Tú he lot gùng kơp ngai, đơs tus “gùng pơdar”, nus bol he gơ lơh be ò kờn lot gùng hớ tài bơh gơ rơp roh oă jơ mơ bơta pran rlau. Bol he sùm kơp kờn lot hơ đăng gùng song tus di tơnggu. Mơya, oh mi git sơl làng bol Isael bơh lài or neh lot tơm blang bras 40 nam tài bơh Yang neh lam bol khai lot hơ đăng gung pơdar sơl? gen gùng pơdar mơ Yang lam lik gơs gung ò di hala ò, hala hớ la dô pơnah tơm bơta rơn dap kwơ màng Yang di?

Ngai do, ngai 22/06/2025, Bơta Hòi Dan Kòp Ngai dan jà ală ồng mò oh mi kơlôi sơnưng bal Jơnau Yàng kơnòm dê bơta dong kơl Diane Pearson dê bơh tơnggume: LOT JAT YÀNG HƠĐĂNG GÙNG PƠDAR

Sră Goh:”Behơ̆ Yàng Tom Trồ lam bol khai lòt pơdar jat gùng tòm ƀlàng ngềt ngơt, hơ đah Dàlềng Pơrhê.”( Lik Ejiptơ 13:18)

Kơp ngai, Joyce át rơn deh bơh hìu tus di tiah lơh broă hơđăng dô nơm gùng, lot găn oă sơnah gung dệt. Mò đơs:

“ Tú kơnhai jớt tus, ăn gơ lơh moat jrum, tài bơh hớ là tú kon ur ăn ji, ming dô nă khai lơm neh sang rài.

Nam do, nus moat jrum hớ gơ lơh kơn jớ rlau. Kơnnhai jơt nam do tus lé ngan, mơ kung ò niam be kơp nam.

Tú ăn găm át rơn deh lot găn dô bă tiah bơh dih bon dơng gen ăn neh tip gùng gơs poan sơnah găm dơl nàng lơh wơl, gen tàng ăn păl lot gùng pơdar. Bulah ò chờ hợp, mơya ăn kung neh joi bàn dô nơm gùng nàng lot. Ăn ò kah dớ lồi dut ăn lọt gùng do la tú lơi, mơya tú rơn deh găm guh hơ đăng mơnơm êt, bơta niam hangmơne ơm di đap mat ăn: hớ la dô hàng nchi kơnhai jơt niam rlau jơh mơ ăn neh bàn. Bơta niam hớ lơh ăn in ò git lơh be lơi.

Mơ ăn git la: Yang nhe lam ăn lot gung pơdar hớ nàng ăn in bàn bơta niam krơi is crih crai tơm bơta crơng gơs Yang di. Bơta hớ neh pơn dom pơn iang nus nhờm mơ nus kơlôi ăn ji tơm jơh ngai hớ”

Bơh bơta lot git hớ, Joyce git la bơta kalke hớ gơ tus bơh Yang Tơm Trồ, mơ tơnggu Yang di la kòn mò dợp git bơta lơngai mơ bơta pơndơm pơniang mò tơm bơta moat jrum.

Digơlan Yang ngùi ală gùng pơdar nàng bol he in git Yang rlau? ngăn sơl be hớ! ăn neh dơp git dô bă loh làng bơta do tú ăn hok Sră Goh. Hớ la jơnau yăl wơl bơh làng bol Israel geh Yang lam lik bơh bơta lơh di tơm tiah Ẹjipto . Lik Ejiptơ 13:17-18 cih wơl be do:

“Tòm tŭ Pharaôn neh lòi làng bol lik lòt, Yàng Tom Trồ ò lam bol khai jat gùng lòt gan lơgar Philistin, bulah la gùng rềp rlau. Bơh Yàng Tom Trồ neh đơs lah: “Dilah bol khai tìp bơta tòmlơh, bol khai rơp tòmgơl nùs mơ rê wơl hơ Ejiptơ.”Behơ̆ Yàng Tom Trồ lam bol khai lòt pơdar jat gùng tòm ƀlàng ngềt ngơt, hơ đah Dàlềng Pơrhê. Làng bol Israel lik bơh di Ejiptơ, rcang sir kung be lòt tòmlơh.”

Dàlềng pơrhê la tiah lời wơl dô pơnah tơm ală bơta ràng tơlik gơnap gơnoar dờng Yang Tơm Trồ di: Yang pợ dàlêng nàng làng bol Israel lot găn be lọt hơđăng tiah rô. Yang Tơm Trồ tơm bơta rơn dap Yang di, neh ai làng bol lot hơ đăng gùng pơdar hớ.

La kon mơnus, bol he mong os siou bơta kong ơt. Bol he kờn jơh ală bơta rơn dap he di pal lik gơs, mơya, oă dớ Yang Tơm Trô kờn he rơn lè nàng gó bơta krơi is Yang di. Dilah lang boi Israel ò lot gùng pơdar, bol khai ò geh tú lơi nàng gó Dàlềng pơrhê pợ, la dô bơta krơi is crih crai lơh cau in pal rơm sắ.

Cau gơnoar huơr Esai, cau neh lọt lam jơh gơnap gơnoar Yang di, kung git nên la ală krơi is gơlik tus bơ tê Yang Tơm Trồ di. Ông cih “tồ làng bol sền mơ git, sền sơwì mơ wă wơng lah tê Yàng Jehôwa neh lơh bơta hơ̆,Bơtau Sàng Goh Israel dê neh crơng gơs bơta hơ̆.”(Esai 41:20)

Tơm rài kis, tú Yang Tơm Trồ lam oh mi lot gan dô nơm “gùng pơdar”, ban mhăr plớ nus. hòi dăn té nàng gơs Yang tề lam he, mơ pợ mát bơta dòn he di nàng kơp gơn, sền swì nàng git Yang găm lơh broă ò jat bơta he kơlôi hala ò. Digơlan gơs, bơh gung lot pơdar hớ, oh mi dợp geh bơta lơngai dờng rlau mơ bơta kơlôi oh mi di.

Dan jà bol he dô nùs bal tòm bơta hòi dan:
Khoai Yang la Bơtau tề lam kon! Nus kon di ưn ngai Yang tài bơh bulah gơs tú kon mut tơm gùng pơdar tơm rài kis, Yang găm ơm têng hớ mơ lam kon. Dăn Yang dong kon git kơnơm tơm bơta rơn dap mơ gùng dạ Yang di gơwet mơ rài kis kon di, bulah lot tơm bơta gơlòng bol glar mơ moat jrum, kon git Ynag găm ơm tềng hớ nàng ai kon in lơngai mơ yợ đơ kon.
Kon ai sơn đăn Yang Jesu krist, Amen.

Ơ ală ồng mò oh mi kòñ gơboh, gơs dớ dớ Yang ò lam he lot hơ đăng gùng song, mơya Yang ngùi ală gùng pơdar nàng dong he git Yang rlau. Gen tàng be hớ, ban gơplớ nus hala pin wil wơl bơh bơta rơn dap Yang di, mơ pal git ưn ngai mơ joi bơta tề lam Yang di.

Yang lam lang bol Israel lot tơm gùng pơdar ò di Yang ò tơl gơ nap gơnoar , mơ la Yang git bơta lơi la niam rlau oh mi in. Tơm ngai do, oh mi găm đăl git la Yang găm ngùi ală gùng pơdar nàng long tiêr oh mi, bơto oh mi git don bơr, git kơnom Yang, mơ lồi dut la nàng rcăng oh mi in mut di “ tiah hơ pơgòn” hàngmơné mơ Yang rơp ai pa!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.