Minh tơdrong pơlong lăng tih pơm liơ wă kơ tơplih, păng đei tơdrong pơlong lăng nai pơm liơ wă kơ bơngai nai lui ngeh kơ bơ̆n đei tơplih tơpă. Đei lu bơngai Kră Yang bơ̆jang, đei tơplih tôm tơdrong đơ̆ng lăm jơhngơ̆m, dôm kơ đêl tơdrong arih đơ̆ng sơ̆ lu bơngai jum dăr tam mă ngeh dêh. Ưh kơ đei ‘bônh kơplah tơdrong arih đơ̆ng sơ̆ oei kiơ̆, mă khan tơdrong arih đei tơplih. Mă khan lu bơ̆n lui gơnang tơpă kơ Kră Yang, păng jơhngơ̆m đei tơbral, mă lei kư̆m đei, lu bơ̆n oei kăl kơ minh ‘nu bơngai pơ̆n tang ăn pơm kơdranh kơ bơ̆n: “Bơngai ‘nâu Kră Yang tam tơplih tơpă.”

Năr ‘nâu, ‘năr 27/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Anne Ferrell Tata kơ̆l ‘bai PƠSĬT GAH TƠDRONG TƠPLIH

Sơ̆p Hla Bơar ‘Bok Kei-Dei: “Mă-lei ‘Barna’ba năm ba Sôl tơ lu jơ̆ng ‘bang Yêsu. ‘Barna’ba roi kơ lu sư tơdrong Sôl tơ’bơ̆p Kră Yang Yêsu păng kơtơ̆ng ‘bơ̆r Yêsu pơma kơplah Sôl oei yak rok trong. Sư kư̆m roi kơ lu sư tơdrong Sôl bơtho đe kư̆m nuih ‘biơ̆ tơpă mơ̆n kơplah sư oei bơtho tơdrong Yêsu kơ khŭl bơngai Juđê tơ Pơlei Đamas.” (Tơdrong Jang 9:27)

“Lei klo inh hăm wă ngeh kơ inh pă minh ‘măng dơ̆ng ưh? Yua kơ kiơ sư ngeh kơ inh?” Noh jơ̆ dôm kơ tơdrong tơchĕng mă buăl inh đei tơtăm. Păng duch noh đei roi kơplah nhi huch ka phê pơma dơnuh.

‘Nao tơdrâu khei kơplah đơ̆ng rŏng kơ duch noh pơdơh kơ jing minh sĕch akar hăm bơngai nai. Duch noh băt kơdih sư tơbral tơpă păng wih wơ̆t tơ tơdrong pơgơ̆p hăm ‘Bok Dŏng Pơklaih Yang Yêsu. Duch noh băt kơ sư đei tơplih bơih. Sư băt sĭt tơpă sư ưh pă wơ̆t tơ trong so dơ̆ng. Mă lei… pơm liơ wă kơ klo sư kư̆m băt kơ tơdrong noh?

Buăl inh đei pơsĭt kơ tơdrong arih tơpă đei chih lăm II Kôrintô 5:17: “Thoi noh na bu kiơ̆ Yêsu Krist, bơngai noh bơ̆n băt kơ ‘Bok Kei-Dei pơjing sư jing bơngai ‘nao, dôm tơdrong so ưh pă đei boih, sư đei tơdrong ‘nao ngăl, yua kơ sư jing bơngai ‘nao boih.”

Klo duch noh đei pơma nơ̆r huay kơ jô̆ yo. Mă lei hơđăl dêh, lăm jơhngơ̆m klo sư oei ưh kơ gan ngeh. Duch noh hlôh pơjing ming jơhngơ̆m wă kơ lui ngeh kăl kơ đei jơ năr, mă lei duch noh jơhngơ̆m pă hiôk wă ‘maih tơ’bôh tơdrong tơplih lăm jơhngơ̆m sư noh jơ̆ tơpă.

Inh đei pơma hăm buăl inh thoi âu: “Ih kăl kơ nhen thoi ‘Barna’ba.” Duch noh lăng inh, sư nhen thoi ưh kơhlôh, na inh roi hơ’mon kơ sư tơdrong ‘bok Pôl.

Hơdrol kơ Kră Yang đei tơplih lăm trong năm tơ Đamas, Pôl kư̆m đei anăn noh jơ̆ Sôl. Tơdrong Jang 9:1 đei chih thoi âu: “Sôl sư oei kơnam wă pơlôch lu bơngai lui kơ Kră Yang Yêsu.”

