Athei tơchĕng pơwao, buăl đei truh tơ “kơpal bơih” lăm trong yak năm kiơ̆ Kră Yang. Buăl oei bơjang kơ Sư tơnăp, ư-ang, đei lơ bơngai pôk pơ-ư. Na gô đei hloi, dôm tơdrong hiong răm. Kơplah anih pơdah pĭt ŭnh, kơplah tơtap ti pă đei re … lei buăl hăm oei đei kiơ? Lu bơ̆n ngăl tơchĕng khan bơ̆n đei yua ăn kơ Kră Yang kơplah oei đei jơhngơ̆m pran, đei tôm tơdrong. Mă lei rŏ lăng, tơm kơ lăm dôm tơdrong rơdu păng pă đei kiơ bơih, Kră Yang gô đei pơm kơ tôm tơdrong jing pran păng hlĭch tơpă lăm tơdrong arih lu bơ̆n.

Rŏ lăng, đơ̆ng kơ dôm tơdrong pơchah nhen thoi pă đei gơh yua mă đe hŭt lê̆, Dêh Char Kră Yang gô đei pơjing kơjăp.

Năr ‘nâu, ‘năr 23/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Bill Gaultiere kơ̆l ‘bai ARIH ĂN KƠ KRĂ YANG KƠPLAH DÔM TƠDRONG KRÔ HMĂ.

Sơ̆p Hla Bơar ‘Bok Kei-Dei: “Na bơ̆n bơngai mă ‘Bok Kei-Dei pơgơ̆r boih, mah kăl kiơ kơ sa ‘nhĕm ‘nhot thoi noh, mah ‘nhĕng kiơ kơ đe sa et tơdrong ‘noh. Tơdrong bơ̆n pơm ‘lơ̆ng kơ ‘Bok Kei-Dei, tơdrong bơ̆n pơm ‘lơ̆ng kơ bôl buăl, tơdrong bơ̆n chơt ngă ‘nă hal yua kơ đei Yang Bơhngol ‘Lơ̆ng, tơdrong noh bơ̆n kăl.” (Rôm 14:17)

Dieter Zander đei pôk pơ-ư minh lăm lu ‘bok pơtho gơh rơgei tơ teh đak Mi. Lăm sơnăm 1980, sư jơ̆ bơngai hơdrol pơjing Hnam Akŭm ‘măn ăn kơ lu bơngai hơ’lơ̆p GenX – minh tơdrong pơjing ‘nao kơplah noh sơ̆. Đơ̆ng rŏng kơ noh. Sư đei tơdrong jang “Axis” lăm Hnam Akŭm Willowcreek tơ Illinois, ‘măn ăn kơ lu hơ’lơ̆p, lăm noh đei ‘bar ‘nu kon drŏ ‘nglo inh.

Inh oei ‘blŏk kơ minh wơ̆t brŏk ngôi tơ hnam, inh đei drong tơ Hnam Akŭm Willowcreek păng ‘bôh Dieter oei preh gitar, bơtho tơ’bôh đei loi kơ hrĕng hơ’lơ̆p. Mơ̆t tơ anih tơpôl, inh nhen thoi soai. Anih noh hiôk chơt tơpă. Brŏ re jơwa, păng ‘bai bơtho sư pơm kơ lơ bơngai đei pơlung pôk tơiung. Hơđăl tơpă sư jơ̆ bơngai pơm kơ lơ bơngai ‘maih wă- gơh preh gitar hloi, păng bơtho tơ’bôh hloi, jơ̆ bơngai chih ‘bai bơtho mă lơ bơngai ‘maih wă.

Pơm keh đang ‘lơ̆ng pơtrơp kơ dôm tơdrong keh đang ‘lơ̆ng. Dieter brŏk tơ San Francisco wă tơgŭm lu ‘bok bơtho nai tơ anăp wă pơjing Hnam Akŭm, kăl hloh noh jơ̆ khŭl lu hơ’lơ̆p. Nhen thoi kơ dôm tơnang măng tơ anăp wă pơih bơih ră.
Mă-lei, lăm ‘năr 4/2/2008, Dieter pă tam kơ băt jĭ pham lĕch tơ lăm kơ̆l ‘ngok jĭ trăp păng truh tơ pă hơdơ̆r.

