kon bơngai rơdu, păng yua kơ thoi noh, Kră Yang jur wă dŏng pơklaih lu bơ̆n.
Yua kơ thoi noh, mă khan đei hlôi mơn kơ lơ tơdrong, đei kơ trong yak hơtaih lăm trong yak năm kiơ̆ Kră Yang, oei đei kơ plah jơhngơ̆m bơ̆n ngĭl ngŭl, oei ‘maih yak năm tơ pah to. Rŏ lăng yua kơ lu bơ̆n ‘blŏk kơ năr hơdrol sơ̆ – dôm kơ lu năr nhen thoi “chơt hiôk hloh”, hiôk hơ – iă hloh, chơchă jên lơ hloh, đei lơ bơngai gơneh gơnơm hloh … Păng lu bơ̆n gô đei tơchĕng: “Na wơ̆t pơm tŏ sĕt đĕch? Pơlong lăng minh wơ̆t đĕch, na inh gô wơ̆t hloi!”

Nă lu bơ̆n đei pơma hơtă: mă đei thoi yơ Yang Yêsu kư̆m kĕ jei bơih – kăl kơ kiơ hiơ̆k bơngơ̆t?

Pŭn dêh, ‘bok Pôl kư̆m băt hơdrol kơ tơdrong noh, păng sư dan ăn kơ lu bơ̆n minh nơ̆r jet tơpăt: “Tơdrong iĕm pơm yoch sơ̆ ưh kơ đei tơgŭm iĕm minh tơdrong kiơ ôh. Dang ei iĕm băt mơlâu kơ tơdrong yoch iĕm sơ̆ boih; tơdrong bơ̆n pơm yoch bơ̆n gô lôch hiong đĕch?” (Rôm 6:21)

Jơ ‘nâu, athei tơpăt jet kơdih akâu- păng jet Kră Yang hloi: Tơdrong “đei plei” noh hăm trŏ kơ đei hiôk hian lăm jơhngơ̆m mă buăl đei ưh? Tơdah buăl băt kơ gĭt kăl kơ tơmam tơdrong arih khŏm khŏm mă Kră Yang ăn, na tơdrong pơm yoch thoi noh hăm trŏ ‘blep ưh?

Hiôk hơ-iă tơpă kơplah băt kơ ‘bok Pôl kư̆m đei chhŭr nuih thoi lu bơ̆n. Sư ưh kơ ôn, mă chih pơdah đĭ, wă kơ bơngai rơdu thoi kơ lu bơ̆n huay kơ ngĭl ngŭl. Mă tơpă, buăl hăm mơn kơ lap ưh? Kơplah nŏng kơ pơm tơdrong pơchơt “đơ̆ng to – đơ̆ng âu” ‘nâu? athei roi đĭ tôm tơdrong kơ Kră Yang, păng gơnang kơ Sư pơthim ăn jơhngơ̆m pran wă kơ buăl kĕ jei đơ̆ng tơdrong pơhlŭ, yua kơ wă ư-ang kơ Kră Yang.

Apĭnh đĭ đăng krao khan hơdai:
Kơkuh kơ Kră Yang, kư̆m đei năr kon đei tơdrong pơhlŭ wă kơ arih kiơ̆ kơ tơdrong arih so. Apinh Ih mơnat kơ kon. Apinh Ih ăn kơ kon đei jơhngơ̆m pran wă kơ dơ̆ng kơ jăp, ăn kơ kon đei chơ̆n jơhngơ̆m chang gô Ih bơ̆jang lăm jơhngơ̆m kon, păng tơgŭm kon đei đon lui tih wă kơ kon rơih iŏk tơdrong arih rim năr mă Ih lăp đon. Apinh Ih yua iŏk tơdrong arih măng mu kon đei hlôi bơih, pơm kơ tơdrong noh jing ‘lơ̆ng ‘bơ̆t anăp Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, tơdrong tơgar băl lăm jơhngơ̆m lu bơ̆n oei ling lang tơnoh, mă lei athei ‘blŏk lu bơ̆n ưh kơ đei năm minh drô̆. Kră Yang ưh kơ đei layơ achăng lê̆ lu bơ̆n, mă khan lu bơ̆n tơwih rŏng kơ Sư lơ wơ̆t – kăl kơ lu bơ̆n băt kơ tơbral, băt kơ wih brŏk, păng băt kơ bơwei tơmam dŏng pơklaih gĭt kăl khŏm khŏm mă Kră Yang ăn. Tơdah năr ‘nâu buăl đei mơn kơdih akâu thoi kơ oei tŏk bŏk “pơjei băl lăm jơhngơ̆m”, athei dơ̆ng ‘mơ̆i păng lăng tơ ‘long pơglang. Athei ăn kơ tơdrong ‘mêm kĕ jei. Păng athei ăn kơ jơhngơ̆m băt kơ bơnê jing kơ tơdrong pơtrŭt tơgŭm buăl pơtrơp yak năm dơ̆ng, ưh kơ đơ̆ng lăm adrin kơdih, mă đơ̆ng tơdrong pran Yang Bơhngol ‘Lơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.

bình luận

Trở thành người đầu tiên bình luận cho bài viết này