Na thoi noh, kơplah sư oei tơ rok trong, Kră Yang đei tơ’bôh kơ sư. Păng đơ̆ng tơdrong noh, tơdrong arih Sôl đei tơplih tôm tơdrong. Kră Yang dan ăn anăn plơ̆ng, noh jơ̆ Pôl.

Đơ̆ng rŏng kơ đei tơplih, sư bơ̆jang ră roi hloi gah ‘Bok Dŏng Pơklaih Yang Yêsu. Mă lei kư̆m ‘bônh kơ hlôh đĕch: đe ưh kơ gan ngeh. Lu sư đei pơma mơmơnh dih băl: “Hăm trŏ ‘bok âu dah kiơ pơm pơrăm kơ lu bơngai lui kơ Yêsu tơ pơlei Jêrusalem ki?” Yua kơ kiơ sư năm tơ Jêrusalem păng ‘maih wă pơgơ̆p hăm bơngai lui, na bu bu kư̆m krăng. Ưh kơ đei bu lui ngeh kơ sư tơpă.

Na… ‘Barna’ba ‘bôh tơ noh!
Tơdrong Jang 9:27 đei roi thoi âu: “Mă-lei ‘Barna’ba năm ba Sôl tơ lu jơ̆ng ‘bang Yêsu. ‘Barna’ba roi kơ lu sư tơdrong Sôl tơ’bơ̆p Kră Yang Yêsu păng kơtơ̆ng ‘bơ̆r Yêsu pơma kơplah Sôl oei yak rok trong. Sư kư̆m roi kơ lu sư tơdrong Sôl bơtho đe kư̆m nuih ‘biơ̆ tơpă mơ̆n kơplah sư oei bơtho tơdrong Yêsu kơ khŭl bơngai Juđê tơ Pơlei Đamas.”

‘Barna’ba đei pơma pơdŏng Pôl. Păng kư̆m thoi noh, buăl inh kăl kơ bơngai pơdŏng sư – minh ‘nu bơngai pơsĭt tơdrong tơplih lăm duch noh, tơgŭm klo sư ‘bôh đon lui duch noh lăm ‘Bok Dŏng Pơklaih noh jơ̆ tôm tơdrong tơpă.

Păng bơngai noh ưh kơ đei bu nai noh jơ̆ ‘bok bơtho tơm sư. ‘bok bơtho noh đei hơdai duch noh lăm tơdrong tơbral tơdrong yoch, tŭk lê̆, pơklaih păng pơklaih thoi đêl. ‘Bok bơtho băt kơ tơdrong duch noh. Na đơ̆ng noh proh hơmet kơ jơ năr tơ’bơ̆p pêng ‘nu lu sư.

‘Bok bơtho pơsĭt thoi âu duch noh đei tơbral tơpă, păng jơhngơ̆m duch noh kư̆m đei tơplih tôm tơdrong. Yua kơ đơ̆ng tơdrong noh, klo duch noh ‘net ‘net hlôh kơ tơdrong tơplih mă akăn sư noh tơpă. Klo akăn măr sư hơdai tơ’bôh đơ̆ng ‘bok bơtho. Đei đak măt lĕch ro – mă ‘nâu ưh kơ đơ̆ng jĭ jăn, mă noh đơ̆ng jơhngơ̆m hiôk, yua kơ đơ̆ng tơdrong hơlam tơpă. Bơngai klo đei lăng ‘bôh minh ‘nu bơngai akăn ‘nao, ưh kơ yua kơ duch noh adrin tơ’bôh kơdih đei tơplih, mă yua kơ Kră Yang đei tơplih duch noh đơ̆ng lăm jơhngơ̆m.

Kon bơngai kư̆m gô đei tơplih. Sôl đei tơplih. Buăl inh kư̆m thoi noh. Mă khan buăl đei tơplih tơpă, bơngai nai kăl kơ đei jơ năr lui ngeh kơ buăl. Păng kư̆m đei, lu bơ̆n kăl kơ minh ‘nu bơngai thoi kơ ‘Barna’ba- minh ‘nu bơngai gô dơ̆ng pah lu bơ̆n, pơm kơdranh păng pơsĭt đon lui ‘nao lăm lu bơ̆n.

