Đei dôm lu tơdrong arih ưh kơ ‘lơ̆ng rŏ ư-ang, mă lei đei tơ’bôh tơdrong ‘lơ̆ng kơjăp đơ̆ng đon lui. Lu sư ưh kơ druh kiơ̆ dôm kơ tơdrong hiôk đơ̆ng teh đak ‘nâu, mă rơih yak năm lăm tơdrong krao, pơyơ̆r đĭ chăl arih kơdih wă bơwih bơwăn kơ Kră Yang păng ‘mêm mơnat kơ đĭch đam Kră Yang. Mă khan đei tam sơng iŏk dôm lu nơ̆r pơkă đơ̆ng Kră Yang lăm tơdrong arih ‘nâu dah ưh, lu sư oei pơtrơp gơnang tơ anih pơdơh lăm đon lui- yua kơ lu sư lăng ataih hloh, gah mĭnh dêh char ‘lơ̆ng hloh, gah mĭnh nơ̆r pơkă ling lang truh đơ̆ng Tơ’ngla ling lang ‘mêm mơnat kơ lu sư.

Năr ‘nâu, ‘năr 28/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Rich Miller kơ̆l ‘bai ANIH PƠDƠH LĂM ĐON LUI.

Sơ̆p Hla Bơar ‘Bok Kei-Dei: “Bơ̆n ‘bôh lơlap lơlang lu bơngai noh sơ̆, lu sư đei đon lui kơjăp tơpă, na lu bơ̆n athei adrin kiơ̆ thoi lu sư. Bơ̆n adrin thoi lu bơngai kơdâu pơjei băl. Thoi noh na lu bơ̆n athei tŭk lê̆ dôm tơdrong mă pơm kơ akâu bơ̆n trăp păng tôm kơ tơdrong yoch mă oei chô̆ pơkơ̆ng bơ̆n. Bơ̆n athei adrin kơdih kơdih kơdâu rok trong mă ‘Bok Kei-Dei đêl pơkă kơ bơ̆n boih.” (Hêbrơ 12:1-2)

Mĕ ‘bă inh ‘nao ‘blŏk kơ 50 sơnăm năr iŏk băl. ‘Noh jơ̆ mĭnh tơdrong ‘bĕnh tơdrong tơm kăl lăm tơdrong arih ŭnh om lăm hnam dơnŏ. Mă lei tơdrong pơm kơ hơ’mon kơ măr sư gĭt kăl hloh dơ̆ng ‘noh bơih jơ̆ lơ khei sơnăm hơdai yak năm lăm tơdrong bơ̆jang, jơ̆ đĭ mĭnh chăl arih hơdai pơm kơdranh kơ tơdrong tơpăt sĭt ưh kơ đei layơ tơplih đơ̆ng ‘Bok Kei-Dei.

Đơ̆ng oei hơ’lơ̆p, inh đei ‘bôh tơdrong tuh ăn đơ̆ng Kră Yang tơgŭm hăm tơdrong hlĭch chrơp kơ hnam dơnŏ nhôn, đơ̆ng kơdih kâu jăn ‘Bok Krist- ‘noh jơ̆ dôm lu anhŏng mŏ oh lăm Khŭl Bơngai Lui lu nhôn. Hăm jơhngơ̆m băt mơnat, inh ‘maih hơri ư-ang hơdai hăm pơtao Đawit:

“Sơ̆ inh oei ‘lơ̆p, dang ei kră boih, tim ‘bôh lu bơngai tơpăt khan đe achăng lê̆, Dah lu kon sâu sư chă apinh sa.” (Hơriso 37:25)

