Gơs tŭ lơi he kơno iat jơnau teh mpồng gen ò git cau lơi găm ntào bơdih mpồng sơl? Tom tŭ hơ̆, bŏl he òs kơlôi sơnơng ò git di pò hala ò? Tài bơh gơs tŭ, pò mpồng ò di mìng ai dô nă cau mut tòm hìu, mơya găm là lơh nền wă rò ală bơta tòmgơl pa tòm rài kis bŏl he. Sră Goh kŭng đơs bơh jơnau teh mpồng, mơya ò di bơh dô nă cau nac crih, mơya tus bơh Yang Dŏng Klàs Jesu. Kơnrẵn teh mpồng mơ Kơnrẵn họi jà bŏl he. Bơta dờng màng là bŏl he rcang sir lơh nền pò mpồng hơ̆ mơ dòp rò Kơnrẵn cơnđòa mut tòm rài kis he hala ò?

Ngai do, ngai 24/06/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Shadia Hrichi dê bơh Tơnggume YANG GĂM TEH MPỒNG Ơ?

Sră Goh: “Do, Añ ntào di mpồng mơ teh; dilah cau lơi kơno jơnau Añ mơ pò mpồng, gen Añ rơp mut mơ sào bal mơ khai, khai bal mơ Añ.” (Yal Tơlik 3:20)

Tŭ do mo, ăñ neh ơn tŭ jơ tòmgơl mpồng hiu he di. Tŭ tus lắp đặt, cau tòm lơh mpồng lùp ăñ koñ ơn bơtơl mat hwềng sơl – khai mìng càng nđợ phuk nàng koar mơ lắp mơ. Tòm tŭ khai rcang, ăñ mhăr ntoat lik nàng lòt rwat dô nơm mat hwềng dềt. Mìng bơh nđợ jơt rbô đồng, ăñ rơp sền gŏ cau găm ntào bơdih mpồng lài mơ tŭ lơh nền pò mpồng hala ò.

Mơya bơh, mìng dô jơnau teh mpồng mo gen ò gơs đơs bơta lơi. Bŏl he ò git ñcau găm ntào diđap bơdih, gen bŏl he kơlôi ò git gơs lơh nền pò mpồng hala ò. Mơ gơlơh be bơh Yang Jesu kŭng kah gơhôr tus kòp nă tòm bŏl he ai bơta lơh nền do, dô bă ngac măt mơ gơs sền sơwì dô bă nĭn non. Tòm Sră Goh Yăl tơlik 3: 20, Sră Goh ai bŏl he gŏ dô nơm rùp òs mòng: Yang Jesu găm ntào di bơdih mpồng mơ teh.

“Do, Añ ntào di mpồng mơ teh; dilah cau lơi kơno jơnau Añ mơ pò mpồng, gen Añ rơp mut mơ sào bal mơ khai, khai bal mơ Añ.”

Do la jơnau pơyoa jơh Hiu Jum Goh ĭn, mơya tòm tŭ do, bŏl he rơp wờng loh Hiu Jum Goh là mpồl jơnŭm kòp nă cau, ală hwềng soàn neh til mpồng gơwèt mơ Yang. Cau Gơnoăr Bơtô Pol neh đơs tom Rôma 3: 11 lah: “Ò gơs dô nă cau lơi git wă, Ò gơs dô nă cau lơi jòi jat Yàng Tom Trồ.”

Sră Goh bơtọ lah : bơh nùs koñ nđàc mơ bơta nđàc krơi is ngăn, Yang neh jòi bàn bŏl he! Mơ cơng tang lọh lang rlau jơh la: Yang Dŏng Jesu kơp gơn ntào bơdih mpồng mơ teh, kơp gơn bŏl he wă rò Kơnrẵn!

Rùp mpồng tòm sèng Sră Goh do òs geh wờng be là ala hwềng nùs kòp nă cau. Bulah wờng jat gơtha mbe lơi, bŏl he kŭng ò săng lòi dô bơta: Yang ò lòi cau tòm dơlăm păl sền cau lơi teh mpồng. Tài bơh Kơnrẵn ò di mìng teh mpồng, gen Kơnrẵn găm đơs jơnau. Sră Goh cih: “Dilah cau lơi kơno jơnau Añ..” He neh tŭ lơi lùp is : Yang Jesu găm đơs jơnau lơi mơ he bơh bơdih mpồng neh tìl hơ̆?