Tơdrâu năr đơ̆ng rŏng, sư hơdơ̆r , mă lei dôm tơdrong đei tơplih đĭ bơih. Ti pah ‘ma pă đei pơpơ̆- sư pă đei gơh preh gitar. Pă đei gơh pơma – hrei âu đei kơ nơ̆r pơma ‘bơ̆t đei ‘bơ̆t ưh, tơnat kơ hlôh. Sư pă đei hơri, pă đei bơtho tơ’bôh. Che tơ anih pơdah tang lê̆ bơih. Pă đei re tơtap ti. Dôm kơ pŭ iŏk tơdrong jang, tôm kơ tơdrong jang, păng anăn đei pôk pơ-ư pă đei bơih. Dôm kơ tơdrong hiong đĭ bơih.

Mă-lei, bôh hlĭch noh jơ̆ jơhngơ̆m đon Dieter oei hơbăng đĕch. Sư oei đei tơdrong hlôh wao, chơt, tơnăp thoi kơ hơdrol ki, mă lei sư pă đei gơh wă tơ’bôh ăn. ‘Net ‘net, lu bơngai jum dăr kơ sư đei gleh lap kơplah hơdrin wă kơ hlôh kơ sư. Sư arih đei jơhngơ̆m sơ’ngon, đei chô̆ lăm jơhngơ̆m đon kơdih sư, yua kơ đơ̆ng pă gơh pơma. Mă tơm kơ đơ̆ng anih sơ’ngon noh, đei minh nơ̆r pơma pơ’lơ̆ng hơdar jơwa lăm jơhngơ̆m sư:

“Hreh bĕ athei băt Inh boih Kră Yang ‘Bok Kei-Dei. Inh đe gô pôk pơư tơ jơ̆p dêh char, kư̆m pôk pơư kơ Inh tơ kơpal teh.” (Hơriso 46:10)

Lơ sơnăm đơ̆ng rŏng, sư chih: “Dôm kơ tơdrong tơchĕng, hli tơrơ, dôm kơ nơ̆r hơnul lăm kơ̆l mă inh ưh kơ gơh wă pơma tơ lĕch – Kră Yang đei kơtơ̆ng ‘bôh đĭ. Inh đei mơn kơ pơlung, kư̆m truh tơ nơ̆r hiĕk đơ̆ng Kră Yang.”

Đơ̆ng rŏng kơ jĭ pham lĕch tơ lăm kơ̆l ‘ngok, Dieter pơtơm blŭng a yak năm tơplih plơ̆ng đĭ. Pă đei khan ‘bok pơtho lơ bơngai pôk pơ-ư, sư jang tơdrong jang linh wei lăng trong, tơdrong jang tơm noh tơgŭm hơ’lơ̆p yak năm hlôi kơ trong. Đơ̆ng rŏng kơ noh, sư bơ̆jang tơ anih tĕch lu tơmam. Păng tơm kơ tơ anih pă đei bu kơnhăm truh noh, Kră Yang đei pơtho sư ‘bai hŏk jrŭ să tơpă: athei ‘mêm kơ bôl buăl – ưh kơ yua kơ ŭnh dreng ‘brĕu tơ anih pơdah, ưh kơ yua kơ re tơtap ti, mă yua kơ Kră Yang ‘mêm kơ sư. Sư đei pơma khan kơ tơdrong arih sư noh jơ̆ “arih ăn kơ Kră Yang hăm dôm tơdrong krô hmă”. Noh jơ̆ anih mă dôm tơdrong pơm krô hmă đĕch mă jing kơ tơdrong kơkuh kơ Kră Yang.

Rŏ lăng buăl kư̆m đei mơn thoi inh: nơ̆r pơma đơ̆ng Dieter jơ ‘nâu pran hloh kơ đĭ đăng! Sư đei tơ’bôh tơdrong tơpă ăn kơ lu bơ̆n kăl tơpă: kơkuh kơ Kră Yang ưh kơ tơdrong mă lu bơ̆n pơm tơ kơpal anih pơdah, mă noh jơ̆ lu bơ̆n đei jơhngơ̆m ‘mêm mơnat rim năr, kơplah ưh kơ đei bu lăng ‘bôh, kơplah pă minh drô̆ lu bơ̆n hăm Kră Yang. Kơkuh ưh kơ wă kơ đei brŏ reh hiôk, đei jơhngơ̆m hiôk hơ iă dah lơ bơngai tơtap ti, mă lu bơ̆n năm tơ Kră Yang hăm bơngai tơpă tơpăt lu bơ̆n, hăm đơ̆ng lăm jơhngơ̆m păng tơdrong tơpă tơpăt ( Yôhan 4:24)

Đơ̆ng tơdrong roi hơ’mon kơ Dieter, lu bơ̆n đei lăng ‘bôh tơpă gah ‘long pơglang ‘Bok Đŏng Pơklaih Yang Yêsu – đei tơ’bôh đơ̆ng lăm tơdrong arih rim năr rim ‘nu kon bơngai.