Apĭnh ‘nĕ kơ hlôh ưh kơ trŏ, mĕ ‘bă inh đei đei pơrơ̆ng rơih iŏk tơdrong arih hmă đĕch, achăng lơ tơdrong đei yua gah mŭk tơmam wă kơ gơh pơyơ̆r kơdih kâu bơwih bơwă kơ bơngai nai. Măr sư ling lang đei anăn lăm dôm lu bơngai hơmah hloh mă inh đei băt. Kơplah oei ‘lơ̆p, inh ‘bôh hlĭch chrơp yua kơ hnam dơnŏ nhôn ưh kơ đei tiwi, kŭm ưh kơ đei hloi kơ̆l kơmăy tah ‘băng rup. Dĭng truh tơ sơnăm lăm 11, hnam nhôn ‘nao wă đei mĭnh pôm TV kơtĭt đơ̆ng ataih. Lăng dơ̆ng, ‘noh jơ̆ dôm tơdrong tơchĕng nhen iĕ đĕch. Mă lei kơplah oei mơlôh, ‘noh đêl jơ̆ tơdrong tih hăm inh.

Dang ei, inh băt bơnê tơpă yua kơ dôm lu tơdrong mă mĕ ‘bă inh ‘măn adrol kơ dôm tơdrong lăm tơdrong arih: măr sư rơih arih mĭnh chăl arih dan tơdrong krao đơ̆ng Kră Yang tơ anăp kơ đĭ đăng.

Kŭm lăm sơnăm inh tŏk tơ lăm 11, mĕ ‘bă inh ‘nao wă răt hnam blŭng a. Adrol kơ ‘noh, lu nhôn ling lang arih lăm dôm kơ hnam yua kơ đơ̆ng Khŭl Bơngai Lui tơgŭm ăn. Mă lei inh tim mă đei mă layơ ‘bôh kơ’bah tơdrong ‘mêm mơnat dah hiong tơdrong hơđơ̆ng lăm hnam dơnŏ. Mĕ ‘bă inh ling lang dan ‘Bok Dŏng Pơklaih Yang Yêsu ‘bơ̆t anih tơm, păng ŭnh om măr sư kŭm tim mă đei tơdrong kiơ. Đơ̆ng dôm khei sơnăm ‘bă inh jơ̆ ‘bok Bơtho wei lăng pêng Khŭl Lui na mĕ inh đei hiơ̆k bơngơ̆t lơ tơdrong jang phara lăm tơdrong jang, truh 25 sơnăm ‘bă inh jang tơdrong jang chă năm bơtho păng mĕ inh pơtho lăm hnam trưng hŏk, tơdrong đei ‘bơm đơ̆ng măr sư lăm tơdrong arih lơ bơngai jơ̆ tơdrong ưh kơ gơh kơ jô̆.

Đĭ đăng yua kơ đơ̆ng mĭnh tơdrong kơnhăm đĕch: wă kơ đĭ đăng bơngai sơng iŏk păng băt kơ tơdrong ‘mêm mơnat đơ̆ng Kră Yang Yêsu.

Mĕ ‘bă inh pơm kơ inh ‘blŏk truh kơ dôm nơ̆r tơ’bôh lăm Sơ̆p hla bơar Hêbrơ 11:13-16:

“Đĭ kơ hnam dơnŏ sư oei chang gô truh kơ lôch. Lu sư ưh tam đei tôm tơdrong ‘Bok Kei-Dei pơkă, mă-lei dang lu sư ‘bôh lê̆ boih, lu sư hiôk tơpă, mă khan sư oei tơ noh dang kơ bơngai tơmoi. Lu sư roi kơ đe kư̆m thoi noh, lu sư oei tơ noh dang kơ bơngai tơmoi. Lu sư pơma thoi noh, bơ̆n băt kơ lu sư ‘maih chă teh đak hiôk wă oei. Mă-lei dah lu sư rơnguơ̆ kơ teh đak so sư kơdih, đêl lu sư jăk achăng lê̆ sơ̆, na tơ̆ng lu sư wă brŏk oei dơ̆ng, kư̆m gơh mơ̆n.”

