Kơplah yak năm rok trong rim năr, tơ ‘blŏk truh kơ “trong wing,” lu bơ̆n ngăl đei mơn ưh kơ ‘maih gơwĕch yua kơ băt kơ gô hiong jơnăr lơ păng jơhngơ̆m pran hloh. Lu bơ̆n ngăl lăp hơpơi yak năm mĭnh pôm trong tơpăt truh tơ anih. Mă lei, buăl hăm băt khan kon pơlei Isơrael sơ̆ đei athei yak lăm char glă 40 sơnăm yua kơ Kră Yang đei chông lu sư yak năm lăm trong wing ưh? Lei rok trong wing mă Kră Yang chông anhăk hăm trŏ jơ̆ trong ưh kơ yua, dah ‘noh jơ̆ lăm mĭnh tơdrong proh hơmet tih hloh đơ̆ng Sư?

Năr ‘nâu, ‘năr 22/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Diane Pearson kơ̆l ‘bai KIƠ̆ KRĂ YANG LĂM TRONG WING.

Sơ̆p Hla Bơar ‘Bok Kei-Dei: “Lei na Kră Yang ‘Bok Kei-Dei chông ba lu kon pơlei năm dăr rok kiơ̆ trong lăm char glă, gah Đak Dơsĭ ‘Brê.” (Lĕch Đơ̆ng Êyiptơ 13 :18a)

Rim năr, Joyce huơ̆r gre đơ̆ng hnam truh tơ anih jang lăm mĭnh pôm trong, yak hlôi lơ trong iĕ. Sư pơma: “Rim kơ khei jĭt truh, inh mơn đei sơ’ngon, yua kơ ‘noh jơ̆ jơ năr mă kon adruh mĭnh pôm inh lôch.

Sơnăm ‘nâu, mơn đei sơ’ngon ‘noh nhen thoi gleh trăp hloh. Bơyan puih sơnăm ‘nâu truh hiơ̆ tơpă, păng kŭm ưh kơ hơiă thoi rim kơ sơnăm.

Kơplah oei huơ̆r gre yak hlôi kơ anih pơlei na inh tơ’bơ̆p tŏk bŏk trong tơ’bưh hăm trong gre treng oei tang wă hơmet, na inh kăl kơ yak trong wing. Mă khan ưh kơ hiôk hơ-iă ră, mă lei kŭm đei chă ‘bôh mĭnh pôm trong nai wă yak. Tơpă inh ưh kơ ‘blŏk tơlŭch inh đei yak rok trong ‘nâu ‘noh jơ̆ layơ, mă lei kơplah gre ‘nao yak tŏk tơ krang kơđeh, mĭnh tơdrong ‘lơ̆ng hơ-iă ‘bôh ‘bơ̆t anăp măt inh: ‘noh bơih mĭnh trong ‘long bơyan puih ‘lơ̆ng rŏ hloh mă inh đei ‘bôh. Tơdrong ‘lơ̆ng ‘noh pơm kơ inh thĕng hreh.

Păng na inh đei hlôh hloi: Kră Yang đei chông anhăk inh yak rok trong wing ‘noh wă kơ inh ‘bôh tơdrong ‘lơ̆ng rŏ hlĭch chrơp lăm tơdrong pơjing đơ̆ng Sư. tơdrong ‘noh đei pơlung pơhngol păng jơhngơ̆m inh đĭ kơ năr noh.”

Hlôi kơ đei tơ’bơ̆p tơdrong ‘nâu, Joyce băt kơnăl khan tơdrong ưh kơ hiôk rơhŏu ‘noh truh đơ̆ng ‘Bok kei-Dei, păng tơdrong kơnhăm đơ̆ng Sư jơ̆ wă kơ sư đei mơn tơdrong pŭn hiôk păng pơlung sư lăm tơdrong ơh sơ’ngon yua kơ tơdrong hiong răm đơ̆ng kơdih.

Lei Kră Yang hăm gơh yua dôm lu trong wing wă kơ lu bơ̆n hlôi đei mơn gah Sư lơ hloh ưh? Tơpă jơ̆ đei! Inh đei sơng iŏk nơ̆r tơl tơwih hơđăl kơ tơdrong ‘nâu kơplah inh đŏk pơhrăm Sơ̆p Hla Bơar ‘Bok Kei-Dei. ‘Noh jơ̆ hơ’mon gah kon pơlei Isơel đei Kră Yang chông anhăk lĕch hlôi kơ pơm đĭch Êyiptơ. Lĕch Đơ̆ng Êyiptơ 13:17-18 chih roi thoi âu:

“Kơplah Pharaôn achăng kon pơlei Isơrael năm, Kră Yang ‘Bok Kei-Dei ưh kơ đei chông ba kon pơlei noh năm rok trong gah dêh Philistin, noh trong jăl jê̆ hloh; yua kơ Kră Yang khan: Hli kơ kon pơlei tơ’bơ̆p tơdrong tơblah wang, lu sư wih brŏk hơlơ̆k đơ̆ng tơ dêh Êyiptơ. Lei na Kră Yang ‘Bok Kei-Dei chông ba lu kon pơlei năm dăr rok kiơ̆ trong lăm char glă, gah Đak Dơsĭ ‘Brê. Kon pơlei Isơrael chĕp khêl đao lĕch đơ̆ng dêh Êyiptơ.”