Kră Yang huay kơ pơdê dôm kơ pơchah pơchek lăm lu bơ̆n. Kră Yang gô pơm đơ̆ng tơdrong krô hmă, dôm đei hơgăt, pă tôm, dôm tơdrong lăng pă đei gĭt kăl, jing đei lăm Dêh Char ư-ang kơ Sư, wă kơ tơdrong tơchĕng Sư gô jing lăm tơdrong arih lu bơ̆n. Păng tơdrong noh đei pôk dan tih tơpă!

Thoi kơ Nơ̆r Kră Yang đei tơ’bŏk kơ lu bơ̆n lăm Rôm 14:17:
“Na bơ̆n bơngai mă ‘Bok Kei-Dei pơgơ̆r boih, mah kăl kiơ kơ sa ‘nhĕm ‘nhot thoi noh, mah ‘nhĕng kiơ kơ đe sa et tơdrong ‘noh. Tơdrong bơ̆n pơm ‘lơ̆ng kơ ‘Bok Kei-Dei, tơdrong bơ̆n pơm ‘lơ̆ng kơ bôl buăl, tơdrong bơ̆n chơt ngă ‘nă hal yua kơ đei Yang Bơhngol ‘Lơ̆ng, tơdrong noh bơ̆n kăl.”

Hrei âu, Dieter oei bơjang kơ Kră Yang, hăm tơdrong jang nai. Mă pơma khan ưh kơ tơproh, sư yua tơmam phĭn rup wă roi dôm tơdrong Kră Yang bơtho tơ’bôh kơ sư. Sơ̆p hla bơar A Stroke of Grace ( đei tơblang: “ Jĭ Pham Lĕch Lăm ‘Ngok Đơ̆ng ‘Mêm Mơnat”) jơ̆ minh tơdrong roi hơ’mon kơ đeh đĕch, krô hmă đĕch mă lei hơtŭt ‘bơm kơ jơhngơ̆m lăm trong yak năm hlĭch chrơp kơdih sư hăm Kră Yang, hăm đĭ jơhngơ̆m tơpăt păng iŏk jơhngơ̆m đon a la.

Apĭnh đĭ đăng krao khan hơdai:
Kơkuh kơ Kră Yang mă ‘mêm kơ kon, kư̆m đei năr kon mơn kon pă đei gĭt kăl, pă đei jơhngơ̆m pran, mơn ‘bôh tơdrong arih kon ơh sơ’ngon, mă lei Ih oei ‘bôh kon. Kon bơnê kơ Kră Yang tơpă! Apinh Kră Yang bơtho kon băt kơ kơkuh kơ Ih, huay kơ hăm gah ‘ngoaih ‘lơ̆ng rŏ mă hăm dôm tơdrong kon pơm wă kơ bơngai lăp đon. Mă lei apinh Ăn kơ kon kơkuh kơ Ih hăm đơ̆ng lăm jơhngơ̆m tơpă tơpăt kon, hăm dôm tơdrong rơdu, pă băt pơm kiơ păng hăm jơhngơ̆m ơh sơ’ngon. Apinh tơgŭm kon arih ăn kơ Ih lăm tôm tơdrong krô hmă lăm chăl arih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, jơhngơ̆m kơkuh kơ Kră Yang, bơ̆jang tơdrong Kră Yang, arih ăn kơ Kră Yang ưh kơ pơtŏ hăm anih pơdah ‘lơ̆ng rŏ dah hăm tơtap ti re jơwa. Gĭt kăl kơ kơkuh noh jơ̆ lăm: jơhngơ̆m đon lu bơ̆n hăm lăng đĭ tơ Kră Yang dah ưh? Kơplah mă ưh kơ đei bu lăng ‘bôh, kơplah tơdrong arih lu bơ̆n đei ơh sơ’ngon. Tơdah năr ‘nâu buăl đei mơn ‘bôh oei lăm anih krô hmă, thĕng hreh, nhen pă đei kiơ gĭt kăl wă pơyơ̆r kơ Kră Yang …na athei ‘blŏk tơm kơ đơ̆ng anih jrŭ kơđĕl, Kră Yang oei chang gô buăl. Kră Yang gô yua buăl plơ̆ng ‘nao, pran hloh, tơpă hloh păng gô đei ư -ang kơ Kră Yang hloh kơ đĭ đăng.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.