Nơ̆r pơkă tih hloh mă lu bơ̆n oei chang gô ‘noh bơih tơdrong đơ̆ng ‘Bok Dŏng Pơklaih Yang Yêsu wă jur dơ̆ng, păng mĕ ‘bă inh ngăl tơ’blŏk gah tơdrong ‘nâu. Teh đak ‘nâu ưh kơ trŏ kơ teh đak tơpă kơ lu bơ̆n. Kră Yang Yêsu đei năm adrol wă hơmet mĭnh anih ‘lơ̆ng rŏ kơ lu bơ̆n. Păng lăm kơplah chang gô nơ̆r pơkă tuch luch ‘noh gơh jing, tôm tơdrong pơgơ̆p đơ̆ng ‘Bok Kei-Dei lăng ‘Bok Krist ling lang “đei”, păng đĭ đăng lu bơ̆n đei pơma “A-men” (II Kôrintô 1:20).

Đĭ đăng dôm lu bơngai lăm Hêbrơ 11, păng hăm mĕ ‘bă inh hloi, ‘noh bơih jơ̆ tơdrong pơlung pran kơtang kơ kơdih inh, ăn kơ inh ‘bôh hơđăl đon lui tơ anih nơ̆r pơkă đơ̆ng ‘Bok Kei-Dei gĭt kăl truh dang yơ.

Hơpơi kơ năr ‘nâu kơdih buăl kŭm đei pơlung, kơplah băt khan Kră Yang Yêsu jơ̆ ‘Bok pơih trong kơ bơ̆n lui kơ ‘Bok Kei-Dei truh tôch (Philip 1:6). Đon lui kăl kơ đei tơdrong anih pơdơh tih dêh, mă lei ‘nĕ kơ tơchĕng, yua kơ lu bơ̆n ưh kơ mĭnh drô̆. Lu bơ̆n oei đei mĭnh tŭk hơmơ̆l pơm sơlam tih dêh jum dăr, lu sư oei tap ti, pơlung păng tơ’blŏk kơ bơ̆n khan: dôm tơdrong adrin gô jing trŏ kơ gĭt dêh lăm năr lu bơ̆n gơh tơ’bơ̆p Sư.

Apĭnh đĭ đăng krao khan hơdai:
Kră Yang ơi, kon bơnê kơ Ih yua kơ dôm kơmĭl đei tơpăt, dôm lu bơngai đei arih đĭ chăl arih sư wă bơ̆jang kơ Kră Yang, bơwih bơwăn kơ kon bơngai. Apĭnh Kră Yang pơtho kơ kon băt arih mĭnh chăl arih hmă đĕch gah ‘ngoaih mă lei rơkah rơkai lăm bơhngol, tơgŭm kon băt dan tơdrong hơmĕng đơ̆ng kơdih tơ anih arih ling lang tơplih kơ anih teh đak dang ei ‘nâu. Mă khan kon ưh kơ ‘bôh hơđăl tơdrong kiơ ‘bơ̆t anăp măt, apĭnh Kră Yang tơgŭm kon rai pơtrơp lui gơnang kơ Ih, yak năm, păng tơnăp hăm Ih rim năr. Hơpơi kơdih tơdrong arih kon gô jing mĭnh nơ̆r kơdranh ‘lơ̆ng rŏ kơ tơdrong tơpăt tih hloh đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, đei dôm lu bơngai ưh kơ arih yua kơ kơdih kâu sư mă arih wă bơ̆jang tơdrong tơtă Kră Yang pơjao. Lu sư ưh kơ kăl kơ đei bơngai lăm teh đak ‘blŏk răk, mă lei oei đei ăn dôm tơdrong gĭt kăl ưh kơ hiong hăm kơdih tơdrong anih pơdơh, chu iŏk đon hơla, hăm tơdrong ‘mêm mơnat ‘măn kơ Kră Yang hăm đĭch đam Kră Yang. Hơpơi kơ ‘noh gô jơ̆ nơ̆r tơ’blŏk pơ’lơ̆ng kơ rim ‘nu lu bơ̆n năr ‘nâu: ưh kơ layơ jơ̆ pơhuach đĕch kơplah lu bơ̆n pơjing kơ chăl arih ling lang. Mă lei tơdrong ‘lơ̆ng rŏ hloh, tơdrong ư-ang hloh oei chang gô đĭ đăng dôm lu bơngai bu mĭnh jơhngơ̆m tơnăp kiơ̆ Kră Yang đĭ chăl arih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.