Đak Dơsĭ ‘Brê jơ̆ anih lăng ‘bôh mĭnh lăm dôm kơ tơdrong tơ’bôh mơsêh mơyang tih hloh đơ̆ng ‘Bok Kei-Dei: Sư blah ‘bar pah tŏk bŏk đak wă kơ kon pơlei Isơrael gơh yak hlôi nhen thoi yak năm kơpal teh hrĕng. ‘Bok Kei-Dei lăm tơdrong proh hơmet đơ̆ng Sư, đei ăn kơ kon pơlei yak năm kơpal trong wing ‘noh.

Jơ̆ kon bơngai, kon bơngai bơ̆n jơ̆ thoi noh ngăl ưh kơ đei tơdrong kĕ chơ̆n. Lu bơ̆n wă kơ dôm tơdrong proh hơmet đơ̆ng bơ̆n đei ling lang tơproh ‘lơ̆ng; mă lei, lơ wơ̆t ‘Bok Kei-Dei wă kơ lu bơ̆n hiơ̆ biơ̆ wă kơ ‘bôh dôm lu tơdrong mơsêh hlĭch đơ̆ng Sư. Tơdah kon pơlei Isơrael ưh kơ yak trong wing, lu sư gô ưh kơ layơ đei ‘bôh tơm măt tơdrong Đak Dơsĭ ‘Brê blah ‘bar pah tŏk bŏk măt, jơ̆ mĭnh tơdrong mơsêh hlĭch chrơp pơm kơ bu kŭm đei hlĭch hlăch păng kơdrăt.

‘Bok Êsai, bơngai hlôi đei mơn tơdrong mơsêh đơ̆ng Kră Yang, kŭm tơbăt hơđăl tơpă khan dôm tơdrong mơsêh hlĭch đei truh đơ̆ng ti ‘Bok Kei-Dei. Sư chih: “Wă kơ đĭ-đăng bơngai ‘bôh păng băt, wă kơ tơchĕng hơdai hlôh khan, noh đơ̆ng ti Kră Yang pơm tơdrong ‘nâu, păng Tơ’ngla ‘Lơ̆ng Rơgoh Isơrael pơjing tơdrong noh.” (Êsai 41:20)

Lăm tơdrong arih, kơplah ‘Bok Kei-Dei chông anhăk buăl yak năm hlôi kơ mĭnh “rok trong wing,” ‘nĕ hăt kơ bơ̆l hăl. Athei krao khan wă kơ tơdrong chông anhăk đơ̆ng Sư, păng pơih măt đon lui đơ̆ng bơ̆n wă chang gô, lăng hơlen ‘bôh Kră Yang hăm oei bơ̆jang kiơ̆ thoi buăl ưh kơ tơchĕng truh dah ưh. Trŏ kơ đei, trŏ kơ rok trong nhen thoi wing gơwĕch gơwe ‘noh, buăl gô sơng iŏk lơ tơdrong pŭn hiôk tih mă buăl ưh tim mă tơchĕng truh.

Apĭnh đĭ đăng krao khan hơdai:
Kơ kuh kơ Kră Yang jơ̆ Tơ’ngla chông anhăk kon! jơhngơ̆m kon băt bơnê kơ Ih yua kơ mă khan kơplah kon yak lăm dôm kơ trong wing đơ̆ng tơdrong arih, Kră Yang oei ‘bơt doh păng chông anhăk kon. Apĭnh Kră Yang tơgŭm kon lui gơnang lăm tơdrong tơdă păng rok trong đơ̆ng Ih kơ tơdrong arih kon, mă khan yak hlôi kơ dôm pơmat tat păng ơh sơ’ngon, kon băt kơ Ih oei ‘bơt doh wă ăn tơdrong pŭn hiôk păng tơgŭm kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, mưh lăp Kră Yang ưh kơ chông lu bơ̆n yak năm rok trong dơnă ‘lơ̆ng păng tơpăt, mă lei Sư yua dôm kơ trong wing dăr wă tơgŭm lu bơ̆n hlôi mơn đei Sư jrŭ hloh dơ̆ng. Yua kơ thoi noh, ‘nĕ kơ bơ̆l hăl dah ngĭl ngŭl gah tơdrong proh hơmet đơ̆ng Sư ‘măn ăn kơ buăl, tơplih kơ noh, athei băt bơnê păng chă tơdrong chông anhăk đơ̆ng Sư.

Kră Yang chông anhăk kon pơlei Isơrael yak trong wing ưh kơ trŏ yua kơ Sư ưh kơ đei tơdrong mơsêh, mă yua kơ Sư băt tơdrong kiơ jơ̆ ‘lơ̆ng hloh kơ lu sư. Năr ‘nâu, buăl kŭm athei băt kơnăl khan Kră Yang oei yua dôm kơ trong yak wing dăr wă pơhrăm pơjuăt buăl, pơtho buăl băt kơ chu yom, băt lui ngeh kơ Sư, păng tuch luch jơ̆ wă hơmet kơ buăl mơ̆t tơ lăm “ Dêh char đei pơkă” ‘lơ̆ng rŏ mă Kră Yang gô ‘măn ăn!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.