Kơplah ‘bok bơtho tơm tơgŭm bơngai klo lui ngeh kơ buăl inh đei tơplih bơih, na ưh kơ đei kiơ pơgăn hnam dơnŏ măr sư klaih thoi đêl. Kơplah ‘Barna’ba tơgŭm lu jơ̆ng ‘bang lui ngeh kơ Pôl tơpă, na ưh kơ đei kiơ pơgăn tơdrong wơ̆ ‘lŏ lăm
Hnam Akŭm. Tơdrong Jang 9:31 đei roi thoi âu: “Yua kơ Sôl lui boih na lu bơngai lui kơ Yêsu oei jơ̆p-jang dêh Juđê păng dêh Galilê, dêh Samri hiôk-hian huay pă đei tơdrong truh tơ lu sư. Lu sư kư̆m rai đunh rai pran. Lu sư lui tơpă kơ Kră Yang păng Yang Bơhngol ‘Lơ̆ng tơgŭm lu sư ling-lang, na lu sư rai đunh rai lơ.”

Tôm tơdrong pơtơm blŭng a kơplah ‘Barna’ba đei roi hăm lu jơ̆ng ‘bang dôm kơ tơdrong kiơ đei truh. Đơ̆ng noh, ‘bok Pôl ‘măn đĭ chăl arih sư wă bơtho tơ’bôh, ră roi păng pơm ‘batem ăn kơ lu bơngai lui.

Tơdah năr ‘nâu buăl kư̆m jơ̆ minh ‘nu bơngai đei tơplih, na buăl băt bơih buăl jơ̆ jing bơngai ‘nao. Dôm tơdrong so hlôi bơih, păng tôm tơdrong jing ‘nao ngăl. Buăl băt kơ tơdrong noh. Kră Yang băt kơ tơdrong noh. Lu bơngai nai kư̆m lăng ‘bôh păng lui ngeh kơ tơdrong tơplih đơ̆ng buăl, rŏ lăng kư̆m kăl kơ đei tŏ sĕt jơ năr. Kư̆m đei, buăl kăl kơ đei “ ‘Barna’ba” – minh ‘nu bơngai pơ̆n dơ̆ng pơma: “Inh lui ngeh kơ tơdrong tơplih noh jơ̆ tơpă!”

Apĭnh đĭ đăng krao khan hơdai:
Kơkuh kơ Kră Yang kon! Bơnê kơ Kră Yang yua kơ huay pă jô̆ yo păng tơplih kon jing ‘nao. Mă kon đêl đei pơ̆k huŏng, mă lei yua kơ đơ̆ng ‘mêm mơnat Ih, kon băt kơ kon jing bơngai ‘nao. Apinh tơgŭm kon arih wă kơ tơ’bôh tơdrong tơplih đơ̆ng Ih ăn rim năr, mă khan bơngai tam mă lui ngeh kơ kon. Apinh ăn kơ kon đei iŏk jơhngơ̆m đon ala, chơ̆n jơhngơ̆m, tơgŭm kon lui kơjăp kơ Ih oei bơ̆jang. Păng apinh Ih dan ăn hơdai kon bơngai nhen thoi ‘Barna’ba, wă pôk tơiung, bơwei, păng pơm kơ dranh kơ tơdrong tơplih đơ̆ng Ih lăm tơdrong arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, ưh kơ đei bu lăm lu bơ̆n arih lơ̆ng tôm tơdrong, ưh kơ đei jĭ rơka. Mă lei yua kơ đơ̆ng tơdrong ‘mêm Kră Yang, lu bơ̆n rŏ lăng gô đei tơplih jing ‘nao păng pơtơm lăm trong yak năm đei pŭn hiôk. Păng tơplih lu bơ̆n đei tơplih tơpă, Kră Yang gô dan ăn kơ lu bơ̆n dôm kơ lu bơngai ling lang lui ngeh, hơdai hăm bơ̆n. Bơngai noh gô pơm kơdranh ăn kơ tơdrong arih lu bơ̆n đei tơdrong tơplih yua kơ đơ̆ng Yang Yêsu Krist. Yua kơ thoi noh buăl ‘nĕ kơ bơ̆l hăl kơplah bơngai nai tam mă lui ngeh kơ buăl – athei kư̆ kơ tơpăt păng chang gô Kră Yang pơm tơdrong mơsêh mơyang đơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.