Sèng Sră Goh lài gơs dô pơnah lơi pò bŏl he ĭn: “Behơ̆ gơs tĕ nùs ngac ngar mơ gơjrañ sang glài tĕ.” (Yal Tơlik 3:19). Do la dô jơnau tơngkah lơbơn niăm mơya krăñ ci, tơngkah bŏl he plac mat bơh bơta ò ơn nùs tôr, kah gơhôr. Bulah behơ̆, gơnoăr sac rwah găm ơm di bŏl he. Bulah iat kơno jơnau Yang, bŏl he gơs gơnoăr ò pò mpồng.

Gen bơta lơi rơp gơlik gơs dilah he rơp lơh nền pò mpồng? Gen Yang gơs mut mơ nisơna chok ală bơta neh lơh tìs tòm rài kis bŏl he di ơ? Gơs dô êt nă cau rngòt ò koñ jà Yang mut tom nùs, tài bơh kơlôi lah Kơnrẵn mìng tus nàng cahrña, nàng lah pơrhơng, mơ tòmgơl ală bơta tòm hìu. Mơya Sră Goh ò đơs behơ̆.
Jơnau Yang đơs tai lah:“Añ rơp mut mơ sào bal mơ khai, khai bal mơ Añ.” Yang Jesu teh mpồng ò di nàng lah pơrhơng, mơya tồ bơt bơtào bơta gơtòmklac dềt mềr băl mơ bŏl he. Kơnrẵn ò phà mpồng mơ mut, kŭng ò tus bơh nùs nhờm cahrña. Kơnrẵn tus tồ dòp pà, dòp ai să tom Kơnrẵn, tồ gơn kơnòm Kơnrẵn, bŏl he geh lơh gơlik gơs kọn sau Yang Tom Trồ.

Be Jang 1: 10 – 12 gơs cih:“Bơtau Jơnau neh ơm tòm dunnia, mơ dunnia neh geh crơng gơs bơh Kơnràñ, mơya dunnia ò git đal Kơnràñ. Kơnràñ neh tus tòm tiah Kơnràñ, mơya làng bol Kơnràñ ò dòp Kơnràñ. Mơya dilah cau lơi neh dòp Kơnràñ, hơ̆ la dòn di sơnđan Kơnràñ; gen Kơnràñ ai khai in gơnoar gơlik gơs kòn sau Yàng Tom Trồ dê.”

Dan jà bol he dô nùs bal tòm bơta hòi dan:
Khoai Yang Jesu kơñ gơboh, kon ưnngai Kơnrẵn tài bơh Kơnrẵn găm ơt ơl gơn kon bơdih mpồng nus kon mơ teh. Gơs ală tŭ kọn kơlôi rcang oă broă, gơs tŭ kọn ò lơh broă lơi, mơ kŭng gơs tŭ kọn rngòt lah he ò tơl bơta niăm rơp nàng dòp rò Kơnrẵn. Kọn Ưnngai Yang neh dŏng kọn dòp git Kơnrẵn mơ rơp pò mpồng nus he nàng wă rò Kơnrẵn. Dăn Yang kư̆ at bồ tòm rài kis kon, lơh gơs Yang Dŏng Klàs mơ lơh gơs cau tòm, mơ lòt băl mơ kọn tòm kòp ală tŭ. Kọn jơh nùs họi dăn, kon ai sơnđăn Yang Jesu Krist, Amen.

Ơ ală ồng mọ ọh mi koñ gơboh, Yang Jesu Krist ò bơklơn dô nă cau lơi păl pò mpồng hala dòp rò Kơnrẵn. Kơnrẵn kơp gơn ntào di gan bơdih, teh mpồng, họi sơnđăn kòp nă bŏl he, mơ kơp gơn. Kơnrẵn gơn dô nơm mpồng geh pò tơlik bơh hwing nùs, bơh bơta dòn mơ bơta pơndềt să nàng dòp rò Kơnrẵn tơmut tom hơ̆. Dilah ngai do he geh kơno iat jơnau Kơnrẵn, dăn băñ lòt găn. Pò tĕ mpồng nus. Tài bơh Kơnrẵn ò tus nàng cahrña, mơya gen gơtòmklac băl mơ he. Tồ bơh hơ̆, he geh hòn chò pơrdòn gơtòmklac dềt mềr bềng lơngap lơngai mơ Bèp hơđăng trồ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.